Read Navajo MATTHEW 8 Bible Online

MATTHEW 8 - Navajo bible

MATTHEW 8

¹Dził bąąhdę́ę́' hadáádzoodzáago, diné ayóó ánéelą́ą́' hakéé' nooyééł,

²áko jó'akon, diné ła' łóód ats'íís yiyáanii naałdzidii bee bąąh dah haz'ą́ą́ léi' haa níyá, áádóó hach'į' nahasáago ání, Bóhólníihii, íinínízin ládą́ą́' nááshididííłááł.

³Áko Jesus k'ídeesníi'go hodeelchid kóníigo, Íinisin lą́ą; łóód nąąh óodįįh. T'áá áko łóód ats'íís yiyáanii naałdzidii yę́ę hąąh ásdįįd.

⁴Áádóó Jesus áhodííniid, T'ááká diné ła'da bił hóólne' lágo, nidi nílááh dah diináahgo náá'iiłniihii bíni'dii átsé niníł'į́, áádóó nááhidoonihii t'áá Mózes yee nihoní'ánígi át'éego nááhidííłnih, áko éí bee nilóód náádzí'ígíí diné bił béédahózin doo.

⁵Áádóó Kapérniyamgi jiníyáago siláo neeznádiin yilt'éego binanit'a'í nilį́į́ léi' hach'į' niníyáago náhookąąh,

⁶áko áháłní, Bóhólníihii, diné shá naal'a'ígíí doo bitah nahwii'náágóó t'áá íiyisí ti'hooníihgo hooghandi sitį́.

⁷Áko Jesus áhodííniid, Ákǫ́ǫ́ deesháałgo nááhodideeshłááł.

⁸Nidi siláo binanit'a'í hanáánáádzíi'go ání, Bóhólníihii, shighan góne' shił yah adíínáałgi doo bą́ą́h anishłį́į da, nidi t'óó saad bee handziih, áko shá naal'a'í náádidoodááł.

⁹Háálá shí ałdó' shinanit'a'í hólǫ́, áádóó siláo binanit'a'í nishłį́, áko ła', Ákǫ́ǫ́ díínááł, bidishniihgo dah diighááh, náánáła', Hágo, bidishniihgo shaa yighááh, áádóó shinaalte', Kónínééh, bidishniihgo t'áá áko éí yi'iił'įįh.

¹⁰Áko Jesus éí yidiizts'ą́ą'go t'óó bił ahóóyóí, áádóó bikéé' nidaakaígíí áyidííniid, T'áá aaníí ánihidishní, Oodlą́ ayóó át'éii Ízrel dine'é bitahgi nidi, t'ah doo kót'éii bik'ínísháah da.

¹¹Áádóó ánihidishní, Ha'a'aahdę́ę́' índa e'e'aahdę́ę́' diné lą'í nidahidookah, áádóó yá'ąąshii bee bóhólníihgo bił haz'ą́ądi Éíbraham áádóó Áízak índa Jéíkab yił da'dooyį́į́ł biniyé yił dah dínóobįįł,

¹²nidi yá'ąąshii bee bóhólníihgo bił haz'áanii hwíí' dadooleeł yę́ę tł'óó'dóó yówehjį' chahałheełjį' ahodi'yooltł'ił; áadi diné daachxa áádóó biwoo' ahídeidiłk'ash doo.

¹³Áko Jesus éí siláo binanit'a'í áyidííniid, Nílááh yínááł; t'áá iinídlánígi át'éego ná ádoolnííł. T'áá áko hanaal'a'í náádiidzá.

¹⁴Áádóó Peter bighan góne' Jesus yah ajííyáago, Peter be'asdzą́ą́ bimá bitah honeezgaigo sitį́įgo jiiłtsą́,

¹⁵áko bíla' bizhdeelchidgo, tah honiigááh yę́ę bits'áldoh, áko nídii'na'go há chooz'įįd.

¹⁶T'áá éí bee i'íí'ání, níłch'i bi'iiníziinii bii' dahólóonii lą'í hach'į' yił neheeskai, áko t'ááłáhídi hadziidziihgo níłch'i bida'iiníziinii haz'niiskaad, índa diné bitah dahoneezgai t'áá ałtso hadaałt'é áńdajiidlaa.

