Read Navajo MATTHEW 24 Bible Online

MATTHEW 24 - Navajo bible

MATTHEW 24

¹Áko sohodizin bił haz'ą́ą́dóó Jesus ch'ízhníyáago joogááł, nít'éé' hódahooł'aahii, Díí sohodizin bił haz'ą́ągi kin naaznilígíí níníł'į́, dahałníigo haa yíkai.

²Nidi Jesus éí áhodííniid, Da' díísh t'áá ałtso doo daah'į́į da? T'áá aaníí ánihidishní, Kwe'é tsé doo ła' t'áá ałk'i dah si'ą́ą da dooleeł, nidi t'áá ałtso naa'ahidoolkał.

³Nít'éé' Dził Álivz binániidi jineezdáago, hódahooł'aahii kódaaníigo t'áá sáhí haa yíkai, Baa ch'íhwííní'ánígíishą' hahgo ádahodoonííł, bee nihił hólne', áádóó náádíídáłígíí, índa nihoolzhíshígíishą' ha'át'íí bee bééhózin doo?

⁴Áko Jesus hach'į' haadzíi'go áhodííniid, Ádaa ádahołyą́, áko diné doo ła' yóó'adanihidínóo'ah da.

⁵Háálá lą'í, Shí Christ ásht'į́, daaníigo shízhi' yee ádadójíigo nidahidookah, áko lą'í yóó'adeidínóo'ah.

⁶Áádóó anaa' dahazlį́į'go índa anaa' dahaleeh ha'níigo baa dahane'go dadoohts'a' doo; ííshją́ą́ éí t'áadoo bik'ee nitsidaahkaaí, háálá díidí ts'ídá ádahodoonííł, nidi t'ah doo nihoogháah da doo.

⁷Háálá ał'ąą dine'é ałch'į' nídahidiibáah doo, áádóó łahgo nihokáá' bee bóhólníihgo bił haz'áanii índa nááná ła' nihokáá' bee bínááhólníihgo bił nááhást'áanii yił ałch'į' nídahidiibáah dooleeł, índa łahgóó dahodichin doo, [áádóó ach'į' nidahwii'náa doo,] áádóó ni' nídahidi'náah doo.

⁸Díidíígíí t'áá ałtso ti'hoo'nííh bee dadeezt'i'ii ádaat'é.

⁹Ákohgo até'él'į́ yaa danihidii'aah dooleeł, áádóó nidanihidoołtsił, índa shízhi' biniinaa ał'ąą dine'é t'áá ałtso nihik'ee dadiniih doo.

¹⁰Áko índa lą'í shits'ánáhidoojah, índa nináda'ahidiit'aah, áádóó ałk'ee dadi'niih doo.

¹¹Áko t'óó ádahodil'į́įgo dahalne'ii t'óó ahayóí dahodooleełgo lą'í yóó'adeidínóo'ah.

¹²Áko bąąhági át'éii k'ee'ąą deeshzhiizhígíí biniinaa diné lą'í bibee ayóó'ó'ó'ni' dadínóok'as.

¹³Nidi t'áá háiida t'áá nihoníyáajį' ha'ólnínígíí éí yisdádooltééł.

¹⁴Áádóó yá'ąąshii bee bóhólníihgo bił haz'áanii baa Hane' Yá'át'éehii nahasdzáán nidahonees'ą́ą́góó, ał'ąą dine'é t'áá ałtso bee hwéédahodoozįįł biniyé bee hoł dahodoonih, áko áadi índa nihodoogááł.

¹⁵Éí bąą (díí t'áá jółta' shį́į́ háni' bik'izh'diitįįh) doo yildingóó ni'iiłchxǫǫhii, Daniel éí Diyin God yá halne'ii nilį́įgo yaa ch'íhoní'áanii hodiyinígi sizį́įgo deidoołtsééł.

