Read Navajo MARK 5 Bible Online

MARK 5 - Navajo bible

MARK 5

¹Nít'éé' be'ek'id wónaaníjį' Gádara dine'é bikéyahjį' ha'naa nida'dzis'éél.

²Tsinaa'eeł biyi'dę́ę́' hajííyáago t'áá áko dajishcháá'dę́ę́' diné léi' níłch'i nichxǫ́'í tsi'nabiiłáago hadááh yílwod,

³éí dajishcháá'góó t'éí naagháá lá, áádóó diné doo ła' be'ótł'óół át'ée da, béésh da'ahólzha'ígíí bee nidi dooda,

⁴háálá lą'ídi akétsíín niná'niłí bąąh nii'nil, áádóó béésh bee béé'átł'óóh nidi, béésh niyiiníísh, áádóó akétsíín niná'niłí neheltǫ', áko diné ła'da doo bik'eh dódle' át'ée da.

⁵Tł'ée'go índa jį́įgo t'áá áłahjį' dilwoshgo tsé yee ni'ídiilgéeshgo dziłgóó áádóó dajishcháá'góó naaghá.

⁶Nít'éé' t'áá nízaadę́ę́' Jesus yiyiiłtsą́ągo yich'į' nídiilwod, áádóó nitsidinígo'go hach'į' nahasáago

⁷yéego hadoolghaazhgo ání, Jesus, Diyin God Aláahgo Ayóó'át'éii biYe' nílíinii, haashą' shíléehgo ánít'į́? Diyin God binahjį' nánooshkąąh, atíshóólééh lágo.

⁸Háálá díí t'ah bítséedi Jesus ábidííniid, Níłch'i nichxǫ́'í nílíinii, diné bii'dę́ę́' haninááh!

⁹Áko, Haashą' yinílyé, jiníigo nabízhdééłkid. Áko ánáádoo'niid, Lą'í yinishyé, háálá t'óó ahonii'yóí.

¹⁰Áádóó t'áá íiyisí Jesus náyookąąhgo ání, Díí kéyahígíí bits'ánihinóółkaad lágo.

¹¹Nít'éé' ákwe'é yílk'id binániigi bisóodi da'ałchozhgo lą'í naakai,

¹²áko níłch'i danchxǫ́'í nídahookąąhgo ádaaní, Bisóodi bich'į' danihidíł'á, éí biih hidiijah.

¹³Áko bazh'di'ní'ą́ągo níłch'i danchxǫ́'í éí diné yii'dę́ę́' hahaazhjée'go bisóodi yiih heezhjéé', áádóó bisóodi t'áá ałtso bidah ch'ééjée'go be'ek'id yiih heezhjéé', áko tó dabííghą́ą́'. Éí bisóodi naakidi mííl daats'í nít'éé'.

¹⁴Áko bisóodi baa ádahojilyánígíí dashdiijée'go kin haal'áagi áádóó binaagóó baa nidahodzisne'. Áko díí áhóót'įįdígíí nihił béédahodoozįįł danízingo diné ła' ákǫ́ǫ́ yíkai.

¹⁵Áko Jesus baa dziiskaigo diné níłch'i bida'iiníziinii lą'í bii' hólǫ́ǫ́ nít'éé' yę́ę bi'éé' hólǫ́ǫgo áádóó bintsékees yá'át'éehgo índa hasht'edít'éego ákwii sidáago dajiiłtsą́, áko t'áá ádzíłtso t'óó hayadahodeesyiz.

¹⁶Áádóó dabíínáłígíí diné éí níłch'i bida'iiníziinii bii' hólǫ́ǫ́ nít'éé' yę́ę ádzaaígíí índa bisóodi ádaadzaaígíí t'áá ałtso baa nidahodzisne'.

¹⁷Áko nídahojookąąhgo, Nihikéyahdóó nówehjį' haninááh, dahojiníigo haa nízhdiikai.

¹⁸Áko tsinaa'eeł biih jigháahgo níłch'i bida'iiníziinii bii' hólǫ́ǫ́ nít'é'ígíí náhookąąhgo áháłní, Nikéé' naasháa doo.

¹⁹Nidi Jesus t'áadoo ha'di'ní'ą́ą́góó kóhodííniid, Nílááh, nighangóó nik'éí bich'į' nídídáahgo ayóó ádaat'éii Bóhólníihii ná yaa naayáhígíí índa yee naa joozba'ígíí bee bił dahólne'.

²⁰Áko dashdiiyáago kéyah Diikápolis hoolyéégóó t'áá át'éé nít'éé' Jesus ayóó át'éii há yaa naayáhígíí baa hojilne'go tázhdíghááh, áko diné t'áá ałtso t'óó bił adahayóí.

²¹Áádóó be'ek'id tsé'naagóó Jesus hoł niná'ní'éelgo, diné t'óó ahayóí haa nánízą́, áko be'ek'id bibąąhgi dzizį́.

