Read Navajo MATTHEW 27 Bible Online

MATTHEW 27 - Navajo bible

MATTHEW 27

¹Abínígo aláahgo nááda'iiłniihii índa diné yá aląąjį' naazíinii Jesus deidiyoołhéełgo yaa nídaast'įįd,

²áko hweda'aztł'ǫ́ǫgo dah dahodiilóóz, áádóó [Pántiyas] Páílat naat'áanii nilíinii yaa dahodeez'ą́.

³Júdas, nináhodiní'ánígíí há nihoot'ą́ągo bił bééhoozingo, yąąh bíni' yíi'a', áko béésh łigaii tádiinígíí aláahgo nááda'iiłniihii índa diné yá aląąjį' naazíinii yaa néí'nil,

⁴kóníigo, Diné t'áadoo ádąąh dah hast'áanii bidił bits'ádoonahgo ninádiní'ą́ągo bąąhági ásdzaa. Nidi ádahodííniid, Nihíísh nihik'ehdi, t'áá ni haa shį́į́ yit'éego ánílééh.

⁵Nít'éé' kin bii' sohodizin góne' éí béeso yah ayííłkaadgo dah diiyá, áádóó éí t'áá yigáłí dah ádiidlo'.

⁶Aláahgo nááda'iiłniihii éí béeso nídeidiinilgo ádadííniid, Díí béeso dił bik'é nii'nilígíí bąą kin bii' sohodizin bibéeso bitah doo'niłgo doo bee haz'ą́ą da.

⁷Áko yaa nídaast'įįdgo, łeets'aa' íí ł'íní bił haz'ání hoolyéegi éí dé'éyóní danilíinii łeehe'níił dooleełgo biniyé kéyah nidayiisnii'.

⁸Éí bąą éí kéyah dííshjį́į́góó Kéyah Diłii hoolyé.

⁹Ákohgo Jeremáíyah, Diyin God yá halne'ii, kóníigo yee haadzíi'ii bohoolyaa, Áádóó béésh łigaii tádiingo hak'énii'nilii éí Ízrel dine'é nídeidiinil,

¹⁰áko Bóhólníihii áshidííniid yę́ęgi át'éego łeets'aa' ííł'íní bił haz'ání hoolyéegi yik'é nideiznil.

¹¹Áádóó nít'éé' Jesus éí naat'áanii bidááhdę́ę́' nizhníyáago nahódééłkidgo ání, Da' niísh Jew dine'é Aláahgo biNanit'a'í nílį́? Áko Jesus áhodííniid, Jó, bee háínídzíí'.

¹²Índa aláahgo nááda'iiłniihii áádóó diné yá aląąjį' naazíinii hak'i dahodii'aahgo, t'áadoo hadzoodzíi' da.

¹³Nít'éé' Páílat áháłní, Daa shį́į́ néelą́ą́' yee nik'i dahodii'aahígíísh doo dints'a' da?

¹⁴Nidi t'áadoo bich'į' hanáádzoodzíi' da, bee hak'i hodiit'aahii t'ááłá'í nidi t'áadoo baa nídzíst'įįd da, áko éidíígíí bik'ee naat'áanii t'áá íiyisí t'óó bił ahayóí.

¹⁵Hodílzingo áłah ná'ádleeh góne' naat'áanii éí diné áłah nádleehígíí awáalyaaí t'ááłá'ígo t'áá deinízinígíí yá ch'ééyiiłt'e' łeh.

¹⁶Íídą́ą́' diné léi' Barábas wolyéego, t'áá íiyisí béého'dílzinii awáalyaaí nilį́.

¹⁷Áko áłah dzizlį́į'go Páílat áhodííniid, Háishą' nihá béédíshchííd, Barábas daats'í, éí doodaii' Jesus éí Christ wolyéhígíí daats'í?

¹⁸Háálá ooch'į́į́d biniinaa Jesus haa deideez'ą́ągo hoł bééhózin.