¹⁶Áko índa Judíyagi kéédahat'ínígíí dziłjį' choda'iidooł'įįł;

¹⁷ła'da bikin bighą́ą'di naagháago, wóne'dę́ę́' t'áadoo le' é ch'íidoojih biniyé doo yah anídoolwoł da,

¹⁸áádóó ła'da dá'ák'ehgi naagháago bi'éétsoh t'ááká t'ą́ą́' yaa náolyeed lágo.

¹⁹Áko éí beiníłką́ągo dadzooltsánígíí índa awéé' dahałt'o'ígíí doo hasht'e'ígóó yínííł biishdínóodah!

²⁰Haigo, éí doodaii' háá'áyį́į́h jį́ aleeh góne' doo dadínóohchéłígíí bíká sodadołzin.

²¹Háálá ákohgo ayóó át'éego ach'į' nahwii'náa doo, nahasdzáán hazlį́į́'dóó wóshdę́ę́' díí jį́įjį' ach'į' nahwii'ná ákót'éii t'ah doo yiiltséeh da nít'éé', áádóó ts'ídá doo ákónááhodoo'níił da.

²²Índa éí yoołkáłígíí doo áłts'ísí ánályaagóogo, nihokáá' dine'é doo ła' doodzih da, nidi bitah haasdláa'ii biniinaa éí yoołkáłígíí áłts'ísí áńdoolnííł.

²³Ákohgo diné ła'da, Shoo, kǫ́ǫ́ Christ naaghá, éí doodaléi', Níláhjí naaghá, danihiłníigo t'áadoo deinohdlání.

²⁴Háálá Christ ádadil'íinii índa t'óó ádahodil'į́įgo dahalne'ii dahodooleełgo, álílee k'ehgo bee éédahózinii índa bik'ee t'óó ił ahayóigo ádahooníiłii ádeił'į́į doo, áko yídaneel'ą́ą́ ládą́ą́' Diyin God atah yiyiizlá'ígíí nidi yóó'adeidínóo'ah.

²⁵Jó'akon, díí t'ah doo ánééhdą́ą́' bee nihił hashne'.

²⁶Éí bąą, Shoo níléí honoojíidi naaghá, danihiłníigo, ákǫ́ǫ́ dadohkááh yíila', doodaii', Shoo ná'áne'ídi sidá, danihiłníigo, t'áadoo deinohdlání.

²⁷Jó, ha'a'aahjí jiilgishgo e'e'aahjį' nidi tsé'naa bee i'didla'ígi át'éego, Diné Silį́į'ii doogááł.

²⁸T'áá ha'át'íhída daaztsą́ągo sitį́įgi ákwe'é jeeshóó' áłah nilį́į doo.

²⁹Éí ach'į' nahwii'ná bił yoołkáłígíí bighá yooską́ą́dóó bik'ijį', t'áá áko jį́honaa'éí bił chahodoołhi ł, áádóó ooljéé' doo adiníłdíin da doo, índa yádiłhił biyi'dę́ę́' sǫ' nidahindéeh doo, áádóó yá'ąąshdi bee dahółdzilii dadoogał,

³⁰áko índa Diné Silį́į'ii bee bééhózinii yádiłhił biyi'di yidooltsééł, áadi índa nahasdzáán bikáa'gi ał'ąą dine'é t'áá ałtso dadoocha, índa yádiłhił biyi'dę́ę́' Diné Silį́į'ii k'os bił yildohgo áádóó bee adziil índa ayóó át'é ats'ádi'nílííd yił yigáałgo deizdoołtsééł.

³¹Áádóó dilní ayóó íits'a'go diists'ą́ą'go bidiyingo nidaal'a'í iidiyooł'aał, áko t'áá dį́į́'góó yádiłhił nidanees'ą́ą́dę́ę́' atah yiyiizláa'ii áłah ádeidoolííł.

³²Fig sikaadii binahjį' hane' bee ak'idi'dootį́įłii nihił béédahoozįįh: jó, éí bits'áoz'a' dit'ódí yileeh áádóó índa bit'ąą' néitsohgo k'adę́ę ch'ínáshį́įgo nihił béédahózin łeh.

