Read Navajo MARK 11 Bible Online

MARK 11 - Navajo bible

MARK 11

¹Áko Jerúsalem t'áá bich'į'dóó Dził Álivz bitsį́įgi Béthfajii índa Béthanii wolyéego kin sinilígíí bich'į' t'áá áyídídę́ę́' jookahgo hódahooł'aahii naaki ajííł'a'go

²ábijiní, Nihílááh, náwónaanídi nihidááhjí kin sinilíjį' doh'aash, áko t'áá noo'áázhgóó télii yázhí t'ah doo adiyeehígíí dahaastł'ǫ́ǫgo bik'ídooh'ash; éí k'e'dooh'ałgo nídoohłóós.

³Áko diné ła'da, Ha'át'íishą' biniyé óht'į́? nihidííniidgo, Jó, Bóhólníihii choidooł'įįł, bididoohniił, áádóó t'áá áko áádę́ę́' nihił yi'doołnih.

⁴Áko dashdii'áazhgo kintaa'aztiinígíí bibąąhgóó kin léi' bich'éédą́ą'gi télii yázhí dahaastł'ǫ́ǫgo bik'ízhní'áázh, áko k'e'jíí'ah.

⁵Nít'éé' ákǫ́ǫ́ naazínígíí ła' ádahodííniid, Ha'át'íishą' baa naah'aashgo, télii yázhí k'e'oh'ad?

⁶Áko t'áá Jesus ádidoohniił hodííniidígi ázhdííniid, áko yił hoda'asnii'.

⁷Áko télii yázhí éí Jesus baazhnílóozgo, habeeldléí bikáa'jį' ádadziiznil, áádóó Jesus éí yik'i dah neezdá.

⁸Áko lą'í dabibeeldléí atiingóó há dayíłkaad, náánáła' éí atiin bąąhgóó tsin bi'iil dadíłch'ilii dayiigéeshgo atiingóó há dayíłjeeh.

⁹Áko alą́ąjį' índa akéédę́ę́' nooyéłígíí dadilwoshgo ádaaní, Baa ha'niih le'! Bóhólníihii bízhi' bee bi'dójíigo yigáłígíí bik'ihojidlíi doo!

¹⁰Nihizhé'é yę́ę David bee bóhólníihgo bił haz'áanii dooleełígíí bik'ihojidlíi doo! Aghánáhóó'áádę́ę́' baa ha'niih le'!

¹¹Áko Jerúsalemgi Jesus jiníyáago kin bii' sohodizin bił haz'ą́ą́ góne' yah ajííyá, áko t'áá ałtsogóó nidzizghaldóó bik'ijį', i'íí'ą́ągo naakits'áadahígíí bił Béthaniigóó dashdiikai.

¹²Áádóó biiskání Béthaniidóó ch'íjíkaigo dichin dzizlį́į́'.

¹³Áko atiin t'áá bits'áhoní'ą́ądi fig léi' bit'ąą' hólǫ́ǫgo sikaadgo jiiłtsą́, áko bineest'ą' daats'í bąąh hólǫ́ jinízingo bich'į' jiníyá. Áko baazhníyáá nít'éé', bit'ąą' t'éiyá bąąh hólǫ́ǫ́ lá, háálá fig dadínóot'į́įłjį' t'ah doo ahalzhíish da.

¹⁴Nít'éé' fig sikaadii ábizhdííniid, Kodóó hool'áágóó diné doo ła' nąąh náá'doodį́įł da. Áko hódahooł'aahii díí deidiizts'ą́ą́'.

¹⁵Áko Jerúsalemdi jíkai. Áádóó kin bii' sohodizin bił haz'ą́ą́ góne' yah ajííyáago, ákóne' baa nida'iiniihígíí índa nida'iiłniihígíí ch'ízhneełkaadgo baa nízdiidzá, áádóó bikáa'gi béeso ałghááda'a'nilígíí índa hasbídí baa nidahaniihii yikáá' dah naazdáhígíí naa'adziistł'ííd,

¹⁶áádóó kin bii' sohodizin bił haz'ą́ągi ha'át'íhígíida doo naalyée da doogo bee hojiił'a'.

