Read Navajo MATTHEW 20 Bible Online

MATTHEW 20 - Navajo bible

MATTHEW 20

¹Jó, yá'ąąshii bee bóhólníihgo bił haz'áanii, éí díí nahalin: diné léi' kéyah bił haz'ą́ągi bee bóhólníihii bich'il na'atł'o'ii bitahgóó bá nidadoolnishii ła' t'ah abínídą́ą́' yíká dah diiyá.

²Nidaalnishí éí denériyas ła'a jį́ yik'é nidaalnish doogo yił ahada'deest'ą́ą́dóó bik'ijį', bich'il na'atł'o'ii yitahjį' yi'níłnii'.

³Áádóó náhást'éigi daats'í oolkiłgo ch'ínáánádzá, nít'éé' nida'iiniih bá haz'ą́ągi náánáła' t'áadoo yaa nidaakaígóó t'óó nidaazį'go nááyiyiiłtsą́,

⁴áko áyidííniid, Nihí ałdó' nihílááh, shich'il na'atł'o'ii bitahgóó dadohkááh, áko t'áá néhébįįhígi át'éego ts'ídá t'áá ákwii át'éego nihich' į' nidi'yeeshłééł. Áko ákǫ́ǫ́ dah diikai.

⁵Áádóó ałní'ní'ą́ągo daats'í áádóó bik'ijį' táadi daats'í aleehgo ch'ínáánádzáago t'áá ákónáánádzaa.

⁶Áádóó ashdla'ígi daats'í oolkiłgo ch'ínáánádzá, nít'éé' náánáła' t'óó nináádaazį'go yik'ínáánádzá, áko ííłní, Ha' át'íishą' biniyé kwe'é shá bíighah t'áadoo baa nidaahkaígóó t'óó nidaahsį'?

⁷Nít'éé' ádahałní, Jó, diné doo ła' shá nidaałnish nihiłníi da. Áko ánéidoo'niid, Nihí ałdó' nihílááh, shich'il na'atł'o'ii bitahgóó dadohkááh [áko t'áá néhébįįhígi át'éego ts'ídá t'áá ákwii át'éego nihich'į' nidi'yoolyééł].

⁸Áádóó i'íí'ą́ągo, ch'il na'atł'o'ii bee bóhólníihii éí bik'ehgo na'anishígíí ííłní, Nidaalnishí hágo bidiní, áádóó bich'į' nidi'yíílééł, akée'di dadeeshnishígíí éí áłtsé, índa áłtsé dadeeshnishígíí éí akéédę́ę́'.

⁹Áko ashdla'ígi daats'í oolkiłgo naanish baa dadeest'ánígíí yíkaigo, t'ááłá'í nítínígo denériyas t'ááłá'í bich'į' nidahaasya'.

¹⁰Áko áłtsé dadeeshnishígíí neheeskaigo, éí aláahgo nihich'į' nidadoolyééł danízin, nít'éé' éí ałdó' t'ááłá'í nítínígo denériyas t'ááłá'í bich'į' nináádahaasya'.

¹¹Áko nídeidiinilgo kéyah bee bóhólníihii yich'į' saad dahółǫ́ǫgo,

¹²ádaaní, Díí akée'di dadeeshnishgo t'ááłáhídi ahéé'ílkidjį' nidaashnishígíí t'áá nihik'ehgo bich'į' nida'iisya', nidi nihí t'éiyá shá bíighah hadoh bééda'ii'níihgo dayíníilníishgo i'íí'ą́.

¹³Áko ła' yich'į' haadzíi'go áyidííniid, Kwá'ásiní, da' doósh ákǫ́ǫ́ ániishłaa da? Shą́ą́', denériyas t'ááłá'ígo bee aha'di'niit'ą́ą ni'.

¹⁴Éí bąą yisíníłbánígíí nídii'aahgo nílááh yínááł; díí akée'diígíí t'áá nigi át'éego bich'į' ni'deeshłééłjí nisin.

¹⁵Da' shinaalye'éésh doo t'áá shí nisinígi ádeeshłíiłgo bee shá haz'ą́ą da? Da' shił hadlee'ígíísh biniinaa iiníłch'į́į́d?

¹⁶Éí bąą da'akéédę́'ígíí éí da'alą́ąjį' doo, índa da'alą́ąjį'ígíí éí da'akéédę́ę' doo. [Háálá lą'í bíká ádahodoo'niid, nidi t'áá díkwíí nídahaasdláá'.]

