Read Navajo MATTHEW 25 Bible Online

MATTHEW 25 - Navajo bible

MATTHEW 25

¹Ákohgo yá'ąąshii bee bóhólníihgo bił haz'áanii éí ch'ikéí neeznált'éego bee hool'iní dah deidiijaa'go iiyehii yidááhgóó eekaígíí nahalin.

²Áko nít'éé' ashdlalt'éego éí dahóyą́ą́ lá, ashdlalt'éego éí doo ádahalyą́ą da lá.

³Doo ádahalyánígíí bee hool'iní dah deidiijaa'go ak'ah iih nídoodziłígíí t'áágééd dah diikai,

⁴nidi dahóyánígíí éí bee hool'iní dah deidiijaa', índa ak'ah iih nídoodziłígíí tózis yee dah deidiijaa'.

⁵Nít'éé' iiyehii doo yíghááhgóó, t'áá ádzíłtso bił dazniizį́į'go da'jiiłhaazh.

⁶Nidi tł'é'ííłníi'go ła' hazhdoolghaazh yists'ą́ą́', Aadę́ę́' iiyehii yigááł! Nihílááh bidááh nohkááh.

⁷Áko ch'ikéí t'áá ałtso nídiijée'go bee hool'iní biih yít'i'ígíí bílátahgi hasht'e' niyída'azhgizh.

⁸Nít'éé' doo ádahalyánígíí éí dahóyánígíí ádeidííniid, Ak'ah ła' nihaa danohsííd, háálá nihibee hool'iní nihits'ą́ą́' dantséés.

⁹Nidi dahóyánígíí hadaasdzíi'go ádaaní, Ak'ah nihada'niidzíidgo doo bíighah da; doo hanii baa nidahaniihígíí bich'į' dohkáahgo t'áá nihí ádá nidahołniih da.

¹⁰Áko nidazhdi'yoołnihgóó ajookaigo, iiyehii níyá, áko hasht'e' ádazhdólzinígíí iiyehii ída'íísįįd góne' iiyehii bił yah ajookaigo dá'deelkaal.

¹¹Áádóó bik'ijį' náánáła' ch'ikéí yę́ę ałdó' yíkaigo ádaaní, Bóhólníihii, Bóhólníihii, nihá ąą ánílééh.

¹²Nidi haadzíi'go ání, T'áá aaníí ánihidishní, Doo nihéédahasin da.

¹³Éí bąą hada'ísídół'į́į́', háálá [Diné Silį́į'ii] yoołkááł áádóó oolkił góne' [doogáłígíí] doo nihił béédahózin da.

¹⁴Yá'ąąshii bee bóhólníihgo bił haz'áanii éí kót'é: diné léi' náánáła' kéyahgóó deeyáago bá nidaal'a'í hágo yidííniidgo, hanaalye'é há yaa ádahalyą́ą doo biniyé bitaazdeez'ą́,

¹⁵nít'éé' ła' béeso tálent wolyéhígíí ashdla' bazh'nínil, ła' éí tálent naaki áádóó náánáła' tálent t'ááłá'í, t'áá yídaneel'ánígíí bik'ehgo bada'dziiznilgo índa dashdiiyá.

¹⁶Nít'éé' tálent ashdla' ba'í'nilígíí t'áá áko naanish yee yaa nídiidzáago tálent ashdla' bá bínániidee'.

¹⁷T'áá ákót'éego ałdó' tálent naaki ba'í'nilígíí tálent naaki bá bínániidee'.

¹⁸Nidi tálent t'ááłá'í ba'ít'ánígíí éí dah diiyáago hahwiizgeedgo, ákóyaa binanit'a'í bibéeso łeeh yiyíí'ą́ągo néidees'į́į́'.

¹⁹Nít'éé' nízaad nihoolzhiizhgo éí nidaal'a'í binanit'a'í nádzá, áko bich'į' ninádazhdoodlééł biniyé béeso hada'iisnilii bił dajííłta'.

²⁰Áko tálent ashdla' ba'í'nilígíí yich'į' niníyáago, tálent ashdla' bá bínániidee'ígíí yiníjaa'go kóní, Shinanit'a'í, tálent ashdla' sha'íínínil ni'; éí tálent ashdla' shá bínániidee'ígíí kǫ́ǫ́ níjaa'.

²¹Áko hananit'a'í áhodííniid, Yá'át'éhígi íinidzaa, yá'át'éehgo índa ba'ahódlíigo naal'a'í nílíinii; t'įįhdígo bee na'ahoosdli'ígíí yá'át'éehgo ninaanish silį́į́', k'ad éí lą'í bee nóhólníihgo ándeeshłííł; ninanit'a'í yaa bił hózhóonii bee ná'íldįįh doo.

²²Áádóó tálent naaki ba'í'nilígíí ałdó' níyáago ádííniid, Shinanit'a'í, tálent naaki sha'íínínil ni'; éí tálent naaki shá bínániidee'ígíí kǫ́ǫ́ níjaa'.

²³Áko hananit'a'í áhodííniid, Yá'át'éhígi íinidzaa, yá'át'éehgo índa ba'ahódlíigo naal'a'í nílíinii; t'įįhdígo bee na'ahoosdli'ígíí yá'át'éehgo ninaanish silį́į́', k'ad éí lą'í bee nóhólníihgo ándeeshłííł; ninanit'a'í yaa bił hózhóonii bee ná'íldįįh doo.

²⁴Áádóó tálent t'ááłá'í ba'ít'ánígíí ałdó' níyáago ádííniid, Shinanit'a'í, nééhasingo diné hashkéii nílį́, háálá t'áadoo k'éé'dídléehgi ná'ígish, áádóó t'áadoo ná'oołch'ihgi hééł áná'iil'įįh,

²⁵áko ninásdzidgo bąą dah diiyáago tálent t'ááłá'í sha'ííní'áanii łeeh yí'ą́ągo nídéł'į́į́'. Jó, kóoní, níí' nít'ée'ii níí' ánánídlééh.