¹⁹Áádóó bikáá'dóó ánihwiit'aahii bikáá'dóó dah dzizdáago, hwe'asdzą́ą́ haa níł'a'go ání, Eii diné t'áá ákogi át'éii ts'ídá t'áadoo baa nánít'íní, háálá abínídą́ą́' biidiiyeelgo yéego bik'ee ti'hwiisénii'.

²⁰Áádóó aláahgo nááda'iiłniihii índa diné yá aląąjį' naazíinii diné áłah nilínígíí yídeinił kadgo, Barábas dayídóohkił, áádóó Jesus éí diyoolyééł dadidoohniił, deidííniid.

²¹Nidi naat'áanii hanáánáádzíi'go áhodííniid, Diné naakiígíí háidíígíishą' nihá béédíshchííd? Nít'éé', Barábas lą́ą, dadííniid.

²²Páílat ánááhodoo'niid, Ákoshą' Jesus éí Christ wolyéhígíí haa deeshłííł? Áko t'áá ałtso ádadííniid, Bíni'dii tsin ałnáoszid bikáa'jį' bił e'elkaałgo daatsxaah.

²³Áko ábizhdííniid, Ha'át'éegoshą'? Ha'át'íí doo aaníí shį́įshą' yaa naayá? Nidi t'ah yówehígo hanáádadeeshghaazhgo ádaaní, Bíni'dii tsin ałnáoszid bikáa'jį' bił e'elkaałgo daatsxaah!

²⁴Áko Páílat t'áadoo biniyéhígóó ájít'į́įgo, nidi t'óó hahodidlaadgo jiiłtsą́ągo, tó nízhdiiką́ áádóó kójíníigo áłah ílínígíí binááł hála' táádzízgiz, Díí diné ts'ídá t'áá ákogi át'éii bidił doo bá naashtłizh da; t'áá nihí bá nanohdeeh doo.

²⁵Áádóó diné t'áá ałtso hadaasdzíi'go ádadííniid, Nihí lá bidił bá naniideeh ni, niha'áłchíní t'áá bił.

²⁶Áko Barábas bá ch'éézhníłt'e', nidi Jesus éí hazaad k'ehgo nibí'íltsxasgo tsin ałnáoszid bikáa'jį' bił i'doolkał biniyé baazhdiní'ą́.

²⁷Ákohgo naat'áanii bikin góne' Jesus yah adeizlóozgo naat'áanii bisiláo t'áá yinélee haa áłah ádayiilaa.

²⁸Áko ha'éé' haa deidiinilgo éénééz tsídídééh nahalingo łichíí' léi' yiih dahastį́,

²⁹áádóó ch'il hooshahii nídeiniisxodgo ch'ah ádayiilaago hak'i deideez'ą́, índa lók'aatsoh nish'náájí hálák'ee deiztą́. Áádóó hadááhdę́ę́' nitséédadigohgo kódaaníigo há nidahałt'i', Yá'át'éhéii, Jew dine'é Aláahgo biNanit'a'í nílíinii!

³⁰Áádóó hak'ídahidizheeh, áádóó éí lók'aatsoh yee hatsiits'iin nínádeidiiłhał.

³¹Índa há nidahast'i'dóó bik'ijį' éí éénééz haa nídeidiiłtsoozgo, t'áá hó ha'éé' yee háádahodiidlaa, áádóó tsin ałnáoszid bikáa'jį' hoł ada'doołkał biniyé dah dahodiilóóz.

³²Áko ch'ínínáago, Sairíinii hoolyéédę́ę́' diné léi' Sáíman wolyéego yik'ékai; éí Jesus bá tsin ałnáoszid yootį́įł doo biniyé áajį' adeineeshchxą́ą́'.

³³Áko Gálgatha hoolyéegi yíkaigo éí tsiits'in si'ání jiníigo óolyé,

³⁴wáin atł'izh nahalingo dích'íi'ii bił ałtahgo jidoodlį́į́ł biniyé haa deizką́, áko dzizlįhgo, t'áadoo joodlą́ą' da.

