Read Navajo MATTHEW 21 Bible Online

MATTHEW 21 - Navajo bible

MATTHEW 21

¹Nít'éé' Jerúsalem t'áá áyídídę́ę́' bich'į' jookahgo Dził Álivz bíighahgi Béthfajii kin sinilígi jíkai, ákohgo hódahooł'aahii nidilt'éego ajííł'a',

²kóbijiníigo, Nihílááh, náwónaanídi nihidááhjí kin sinilíjį' doh'aash, t'áá áko ákwii télii ła' biyázhí bił dahaastł'ǫ́ǫgo bik'ídooh'ash; éí k'e'dooh'ałgo shaa nídooh'ish.

³Áko t'áá háiida ha'át'íhída nihidííniidgo, Jó, Bóhólníihii choidooł'įįł, didoohniił, áko t'áá áko áádę́ę́' nihił yi'doołnih.

⁴Díí kóhóót'įįdígíí Diyin God yá halne'ii kóníigo yee haadzíi'ii bohodoolnííł biniyé ádzaa:

⁵Záíyan bich'é'é bił dahołne', Jó'akon, Aláahgo niNanit'a'í nilíinii a'ohgo í'dólzingo télii, Jó, éí télii yázhí yik'i dah sidáago nich'į' bił yigááł.

⁶Áko hódahooł'aahii dah dii'áazhgo Jesus t'áá áhodííniidígi ádziidzaa,

⁷áko télii índa biyázhí bił názh'ní'eezhgo habeeldléí bikáa'jį' adadziiznil, áádóó Jesus éí télii yázhí yik'i dah neezdá.

⁸Áko diné lą'í dabibeeldléí atiingóó há dayíłkaad, náánáła' éí tsin bi'iil dayiizhgizhgo atiingóó há dayíłjeeh.

⁹Áko halą́ąjį' índa hakéédę́ę́' nooyéłígíí dadilwoshgo ádaaní, David biYe' nilíinii baa ha'niih doo! Bóhólníihii bízhi' bee bi'dójíigo yigáłígíí bik'ihojidlíi doo! Aghánáhóó'áádę́ę́' baa ha'niih doo!

¹⁰Áko Jerúsalem góne' ajííyáago t'áá át'éé nít'éé' hahodíídláád, Díishą' háí át'į́, ha'níigo.

¹¹Áko hoł nooyéłígíí ádadííniid, Díí Jesus, Diyin God yá halne'ii, Gáliliidi Názareth hoolyéédóó át'į́.

¹²Nít'éé' Jesus éí Diyin God bikin bii' sohodizin bił haz'ą́ą́ góne' yah ajííyáago, ákóne' baa nida'iiniihígíí índa nida'iiłniihígíí ch'ízhniníłkaad, áádóó bikáa'gi béeso ałghááda'a'nilii índa hasbídí baa nidahaniihii yikáá' dah naazdáhígíí naa'adziistł'ííd.

¹³Áko ábijiní, Jó, bee ak'e'ashchį́, Shikin éí kin bii' sohodizin wolyée doo, nít'éé' nihí aghada'ii'níiłii be'a'áán ádaahłaa lá.

¹⁴Nít'éé' diné doo da'oo'ínígíí índa nida'niłhodígíí kin bii' sohodizin bił haz'ą́ągi haa haaskaigo, náádahizhdiyiisá.

¹⁵Nidi aláahgo nááda'iiłniihii índa bee haz'áanii yínda'niłtinii éí ádahooníiłii ayóó ádaat'éii baa nijiyáhígíí, áádóó kin bii' sohodizin bił haz'ą́ą́ góne' áłchíní, David biYe' nilíinii baa ha'niih doo! daaníigo dadilwoshgo dayiiłtsą́ągo doo bił dahóózhǫǫd da,

¹⁶áko Jesus ádeidííniid, Díí ádaanínígíísh dints'a'? Áko Jesus áhodííniid, Aoo', da' kóhá'nínígíísh t'ah doo dayínółta' da? Áłchíní yázhí índa awéé' t'ahdii da'ałt'o'ii aa ha'niih t'áá ákogi át'éii yee yádaałti'go íinilaa.

¹⁷Áko bits'ą́ą́' dashdiiyáago kin haal'áádóó ch'ízhníyá, áko Béthaniidi jiníyáago ákwii hwiiską́.

¹⁸Áádóó abínígo kin haal'áágóó níjoodáałgo dichin dzizlį́į́'.