³³Nihí ałdó' díidíígíí bidahoolníiłgo danół'į́įgo, Diné Silį́į'ii k'ad t'áá áyídídę́ę́' nihich'éédą́ą'jį' nidi bił ahoolzhiizh lá danohsingo nihił béédahózin doo.

³⁴T'áá aaníígóó ánihidishní, Díí oochíłígíí doo bił yóó'ahodoogáał da, díidí t'áá ałtso ádaadzaago índa.

³⁵Yádiłhił índa nahasdzáán bił yóó'ahodoogááł, nidi shizaad t'éiyá doo bił yóó'ahodoogáał da.

³⁶Nidi ákwii yoołkáłígíí índa oolkiłígíí diné ła'da doo hoł bééhózin da, yá'ąąshdi diyingo nidaal'a'í nidi dooda, aYe' nidi dooda, nidi shiTaa' t'éiyá bił bééhózin.

³⁷Áko Diné Silį́į'ii yígháahgo, Nóah bíyoołkááł yę́ędą́ą́' áhoot'éhígi áhoot'ée doo.

³⁸Háálá éí yoołkááł yę́ędą́ą́' t'ah doo tó yiląąhgóó Nóah tsinaa'eeł yiih yíyáajį' diné da'ayą́ áádóó da'adlą́ áádóó nida'ayeh índa ahaa daha'nííł nít'éé',

³⁹áko tó dooląąłígíí doo bił béédahózingóó tó yíląąd áádóó ábi'niiłdįįdgo índa bił béédahoozin, áko Diné Silį́į'ii yígháahgo ts'ídá ákóhoot'ée doo.

⁴⁰Ákohgo dá'ák'ehgi diné naaki naa'aash doo; ła' nídidooltééł, ła'ígíí éí t'áá ákǫ́ǫ doo.

⁴¹Asdzání naaki ak'áa doo; ła' nídidooltééł, ła'ígíí éí t'áá ákǫ́ǫ doo.

⁴²Éí bąą hada'ísídół'į́į́', háálá nihiBóhólníihii nídoodááł bijínígíí doo nihił béédahózin da.

⁴³Nidi díí nihił béédahózin, kin bee bóhólníihii ts'ídá ákohgo ani'įįhii doogáłígíí bił bééhózingo, ha'asíid doo, áko bighan doo bits'ą́ą́' wótsid át'éégóó íidoolííł.

⁴⁴Éí bąą nihí ałdó' hasht'e' áda'díínółzin, háálá Diné Silį́į'ii oolkiłígi doo nidayínóhłíi da yę́ę góne' doogááł.

⁴⁵Ákoshą' háí ba'ahódlíigo índa hóyą́ągo naal'a'í nilį́, éí binanit'a'í bighan haz'ą́ągi nidaakaígíí t'áá ałtso t'áá áajį' anáhwiilzhíishgo yaná'áltso' doo biniyé nibiníłtį́?

⁴⁶Naal'a'í jílíinii ákójít'į́įgo hananit'a'í níyáago éí hak'ihojidlí.

⁴⁷T'áá aaníígóó ánihidishní, Hananit'a'í bee hólóonii t'áá ałtso bee hóhólníihgo nihodoołtééł.

⁴⁸Nidi naal'a'í doo yá'áshóonii t'áá bijéí biyi'ídi, Shinanit'a'í la' doo hah nádáah da, didooniił,

⁴⁹áádóó yił nidaal'a'ígíí yitaa'ałhaałgo, índa da'adláanii yił da'ayą́ągo áádóó da'adlą́ągo yaa nídidoodááł.

⁵⁰Éí naal'a'í nilíinii binanit'a'í yoołkáałii doo nayólíí góne' índa hoolzhish doo bił bééhózin góne' nídoodáałgo,

⁵¹atíbidoolííł, índa diné t'óó ádahodil'íinii yitah hodoołt'eeł; áadi diné daachxa áádóó biwoo' ahídeidiłk'ash doo.