¹⁷Nít'éé' Jesus éí Jerúsalem góde joogáałgo, naakits'áadahgo hódahooł'aahígíí bił ats'ádzískai, áko jookahgóó ábizhdííniid,

¹⁸Jó'akon, Jerúsalem góde deekai, áko Diné Silį́į'ii aláahgo nááda'iiłniihii índa bee haz'áanii yínda'niłtinii baa hodi'doot'ááł, áádóó éí hodi'yoolyéełjį' há nidahodoo'ááł,

¹⁹índa doo Jew dine'é danilíinii yaa dahodidoo'ááł, áko éí há nidahodoołt'ih áádóó nahóda'doołtsxis índa tsin ałnáoszid bikáa'jį' hoł ida'doołkał, índa tágí jį́ aleeh góne' dadziztsą́ą́dę́ę́' nááhodi'doodlááł.

²⁰Nít'éé' Zébedii biye'ké bimá yił haa yíkaigo t'áadoo le'é yíídóokił biniyé Jesus yich'į' nitsidinígo'.

²¹Áko Jesus áhodííniid, Ha'át'íishą' nínízin? Nít'éé' ábijiní, Díí shiyáázh nidilt'éego bee nóhólníihgo bił haz'áanii biyi'di, ła' ninish'náájí dah sidáa doogo índa ła' éí ninishtł'ají dah sidáa doogo bee bá handziih.

²²Nidi Jesus haadzíi'go ashiiké áyidííniid, Yínóhkeedígíí doo nihił bééhózingóó ádóhní. Deeshdlį́įłgo sheíkáanii daats'í doohdlį́įłgo bínooł'ą́? [Áádóó bee shidi'doolzįhii daats'í bee nihidi'doolzįhgo bínooł'ą́?] Áko, Bíniil'ą́ą́ lą́ą, hodííniid.

²³Áko ábijiní, Sheíkáanii lá t'áá aaníí doohdlį́į́ł ni, [áádóó bee shidi'doolzįhii lá bee nihidi'doolzįh ni,] nidi ła' shinish'náájí áádóó ła' shinishtł'ají dah soodáa dooleełígíí shí a'dideesh'áałgo doo bee shóhólníih da, nidi shiTaa' há hasht'eyiilaaígíí éí yee a'didoo'ááł.

²⁴Áko neeznált'éhígíí éí deidiizts'ą́ą'go, t'áá ła' háá'ázhígíí yich'į' doo bił dahóózhǫǫd da.

²⁵Nidi t'áá ádzíłtso Jesus hágo hodííniidgo áháłní, Nihił béédahózingo doo Jew dine'é danilíinii bindanit'a'í ayóogo ádídahólníihgo yindant'áa łeh, áko bitahgóó t'áá bí bidine'é ayóó ádaat'éii ída'niłkadgo bee bídahólnííh.

²⁶Nidi nihí nihitahgóó éí doo ákót'ée da dooleeł, nidi t'áá háiida nihitahgóó ayóó át'éii deeshłeeł jinízinígíí éí nihá nijil'a' doo,

²⁷áádóó t'áá háiida nihitahgóó shí alą́ąjį' dooleeł jinízinígíí éí nihinaalte' jílį́į doo:

²⁸t'áá Diné Silį́į'ii doo bá na'al'a' da, nidi á naal'a' doo, índa be'iina' ninéidiní'ą́ągo daaztsánígíí yee lą'í ninéidiyoołnih yiniyé níyá.

²⁹Áko Jérikodóó ch'íjíkaigo, diné ayóó át'é yíl'áhígíí hakéé' dah nídiizą́.

³⁰Áádóó jó'akon, diné naaki doo oo'į́į́góó atiin bąąhgi sikéé lá, áko aadę́ę́' Jesus yigááł ha'níigo yidiizts'ą́ą'go kóníigo hadoolghaazh, Bóhólníihii, David biYe' nílíinii, nihaa jiiníbaah!

³¹Áko diné yíl'áhígíí, T'áadoo ádóhníní, dahałníigo hach'adahashké, nidi t'óó nówehda hanáázhdoolghaazhgo ájíní, Bóhólníihii, David biYe' nílíinii, nihaa jiiníbaah!

³²Áko Jesus t'áá ákǫ́ǫ́ yiizį'go, hágo hodííniidgo áháłní, Ha'át'íí nihá baa nideeshaał shíínóh'ní?

³³Áko ábijiní, Bóhólníihii, nihináá' bee iit'į́įgo ánihílééh.

³⁴Áko Jesus haa a'ááh niizį́į'go hanáá' yideelchid, áko t'áá áko ajoo'į́ dzizlį́į́', áádóó bikéé' dashdii'áázh.