Read Navajo MARK 3 Bible Online

MARK 3 - Navajo bible

MARK 3

¹Kin bii' áłah ná'ádleeh góne' Jesus yah anáádzoodzáago ákwe'é diné bíla' t'ááłáhájígo bąąh dah haz'ą́ą́ léi' sidáá lá.

²Áko t'áá ałtso hadahasíidgo ádeinízin, háá'áyį́į́h jį́į́ góne' daats'í náábizhdidoołááł, díí yee hak'i dahodidoo'ááł biniyé.

³Áko diné bíla' bąąh dah haz'áanii hágo yidííniid.

⁴Áádóó Férisii danilíinii nayídééłkid, Háá'áyį́į́h jį́į́ góne' daats'í yá'át'éehgo ázhdoonííł, doodaii' atízh'doolíiłgo daats'í bee haz'ą́; hináanii yisdázhdoołtééł, doodaii' azhdiyoołhéełgo daats'í bee haz'ą́? Nidi t'áadoo hadaasdzíi' da.

⁵Áádóó doo binídahaz'áágóó bąąh háni'go doo hoł hózhǫ́ǫ́góó bitah dzideezghalgo diné bíla' bąąh dah haz'ánígíí ábijiní, K'ídílchííd. Áko k'ídeeshchidgo bíla' hadaałt'é násdlį́į́'.

⁶Áádóó Férisii danilíinii ch'ékaigo ha'át'éegoda dahodiyoołhéłígíí yee hondahaz'ą́ągo Hérad yich'ijí danilínígíí t'áá áko yił haa nídaast'įįd.

⁷Áko Jesus bídahooł'aahii be'ek'idgóó yił dah diikai, áko t'óó ahojíyóí Gáliliidę́ę́' bikéé' nidziiskaii áádóó Judíyadę́ę́'

⁸áádóó Jerúsalem kin haal'áhídę́ę́' áádóó kéyah Idumíya hoolyéédę́ę́' áádóó Jórdan tooh wónaanídę́ę́' áádóó Táir índa Sáídan kin haal'áhídę́ę́' t'óó ahojíyóí Jesus yaa naagháhígíí t'áá ałtso dajíínii'go baa dziiskai.

⁹Áádóó t'óó ahojíyóigo bąą doo dahozhdoołjish da biniyé, hódahooł'aahii ábizhdííniid, Tsinaa'eeł yázhí ła' kojį' shá ninoł'eeł,

¹⁰háálá lą'í náádabizhdiiłjée'go, ka nidaakaígíí t'áá ałtso hodadidiilchił danízingo hak'ijį' da'ahiljizh.

¹¹Áádóó níłch'i danchxǫ́'ígíí nídahoołtséehgo hayaajį' anída'diilghą́ąhgo éí yéego háádadilwoshgo ádaaní, Diyin God biYe' nílíinii ánít'į́.

¹²Áádóó bich'į' hadzoodzíi'go ábijiní, T'ááká shaa ch'ídahooh'ááł lágo.

¹³Áádóó Jesus dayílk'idgóó ajííyáago t'áá hóznízinígíí hágo bizhdííniid, áko éí haa haaskai.

¹⁴Áádóó diné naakits'áadah bił nijikai dooleełgo éí Diyin God bizaad yaa dahodoolnihgóó ahizhdooł'aał biniyé bits'ázhnínil,

¹⁵áádóó bee óhólníihii bee dahólǫ́ǫgo [bąąh dah nahaz'áanii hadaałt'é anídeidle', áádóó] níłch'i bida'iiníziinii bii' dahólóonii yii'dę́ę́' hadeiniiłkaad doo ałdó' biniyé bits'ázhnínil.

¹⁶Sáíman wolyéhígíí Peter ałdó' bee jíízhi';

¹⁷Zébedii biye'ké James índa yił háá'áázh John, éí Bowanérjiiz ałdó' bizhdííniid, éí ii'ni' biye'ké jiníigo óolyé;

¹⁸Andrew, áádóó Philip, áádóó Barthálemew, áádóó Matthew, áádóó Thomas, áádóó James éí Alfíyas biye', áádóó Thádiyas, áádóó Sáíman éí Kéínan dine'é jílínígíí,

¹⁹índa Júdas Iskáriyat, éí nináhodidoo'áłígíí, díí t'áá ałtso bits'ázhnínil. Ákohgo kin góne' Jesus bił yah ajookai.

²⁰Diné yíl'áhígíí haa áłah náánásdlį́į'go doo da'jóyą́ą́' ádzaa da.

²¹Áko hak'isóó danilínígíí dayíínii'go dahwiidoołtsoł yiniyé haa yíkai, háálá ła' ádaaní, Tsizh'deeyáá lá.

²²Áádóó bee haz'áanii yínda'niłtinii Jerúsalemdę́ę́' yíkaígíí ádaaní, Béíyalzííbab hwii' hólǫ́ǫ́ lá, áko níłch'i bida'iiníziinii binanit'a'í bee níłch'i bida'iiníziinii ayi'dę́ę́' hahizhniłkaad lá.

²³Áko bee haz'áanii yínda'niłtinii hágo bizhdííniidgo hane' bee ak'idi'dootį́įłii binahjį' ábijiní, Haash yit'éego Séítan t'áá bí ha'ídínóolchééł?

²⁴Jó, ła' dine'é t'áá bił dah nahaz'ą́ą́góó t'áá bí ałk'i néijahgo éí doo didoonaał da.

²⁵Áádóó łahgo hooghandóó t'áá bí ałk'i néijahgo doo bee hodidoonaał da.

²⁶Áko Séítan t'áá bí ách'į' nídiibaa'go áádóó ák'inéilwodgo ałdó' doo didoonaał da, nidi bá nihodoot'ih.

²⁷Diné bidziilii bighan góne' diné ła' doo yah adoogáałgo binaalye'é yighaidiyoo'nił da, t'áá hazhó'ó diné bidziilii átsé yi'dootł'óół, áádóó índa bighandę́ę́' binaalye'é yits'ą́ą́' ch'íidiyoojih.

²⁸T'áá aaníígóó ánihidishní, Diné yee bąąhági ádaat'íinii ts'ídá t'áá ałtso, áádóó Diyin God baa'ihgo bá yáti' t'áá ałtso éí bá yóó'anídahidit'aah dooleeł,

²⁹nidi t'áá háiida Níłch'i Diyinii baa'ihgo yá hahadziihígíí, éí ts'ídá doo bá yóó'anídidoot'áał da, nidi éí hool'áágóó bąąhági át'éii bee ádąąh dah hodzist'ą́,

³⁰háálá bee haz'áanii yínda'niłtinii, Níłch'i nichxǫ́'ígíí hwii' hólǫ́ǫ́ lá, daaní.

³¹Áádóó hamá índa hatsilíké ákwe'é yíkai, áko tł'óo'di naazį́įgo hágo dahałníigo hach'į' yah ada'as'a'.

³²Áádóó diné t'óó ahayóí hanaagóó naháaztą́ągo ádahodííniid, Tł'óo'di nimá áádóó nitsilíké níkadantá.

³³Áko ábijiní, Háishą' shimá índa shitsilíké danilį́?

³⁴Áko hanaagi naháaztánígíí bitah dzideezghalgo ázhdííniid, Jó, kǫ́ǫ́ shimá áádóó shitsilíké!

³⁵T'áá háiida Diyin God íinízinii bida'jił'ínígíí éí shitsilí índa shideezhí índa shimá jílį́.