Read Navajo MARK 15 Bible Online

MARK 15 - Navajo bible

MARK 15

¹T'áá áko abínígo aláahgo nááda'iiłniihii éí diné yá aląąjį' naazíinii áádóó bee haz'áanii yínda'niłtinii índa diné ándaha'áii t'áá át'é áłah silį́į'go haa nídaast'įįd, áko Jesus yeda'aztł'ǫ́ǫgo dah deidiilóóz, áádóó Páílat yaa dahodeez'ą́.

²Áko Páílat nahódééłkidgo áháłní, Da' niísh Jew dine'é Aláahgo biNanit'a'í nílį́? Áko ábizhdííniid, Jó, bee háínídzíí'.

³Áádóó aláahgo nááda'iiłniihii lą'ígóó hak'i dahodii'ą́. [Nidi t'áadoo hadzoodzíi' da.]

⁴Áko Páílat kóníigo ninááhódééłkid, Da' niísh doo t'ą́ą́' háádíídzih da? Jó'akon, haa shį́į́ néelą́ą́' yee nik'ídaha'ááh.

⁵Nidi Jesus t'áadoo hach'į' hanáádzíi' da, áko Páílat díidíígíí yik'ee t'óó bił ahayóí.

⁶Áko hodílzingo áłah ná'ádleeh baa náhwiilzhíishgo, Páílat éí awáalyaaí t'ááłá'ígo t'áá diné bíndayóki'ígíí yá ch'éiyiiłt'e' łeh.

⁷Íídą́ą́' nidaachxǫ'go naat'áanii yił da'ahigą́ągo awáalyaa shijé'ígíí bitahdóó diné ła' iisxíinii nilį́įgo Barábas wolyéé lá.

⁸Áko diné lą'í áłah nilínígíí Páílat yaa nísą́ągo [hadadeeshghaazhgo] ádeiłní, T'áá nihá ánánít'įįhígi át'éego nihá ánáádíí'nííł.

⁹Nít'éé' áhodííniid, Da' Jew dine'é Aláahgo biNanit'a'í nilíiniísh nihá béédíshchííd?

¹⁰Háálá aláahgo nááda'iiłniihii dahoołch'į́įdgo biniinaa haa deizlóozgo hoł bééhózin.

¹¹Nidi aláahgo nááda'iiłniihii éí áłah nilínígíí yíni' yá ádahoolaago, Éí dooda, Barábasgo nihá ch'ééníłt'e' dadidoohniił, deidííniid.

¹²Ákoshą' Jew dine'é Aláahgo biNanit'a'í dabidohnínígíí haa deeshłííł? hałníigo Páílat hach'į' hanáánáádzíí'.

¹³Áko, Tsin ałnáoszid bikáa'jį' bił o'ołkaałgo sołhé, daaníigo hanáádadeeshghaazh.

¹⁴Nít'éé' Páílat ájíní, Ha'át'éegoshą'? Ha'át'íí doo aaníí shį́įshą' yaa naayá? Nidi, Tsin ałnáoszid bikáa'jį' bił o'ołkaałgo sołhé, daaníigo t'ah yówehígo hanáádadeeshghaazh.

¹⁵Áko Páílat éí áłah nilínígíí k'adę́ę bíni' bá bi'jilééh biniyé Barábas bá ch'éézhníłt'e', nidi hazaad k'ehgo Jesus nibí'íltsxasgo tsin ałnáoszid bikáa'jį' hoł ida'doolkał biniyé baa hozhdiní'ą́.

¹⁶Ákohgo naat'áanii bikin, éí Priitóriyam hoolyéé góne' yah adahazlóozgo, siláo t'áá yinélee haa áłah ádayiilaa.

¹⁷Áko éénééz tsídídééh nahalingo łichí'ígíí yee hadahodiilaa, áádóó ch'il hooshahii nídeiniisxodgo ch'ah ádayiilaago hak'i deideez'ą́.

¹⁸Áko hach'į' nehekáahgo, Yá'át'éhéi, Jew dine'é Aláahgo biNanit'a'í nílíinii! dahałníigo haa nídiikai.

¹⁹Áko lók'aatsoh yee hatsiits'iin nínádeidiiłhał, áádóó hak'ídahidizheeh, índa hach'į' nitséédadigohgo hach'į' nidahałá.

²⁰Índa há nidahast'i'dóó bik'ijį', éénééz tsídídééh nahalingo łichí'ígíí haa nídeidiiłtsoozgo t'áá hó ha'éé' yee háádahodiidlaa. Áádóó tsin ałnáoszid bikáa'jį' hoł ada'doołkał biniyé ch'ídahazlóóz.

²¹Nít'éé' Sairíin hoolyéédę́ę́' diné léi' Sáíman wolyéego, Alezáander áádóó Rúfas bizhé'é nilį́įgo dáda'ak'ehdę́ę́' yigááł, áko, Tsin ałnáoszid yítį́į́ł, deiłníigo áajį' adeineeshchą́ą́'.

²²Áko Gálgatha hoolyéejį' adahazlóóz, éí tsiits'in si'ání jiníigo óolyé.

²³Áádóó wáin, jeeh mir wolyéii bił ałtahgo jidoodlį́į́ł biniyé haa deizką́, nidi doo jinízin da.

²⁴Áko tsin ałnáoszid bikáa'jį' hoł ada'askaal, índa ha'éé' t'ááłá'í níłtsoozígo yiniyé yáá'iilt'e' yaa naaskaigo ałtaadeis'nii'.