³⁵Áádóó tsin ałnáoszid bikáa'jį' hoł ada'askaalgo, ha'éé' biniyé yáá'iilt'e' yaa naaskaigo ałtaadeis'nii'. [Diyin God yá halne'ii kóníigo, Shi'éé' ałtaadeis'nii', índa shi'é'ígíí yiniyé yáá'iilt'e' yaa naaskai, nínígíí bohodoolnííł biniyé ákódzaa.]

³⁶Áádóó t'áá ákǫ́ǫ́ naháaztą́ągo haa ádahalyą́.

³⁷Yee hak'i dahodii'ánígíí éí bee ak'e'ashchį́įgo hak'igi dah deiztą́ kóníigo, Díí Jesus, Jew dine'é Aláahgo biNanit'a'í nilį́.

³⁸Áádóó ani'įįhii nidilt'éego ałdó' t'áá ał'ąą tsin ałnáoszid bikáa'jį' bił ada'askaal, ła' éí honish'náájí dah hidiilt'e', ła' éí honishtł'ají.

³⁹Áko hwíighah dahidikáhígíí há nidahałt'i'go bitsiits'iin deiłne'go

⁴⁰ádaaní, Kin bii' sohodizin tídeeshłííł áádóó táá' yiską́ąjį' áńdeeshdlííł, dííníniid ni', haa'íshą' yisdá'ádílteeh! Diyin God biYe' nílį́įgo, tsin ałnáoszid bąąhdę́ę́' hadááńdááh.

⁴¹T'áá ákót'éego ałdó' aláahgo nááda'iiłniihii áádóó bee haz'áanii yínda'niłtinii índa diné yá aląąjį' naazíinii há nidahałt'i'go ádadííniid,

⁴²Náánáła' yisdáńdziiznil nidi, t'áá hó t'éí doo yisdá'ázhdóltééł át'ée da. Jó, Ízrel Aláahgo biNanit'a'í jílį́įgo háni'dii k'ad tsin ałnáoszid bąąhdę́ę́' hadajighááh, áko índa dahwiidiidląąłgo haa dadzííníidlíi doo.

⁴³Diyin God beijólí; t'áá aaníí honízin ládą́ą́' háni'dii k'ad yisdáháłteeh, háálá, Diyin God biYe' nishłį́, jiní.

⁴⁴Ani'įįhii tsin ałnáoszid bąąhjį' hoł, bił ada'askaalígíí ałdó' t'áá ákót'éego hóó'įįd.

⁴⁵Nít'éé' ałní'ní'ą́ą́dóó táadi ahéé'ílkidjį' t'áá át'éé nít'éé' chahóółhéél.

⁴⁶Áko tá'ígi daats'í oolkiłgo Jesus yéego hadoolghaazhgo ání, Éílii, Éílii lama sabákthanii? éí, ShiDiyin God, shiDiyin God, ha'át'éegoshą' yóó'ashidííní'ą́? jiníigo óolyé.

⁴⁷Áko ła' ákǫ́ǫ́ naazínígíí éí deidiizts'ą́ą'go, Díí diné Iiláíjah yíká ání, dadííniid.

⁴⁸T'áá áko ła' dah diilwodgo, tó náyiits'ǫsígíí ch'il na'atł'o'ii bitoo' dók'ǫ́zhígíí yínéíz'ą́, áádóó lók'aatsoh bílátahgi dah yiz'ą́ągo bąąh jidoots'ǫs biniyé haa yí'níłtsih.

⁴⁹Áádóó ła'ígíí ádadííniid, Átsé, t'áadoo baa nídaaht'íní! Haa'íshą', Iiláíjah daats'í haa doogáałgo yisdáhodoołtééł dadíníil'įįł.

⁵⁰Áádóó Jesus yéego hanáázhdoolghaazhgo hwii' sizíinii ninázhdiní'ą́.

