Read Navajo MARK 7 Bible Online

MARK 7 - Navajo bible

MARK 7

¹Áko Férisii danilíinii áádóó bee haz'áanii yínda'niłtinii ła' Jerúsalemdę́ę́' neheeskaígíí Jesus yaa áłah silį́į'go,

²hódahooł'aahii ła' Jew dine'é binahagha' bik'ehgo yílá tánágisígíí t'áadoo yida'aléhí ida'niiyą́ą́' nít'éé', éí dayiiłtsą́ągo [doo bił adaaníi da].

³Háálá bizází yę́ę bi'é'él'į' bik'ehgo Férisii áádóó Jew dine'é danilíinii t'áá ałtso bíla' t'áadoo táádeigisí doo da'ayą́ą da,

⁴áádóó ałdó', nida'iiniihdę́ę́' nináhákáahgo binahagha' bik'ehgo t'áadoo tá'ádadigisí doo da'ayą́ą da, áádóó bizází yę́ę bi'é'él'į' ałdó' lą'í yida'ał'į́, jó, éí bee adlání áádóó łeets'aa' índa łeets'aałtsooí tánágis ádaat'éiida.

⁵Áko Férisii índa bee haz'áanii yínda'niłtinii nidahódééłkidgo ádaaní, Ha'át'éegoshą' nídahooł'aahii nihizází yę́ę bi'é'él'į' doo yik'ehgo dayíkááhgóó bíla' t'áadoo táádeigisí da'ayą́?

⁶Áko ábijiní, T'áá bee ak'e'ashchínígi át'éego nihí t'óó ádahodoł'íinii, Aizéíyah ts'ídá niheełt'éego t'áá nihítséedi nihaa hoolne': Díí diné t'áá bizábąąhídóó t'éiyá yee shił danilį́, nidi dabijéí doo yee shit'áhíjį' ádaat'ée da.

⁷Na'níle'dii shich'į' dahodísin, háálá diné yee nahas'áanii bina'nitin danilį́įgo yee nida'nitin.

⁸Diyin God yee has'áanii nahjį' kódaał'į́įgo diné bi'é'él'į' dayínóhtą'. [Jó, Jew dine'é binahagha' bik'ehgo łeets'aa' áádóó bee adlání táádaahgis, áádóó ákódaat'éhígíí lą'í ádaał'į́.]

⁹Áko ánáábizhdoo'niid, Nihí daohchįįhgo nihi'é'él'į' t'áá dayínóhtą' doo biniyé Diyin God yee has'áanii nahjį' kódaał'į́!

¹⁰Háálá Mózes ádííniid, Nizhé'é índa nimá nił nilį́įgo íínísin, áádóó, T'áá háiida bizhé'é, doodaii' bimá yiyíídzí'ígíí ts'ídá bidiyoolyééł, níigo yee has'ą́,

¹¹nidi nihí diné ła'da bizhé'é, doodaii' bimáda, T'áá ha'át'íhída bee níká adeeshwoł yę́ę éí Kórban át'é, yiłnínígíí, éí binahjį' bizhé'é áádóó bimá doo bił nilį́į da nidi, éí t'áá áko dadohní. (Kórban éí Diyin God baa deet'ą́ jiníigo óolyé.)

¹²Áko bizhé'é índa bimáda yíká adoolwoł yę́ę dooda dadohní.

¹³Ákót'éego nihí nihi'é'él'į' yił ahoolchíiłii éí bee Diyin God bizaad doo idééłníígóó ádaał'į́. Áádóó ákódaat'éhígíí lą'í baa naahkai.

¹⁴Áádóó diné yíl'áhígíí hágo náábizhdoo'niidgo ábizhdííniid, Dashíínółts'ą́ą́', t'ááłá'í nootínígo, áádóó díí bik'ida'doohtįįh:

¹⁵ha'át'íhída t'áá bikáá'dę́ę́' diné biih hwiileehii éí doo nibiiłchxǫǫh da, nidi bii'dę́ę́' hahwiileehii t'éiyá nibiiłchxǫǫh.

¹⁶[Diné ła'da hajaa' hólǫ́ǫgo azdiits'a'ígíí háni' ajíists'ą́ą́'.]

¹⁷Áko áłah ílínígíí bits'ą́ą́' kin góne' yah ajííyáago, hódahooł'aahii hane' bee ak'idi'dootį́įłii baa níjít'į́į́ nít'é'ígíí yíndahódééłkid.

