Read Navajo MATTHEW 26 Bible Online

MATTHEW 26 - Navajo bible

MATTHEW 26

¹Jesus díí saad ałtso yee niyáníłti'go bídahooł'aahii áyidííniid,

²Nihił béédahózingo naakiiską́ągo atis'adeesdzá bee bééhániihii baa hoolzhíísh, ákohgo tsin ałnáoszid bikáa'jį' Diné Silį́į'ii bił i'doolkałgo ninádidoot'ááł.

³Ákohgo aláahgo nááda'iiłniihii [áádóó bee haz'áanii yínda'niłtinii] índa Jew dine'é yá aląąjį' naazíinii éí aláahgo náá'iiłniihii, Kéíyafas wolyéhígíí, bighangi áłah silį́į́',

⁴áádóó t'áá nahont'inee dahwiidoołtsołgo áádóó dahodiyoołhéełgo yaa nídaast'įįd.

⁵Nidi ádadííniid, Hodílzingo áłah ná'ádleeh góne' éí dooda, háálá ákódeiidzaago diné hadahodínóołchał.

⁶Áko Béthaniigi Sáíman éí łóód ats'íís yiyáanii naałdzidii bee bąąh dah haz'ą́ą́ nít'é'ígíí bikin góne' Jesus yah ajííyáago,

⁷ákwii ajiyą́ągo asdzání léi' tsé alabáster wolyéhígíí bee tózis ályaago ak'ah t'áá íiyisí ílínígíí yee yah ayíí'ą́ągo hatsiits'iin yik'i yayiiziid.

⁸Nidi hódahooł'aahii éí dayiiłtsą́ągo, Díí lá ha'át'íí biniyé t'óó bee na'as'ne'? daaníigo yik'ee doo bił dahóózhǫǫd da.

⁹Háálá díí ak'ahígíí lą'í bą́ą́h ílį́įgoda nahidoonih nít'éé', áko éí béeso diné badahojoobá'íígíí bitaa'niih doo nít'éé'.

¹⁰Nidi Jesus bił bééhózingo áhodííniid, Ha'át'íí biniyé asdzání baa nídaaht'į́? Jó, éí nizhónígi shá ádziidzaa.

¹¹Háálá badahojoobá'íígíí t'áá áłahjį' nihitaa daakai, nidi shí éí doo t'áá áłahjį' nihitaasháa da.

¹²Díí ak'ah shits'íís bik'i yadziiziidígíí, yóó'áshidi'doolníłígíí biba' hasht'eshijiléehgo ájít'į́.

¹³T'áá aaníígóó ánihidishní, Nahasdzáán t'áá si'ą́ą́ nít'éé' bikáá'góó díí hane' yá'át'éehii baa dahane'góó, díí asdzání ádzaaígíí bee bééhániih biniyé baa hane' dooleeł.

¹⁴Ákohgo naakits'áadahígíí ła', Júdas Iskáriyat wolyéii, aláahgo nááda'iiłniihii yaa níyá,

¹⁵áko áyidííniid, Nihaa hodiní'ą́ągoshą' ha'át'íí shaa dadoohłééł? Áko béésh łigaii tádiin haa deiznil.

¹⁶Áko áádóó ha'át'éegoda ashja'iilaago nináhozhdidoo'áałgi baa nitsídzíkeesgo hodeeshzhiizh.

¹⁷Nít'éé' díík'ǫsh t'áágééd bááh ályaii hodílzingo áłah ná'ádleeh ła'a jį́ aleeh góne' ídahooł'aahii Jesus yaa yíkaigo ádaaní, Atis'adeesdzá bee bééhániihgo yidánígíí dííyį́į́ł biniyé háadishą' ná hasht'ediilnííł?

¹⁸Áko áhodííniid, Nílááh, kin haal'áajį' doh'aash, ákwe'é diné ła' ábididoohniił, Na'nitiní ání, Shá haz'ánígíí koshídę́ę́' hadziih; nighangi atis'adeesdzá bee bééhániihgo yidánígíí shídahooł'aahii bił dadeeshį́į́ł.

¹⁹Áko íhooł'aahii t'áá Jesus ádazhdooníiłii yee hoł hoolne'ígi ádadziidzaago atis'adeesdzá bee bééhániihgo dadoodį́łígíí t'áá áłdįįłt'éego áyiilaa.

