Read Navajo MATTHEW 7 Bible Online

MATTHEW 7 - Navajo bible

MATTHEW 7

¹Doo nihaa nídahódóot'įįłígíí biniyé t'áadoo aa nídaaht'íní.

²Háálá bee aa nídaaht'íinii t'áá éí bik'ehgo nihaa nídahódóot'įįł, áádóó t'áá ła' bá ída'nooł'ąąd yę́ęgi ánéelt'e'go nihá ínídadí'nóol'ąął.

³Áko ha'át'íí biniyé nik'is binák'e oolts'idígíí níníł'į́, nidi t'áá ni nástáán ninák'ee sitánígíísh doo baa ákonínízin da?

⁴Éí doodaii' t'áá ni nástáán ninák'ee sitą́ągo, ha'át'éego nik'is ábididííniił, Haa'íshą' ninák'e oolts'idígíí ná haash'aah?

⁵T'óó áhodil'íní nílíinii, áłtsé nástáán ninák'ee sitánígíí hanitįįh, áko índa hazhó'ó ííní'į́įgo nik'is binák'e oolts'idígíí bá hadíí'ááł.

⁶Ha'át'íhída dílzinii t'áadoo łééchąą'í bich'į' adahołtł'iidí, áádóó nihidiichiłí t'áadoo bisóodi bich'į' adahołkaadí. Ákódaaht'į́įgo éí yik'i nidookah áádóó t'áá yiláahjį' nihich'į' dah didoojahgo danihidoo'ał.

⁷Da'íínóhkeed, áko deínóhkeedígíí nihaa dadoolyééł; hádaaht'į́, áko hádaaht'ínígíí bik'ídadoohkah; dáádílkał nídanołts'in, áko nihá ąą ádadoolnííł.

⁸Háálá t'ááłá'í jinítínígo dajókeedii éí haa dahalyé, hádajit'ínígíí bik'ídajiikááh, índa dáádílkał nídazniłts'inígíí há ąą ádaalne'.

⁹Nihitahdóó diné ła' biye' łees'áán bíyííkeedgo da' tséésh yeidoo'ááł?

¹⁰Éí doodago łóó' bíyííkeedgo da' tł'iishísh yeidoołtééł?

¹¹Áko nihí doo yá'ádanoht'éeh da nidi, aa doolyéełii yá'ádaat'éehii nihada'áłchíní baa dadoohłéełii nihił béédahózingo, éí bilááh át'éego nihiTaa' yá' ąąshdi hólóonii ha'át'íhída yá'ádaat'éehii bídajókeedígíí haa yiiníiłgo át'é.

¹²Éí bąą diné hach'į' ádaaníił le' danohsinígi át'éego nihígo yee' bich'į' ákódaahníił le', háálá éí bee haz'áanii áádóó Diyin God yá dahalne'ii yee nida'nitin.

¹³Áhoołts'óózígo yah ahóót'i'í góne' yah ahohkááh, háálá atí'oolníiłjį' hóteelgo yah ahóót'i' áádóó hóteelgo bich'į' honít'i', áko diné lą'í ákóne' yah ahikááh.

¹⁴Háálá iináajį' áhoołts'óózígo yah ahóót'i' áádóó áhoołts'óózígo bich'į' honít'i', áko t'áá díkwíí éí yik'ídahakááh.

¹⁵T'óó ádahodil'į́įgo dahalne'ii bits'ąą ádaa ádahołyą́, jó éí dibégi át'éego doo báhádzidgóó nihaa nídaakah, nidi dabiyi'di t'éí mą'iitsoh t'óó báhádzidgo dichin daazlį́į'go da'aldeełii nidahalin.

¹⁶Nidi éí tsin bineest'ą' bee bééhózinígi át'éego ádaaníłígíí bee nihił béédahózin doo. Da' ch'il deeníníísh bąąhdóó ch'il na'atł'o'ii wóbé, éí doodaii', da' hoshísh bąąhdóó fig wolyéhígíí wóbé?

¹⁷Jó, tsin yá'ádaat'éehii t'áá ałtso bąąhdóó aneest'ą' yá'át'éehii nídahoodleeł, nidi tsin nichxǫ́'ígíí bąąhdóó aneest'ą' nichxǫ́'ígíí náhoodleeł.

¹⁸Tsin yá'át'éehii bąąhdóó aneest'ą' nichxǫ́'ígíí doo hóle' át'ée da, áádóó tsin nichxǫ́'ígíí bąąhdóó aneest'ą' yá'át'éehii doo hóle' át'ée da.

¹⁹Tsin t'áá ałtso bineest'ą' doo yá'át'ééhgóó bąąh nídahadleehígíí k'ídahalne'go kǫ' biyi' góne' adahaltł'iid.

²⁰Áko tsin bineest'ą' bee bééhózinígi át'éego t'óó ádahodil'į́įgo dahalne'ii ádaaníłígíí bee nihił béédahózin doo.

²¹T'ááłá'í jinítínígo, Bóhólníihii, Bóhólníihii, dashijinínígíí doo t'áá ádzíłtso yá'ąąshii bee bóhólníihgo bił haz'áanii biih dahizhdookah da, nidi t'áá háiida shiTaa' yá'ąąshdi hólóonii íinízinii bik'eh ájít'éhígíí t'éiyá.

²²Éí bijį́įdi lą'í ádashididooniił, Bóhólníihii, Bóhólníihii, da' nízhi'ísh bee doo Diyin God bá nidahosiilne' da, da' nízhi'ísh bee doo níłch'i bida'iiníziinii ayi'dę́ę́' hadahineelkaad da, áádóó da' doósh ádahooníiłii ayóó ádaat'éii lą'í nízhi' bee baa nidasiikai da?

²³Ákondi ádabidideeshniił, Ts'ídá doo nihééhasin da; bąąhági át'éii baa deínóhkáahii, shits'ánóhkááh.

²⁴Áko t'ááłá'í jinítínígo díí shizaad dazdiits'a'go bida'jił'ínígíí éí diné léi' hóyą́ągo tsé'éłkáa'gi bikin niiní'ánígíí nidahojílin,

²⁵áko nahóółtą́ índa tó dááląąd, áádóó ayóó át'éego éí kin bich'į' deeyol, nidi t'áadoo ahiih náázhoozh da, háálá tsé'éłkáa'gi niit'ą́.

²⁶Áádóó t'ááłá'í jinítínígo díí shizaad dazdiits'a'go doo bida'jił'ínígíí, éí diné léi' doo hóyą́ą́góó séítahgi bikin niiní'ánígíí nidahojílin.

²⁷Áko nahóółtą́ índa tó dááląąd, áádóó ayóó át'éego éí kin bich'į' deeyolgo ahiih náázhoozh. Dooládó' ahiih ná'ííłdáaz da!

²⁸Ákohgo Jesus díí saad ałtso bee hadzoodzíi'go diné yíl'áhígíí hana'nitin bik'ee t'óó bił adahóóyóí,

²⁹háálá naat'áanii ídlį́įgo na'nitinígíigi át'éego naz'neeztą́ą́', bee haz'áanii yínda'niłtinii nahalingo éí dooda.