Read Navajo MARK 10 Bible Online

MARK 10 - Navajo bible

MARK 10

¹Áádóó dah náázhdiidzáago Judíya kéyah bibąąhgóó ch'ízhníyá, áádóó Jórdan tooh wónaanídi jiníyáago, áadi haa áłah náá'ásdlį́į́', áko t'áá ninázh'nítįįhígi át'éego nínáázhdí'níitą́ą́'.

²Nít'éé' Férisii danilíinii ła' haa yíkaigo hákada'iiłhilgo nidahódééłkidgo ádaaní, Da' dinéésh be'asdzą́ą́ yił ałts'ándoot'ashgo t'áá bee haz'ą́?

³Ákohgo bich'į' hadzoodzíi'go ábijiní, Mózesshą' ha'át'íí yee nihá hooł'a'?

⁴Áko ádahodííniid, Mózes éí diné ła'da naaltsoos bik'ehgo ałts'á'doot'ashígíí hazhdiilaago índa hwe'asdzą́ą́ yóó'azhdidoo'ááł níigo yee a'di'ní'ą́.

⁵Nidi Jesus ánááhodoo'niid, Nihijéí doo binídahaz'áhígíí biniinaa éí bee haz'áanii Mózes nihá yee ak'e'ashchį́.

⁶Nidi Diyin God t'áá ałtsoní áyiilaadą́ą́' biką'ii índa bi'áadii áyiilaa.

⁷Éí biniinaa diné bizhé'é índa bimá yits'ą́ą́' dah didoogáałgo be'asdzą́ą́ yił ahididoo'ash,

⁸áko éí nizhdilt'éhígíí ats'íís t'ááłá'í jidooleeł. Áádóó bik'ijį' doo t'áá ał'ąą da, nidi ats'íís t'ááłá'í jileeh.

⁹Éí bąą Diyin God ahainínilii éí diné doo ła' ałts'ázhdoonił da.

¹⁰Wóne'é hódahooł'aahii t'áá éí yínináádahódééłkid.

¹¹Áko ábizhdííniid, T'áá háiida hwe'asdzą́ą́ yóó'azhdíí'ą́ągo náánáła' asdzání bá náá'dzísgehgo, éí átsé hwe'asdzą́ą́ nít'é'ígíí baazhdíílá,

¹²áádóó asdzání hahastiin yóó'azhdíí'ą́ągo náánáła' diné hahastiin ánáájiidlaago, éí ałdó' azhdíílá.

¹³Áko diné ła' áłchíní yázhí bidazhdidoolchił biniyé hach'į' nidayii'éésh, nít'éé' hódahooł'aahii éí deideezteh.

¹⁴Nidi Jesus éí yaa ákoniizį́į'go yik'ee doo bił hóózhǫǫd da, áko áhodííniid, Bíni'dii áłchíní shaa hakááh, t'áadoo shich'į' nidanoh'iní, háálá ákódaat'éhígíí Diyin God bee bóhólníihgo bił haz'áanii bíí' ádaat'é.

¹⁵T'áá aaníígóó ánihidishní, T'áá háiida áłchíní yázhí nahalingo Diyin God bee bóhólníihgo bił haz'áanii doo ádaazhdeet'ánígíí éí doo biishdoogáał da.

¹⁶Áko náhizhdiiłteehgo bik'i dah dahizhdilníihgo bá sozdoolzin.

¹⁷Nít'éé' náánáłahgóó nihináádzídzáago, diné léi' hadááh yílwodgo hach'į' nitsidinígo'go áháłní, Na'nitiní yá'át'éehii nílíinii, haash deeshníiłgo iiná doo ninít'i'ii shee hodooleeł?

¹⁸Áko Jesus áhodííniid, Ha'át'íishą' biniyé yá'át'éehii shidiní? T'ááłá'í nidi doo yá'ájít'éhí da, t'áá hazhó'ó Diyin God t'éiyá.

¹⁹Bee haz'áanii nił bééhózin: Ts'ídá doo adidííléeł da, Diné ts'ídá doo diyííłhéeł da, Ts'ídá doo adíníí'į́įł da, Ts'ídá doo t'áá ádzaagóó hólne'í da, Doo hona'adlo' da, Nizhé'é índa nimá nił nilį́įgo íínísin.

²⁰Áko ázhdííniid, Na'nitiní, eii t'áá ałtso t'áá áłchíní nishłį́į́dą́ą́' bik'eh honish'į́įgo hoolzhiizh.

