Read Navajo MARK 4 Bible Online

MARK 4 - Navajo bible

MARK 4

¹Be'ek'id bąąhgi Jesus nínáázhdí'níitą́ą́'. Áko diné t'óó ahayóí haa áłah silį́į́', éí bąą tsinaa'eeł biih jííyáago bii'dóó dah dzineezdá, áko diné áłah silį́'ígíí t'áá át'é tábąąhgóó yíl'á.

²Nít'éé' hane' bee ak'idi'dootį́įłii lą'ígóó bee naz'neeztą́ą́', áko nazh'nitingo ábijiní,

³Da'íísółts'ą́ą́'! K'éé'dídléehii léi' álástsii' k'iididoolééłgóó ch'íníyá.

⁴Áko álástsii' ła' nihiyiiłkaad, nít'éé' ła' atiinjį' ahineezdee'. Atiinjį' ahineezdee'ígíí tsídii nidahaast'a'go ałtso yaa nahodeeskai.

⁵Náánáła' tsétahjį' ahineezdee', ákwe'é łeezh doo hózhǫ́ hólǫ́ǫ da, áko łeezh doo ditánígíí biniinaa t'áadoo hodíína'í hadaneesą́,

⁶áko doozhǫǫgo dah adii'ą́ągo, hadaneesánígíí yideez, índa bihétł'óól ádingo biniinaa daniiłna'.

⁷Náánáła' ch'il dadeeníinii bitahgóó ahineezdee', áko ch'il dadeeníinii bilááh daneesą́ągo ałtso bííghą́ą́', áko t'áadoo bineest'ą' dahazlį́į' da.

⁸Índa náánáła' łeezh yá'át'éehjį' ahineezdee'go dadínéesą́ą́dóó nidahineesą́ągo bineest'ą' dahazlį́į́', ła' tádiindi, ła' hastą́diindi, ła' neeznádiindi bilááh nídaasdlį́į́'.

⁹Áko ázhdííniid, T'áá hajaa' hólǫ́ǫgo azdiits'a'ígíí háni' ajíists'ą́ą́'.

¹⁰Áádóó t'áá sáhí dzizlį́į'go, t'áá ákǫ́ǫ́ hanaagóó naakits'áadahígíí áádóó yił naháaztánígíí hane' bee ak'idi'dootį́įłii yíndahódééłkid.

¹¹Áko ábizhdííniid, Diyin God bee bóhólníihgo bił haz'áanii bee na'nitinii doo bééhózin daígíí nihich'į' ííshją́ą́ ádaalyaa, nidi doo nihich'ijí danilíinii bich'į'go t'éiyá t'áá ałtso hane' bee ak'idi'dootį́įłii át'éego bee bił dahane',

¹²áko dazhníł'į́į nidi doo deizdoołtséeł da, dazdiits'a' nidi doo bik'idazhdi'dootį́įł da; doodaii' bąąhági ádadziidzaaígíí bits'ą́ąjį' ninázhdookah, áádóó há yóó'anídahididoot'ááł.

¹³Áko Jesus áhodííniid, Da' díí hane' bee ak'idi'dootį́įłiísh t'áadoo bik'ida'dootą́ą da? Ákoshą' haa yit'éego hane' bee ak'idi'dootį́įłii t'áá ałtso bik'idadi'doohtį́į́ł?

¹⁴K'éé'dídléehii éí Diyin God bizaad k'iidilé.

¹⁵Áko díí saad k'idoolyáhígi ła' atiinjį' ahineezdee'ígíí ádaat'é; éí saad t'áá deidiits'į́į́hgóó, t'áá áko Séítan yigháahgo dabijéí biyi'di k'idoolyáhígíí hááyii'nííł.

¹⁶Áádóó t'áá ákónáánát'éego tsétahgóó ahineezdee'ígíí éí saad t'áá dazdiits'į́į́hgóó, t'áá áko baa hoł dahózhǫ́ǫgo nídazhdiiléhígíí ádaat'é,

¹⁷áko dahayi'di ahétł'óól ádaadin, nidi t'óó kónígháníjį' hwee dahodina', áko nít'éé' saadígíí biniinaa hach'į' nidahwii'náago, doodaii' atídaho'dil'į́įgo haa ní'diildahgo t'áá áko bits'áníjiijeeh.

¹⁸Áádóó ła' ch'il dadeeníinii bitahgóó ahineezdee'ígíí éí saad deidiits'į́į́h,

¹⁹nidi nahasdzáán bikáa'gi bee da'iináanii baa nitsáhákees, áádóó at'į́ hodíní'ah, índa t'áá ałtso bidáhoneení ghadahodiit'aahgo éí saad yę́ę deighą́, áko doo bineest'ą' dahaleeh da.

²⁰Nidi łeezh yá'át'éehii biih hineezdee'ígíí éí saad deidiits'į́įhgo nídeidiyiilééh, áádóó bineest'ą' dahaleehgo ła' tádiindi, ła' hastą́diindi, ła' neeznádiindi bilááh ninádahadleeh.