²⁰Áko i'íí'ą́ągo Jesus hódahooł'aahii naakits'áadahígíí bił dazh'dooyį́į́ł biniyé jidineezbin,

²¹nít'éé' da'jiyą́ągo Jesus ázhdííniid, T'áá aaníí ánihidishní, Nihí ła' nináshididooh'ááł.

²²Áko t'ááłá'í jinítínígo t'áá íiyisí bąąh daháni'go t'áá ałkéé', Bóhólníihii, da' shíísh? dajiníigo baa nízhdiikai.

²³Áko haadzíi'go ádííniid, T'áá shił éé'é'áhígíí éí nináshididoo'ááł.

²⁴Diné Silį́į'ii t'áá bá bee ak'e'ashchínígíí bik'ehgo ábidi'doolnííł, nidi Diné Silį́į'ii ninázhdiní'ánígíí éí doo hojooba' ájíníi da! Éí dinéhígíí t'áadoo ho'dizhchį́į́jígo há yá'át'ééh nít'éé'.

²⁵Áko Júdas, nináhodee'aahígíí áhodííniid, Na'nitiní, da' shíísh? Áko Jesus áháłní, Jó, bee háínídzíí'.

²⁶Áko da'jiyą́ągo Jesus bááh néidii'ą́, áádóó yik'i sodoolzingo niyiizti', áádóó bídahooł'aahii yitaiznii'go áyidííniid, Nídahidooh'aahgo daahsą́; díí shits'íís át'é.

²⁷Áádóó doodlį́įłii néidiiką́, áko sodoolzingo yaa ahééh niizį́į́' áádóó kóníigo hainíką́, T'áá ánółtso daahdlą́,

²⁸háálá díí shidił bee aha'deet'áanii ániidíii, t'óó ahayóí bąąhági át'éii bá yóó'ahididoot'ááł biniyé bá deezna'ígíí át'é.

²⁹Nidi ánihidishní, Kodóó ch'il na'atł'o'ii bitoo' doo ła' náádeeshdlį́įł da, shiTaa' bee bóhólníihgo bił haz'áanii biyi'di índa ch'il na'atł'o' ii bitoo' ániidíii nihił náádadeeshdlį́į́ł.

³⁰Áádóó sin ła' bee dahojíítáalgo, Dził Álivzgóó dashdiikai.

³¹Áko Jesus áháłní, Díí tł'éé' t'áá ánółtso shí shiniinaa t'ą́ą́' anídínóohdah, háálá kót'éego bee ak'e'ashchį́, Na'niłkaadii atídeeshłííł, áádóó dibé nideiniłkaadii da'níłts'ą́ą́'góó taidoojah.

³²Nidi dasétsą́ą́dę́ę́' nááshi'diilzáádóó bik'ijį' Gáliliigóó nihiba' yisháał doo.

³³Nidi Peter haadzíi'go áhodííniid, Azhą́ t'áá ádzíłtso niniinaa t'ą́ą́' anázhníídee' nidi, shí t'éí ts'ídá doo t'ą́ą́' anídeeshtłish da.

³⁴Jesus áhodííniid, T'áá aaníígóó ándishní, Díí tł'éé' naa'ahóóhai biką'í t'áadoo ániihí, táadi doo hwééhasin da náshididíí'niił.

³⁵Peter áháłní, Azhą́ t'áá níighah dasétsą́ą nidi, doo hwééhasin da doo nidideeshniił da. Áko hódahooł'aahii ałdó' t'áá ałtso t'áá ákót'éego hadaasdzíí'.

³⁶Ákohgo Jesus Gethsémanii hoolyéhígi bídahooł'aahii yił yíkaigo ííłní, T'áá kwe'é nahísóotą́, shí éí t'ah wónásígóó deesháałgo áadi sodideeszįįł.

³⁷Áko Peter índa Zébedii biye' nidilt'éego bił dashdiikai, nít'éé' t'áá íiyisí yíní biih jíítłizh áádóó nitsidzídzá.

³⁸Ákohgo áhodííniid, Shii' sizíinii nitseeltłah, t'áá hoyółhéełgo, t'áá kǫ́ǫ́ nahísóotą́ągo shił hada'ísídół'į́į́'.

³⁹Áádóó t'áá áháníjį' dashdiiyáago, ákwii tsé'yaa jineeshjoolgo kójíníigo sozdoolzin, ShiTaa', bohónéedzą́ą́ ládą́ą́', díí doodlį́įłii shits'ą́ąjį' kódíílííł, ákondi shí íinisinígíí éí dooda, nidi ni íinínízinígíí ádoonííł.