²¹Áko Jesus ayóó'áhó'níigo honééł'į́į'go áhodííniid, T'ááłáhígo haz'ą́ t'ahdii bee nich'į' anáhóót'i'; nílááh, nídídáahgo nee hólónígíí t'áá ałtso naa nahóniihgo bee shóisíníłt'e'ígíí badahojoobá'íígíí bitaa díínih, áko yá'ąąshdi naalye'é ílíinii nee hólǫ́ǫ dooleeł, áádóó dah diináahgo [tsin ałnáoszid nídiitįįhgo] shikéé' yínáał doo.

²²Nidi kót'éego ha'oodzí'ígíí bik'ee yínííł dzizlį́į'go bąąh háni'go dashdiiyá, háálá t'áá íiyisí ajit'į́.

²³Áko Jesus hódahooł'aahii bitaa dzizghalgo ájíní, Da'jit'ínígíí Diyin God bee bóhólníihgo bił haz'áanii biih dazhdookahígi dooládó' há daniłdzil da!

²⁴Nít'éé' hódahooł'aahii saad bee hadzoodzí'ígíí yik'ee t'óó bił adahóóyóí. Áko Jesus hach'į' hanáánáádzíi'go áhodííniid, Sha'áłchíní, [at'į́ bada'jólíhígíí] Diyin God bee bóhólníihgo bił haz'áanii biih dazhdookahígi dooládó' lá há daniłdzil da.

²⁵Ghą́ą́'ask'idii tsah bighá'ált'ih góne' ch'ídoogáałgo doo bá bohónéedzą́ą da, nidi diné ajit'íinii Diyin God bee bóhólníihgo bił haz'áanii biishdoogáłígi agháago doo há bohónéedzą́ą da.

²⁶Áko t'áá íiyisí t'óó hoł adahayóigo ádabizhdííniid, Ákoshą' háí yisdádooltééł?

²⁷Áko Jesus hatah déez'į́į'go áhodííniid, Éí diné ts'ídá t'áadoo bee bá bohónéedzání da, nidi Diyin God éí doo ch'ééh íidooł'įįł da, háálá Diyin God t'áá ałtsoní bee bá bohónéedzą́.

²⁸Áko Peter hach'į' ayá'niiłti'go ání, Jó'akon, nihí nihee dahólǫ́ǫ́ nít'é'ígíí ałtso bits'ą́ą́' dah dahidiikaigo nikéé' dayíníikááh.

²⁹Áko Jesus ádííniid, T'áá aaníígóó ánihidishní, Diné t'ááłá'í nítínígo shí áádóó hane' yá'át'éehii biniinaa bikin, doodaii' bik'isóó, doodaii' bilahkéí, doodaii' bizhé'é, doodaii' bimá, [doodaii' be'asdzą́ą́,] doodaii' ba'áłchíní, doodaii' bikédaayah yits'ą́ą́' dah diiyáii,

³⁰éí díí k'ad hoolzhishígíí biyi' daakin áádóó ak'isóó áádóó alahkéí áádóó amá danilíinii áádóó áłchíní índa kédaayah, neeznádiindi ahą́ą́h nániiláago até'él'į́ bóóltą'go baa nídoolyééł, áádóó łahgo náhodeesdzáago iiná doo ninít'i'ii bee jiináa doo.

³¹Nidi lą'í da'alą́ąjį'ígíí éí da'akéédę́ę' dooleeł, índa da'akéédę́'ígíí éí da'alą́ąjį' dooleeł.

³²Nít'éé' Jesus halą́ąjį' yigáałgo Jerúsalem góde bikéé' jookahgo t'óó hoł adahóóyóí, índa bikéé' jookahígíí nídadzildzid. Áko naakits'áadahígíí bił ats'ádzískaigo áhodi'doolníłígíí bee bił ahozhniilne',

³³kójíníigo, Jó'akon, Jerúsalem góde deekai, áko Diné Silį́į'ii éí aláahgo nááda'iiłniihii índa bee haz'áanii yínda'niłtinii baa hodi'doot'ááł, áádóó éí hodi'yoolyéełjį' há nidahodoo'ááł índa doo Jew dine'é danilíinii yaa dahodidoo'ááł,

³⁴áko éí há nidahodoołt'ih áádóó nahóda'doołtsxis áádóó hak'ídahididoozhah índa dahodiyoołhééł, áko tágí jį́ aleeh góne' náázhdidoodááł.