²⁶Nidi hananit'a'í hach'į' haadzíi'go áhodííniid, Bąąhági ánít'éii índa bił hóyée'go naal'a'í nílíinii! T'áadoo k'éé'díshdléehgi ná'áshgishgo, áádóó t'áadoo ná'ooshch'ihgi hééł áná'iish'įįhgo nił bééhózin lá ya'?

²⁷Áko shibéeso éí béeso yaa ádahalyánígíí baa díínił nít'éé', áko nánísdzáago shibéeso ínáóltą'í bił shaa ná'nil dooleeł nít'éé'.

²⁸Áko tálent t'ááłá'í ba'ít'ánígíí bits'ą́ą́' nídooh'aahgo tálent neeznáá neijaahígíí baa noh'aah.

²⁹Háálá t'ááłá'í jinítínígo ha'át'íhída hwee hólónígíí biláahgo ła' haa náádoolyééł, áko lą'í hwee hólǫ́ǫ dooleeł, nidi ha'át'íhída hwee ádinígíí éí t'áá hwee hólónígíí nidi haghadoolyééł.

³⁰Áádóó naal'a'í t'áadoo yee choo'ínígíí tł'óó'dóó nówehjį' chahałheeł góne' ahołhan; áadi diné daachxa áádóó biwoo' ahídeidiłk'ash doo.

³¹Nidi Diné Silį́į'ii bits'ádi'nílíidgo índa diyingo nidaal'a'í t'áá ałtso yił yíkaigo, áadi índa bikáá'dóó nahat'áii bits' ádi'nílíidii yikáá'dóó dah dínóodaał.

³²Áádóó ał'ąą dine'é t'áá ałtso baa áłah ádoolnííł, índa na'niłkaadii bidibé éí tł'ízí yits'áyiiníłígi át'éego, éí t'ááłá'í nítínígo ałts'áidoonił,

³³áko dibé éí binish'náájígo niidoonił, tł'ízí éí binishtł'ajígo niidoonił.

³⁴Áko índa Aláahgo Naat'áanii binish'náájígo yíl'áhígíí áyididooniił, ShiTaa' nihik'ijidlíii, hágo, aláahgo bee óhólníihgo bił haz'áanii nahasdzáán niit'ą́ą́dę́ę́' nihá hasht'eelyaaígíí nihíí' ádaahłééh,

³⁵háálá dichin nishłį́įgo shada'soołtsood, dibáá' nishłį́įgo tó shaa dasooką́, dé'éyóní nishłį́įgo shił yah adasoohkai,

³⁶shi'éé' ádingo hadashidoohłaa, daastsaahgo shaa nidasinootą́ą́', awáalyaa góne' sédáago shaa dasoohkai.

³⁷Ákohgo t'áá ákogi ádaat'éii kódaaníigo hach'į' hadadoodzih, Bóhólníihii, hádą́ą'shą' dichin nílį́įgo daniiltsą́ągo nada'siiltsood, éí doodaii' dibáá' nílį́įgo tó naa dasiiką́?

³⁸Áádóó hádą́ą'shą' dé'éyóní nílį́įgo daniiltsą́ągo, nił yah adasiikai, doodaii' ni'éé' ádingo hadandiilyaa?

³⁹Áádóó hádą́ą'shą' dantsaahgo, éí doodago awáalyaa góne' sínídáago daniiltsą́ągo naa dasiikai?

⁴⁰Áádóó Aláahgo Naat'áanii hach'į' t'ą́ą́' háádoodzihgo áhodidooniił, T'áá aaníí ánihidishní, Díí shik'is ła' ts'ídá hojooba' ádaat'éii bá baa nidasoohkaígíí, éí shí shá baa nidasoohkai.

⁴¹Áádóó binishtł'ajígo jíl'áhígíí áhodidooniił, Nihí atídanihidi'doolníiłgo nihá hada'iisdzíi'ii hool'áágóó hodook'ą́ą́ł, níłch'i bida'iiníziinii binanit'a'í áádóó bá nidaal'a'í bá hasht'ehoolyaaígíí biyi'jį' shits'ánóhkááh,

⁴²háálá dichin nishłį́įgo t'áadoo shada'soołtsood da, dibáá' nishłį́įgo t'áadoo tó shaa dasooką́ą da,

⁴³dé'éyóní nishłį́įgo t'áadoo shił yah adasoohkai da, shi'éé' ádingo t'áadoo hadashidoohłaa da, daastsaahgo índa awáalyaa góne' sédáago t'áadoo shaa nidasinootą́ą' da.

⁴⁴Ákohgo éí ałdó' kódaaníigo hach'į' t'ą́ą́' háádadoodzih, Bóhólníihii, hádą́ą'shą' dichin nílį́įgo, doodaii' dibáá' nílį́įgo, doodaii' dé'éyóní nílį́įgo, doodaii' ni'éé' ádingo, doodaii' dantsaahgo, doodaii' awáalyaa góne' sínídáago daniiltsą́ągo, t'áadoo naa ádahosiilyąąd da?

⁴⁵Áádóó kóníigo hach'į' hanáádoodzihgo áhodidooniił, T'áá aaníí ánihidishní, Díidí ts'ídá hojooba' ádaat'éii t'áadoo bá baa nidasoohkaígíí, éí t'áadoo shá baa nidasoohkai da.

⁴⁶Áko díidí hool'áágóó até'él'į́ biyi'jį' dashdidookah, nidi t'áá ákogi ádaat'éii éí iiná doo ninít'i'ii yiyi'jį' dah didookah.