¹⁹Áko fig léi' atiin bąąhgi sikaadgo jiiłtsą́, áko baazhníyáago t'áadoo bąąh hólónígóó t'áá hazhó'ó bit'ąą' t'éiyá bąąh hólǫ́ǫgo jiiłtsą́. Áko ábizhdííniid, Kodóó hool'áágóó ts'ídá t'ááká nineest'ą' nąąh hóle' yíila'! T'áá áko fig sikaadii niiłna'.

²⁰Áko hódahooł'aahii éí dayiiłtsą́ągo t'óó bił adahayóigo ádaaní, Haa lá yit'éego fig sikaadii tsxį́įłgo niiłna'?

²¹Áko Jesus hanáánáádzíi'go áhodííniid, T'áá aaníí ánihidishní, T'áadoo nihił naaki danilíní da'iinohdlą́ągo, t'áá díí fig sikaadii áshłaaígi át'éii doo t'éí baa nidaahkai da doo, nidi azhą́ díí dził, Dah ni'doot'aahgo tónteel biyi' góne' andi'yólghan, bidooniid nidi, ákódoonííł.

²²Áko da'iinohdlą́ągo t'áá ha'át'íhída dayínóhkeedgo sodadołzingo, éí nihaa dahalyée doo.

²³Nít'éé' kin bii' sohodizin bił haz'ání góne' yah ajííyáago, diné nazhnitingo aláahgo nááda'iiłniihii índa diné yá aląąjį' naazíinii haa yíkaigo ádaaní, Ha'át'íí bee óhólnííh shį́įshą' bik'ehgo díidí baa naniná, áádóó háishą' díí bee óhólnííh neidiní'ą́?

²⁴Áko Jesus hach'į' hanáádzíi'go áhodííniid, Shí ałdó' łahgo nanihídídéeshkił, áko éí bee shił dahoołne' ládą́ą́', shí ałdó' bee óhólnííh bik'ehgo díí baa naasháhígíí bee nihił hodeeshnih.

²⁵John lá háádę́ę́' bee óhólníihii bik'ehgo tó bee adzisį́į́h nít'éé'? Yá'ąąshdę́ę́' daats'í, éí doodaléi' diné bits'ą́ą́dóó daats'í? Áko yaa nídaat'į́įgo ádaaní, Yá'ąąshdę́ę́' dadii'niidgo la', ánihididooniił, Ákoshą' haa yit'éego doo dahwiisoohdląąd da?

²⁶Doodaii', Diné bits'ą́ą́dóó, dadii'niidgo la', diné yíl'áhígíí béédeiildzid, háálá éí t'áá ałtso John yę́ę Diyin God yá halne'ii nilį́į́ nít'éé' dayó'ní.

²⁷Áko Jesus yich'į' hadaasdzíi'go ádaaní, Doo nihił béédahózin da. Áko Jesus áhodííniid, Shí ałdó' bee óhólnííh bik'ehgo díidí baa naasháhígíí doo bee nihił hodeeshnih da.

²⁸Nidi díí haash yit'éego baa nitsídaahkees? Diné léi' biye' naaki, áko alą́ąjį' naagháhígíí yaa níyáago áyidííniid, Shiye', nílááh díí jį́ shich'il na'atł'o'ii bitahgi nidíílnish.

²⁹Nít'éé' biye' ání, Doo ádeeshníił da, nidi áádóó bik'ijį' łahgo át'éego yąąh tsíńdeezkéezgo ákǫ́ǫ́ dah diiyá.

³⁰Áádóó akéédę́ę́' naagháhígíí yaa náánádzáago t'áá ákót'éego yich'į' hanáánáádzíí', áko nít'éé', Deeshááł, shizhé'é, dííniid, nidi t'áadoo ákǫ́ǫ́ deeyáa da.

³¹Díí naakigoshą' háidíígíí bizhé'é íinízinígíí yi'iilaa? Áko ádaaní, Áłtséhígíí lą́ą. Jesus áháłní, T'áá aaníígóó ánihidishní, Tax nahalyéhígíí yiniyé naazdáii áádóó da'ałjiłnii éí Diyin God bee bóhólníihgo bił haz'áanii t'áá nihí átsé yiih hikááh.