⁴⁰Áko hódahooł'aahii baa nídzídzá, nít'éé' da'ałhosh lá, áko Peter ábijiní, Ha'át'íí lá! Da' t'ááłá'í ahéé'ílkidjį' nidiísh doo shił hada'ísídół'į́į́' ádanoht'ée da?

⁴¹Hada'ísídół'į́į́' áádóó sodadołzin, áko doo nihídahodínóotah da; níłch'i ii' sizíinii éí lą́ nízin, nidi ats'íís éí doo bidziil da.

⁴²Áádóó naakidi aleeh góne' anáádzoodzáago, kójíníigo sonáázdoolzin, ShiTaa', díí t'áadoo yishdlání ts'ídá doo shits'ą́ąjį' kódoolnííłgóogo, íinínízinii bohodoolnííł.

⁴³Áko haa nínáádzídzá, nít'éé' nááda'jiłhosh lá, háálá t'áá íiyisí bił ho'niighą́ą́'.

⁴⁴Áko hats'ą́ą́' dah náázdiidzáago, táadi aleeh góne' saadígíí t'áá éí bee sonáázdoolzin.

⁴⁵Ákohgo hódahooł'aahii baa nínáádzídzáago ábijiní, Da' t'ahdiísh da'ołhosh áádóó háádaałyį́į́h? Jó'akon, áajį' o'oolkid, índa Diné Silį́į'ii éí bąąhági ádaaníiłii bílák'eejį' ninádeet'ą́.

⁴⁶Nídoohjeeh, k'ad yiikah doo; jó'akon, nináshidee'aahígíí aadę́ę́' yigááł.

⁴⁷T'ahdii yájíłti'go Júdas, naakits'áadahígíí ła' nilíinii níyá, áádóó aláahgo nááda'iiłniihii índa diné yá aląąjį' naazíinii bits'ą́ą́dóó diné t'óó ahayóí diltłish índa tsihał dayíjáahgo yił haa nánízą́.

⁴⁸Áko nináhodiní'ánígíí éí yaa honíłtínígíí bee ééhózin dooleełii ła' yee yił hoolne' lá kóníigo, T'áá séts'ǫsígíí ííshją́ą́ éí bí át'į́į doo; éí deidoołtsoł.

⁴⁹T'áá áko Jesus yich'į' niníyáago, Yá'át'éhéii, Na'nitiní! hałníigo hazts'ǫs.

⁵⁰Áádóó Jesus áhodííniid, Kwá'ásiní, ha'át'íishą' biniyé kwe'é yíníyá? Áko Jesus yich'į' niikaigo deisiłgo dayiiłtsood.

⁵¹Nít'éé' jó'akon, Jesus yił naakaígíí ła' bidiltłish hayíítą́ągo aláahgo náá'iiłniihii binaalte' bijaa' na'iidiiłhaal.

⁵²Nít'éé' Jesus ábíłní, Nidiltłish iih nánítįįh, háálá t'áá diltłish bił hadajiideełígíí éí t'áá ádzíłtso diltłish bee ádazhdoodįįł.

⁵³Da' shiTaa' néideeshkąąłgo, t'áá áko diyingo nidaal'a'í tsosts'idiindóó ba'aan naakidi mííl yázhí bilááh ánéelą́ą'go shich'į' iidiyooł'aałígíísh doo baa nitsídaahkees da?

⁵⁴Nidi kót'éego áhodooníiłgoshą' Diyin God bizaad bee ak'eda'ashchínígíí haa yit'éego bohodoolnííł?

⁵⁵Áko ákwii hoolzhishgo Jesus éí diné yíl'áhígíí áyidííniid, Da' shił nidadoohdiłísh biniyé diltłish índa tsihał dayínóhjáahgo agha'ii'níiłii bich'į' oonééł nahalingo shich'į' ch'ínooná? Shą́ą́', t'áá ákwíí jį́ kin bii' sohodizin bił haz'ání góne' sédáago na'nishtin nít'éé', nidi t'áadoo dashoołtsood da.

⁵⁶Nidi Diyin God yá dahalne'ii yee ak'eda'ashchínígíí bohodoolnííł biniyé díidí t'áá ałtso k'ad áánííł. Ákohgo hódahooł'aahii t'áá ałtso hats'ą́ą́' dah diijée'go yóó'aheeswod.

⁵⁷Áádóó índa Jesus dahoołtsoodígíí Kéíyafas aláahgo náá'iiłniihii yaa dahazlóóz, áadi bee haz'áanii yínda'niłtinii índa diné yá aląąjį' naazíinii haa áłah silį́į́'.