²⁵Abínígo náhást'éigi oolkiłgo tsin ałnáoszid bikáa'jį' hoł ada'askaal.

²⁶Yee hak'i dahodii'ánígíí éí, Jew dine'é Aláahgo biNanit'a'í, níigo bee ak'e'ashchį́.

²⁷Áádóó ani'įįhii nidilt'éego ałdó' t'áá ał'ąą tsin ałnáoszid bikáa'jį' bił ada'askaal, ła' éí honish'náájí dah hidiilt'e', ła' éí honishtł'ají.

²⁸[Áko, Bee haz'áanii yilááh nidahideestáalii bił bi'déélta', níigo bee ak'e'ashchínígíí bohoolyaa.]

²⁹Áko hwíighah dahidikáhígíí há nidahałt'i'go bitsiits'iin deiłne'go ádaaní, Há háa! Kin bii' sohodizin atídeeshłííł, áádóó táá' yiską́ąjį' ninádeesh'ááł dííníniidii,

³⁰tsin ałnáoszid bąąhdę́ę́' hadáánídáahgo yisdá'ádílteeh.

³¹T'áá ákót'éego ałdó' aláahgo nááda'iiłniihii áádóó bee haz'áanii yínda'niłtinii há nidahałt'i'go áda'ahidi'ní, Náánáła' yisdánídziiznil nidi, t'áá hó t'éí doo yisdá'ázhdóltééł át'ée da.

³²K'ad Christ, Ízrel dine'é Aláahgo biNanit'a'í jílíinii háni'dii dahoníil'į́įgo tsin ałnáoszid bąąhdę́ę́' hadajighááh, áko índa dahwiidiidląął. Áádóó nidilt'éego, hoł bił ada'askaalígíí ałdó' hóó'įįd.

³³Nít'éé' ałní'ní'ą́ą́dóó táadi ahéé'ílkidjį' t'áá át'éé nít'éé' chahóółhéél.

³⁴Áko tá'ígi oolkiłgo Jesus yéego hadoolghaazhgo ání, Éílii, Éílii, lama sabákthanii? Éí, ShiDiyin God, shiDiyin God, ha'át'éegoshą' yóó'ashidííní'ą́? jiníigo óolyé.

³⁵Áko ła' ákǫ́ǫ́ naazínígíí éí deidiizts'ą́ą'go, Jó'akon, Iiláíjah yíká ání, dadííniid.

³⁶Áko ła' dah diilwodgo tó náyiits'ǫsígíí ch'il na'atł'o'ii bitoo' dók'ǫ́zhígíí yénéíz'ą́, áádóó lók'aatsoh bílátahgi dah yiz'ą́ągo bąąh jidoots'ǫs biniyé haa yí'níłtsih kóníigo, Átsé, t'áadoo baa nídaaht'íní, haa'íshą' Iiláíjah daats'í haa doogáałgo adahodoołtééł dadíníil'įįł.

³⁷Nít'éé' Jesus yéego hazhdoolghaazhgo hajííyol.

³⁸Áko kin bii' sohodizin biyi' góne' ach'ą́ą́h naníbaal wódahdę́ę́' yaago ałch'áádláád.

³⁹Ákohgo siláo neeznádiingo binanit'a'í hadááhdę́ę́' sizínígíí ákót'éego [hazhdoolghaazh áádóó] hajííyolgo yiyiiłtsą́ągo ání, T'áá aaníí, díí diné Diyin God biYe' nilį́į́ nít'éé' lá.

⁴⁰Ákwe'é ałdó' asdzání ła' Mary Mágdaliin áádóó Mary, éí James akéédę́'ígíí áádóó Jóses bimá, índa Salómii nízaadę́ę́' dadéez'į́į'go atah naazį́.

⁴¹Éí díí asdzání, Gáliliidi nijighá yę́ędą́ą́' hakéé' naakaigo há nidaal'a' nít'éé', áádóó asdzání náádaała' lą'í Jerúsalemgi bił jíkaígíí ałdó' áadi atah naazį́.

⁴²Áko hííłch'į'go hasht'ehodi'nééh bijį́, jó, éí biiskání háá'áyį́į́h jį́ dooleełgo bąą,

⁴³Arimathíya hoolyéédę́ę́' Jóseph éí diné ándaha'áii bitahdóó hastóí ílíinii jílį́, hó ałdó' Diyin God bee bóhólníihgo bił haz'áanii nijólí, áko éí t'áadoo dzisti'í Páílat baazhníyáago Jesus bits'íís yę́ę bíjííkeed.

⁴⁴Áko Páílat, t'áá daats'í íídą́ą́' dadziztsą́ niizį́į'go t'óó bił ahayóí, áko siláo binanit'a'í hágo yidííniid, T'áá daats'í íídą́ą́' dadziztsą́, níigo nayídééłkid.

⁴⁵Áko siláo binanit'a'í bits'ą́ą́dę́ę́' náhóóne'go índa Jesus bits'íís yę́ę Jóseph yeidiní'ą́.

⁴⁶Áádóó Jóseph éí áłts'óózígo yisdizígíí bee na'at'ą́hí łigaii dits'idgo ályaii nayiisnii', áádóó tsin ałnáoszid bąąhdę́ę́' nayííłtį́įgo éí yił yizdis, índa tséní'ootséél góne' ayííłtį́įgo tsé yidéidiníłmááz.

⁴⁷Áko Mary Mágdaliin índa Mary, Jóses bimá éí niho'deeltínígi bił bééhoozin.