Read Navajo MATTHEW 6 Bible Online

MATTHEW 6 - Navajo bible

MATTHEW 6

¹T'óó diné yee danihiníł'į́į doo biniyé diné binááł jooba' bee ádaahníłígíí bits'ąą ádaa ádahołyą́; ákódaaht'į́įgo nihiTaa' yá'ąąshdi hólóonii nihaidooléełii ádin doo.

²Éí bąą hojooba' ádaat'éii bíká ánánílwo'go diné t'óó áhodil'íinii ádaat'ínígi át'éego dilní t'áadoo ádílą́ąjį' diniłts'a'í. Éí kin bii' áłah nída'adleehgóó índa kintaa aztiingóó diné t'óó baa dahaniih doo biniyé ádaat'į́. T'áá aaníígóó ánihidishní, Éí hach'į' nidadoolyéełii t'áá íídą́ą́' hwee dahazlį́į́'.

³Nidi níla' nish'náájí bee hojooba' ádaat'éii bíká anánílwo'go níla' nishtł'ajíígíí éí t'áadoo bił bééhóziní íínísin.

⁴Áko áká anánílwo'go t'áadoo yi'niihí baa naniná, áko niTaa' t'áadoo yi'niihí ááníiłii yoo'íinii, éí na'doolééł.

⁵Áádóó diné t'óó ádahodil'į́įgo sodadilzinígi át'éego t'áadoo sodílziní, háálá éí diné danihiníł'į́į doo, danízingo kin bii' áłah nída'adleehgóó índa kintahgi naańda'aztiingóó naazį́įgo sodadilzingo bił dahoneełni. T'áá aaníí ánihidishní, Éí hach'į' nidadoolyéełii t'áá íídą́ą́' hwee dahazlį́į́'.

⁶Nidi sodílzingo doo naagháhí góne' yah anáńdáahgo ádáńdílkałgo niTaa' doo yit'į́į́góó hólóonii bich'į' sodílzin, áko niTaa' t'áadoo yi'niihí ááníiłii yoo'íinii, éí na'doolééł.

⁷Áádóó sodadołzingo, doo Jew dine'é danilíinii ádaat'ínígi át'éego saad t'áadoo biniyéhí daígíí t'áadoo háádahołt'éhí, háálá ákót'éego saad lą'í bee haasdzíi'go shá dazdidoots'į́į́ł danízin.

⁸Éí bąągo t'áadoo éigi ádanoht'éhí, háálá bídin danohłį́įgo chodaoł'ínígíí nihiTaa' bídeínóhkeed dooígíí t'áá íídą́ą́' bił bééhózin.

⁹Kót'éego sodadołzin: NihiTaa' yá'ąąshdi honílóonii, nízhi' diyingo óolzin le',

¹⁰Bee nóhólníihii náásgóó k'ee'ąą yilzhish le'. Áádóó bee íinínízinii t'áá yá'ąąshdi ááníłígi át'éego nahasdzáán bikáa'gi ááníił le'.

¹¹Ch'iyáán t'áá ákwíí jį́ niha'iyíłtsódígíí díí jį́ nihaa náádiní'aah.

¹²Áádóó t'áá nihich'į' bąąhági ádaaníiłii bá yóó'adahidiit'aahígi át'éego nich'į' nida'ayiilzíhígíí nihá yóó'ahidí'aah.

¹³Áádóó nihí hodínóotahjį' nihi'óółnííh lágo, nidi bąąhági át'éii bits'ą́ąjį' yisdánihiyínííł. [Háálá ahóyéel'áágóó ni t'éí nóhólnííh áádóó t'áadoo bee nóodziilí da, índa ayóó ánít'é. T'áá ákót'ée doo.]

¹⁴Háálá diné nihich'į' doo ákǫ́ǫ́ ádáát'įįdii bá yóó'adahidoh'aahgo nihiTaa' yá'ąąshdi hólóonii bich'į' doo ákǫ́ǫ́ ádaot'įįdii ałdó' nihá yóó'iidii'aah doo,

¹⁵nidi diné nihich'į' doo ákǫ́ǫ́ ádáát'įįdii doo bá yóó'adahidoh'aahgóogo, nihiTaa' bich'į' doo ákǫ́ǫ́ ádaot'įįdii ałdó' doo nihá yóó'iididoo'áał da.

¹⁶Hodílzingo doo adą́ baa naahkaigo diné t'óó ádahodil'į́įgo yínííł yił nidaakaígi át'éego t'áadoo ákódanoht'éhí, éí binii'jį' haa'í lá doo ádayooł'įįł da, hodílzingo doo adą́ yaa naakaígíí éí t'óó diné yee danihiníł'į́ danízingo ádaat'į́. T'áá aaníí ánihidishní, Éí bich'į' nidadoolyéełii t'áá íídą́ą́' bee dahólǫ́.