⁵⁸Nidi Peter éí nízaadę́ę́' hakéé' yigáałgo, aláahgo náá'iiłniihii bikin binaagi haz'ą́ągo biná'ástł'iní góne' yah ííyá, áko haa hodoonííł nízingo, ákwii siláo yił naháaztą́.

⁵⁹Ákohgo aláahgo nááda'iiłniihii [áádóó diné yá aląąjį' naazíinii] índa diné ándaha'áii t'áá ałtso wooch'ííd binahjį' Jesus hodi'yoolyéłígíí ch'ééh yíkadadilts'i',

⁶⁰nidi t'áá ádin lá, azhą́ lą'í dabiyooch'íidgo dahalne'ii hadahaasdzíi' nidi. Áadi índa diné nidilt'éego t'áá ádzaagóó haa halne'go niní'áázh,

⁶¹áko áháłní, Díí diné ání, Diyin God bikin bii' sohodizin atídeeshłííł, áádóó táá' yiską́ąjį' áńdeeshdlíiłgo bíneesh'ą́, jiní.

⁶²Áádóó aláahgo náá'iiłniihii nídii'na'go áhodííniid, Da' doósh ák'ihadidíídzih da? Díí dinéshą' ha'át'íí yee naa dahalne'?

⁶³Nidi Jesus t'áadoo ák'ihazdoodzíi' da. Nít'éé' aláahgo náá'iiłniihii ánááhodoo'niid, Diyin God hináanii binahjį' ándishní, Christ, Diyin God biYe' daats'í nílínígíí bee nihił hólne'.

⁶⁴Nít'éé' Jesus áháłní, Jó, bee háínídzíí'. Nidi ándishní, Diné Silį́į' ii éí Aláahgo Bidziilii yinish'náájí dah sidáago, índa yádiłhił biyi'dę́ę́' k'os bił yildohgo deidoołtsééł.

⁶⁵Nít'éé' aláahgo náá'iiłniihii ák'ina'ooldláadgo ání, Diyin God baa'ihgo bá hadzoodzíí'. Ha'át'íishą' biniyé ła' ch'ínáádahót'aah doo? Jó, k'ad Diyin God baa'ihgo bá hadzoodzíi'go dahosidoots'ą́ą́'.

⁶⁶Éí haash yit'éego baa nitsídaahkees? Nít'éé', Hodiyoolyééł lą́ą, dadííniid.

⁶⁷Ákohgo hanii'jį' yik'ídahidizheeh, áádóó nídahoniłts'in, índa ła' yéego ninádahodiika'go,

⁶⁸ádaaní, Christ nílíinii, Diyin God yá halne'ii nílį́įgo háí nándííłts'in, bee nihił hólne'.

⁶⁹Áko Peter tł'óo'di kin binaagi haz'ą́ągo biná'ástł'iní góne' dzizdá. Nít'éé' asdzání naal'a'í kóníigo hach'į' niníyá, Ni la' ałdó' Jesus Gáliliidóóígíí bił nanikai ni'.

⁷⁰Nidi t'áá ałtso dabinááł dooda jidííniid, Baa yáníłti'ígíí doo shił bééhózin da, jiníigo.

⁷¹Áko ch'é'étiin haz'áníjį' ch'ízhníyáago náánáła' asdzání naal'a'í nááhoołtsą́, áko ákǫ́ǫ́ naazínígíí ííłní, Díí diné ałdó' Jesus Názarethdóóígíí yił naakai ni'.

⁷²Áko dooda náázhdoo'niid, Éí dinéhígíí doo bééhasin da, jiníigo bee ádee hadzoodzíí'.

⁷³Áádóó t'óó nááhodoo'na'go, ákǫ́ǫ́ naazínígíí Peter yaa yíkaigo ánáádeidoo'niid, T'áá aaníí ni ałdó' éí ła' ánít'į́, jó, nizaadígíí bee nééhózin.

⁷⁴Áko ádił ni'jít'įįhgo ádee hanáázdoodzíí', Éí dinéhígíí doo bééhasin da. T'áá áko naa'ahóóhai biką'í ádííniid.

⁷⁵Áko Peter éí Jesus, Naa'ahóóhai biką'í t'áadoo ániihí táadi doo hwééhasin da shididííniił, hodííniidii bééjoolnii'. Áko ch'ízhníyáago aníjíchago jíícha.