¹⁷Kót'éego baa nijiyáhígíí, Aizéíyah, Diyin God yá halne'ii, yaa hoolne'ígíí bohodoolnííł biniyé baa nijiyá, T'áá hó, doo nihitah dahółdzilii ák'ijį' kójiilaa, índa nihitah dahoneezgaii bá dziizį', dííniid.

¹⁸Nít'éé' Jesus binaagi diné t'óó ahayóí yíl'áago yiyiiłtsą́ągo, Wónaanígóó diikah, dííniid.

¹⁹Nít'éé' bee haz'áanii yínda'niłtinii ła' níyáago áhodííniid, Na'nitiní, t'áá nanináágóó nikéé' naasháa doo.

²⁰Áko Jesus áháłní, Mą'ii dootł'izhí be'a'áán dahólǫ́, áádóó tsídii wódahgo nidaat'a'ígíí bit'oh dahólǫ́, nidi Diné Silį́į'ii éí t'áadoo nizhnót'áałgi da.

²¹Áádóó ídahooł'aahii náánáła' ábidííniid, Bóhólníihii, áłtsé shizhé'é łeeh deeshtééłgóó nídeeshdáałgo bee sha'di'ní'aah.

²²Nidi Jesus áhodííniid, Shikéé' yínááł, áádóó bíni'dii daneeznáanii t'áá bí łeeh da'ahii'nííł.

²³Áádóó tsinaa'eeł biih jííyáago hódahooł'aahii hakéé' iih yíjéé'.

²⁴Áádóó jó'akon, táłkáa'gi ayóó át'éego deeyolgo, tó náádadiidáhígíí tsinaa'eeł biih yilk'ooł, nidi Jesus éí ajiłhosh.

²⁵Áko hódahooł'aahii hach'į' niikaigo ch'éédahasidgo ádaaní, Táłtł'ááh yiildaas, Bóhólníihii, yisdánihínííł.

²⁶Nít'éé' áháłní, Ha'át'éegoshą' nídasoołdzííd, t'įįhdígo da'iinohdláanii? Áko yiizį'go níyol índa tó yideezteh, áko t'áá íiyisí hodiiyeel.

²⁷Áko hódahooł'aahii t'óó bił adahayóigo kódaaní, Díí lá ha'át'íí diné shį́į́ át'į́įgo, níyol áádóó tó nidi bik'eh dahół'į́?

²⁸Wónaaníjį' Gérgasa dine'é bikéyahjį' ha'naa nida'dzis'éelgo, dajishcháá'dę́ę́' diné nidilt'éego níłch'i bida'iiníziinii tsi'nabiił'aashgo hadááh ahi'neelchą́ą́', éí t'áá íiyisí báhádzidgo bąą diné ła' doo áajigo ch'óoya' át'ée da.

²⁹Nít'éé' jó'akon, éí kóníigo hadoolghaazh, Haashą' nihíléehgo ánít'į́, Jesus, Diyin God biYe' nílíinii? Atínihidi'doolníłígíí t'ah doo baa hoolzhíish da nidiísh atínihidíílíiłgo biniyé yíníyá?

³⁰Áko éí áádóó t'áá nízaadi bisóodi lą'í nida'ałchozh.

³¹Áko níłch'i bida'iiníziinii nídahookąąhgo ádaaní, Hanihiníłkaad ládą́ą́', níléí bisóodi naakaígíí biih danihidííł'aał.

³²Áko ábizhdííniid, Nihílááh lą́ą. Áko níłch'i bida'iiníziinii éí diné yiyi'dę́ę́' hahaazhjée'go bisóodi yiih heezhjéé', áko jó'akon, bisóodi t'áá ałtso bidah ch'ééjée'go be'ek'id yiih heezhjéé', áko tó bííghą́ą́'.

³³Áko bisóodi baa ádahojilyánígíí dashdiijée'go kin haal'áágóó aníjííjée'go, éí áhóót'įįdígíí t'áá ałtso índa diné níłch'i bida'iiníziinii bii' hólónę́ę bii' hanoolkaadígíí baa dahojoolne'.

³⁴Áko kin haal'áádóó diné t'áá ałtso ch'íheezhjée'go Jesus bidááh náznísą́. Áko dajiiłtsą́ągo nídajookąąhgo ádajiní, Nihikéyahdóó nówehjį' haninááh.