³²Háálá John yę́ę ts'ídá t'áá ákogi é'ét'é bił nahazt'i'ii yił nihaa níyáa nidi, t'áadoo deisoohdląąd da, nidi tax nahalyéhígíí yiniyé naazdáii áádóó da'ałjiłnii daboosdląąd, áádóó azhą́ hadasidooł'į́į́'dóó bik'ijį' nidi, t'áadoo łahgo át'éego bąąh nitsíńdasookéezgo deisoohdląąd da.

³³Hane' bee ak'idi'dootį́įłii náánáła' dadoohts'į́į́h. Diné ła' kéyah bee bóhólníihii jílį́įgo, ch'il na'atł'o'ii k'izhdííláago tsé binaa ahénátł'ingo ájiilaa, áádóó ákwii ch'il na'atł'o'ii yiljizh dooleełgi hahodziiznil, índa bikáá'dóó ha'alzídí hajíítł'ingo nízaadgóó yaa'áago ájiilaa, áko ch'il na'atł'o'ii yaa ádahalyą́ą dooleełii baa dzisįįdgo náánáła' kéyahgóó ajííyá.

³⁴Áko k'adę́ę da'nit'ą́ągo, há nidaal'a'í ła' daneest'ánígíí ła' há nídeidoojih biniyé ch'il na'atł'o'ii yaa ádahalyánígíí bich'į' adziis'a'.

³⁵Nít'éé' ch'il na'atł'o'ii yaa ádahalyánígíí há nidaal'a'í deisiłgo, ła' nídeineesxaal, ła' éí dayiisxį́, índa náánáła' éí yił nidadzisne'.

³⁶Áko náá'áłdó' nááná ła' há nidaal'a'í áłtséédą́'ígíí t'ah bilááh ánéelą́ą'go ákǫ́ǫ́ anáádziis'a', áko éí ałdó' t'áá ákónáádayiidlaa.

³⁷Áádóó éí bik'ijį' índa, Shiye'jígo bił danilį́į dooleeł, jiníigo bich'į' haye' ajííł'a'.

³⁸Nidi ch'il na'atł'o'ii yaa ádahalyánígíí haye' dayiił tsą́ągo áda'ahidoo'niid, Díí ch'il na'atł'o'ii bíí' dooleełígíí át'į́į́ lá; sołtį', dadiyiilyééł, áko bíí' dooleeł yę́ę nihíí' dadooleeł.

³⁹Áko dahasiłgo ch'il na'atł'o'ii bitahdóó ch'ídahwiisxango dahwiisxį́.

⁴⁰Áko ch'il na'atł'o'ii bee hóhólníhígíí jiníyáago, ch'il na'atł'o'ii yaa ádahalyánígíí lá haazhdoolííł lá?

⁴¹Áko diné ádahodííniid, Éí diné doo ádadiilkóhígíí bik'e'íyée'ii yee neidoołtsił, áko ch'il na'atł'o'ii éí náánáła' yaa ádahalyą́ą dooleełii yaa néidoosįįł, áko éí da'nit'ą́ąjį' anáhwiilzhíishgo ch'il na'atł'o'ii bineest'ą' baa nídayiigéeh doo.

⁴²Nít'éé' Jesus áháłní, Da' kót'éego Diyin God bizaad bee ak'eda'ashchínígíísh biyi' t'ah doo dayínółta' da? Kin ádeił'íní tsé doo deiniizį́'ígíí, t'áá éí tsé bee naaná'ástł'inii silį́į́'; díidí Bóhólníihii áát'įįdígíí át'é, áko daníil'į́įgo bik'ee t'óó nihił adahayóí.

⁴³Éí bąą ánihidishní, Diyin God bee bóhólníihgo bił haz'áanii nihighadidoot'ááł, índa náánáła' dine'é éí bits'ą́ą́dóó aneest'ą' nídahoodleeł doo biniyé baa didoot'ááł.

⁴⁴[Áádóó t'áá háiida díí tsé bik'ijį' ajíígo'ígíí nihizhdooltǫǫł, nidi t'áá háiida hak'ijį' naalts'idígíí ch'íhodoołk'ááł.]

⁴⁵Áko aláahgo nááda'iiłniihii índa Férisii danilíinii hane' bee ak'idi'dootį́įłii bee hadziisdzí'ígíí deidiizts'ą́ą'go, éí binahjį' bí baa níjít'į́įgo bił béédahoozin.

⁴⁶Nidi hodi'dooltsoł ch'ééh daniizį́į́', diné yíl'áhígíí yéédaaldzidgo biniinaa, háálá Diyin God yá halne'ii át'į́ danízin.