¹⁷Áádóó naz'neeztą́ą'go ábijiní, Da' kót'éegoósh doo bee ak'e'ashchį́į da, Shikin éí ał'ąą dine'é t'áá ałtso bá kin bii' sohodizin wolyée doo? Nidi aghada'ii'níiłii be'a'áán ádaahłaa lá.

¹⁸Áko bee haz'áanii yínda'niłtinii índa aláahgo nááda'iiłniihii éidí deidiizts'ą́ą́', áko ha'át'éegoda dahodiyoołhéłígíí ch'ééh yaa nídaast'įįd, háálá diné t'áá ałtso hana'nitin bik'ee t'óó bił adahayóigo biniinaa hwéédaaldzid.

¹⁹Áko t'áá aná'át'ááh bik'eh kin haal'áhídóó ch'ééjídááh.

²⁰Áádóó abínígo fig sikaadígóó níjookah, nít'éé' t'áá bihétł'óóldę́ę́' sigango dajiiłtsą́.

²¹Áko Peter yénáálnii'go áhodííniid, Shoo, Na'nitiní! Fig sikaadii nichxǫ́'ógo bá háínídzí'ígíí sigan lá.

²²Áko hach'į' hanáánáádzíi'go áháłní, Diyin God deinohdlą́ągo baa dadzíínóhłí.

²³T'áá aaníígóó ánihidishní, T'áá háiida díí dziłígíí, Dah ni'doot'aahgo tónteel biih nidi'yólghan, yidííniidgo áádóó bee hadzoodzí'ígíí bohodoolnííł jinízingo hajéí t'áadoo bił naaki nilíní joodlą́ągo éí há bohodoolnííł.

²⁴Éí bąą ánihidishní, T'áá ha'át'íhída dayínóhkeedgo bíká sodadołzinígíí éí t'áá íídą́ą́' nihaa deet'ą́ągo deinohdlą́ą le', áko danihíí' dooleeł.

²⁵Áádóó t'áá sodadołzin bik'eh ła'da t'áá baaní hólǫ́ǫgo bik'ijį' danohłínígíí bá yóó'anídahidoh'aah, áko doo ákǫ́ǫ́ ádaahdzaaígíí nihiTaa' yá'ąąshdi hólóonii nihá yóó'ánéididoo'ááł.

²⁶[Nidi náánáła' diné nihich'į' bąąhági ádaadzaii doo bá yóó'anídahidoh'aahgóó nihiTaa' yá'ąąshdi hólóonii ałdó' bąąhági ádaoht'įįdii doo nihá yóó'anéididoo'áał da.]

²⁷Áádóó Jerúsalemdi náájíkai. Áko kin bii' sohodizin bił haz'ą́ą́ góne' joogáałgo aláahgo nááda'iiłniihii áádóó bee haz'áanii yínda'niłtinii índa diné yá aląąjį' naazíinii haa yíkaigo

²⁸ádahałní, Ha'át'íí bee óhólnííh shį́įshą' bik'ehgo díidí baa naniná, áádóó háishą' díí bee óhólnííh neidiní'ą́ągo bik'ehgo baa naniná?

²⁹Áko Jesus áháłní, Shí ałdó' łahgo nanihídídéeshkił, bee shił dahoołne'go índa shí ałdó' bee óhólnííh bik'ehgo díidí baa naasháhígíí bee nihił hodeeshnih.

³⁰John lá háádę́ę́' bee óhólníihii bik'ehgo tó yee asį́į́h nít'éé', yá'ąąshdę́ę́' daats'í, éí doodaléi' diné bits'ą́ą́dóó daats'í? Bee shił dahołne'.

³¹Áko yaa nídaat'į́įgo ádaaní, Yá'ąąshdę́ę́' dadii'niidgo la', ádidooniił, Ákoshą' haa yit'éego doo dahwiisoohdląąd da?

³²Doodaléi', Diné bits'ą́ą́dóó, dadii'niidgo la', diné yéédaaldzid, háálá diné t'áá ałtso John t'áá aaníí Diyin God yá halne'ii nilį́į́ nít'éé' dayó'ní.

³³Áko Jesus yich'į' hadaasdzíi'go ádaaní, Doo nihił béédahózin da. Áko Jesus áhodííniid, Shí ałdó' bee óhólnííh bik'ehgo díidí baa naasháhígíí doo bee nihił hodeeshnih da.