¹⁷Nidi hodílzingo doo adą́ baa nanináago nitsii' náníłtłah áádóó ninii' tánínánígis,

¹⁸áko hodílzingo doo adą́ baa nanináhígíí diné doo ná dayoo'į́į da doo, niTaa' doo yit'į́į́góó hólóonii t'éiyá ná yoo'į́į doo, áádóó niTaa' t'áadoo yi'niihí ááníiłii yoo'íinii, éí na'doolééł.

¹⁹Nahasdzáán bikáa'gi ch'osh ałchozhii hólǫ́ǫgi, áádóó t'áadoo le'é nídahidiniichxíihgi, índa ani'įįhii kin yighá da'anilgo da'ni'įįhgi, nihinaalye'é da'ílíinii t'áadoo ádá hasht'e' nidahidoh'níłí,

²⁰nidi yá'ąąshdi ch'osh ałchozhii ádindi, áádóó t'áadoo le'é doo nídahidiniichxíihgi, índa ani'įįhii doo kin yighá da'anilgo da'ni'įįhdi, nihinaalye'é ádá hasht'e' nidahidoh'nííł.

²¹Háálá nihinaalye'é siláadi t'áá ákwii ałdó' nihijéí hólǫ́ǫ doo.

²²Bee hool'iní bee adinídínígi át'éego anáá' bee ats'íís bá adinídíín. Éí bąą nináá' yá'át'éehgo nits'íís t'áá át'é bił hool'in doo,

²³nidi nináá' doo yá'át'ééhgóó nits'íís t'áá át'é bił chahałheeł doo. Áko éí bąągo niyi'di adinídíín dooleeł yę́ę éí t'áá át'é chahałheeł nilį́įgo dooládó' chahałheeł da doo!

²⁴Diné ła'da doo t'áá łahjį' naat'áanii naaki bá nijól'a' át'ée da, háálá ła' bik'eezhdiniih doo, ła' éí ayóó'ájó'níi doo, éí doodaléi' ła' doo nahdi jó'níi da doo, ła' éí jijoołáa doo. Diyin God índa at'į́ doo t'áá łahjį' bá nijól'a' át'ée da.

²⁵Éí bąą ánihidishní, Ha'át'íí lá deeshį́į́ł lá? doodaii', Ha'át'íí lá deeshdlį́į́ł lá? doodaii', Ha'át'íí lá bee hadideeshnííł lá? t'áadoo danohsingo bee dahinohnáa dooleełígíí bíká ádił nídahodoł chiłí. Jiinánígíí éísh ch'iyáán doo biláahgo ílį́į da, áádóó hats'íísísh éé' doo biláahgo ílį́į da?

²⁶Tsídii wódahgo nidaat'a'ígíí danół'į́: éí doo k'ééda'didléeh da, doo nidi nída'agish da, índa doo nooh nída'ałchíih da, ákondi nihiTaa' yá'ąąshdi hólóonii ba'ałtso'. Da' nihíísh doo éí biláahgo da'nohłį́į da?

²⁷Áádóó nihí ła' ádił náhodołchiłgo hinohnánígíí t'įįhdígoósh bilááh ádoohłíiłgo bínooł'ą́?

²⁸Áko ha'át'íísh biniyé nihi'éé' bíká ádił nídahodołchił? Nihokáá'góó ch'ilátah hózhóón nidanise'ígíí baa nitsídaahkees, éí doo nidaalnish da, índa doo da'adiz da,

²⁹nidi ánihidishní, Azhą́ Sálaman ayóó ájít'éé nít'éé' nidi, doo ła' díí hadadít'éhígi át'éego hazhdít'ée da nít'éé'.

³⁰Éí lá bąą Diyin God nihokáá'góó ch'ilígíí díí jį́ nidanise'go, áádóó yiską́ągo konk'eh góne' ahidoolkałígíí nidi nizhónígo haidósingo, t'įįhdígo da'iinohdláanii, da' ákoósh éidíígíí biláahgo doo hadadinoht'éego ánihósin da?

³¹Éí bąą, Ha'át'íí lá dadiidį́į́ł lá? doodaii', Ha'át'íí lá dadiidlį́į́ł lá? doodaii', Ha'át'íí lá bee hadadiniit'ée dooleeł lá? t'áadoo dadohníigo ádił nídahodołchiłí.

³²Háálá doo Jew dine'é danilíinii éidí t'áá ałtso hádaat'į́; jó nidi, nihiTaa' yá'ąąshdi hólóonii díidí t'áá ałtso bídin danohłį́įgo chodaoł'ínígíí nihá bił bééhózin.

³³Nidi Diyin God bee bóhólníihgo bił haz'áanii áádóó yee ts'ídá t'áá ákogi át'éii alą́ąjį' hádaaht'į́, áko éidí t'áá ałtso nihá bíidoolyééł.

³⁴Éí bąą yiską́ągo áhoot'ée dooleełígíí t'áadoo bíká ádił nídahodołchiłí, háálá yiską́ągo bíká ádił nídahodichiłii dahólǫ́ǫ doo. Ła'a jį́ bii' ach'į' nahwii' ná nihwiileehígíí bíni'dii t'áá ákódígo ach'į' nahwii'ná hólǫ́.