⁵¹Nít'éé' jó'akon, kin bii' sohodizin biyi' góne' ach'ą́ą́h naníbaal wódahdę́ę́' yaago ats'áádláád, áádóó ni' hidees'náa'go, tsé éí daazdlad,

⁵²índa dajishcháá' ąą ádaadzaago, lą'í Diyin God bidiyį́į́' daneeznánígíí náádabi'diyiiljéé',

⁵³áádóó Jesus daaztsą́ą́dę́ę́' náádiidzáádóó bik'ijį' éí dajishcháá'dę́ę́' ch'ééjiiskaigo diyingo kin haal'áá góne' aheeskai, áko lą'í yich'į' ída'diilyaa.

⁵⁴Ákohgo siláo neeznádiingo binanit'a'í índa Jesus yaa ádahalyą́ągo yił naazíinii ni' hidees'náá' áádóó ádahóót'įįdígíí dayiiłtsą́ągo, kódaaníigo t'áá íiyisí nídaasdzííd, Díí t'áá aaníí Diyin God biYe' nilį́į́ nít'éé' lá!

⁵⁵Ákwe'é ałdó' asdzání lą'í nízaadę́ę́' dadéez'į́į'go naazį́, éí Gáliliidę́ę́' Jesus yá nidaal'a'go yikéé' yíkai;

⁵⁶Mary Mágdaliin áádóó Mary, éí James áádóó Jóseph bimá, índa Zébedii biye'ké bimá ákwe'é atah naazį́.

⁵⁷Áko Arimathíya hoolyéédę́ę́' diné at'íinii léi' Jóseph wolyéego, éí ałdó' Jesus yíhooł'aahii nilį́įgo, hííłch'į'go níyá.

⁵⁸Éí Páílat baazhníyáago Jesus bits'íís yę́ę bíjííkeed. Áko Páílat éí ats'íís haa nídooltéełgo yee haadzíí'.

⁵⁹Áko Jóseph éí ats'íís haa náltį́įgo, áłts'óózígo yisdizígíí bee na'at'ą́hí łigaii dits'idgo ályaii chin bąąh ádinii bił dzizdis,

⁶⁰áádóó t'áá ániidígo tséní'ootséél, t'áá hó ádá hasht'ehojiilaaí góne' nizhníłtį́, áko tsé ayóó áníłtso léi' bidáázhdiníłmááz áádóó dashdiiyá.

⁶¹Áko Mary Mágdaliin índa Mary ła'ígíí ałdó' éí tséní'ootsélígíí binaashiidę́ę́' siké.

⁶²Hasht'ehodi'nééh biiskání, aláahgo nááda'iiłniihii índa Férisii danilíinii Páílat yaa áłah silį́į́',

⁶³kódaaníigo, Nihinanit'a'í nílíinii, éí anó'áahii t'ah hiná yę́ędą́ą́', Táá' yiską́ągo náádideeshdááł, dííniidii béédeiilniih.

⁶⁴Éí bąą táá' yiską́ąjį' tséní'ootséél yéego baa áháyą́ą doogo bee nihoní'aah, éí doodago bídahooł'aahii [tł'ée'go] baa dookahgo nídabidínóo'į́įłgo yóó'adabidoołtééł, áko diné ádeididooniił, Dadziztsą́ą́dę́ę́' náázdiidzá, áko akée'di wooch'íid dooleełígíí átséhígíí biláahgo t'óó tsé'édinda ádoonííł.

⁶⁵Áko Páílat áhodííniid, Nihílááh, jishcháá' yaa ádahalyą́ą dooleeł biniyé siláo ła' nidanohnííł, áko yéego baa áháyą́ągo ádaahłééh.

⁶⁶Áko dashdiikai, áádóó tséní'ootséelgi tsé dáádeelmáazgo t'ááłáhígi hashtł'ish nidadziztłéé' áádóó bik'i nidadziz'ą́. Áádóó siláo nidadziznilígíí ádabizhdííniid, Yéego baa ádahołyą́.