²¹Áádóó Jesus ánáádí'ní, Diné doo bee hool'iní yidiiłtłi'go tsits'aa' yił yaa nií'aah da, doo nidi tsásk'eh yiyaa ii'aah da, da' bá ya'ii'áhígíísh doo yikáa'gi dah yidoo'áał da?

²²Háálá baa hasti'go dah nool'į́įłii nidi bééhodoozįįłgo át'é, áko t'áá ha'át'íhída bik'é'ésti'ígíí hahgoda báádi'dooltsos.

²³Diné ła'da hajaa' hólǫ́ǫgo azdiits'a'ígíí éí háni' ajíists'ą́ą́'.

²⁴Áádóó Jesus ánáádoo'niid, Dadoohts'a'ígíí hazhó'ó dayísółts'ą́ą́', háálá t'áá ła' bá ída'nóoł'ąądígi ánéelt'e'go nihá índa'dí'nóol'ąął, áádóó da'doohts'a'ígíí t'áá biláahgo nidi nihaa náádidoot'ááł.

²⁵Háálá t'áá háiida ha'át'íhída hwee hólónígíí biláahgo ła' haa náádoolyééł, áádóó ha'át'íhída hwee ádinígíí, éí t'áá hwee hólónígíi nidi haghadoolyééł.

²⁶Jesus ánáádoo'niid, Diyin God bee bóhólníihgo bił haz'áanii éí kót'é: diné léi' álástsii' nihi'jiiłkaadgo k'izh'díílá.

²⁷Áko tł'ée'go ní'jiilwosh áádóó jį́įgo náázhdii'nah, áádóó álástsii' hadaneesą́ áádóó dadínéesą́, áko hada'neesánígíí índa dadí'néesánígíí t'áadoo hoł bééhoozin da.

²⁸Háálá ni' t'áá bí aneest'ą' yidínísééh, áłtsé yiitsoh áádóó bit'ąą' haleeh, náá'ákóne' bineest'ą' nááhádleeh, áádóó áadi índa ałtso nit'į́į́h.

²⁹Áádóó ant'į́įhgo iigéeshjį' ahalzhishgo, t'áá áko bee iigéshí bee aneest'ánígíí jiigéeshgo baa nízhdiidááh.

³⁰Áádóó Jesus ánáádoo'niid, Diyin God bee bóhólníihgo bił haz'áaniishą' ha'át'íí bił ahąąh nidadii'nił, áádóó hane' bee ak'idi'dootį́įłiishą' ha'át'íí bee baa dahodiilnih?

³¹Jó, éí ch'il mástad wolyéhígíí bílástsii' nahalin, háálá éí k'eelyéí dahólónígíí t'áá ałtso bi'oh áníshéhígo k'idilyééh,

³²áko k'idilyéehgo hanisééh, áko dówózhiigi áníłtsogo dahólónígíí t'áá ałtso yilááh áníłtso yileeh, áko bits'áoz'a' dantsxaaz daaleehgo bichaha'ohgóó tsídii nidahat'ahígíí bit'oh ádayiił'įįh.

³³T'áá yik'ida'dootą́'ígi át'éego hane' bee ak'idi'dootį́įłii lą'í bee diné nazneeztą́ą́';

³⁴hane' bee ak'idi'dootį́įłii t'áágéedgo diné doo nazhnitin da nít'éé', nidi hódahooł'aahii bił t'áá sáhí jileehgo, hane' bee ak'idi'dootį́įłii ááhyiłníinii hazhó'ó yaa halne'.

³⁵T'áá éí bijį́ i'íí'ą́ągo áhodííniid, Tį', be'ek'id wónaanígóó nihił adoo'oł.

³⁶Áko hódahooł'aahii diné áłah silį́'ígíí yits'ą́ąjį' dah diikaigo, tsinaa'eeł yázhí bii' dzizdáhígíí yiih yikaigo tsinaa'eeł ła' hanaagóó naaznilígíí bił wónaanígóó dah dazh'diił'éél.

³⁷Nít'éé' ayóó át'éego deeyol, áádóó tó náádadiidáhígíí tsinaa'eeł biih yilk'oołgo tsinaa'eeł k'adę́ę tó bii' hadibin.

³⁸Jesus t'éí akéédę́ę́' tsii'ááł bikáa'gi ajiłhosh, áádóó hódahooł'aahii ch'éédahasidgo ádahodííniid, Na'nitiní, da' tó nihidooghą́łígíísh doo ni'diił'áa da?

³⁹Áko ch'éédzídzidgo níyol dzideeztehgo tó ábijiní, K'adí! Hasht'edít'eeh! Áko ííyol, índa t'áá íiyisí hodiiyeel.

⁴⁰Áko Jesus áhodííniid, Ha'át'íishą' biniyé nídaałdzid? Da' t'ahdii nidiísh doo da'iinohdlą́ą da?

⁴¹Áko hódahooł'aahii t'áá íiyisí nídaaldzidgo áda'ahidoo'niid, Ákoshą' díí lá háí át'į́įgo, níyol áádóó tó nidi bik'eh dahół'į́?