¹⁸Áko ábizhdííniid, Da' nihíísh ałdó' t'áá ákót'éego doo ak'ida'doohtįįh da? Da' díísh doo nihił béédahózin da? Ha'át'íhída t'áá bikáá'dę́ę́' diné biih hwiileehgo doo bółchxǫǫh át'ée da,

¹⁹háálá éí hajéí doo yiih hwiileeh da, nidi habid t'éiyá yiih hwiileeh áádóó haghá hwiileeh. (Kózhdííniidígíí bee ch'iyáán t'áá ałtso t'áadoo át'éhígóó yidą́ jidííniid.)

²⁰Áko ánáázhdí'ní, Diné bii'dę́ę́' hahwiileehii éí diné niyiiłchxǫǫh.

²¹Háálá diné bii'dę́ę́', bijéí bii'dę́ę́' nichxǫ́'ógo nitsáhákees hahwiileeh, adilyé, na'ageh bee tsi'na'adá, diné naatseed,

²²ani'į́į́', adáhonooní, bąąhági áhoonííł, na'adlo', tsi'na'adá, ooch'į́į́d, baa'ihgo áyáti', ádaa ha'niih, áhodiigis.

²³Díí t'áá ałtso doo yá'ádaashxóonii diné bii'dę́ę́' hadahwiileehgo nidabiiłchxǫǫh.

²⁴Áko Jesus nízhdii'na' áádóó dashdiiyá, áko Táir índa Sáídan nahós'a'di jiníyá. Áadi kin léi' biyi' góne' yah ajííyáago diné ła' doo yidoonih da jinízin, nidi ch'ééh na'ázhdinil'in.

²⁵Nít'éé' t'áá áko asdzání ła', bich'é'é áłts'ísí léi' éí níłch'i nichxǫ́'í bii' hólǫ́ǫgo haa hóónii' lá, áko haa níyáago hach'į' nitsidinígo'.

²⁶Éí asdzání Gríik dine'é nilį́įgo Sáirofiníishiya hoolyéedi bi'dizhchį́. Áko náhookąąhgo áhodííniid, Níłch'i bi'iiníziinii shich'é'é bii'dę́ę́' haníłchééh.

²⁷Áko Jesus áhodííniid, Bíni' áłchíní átsé hwiih daaleeh, háálá áłchíní bich'iyą' łééchąą'í bich'į' ajiiłtł'iidgo doo aaníi da.

²⁸Nidi asdzání ánááhodoo'niid, T'áá aaníí ákót'é, Bóhólníihii, nidi bikáá' adání bikáá'dę́ę́' łees'áán bizéí áłchíní bílák'ee hadandéhígíí łééchąą'í deiyą́.

²⁹Áko asdzání ánáábizhdoo'niid, Jó, yá'át'éehgo háínídzíí'. Nílááh náádááł; jó, níłch'i bi'iiníziinii nich'é'é biyi'dę́ę́' hahóóle'.

³⁰Áko hooghangóó nídzídzá, nít'éé' at'ééd tsásk'eh yikáá' sitį́įgo jiiłtsą́, níłch'i bi'iiníziinii biyi'dę́ę́' hahóóle' lá.

³¹Áko Jesus éí Táir índa Sáídan nahós'a'dóó dah náázdiidzáago, Diikápolis biyi' góne' ch'ízhníyáago Gálilii be'ek'idi jiníyá.

³²Áko diné ła' bijééhkał índa ałt'andzihgo yił haadaaskaigo, Bik'i dah didíílnih, dahałníigo nídahookąąh.

³³Áko jíl'áhígíí bits'ą́ądi t'áá sáhí hoł nizhní'áázh, áko áadi bijeeyi' góne' azhdoolchid áádóó azhdíízhée'go bitsoo' bizhdeelchid,

³⁴áádóó yá'ąąshgóó dzidéez'į́į'go ádił hadzoodzolgo áhojiní, Éfatha, éí, Ąą ánínééh, jiníigo óolyé.

³⁵T'áá áko hajeeyi' aní'díídláád índa hazaad doo át'éhígóó t'áá bééhózínígo hadzoodzíí'.

³⁶Áko, T'ááká diné ła' bee bił dahoołne' yíila', bizhdííniid; t'áá ákóbijiníi nidi, t'óó yówehda yee haa tádahodoolne'.

³⁷Áko nádį́'ídi t'óó hoł adahayóigo ádajiní, T'áá ałtso yá'át'éehgo áyiilaa; bijééhkałii nidi adiits'a'go, índa doo yáłti'ii nidi yáłti'go ánáyoodlííł lá.