Read Navajo MATTHEW 28 Bible Online

MATTHEW 28 - Navajo bible

MATTHEW 28

¹Áko háá'áyį́į́h jį́ azlį́į́'dóó biiskání damį́įgo aleeh góne' naaniiníłką́ągo, Mary Mágdaliin áádóó Mary ła'ígíí tséní'ootséelgo Jesus yóó'ályaadi jidínóoł'įįł biniyé ákǫ́ǫ́ jiní'áázh.

²Nít'éé' jó'akon, ayóó át'éego ni' nahaas'náá', háálá Bóhólníihii bidiyingo naal'a'í yá'ąąshdę́ę́' hadááyá, áádóó tsé nahjį' ayííłmáazgo yik'i dah neezdá.

³Atsiniltł'ish i'diłdla'ígi ánoolnin, áádóó bi'éé' éí yas nahalingo łigai.

⁴Áko jishcháá' baa ádahojilyáanii nídadzisdzíidgo hatah dahoditłid, áádóó diné daneeznáanii nidahojílin dadzizlį́į́'.

⁵Nidi diyingo naal'a'í éí asdzání áyidííniid, T'áadoo náłdzidí, háálá tsin ałnáoszid bikáa'jį' Jesus bił o'oolkaalígíí hanohtáago shił bééhózin.

⁶Éí doo kwe'é da, háálá t'áá ádííniidígi át'éego daaztsą́ą́dę́ę́' náádiidzá. Hágo, Bóhólníihii sitį́į́ nít'éé' yę́ęjį' dóh'į́į́'.

⁷Áko tsxį́įłgo nihílááh, Jesus daaztsą́ą́dę́ę́' náádiidzáá lá, dohníigo bídahooł'aahii bił hołne', jó'akon, Gáliliigóó nihiba' jideeyá; áadi dahwiidoołtsééł. Jó akonee', nihił hweeshne'.

⁸Áko nídzíldzid nidi, t'áá íiyisí hoł hózhǫ́ǫgo tséní'ootsééldóó tsxį́įłgo dashdii'áázh, áko bídahooł'aahii hane' baa nízhdoo'ááł biniyé dah ahizhdíníilchą́ą́'.

⁹Nít'éé' jó'akon, Jesus hadááh níyáago, Nihił hózhǫ́ǫ le'! hałní. Áko baazhní'áazhgo bikee' dziiłtsoodgo bich'į' nitsizhdinígo'.

¹⁰Áko Jesus áháłní, T'áadoo náłdzidí, nihílááh, shik'isóó Gáliliigóó dookah, áadi dashiidoołtséełgo bee bił hołne'.

¹¹Áádóó joo'ash nít'éé', jó'akon, aa ádahalyáanii ła' kin haal'áagi yíkaigo, ádahóót'įįdígíí t'áá ałtso aláahgo nááda'iiłniihii yee yił dahoolne'.

¹²Áko diné yá aląąjį' naazíinii yił áłah silį́į'go yaa nídaast'įįd, áko siláo éí béeso lą'í yaa deiznilgo,

¹³ádaaní, Da'iilwoshgo hódahooł'aahii tł'ée'go yíkai lá, áko dahoneez'į́į'go yóó'adahastį́į́ lá, dadohníigo diné bił dahodoołnih.

¹⁴Áko díidíígíí naat'áanii yidiizts'ą́ą'go bił t'áá áko doo biniyé bijadahidiigééł, áko t'áadoo bá nanohdeehígóó ádanihidiilnííł.

¹⁵Áko siláo béeso nídeidiinilgo, t'áá ádabi'doo'niidígi ádaadzaa, áádóó kót'éego hane'ígíí éí bijį́į́dóó díí jį́įjį' Jew dine'é bitahgóó nidadidlaad.

¹⁶Ákohgo ídahooł'aahii ła'ts'áadah jilt'éhígíí Gáliliidi dził si'ánígóó Jesus há nihoní'áníjį' jíkai.

¹⁷Áko Jesus dajiiłtsą́ągo bich'į' nitsidazhdinígo', nidi ła' t'áá hoł naaki daazlį́į́'.

¹⁸Áko Jesus haa níyáago kóníigo hach'į' haadzíí', Yá'ąąshdi áádóó nahasdzáán bikáa'gi bee ídahólníihii t'áá ałtso shaa deet'ą́.

¹⁹Éí bąą nihílááh, ał'ąą dine'é t'áá ałtso ídahooł'aahii danilį́įgo ádaahłe', aTaa' áádóó aYe' índa Níłch'i Diyinii bízhi' bee tó bee daahsį́į́h,

²⁰áádóó bee nihich'į' hahásdzíi'ii t'áá ałtso yik'eh dahół'į́į dooleełgi bee nidanohtin, áádóó jó'akon, łahgo náhodeesdzáajį' t'áá áłahjį' nihił honishłǫ́.