³⁵Nít'éé' Zébedii biye'ké James índa John haa ní'áazhgo áháłní, Na'nitiní, t'áá nííníikeedígíí nihá bi'díílííł, nííníi'ní.

³⁶Áko ábizhdííniid, Ha'át'íí nihá baa nideeshaał nohsin?

³⁷Áko áháłní, Ayóó ánít'é áni'diilyaadi, ła' ninish'náájí dah siidáa doogo índa ła' ninishtł'ají dah siidáa doogo bee niha'di'ní'aah.

³⁸Nidi Jesus áhodííniid, Yínóhkeedígíí doo nihił bééhózingóó ádóhní. Sheíką́ągo yishdlánígíí daats'í doohdlį́įłgo bínooł'ą́? Áádóó bee shidi'doolzįhii daats'í bee nihidi'doolzįhgo bínooł'ą́?

³⁹Áko, Bíniil'ą́ lą́ą, hodííniidgo Jesus ázhdííniid, Sheíką́ągo yishdlánígíí lá doohdlį́įł ni, áádóó bee shidi'doolzįhii lá bee nihidi'doolzįh ni,

⁴⁰nidi ła' shinish'náájí áádóó ła' shinishtł'ají dah soodáa dooleełígíí shí a'dideesh'áałgo doo bee shóhólníih da, nidi bá hasht'eelyaaígíí éí baa didoot'ááł.

⁴¹Áko neeznált'éhígíí éí deidiizts'ą́ą'go James índa John yich'į' doo bił dahóózhǫǫd da.

⁴²Áko Jesus t'áá ádzíłtso hágo hodííniidgo áháłní, Nihił béédahózingo doo Jew dine'é danilíinii nidant'á béédaho'dílzinii ayóogo ádídahólníihgo yindant'áa łeh, áko doo Jew dine'é danilíinii bitahgóó ayóó ádaat'é danilíinii ída'niłkadgo bee bídahólnííh.

⁴³Nidi nihí nihitahgóó éí doo ákót'ée da dooleeł, nidi t'áá háiida nihitahgóó ayóó át'éii deeshłeeł jinízinígíí éí nihá nijil'a' doo,

⁴⁴áádóó t'áá háiida nihitahgóó shí alą́ąjį' dooleeł jinízinígíí éí t'áá ałtso bá nijil'a' doo.

⁴⁵Háálá Diné Silį́į'ii ałdó' doo bá na'al'a' da, nidi á naal'a' doo índa be'iina' ninéidiní'ą́ągo daaztsánígíí yee lą'í ninéidiyoołnih yiniyé níyá.

⁴⁶Nít'éé' Jériko kin haal'áadi jíkai, áko hódahooł'aahii índa diné hoł nooyéłígíí Jérikodóó bił ch'íjíkaigo Bartimíyas, Timíyas biye', doo oo'į́į́góó adókeedí nilį́įgo, atiin bąąhgi sidáá lá.

⁴⁷Áko Názarethdóó Jesus át'į́ ha'níigo yidiizts'ą́ą'go hadoolghaazhgo ání, Jesus, David biYe' nílíinii, shaa jiiníbaah!

⁴⁸Áko diné lą'í, T'áadoo ádíníní, dahałní, nidi t'ah yówehgo hanáázhdoolghaazhgo ájíní, David biYe' nílíinii, shaa jiiníbaah!

⁴⁹Áko Jesus t'áá ákǫ́ǫ́ yiizį'go ání, Hágo bidohní. Áko diné doo oo'ínígíí hágo deidííniidgo ádeiłní, Nił hózhǫ́ǫgo nídiidááh; níláhdę́ę́' hágo niłní.

⁵⁰Áko diné éí habeeldléí nahjį' ajiyííłhango náhizhdiitahgo Jesus baazhníyá.

⁵¹Áko Jesus áháłní, Ha'át'íí ná baa nideeshaał shííní'ní? Áko diné doo oo'íinii ání, Na'nitiní, eesh'į́įgo áshílééh.

⁵²Áko Jesus áháłní, Nílááh yínááł; ne'oodlą' bee doo ánít'éhí da násínídlį́į́'. T'áá áko ajoo'į́ dzizlį́į́' áádóó Jesus bikéé' dashdiiyá.