Read Navajo MATTHEW 3 Bible Online

MATTHEW 3 - Navajo bible

MATTHEW 3

¹Ákwii yoołkááł yę́ędą́ą́' John Tó Yee Asį́įhii, Judíya kéyah honoojíidi níyáago halne'go kóní,

²Łahgo át'éego Diyin God bich'į' tsíńdahidohkeesgo ádił nida'iyohsíihii bits'áhóhkááh, háálá yá'ąąshii bee bóhólníihgo bił haz'áanii bílátah dahashzhiizh.

³John lą́ą, éí Aizéíyah Diyin God yá halne'ii nilíinii haa yáłti'go ání: Honoojíidi ła' chánahgo kójíníigo hwiinéé' diits'a'go hojilne': Bóhólníihii bá honít'i'ii hasht'e dahohłééh, be'atiin k'éhézdongo ádaahłééh.

⁴John éí ghą́ą́'ask'idii bighaa' bee éé' ályaago ha'éé', áádóó akał sis bee áká dzíszaaz, índa nahachagiitsoh índa tsés'ná bitł'izh ałdó' hach'iyą'.

⁵Nít'éé' Jerúsalemdę́ę́' áádóó Judíyadę́ę́' t'áá níłtéél nít'éé' índa Jórdan tooh binaadę́ę́' t'áá át'éé nít'éé' diné haa haaskai.

⁶Bibąąhági ádaat'éii yee ádaa dahoolne'go Jórdan tooh nílínígíí biyi' tó bee dadzíísį́į́'.

⁷Nidi Férisii áádóó Sádjusii danilíinii tó bee dabidi'doolzįh biniyé deíkáahgo jiiłtsą́ągo ábijiní, T ł'iish ba'áłchíní danohłíinii! Háishą' Diyin God t'óó báhádzidgo bibee até'él'íinii bits'ą́ąjį' dah dadínóohchééh nihidííniid?

⁸Éí bąą łahgo át'éego Diyin God bich'į' tsíńdadohkeesgo beełt'éego nihits'ą́ą́dóó aneest'ą' dahóle',

⁹áádóó t'óó ádaa dadzíínóhdlíigo t'áá nihiyi'ídi, Éíbraham yee' nihizhé'é nilį́, t'áadoo dadohníní, háálá ánihidishní, Diyin God díí tsé kǫ́ǫ́ naaznilígíí bee Éíbraham ba'áłchíní íidoolíiłgo yíneel'ą́.

¹⁰K'ad nidi tsin bihétł'óól biniyé tsénił si'ą́, áko tsin t'áá ałtso bineest'ą' doo yá'át'ééhgóó bąąh nídahadleehígíí k'ídahalne'go, kǫ' biyi' góne' adahaltł'iid.

¹¹Łahgo át'éego Diyin God bich'į' tsíńdahidohkeesgo bąąhági ádanoht'é yę́ę bits'áhóhkáahgo tó bee danihisį́į́h, nidi shikéédę́ę́' náájoodáłígíí éí shiláahgo ájít'é, áko hakee' yish łéeł dooígíí doo bą́ą́h nishłį́į da; hó t'éí Níłch'i Diyinii índa kǫ' bee danihidzisį́įh doo.

¹²Hó éí ásaa' bee ąąh oolch'íhígíí dah joo'ááł, áádóó háá'jílk'áahgi hozhdidooshǫǫłgo hatł'oh naadą́ą́' nooh níjílchíihgi yah ahizhdooyééł, nidi azhool t'éí kǫ' doo nitséesii bee adizhdoołk'ą́ą́ł.

¹³Ákohgo Gáliliidę́ę́' Jórdanjį' Jesus níyá, John tó yee hodoosįh biniyé.

¹⁴Nidi John éí Jesus ch'ééh kóbizhdííniid, Nigo yee' tó bee shidíísįh nít'éé', da' ákoósh jó nida tó bee nideesįh biniyé shéíníyá?

¹⁵Nidi Jesus ánááhodoo'niidgo ání, Bíni'dii k'ad éí ákót'é, háálá ákót'éego t'áá ákogi ádaat'éii t'áá ałtso bi'diilnííł. Áko John yee lą́ asłį́į́'.

¹⁶Áádóó Jesus tó bee ho'doolzį́į'go táyi'dę́ę́' háádzísdzá, nít'éé' jó'akon yá' ąąsh ąą ádzaa, áádóó Diyin God biNíłch'i Diyinii hasbídí nahalingo Jesus bik'ijį' hadahooleełgo áádóó bik'i dah neezdáago jiiłtsą́.

¹⁷Áádóó yá'ąąshdę́ę́' iinéé' diists'ą́ą'go ání, Díí shiYe' ayóó'óósh'níinii jílį́, t'áá íiyisí hąą shił hózhǫ́.