²²Áko diné áłah ná'ádleehgo á dah náńdaahígíí ła', Jéí'iras wolyéhígíí, níyáago, hoołtsą́ągo hach'į' nitsidinígo',

²³áádóó t'áá íiyisí náhookąąhgo ání, Shitsi' áłts'íísígíí bi'niitsą́. Tį' ákǫ́ǫ́, hadaałt'é nídoodleełígíí biniyé bik'i dah didíílnih, áko náádidoodáałgo hináa doo.

²⁴Áádóó ákǫ́ǫ́ Jesus hoł dah dii'áázh. Áko diné t'óó ahayóí hakéé' yikahgo hoł dinííyił.

²⁵Nít'éé' ákwe'é asdzání léi' dił bigháńdiniiltałgo naakits'áadah nááhai lá,

²⁶áko azee' ádeił'íní lą'í ch'ééh ádahóół'įįdgo biniinaa ałtso ádaa nahozdeesdzá, nidi t'áadoo náázdiidzáa da, nidi t'óó tsé'édinda ádziidzaa.

²⁷Nít'éé' Jesus baa hojíínii', áko diné ahénál'áago Jesus bine'dę́ę́' nizhníyáii' bi'éé' bizhdeelchid.

²⁸Háálá ájíní, Bi'éé' t'éiyá bidinishchid nidi hadaałt'é nídeeshdleeł.

²⁹T'áá áko dił haghánílínígíí ásdįįd, áko hąąh dah haz'ánígíí náázdiidzáago hoł bééhoozin.

³⁰Áko Jesus bee adziilii hats'áhoníle'go baa ákozniizį́į'go honás'áhígíí bich'į' nídzízyizgo ájíní, Háishą' shi'éé' yideelchid?

³¹Áko hódahooł'aahii ádahodííniid, Jó, diné ninás'áhígíí nił bééhózin. Ha'át'éegoshą' háí shideelchid diní?

³²Nidi hodeelchidígíí yizdoołtsééł biniyé diné bitaa dzizghal.

³³Nít'éé' asdzání doo át'éhí da áho'diilyaaígíí hoł bééhózingo, nídzíldzidgo hatah hoditłidgo Jesus baazhníyáago biyaajį' nitsizhdinígo', áko t'áá ałtso t'áá aaníígóó bee bił hojoolne'.

³⁴Áko asdzání ábizhdííniid, Shitsi', ne'oodlą' bee doo ánít'éhí da násínídlį́į́'; nił hózhǫ́ǫgo náádááł, áádóó nąąh dah haz'ą́ nít'é'ígíí bits'ą́ąjį' hadaníłt'ée doo.

³⁵Áko Jesus t'ah yájíłti'go diné ła' Jéí'iras bighandę́ę́' yíkaigo ádaaní, Nitsi' daaztsą́. T'áásh doo biniyéhégóó Na'nitiní baa nínáánít'į́į dooleeł?

³⁶Nidi ha'oodzí'ígíí Jesus doo yaa ná'áhodílt'į́į́góó áłah ná'ádleehgo á dah náńdaahígíí áyidííniid, T'áadoo nił yé'í, t'óó iinídlą́ągo aa dzíínílí.

³⁷Áko diné doo ła' hakéé' yigáał da dooleełgo ájiilaa, t'áá hazhó'ó Peter áádóó James índa James bitsilí John t'éiyá bił ákǫ́ǫ́ jíkai.

³⁸Áko áłah ná'ádleehgo á dah náńdaahígíí bighandi jíkai, nít'éé' diné hahóół'áago ła' daacha índa ła' ayóó íits'a'go ák'idadiit'aahgo jiiłtsą́.

³⁹Áko yah ajííyáago ábizhdííniid, Ha'át'íishą' biniyé hahooł'áago daahcha? At'ééd doo daaztsą́ą da, nidi t'óó ałhosh.

⁴⁰Áko t'óó há nidahałt'i'go haa daadloh. Nidi t'áá ádzíłtso ch'íhonizhníłkaadgo at'ééd bizhé'é índa bimá áádóó bił nijikaígíí t'éiyá at'ééd sitíní góne' bił yah ajookai.

⁴¹Áko at'ééd bíla' jiiłtsoodgo ábijiní, Talétha kóomii, éí, At'ééd, nídiidááh nidishní, jiníigo óolyé.

⁴²T'áá áko at'ééd nídii'na'go dah diiyá, háálá éí naakits'áadah binááhai. T'áá áko t'áá ádzíłtso t'áá íiyisí t'óó hoł adahóóyóí.

⁴³Áko Jesus hach'į' haadzíi'go áháłní, T'ááká diné ła'da bił dahoołne' yíila', áádóó ábizhdííniid, At'ééd ba'nołtsóód.