Read Navajo MARK 8 Bible Online

MARK 8 - Navajo bible

MARK 8

¹Éí yoołkááł yę́ędą́ą́' t'óó ahayóí haa áłah náánásdlį́į'go t'áadoo dayóyą́'ígóó biniinaa Jesus hódahooł'aahii hágo bizhdííniidgo ábijiní,

²Díí diné yíl'áhígíí baa a'ááh nisin, háálá t'áá shaa áłah nilį́įgo k'ad táá' yiską́, áko t'áadoo dayóyą́'í da;

³t'áá dichin danilį́įgo hooghangóó béé'ayéłnii'go hooghan t'áá yi'oh dahidínóołnah, háálá ła' nízaadę́ę́' nidaakai.

⁴Áko hódahooł'aahii hach'į' hadaasdzíí', Díí doo naagháhígi háádę́ę'shą' bááh shóidoot'eełgo díí diné da'dooyį́įłgo hwiih dadooleeł?

⁵Áko, Díkwíishą' łees'áán nidaahjaah? jiníigo nabízhdééłkid. Áko ádahodííniid, Tsosts'id lą́ą.

⁶Áko diné yíl'áhígíí, Ni'góó dinohbįįh, bizhdííniid, áádóó łees'áán tsosts'idígíí nízhdiinilgo Diyin God bich'į' sozdilzingo baa ahéésniizį́į́', índa nijiitíihgo hódahooł'aahii bitaa jiniih, éí diné yitaa deidoonih biniyé, áko éí yíl'áhígíí yitaa deiznii'.

⁷Łóó' ádaałts'ísígíí ałdó' t'áá díkwíí nideijaah lá, áko éí bik'i sozdoolzingo hódahooł'aahii, Diné bitaa daahniih, bizhdííniid.

⁸Áko da'ííyą́ą'go hwiih daazlį́į́', áádóó bi'oh da'oodą́'ígíí náádadziisdláa'go ts'iizis tsosts'id hadazdeesbįįd.

⁹Da'ííyą́'ígíí dį́įdi mííl daats'í ánéelą́ą́'. Áko éí, Nídayínóhkááh, bizhdííniid,

¹⁰áádóó t'áá áko hódahooł'aahii bił tsinaa'eeł biih náájookaigo, Dalmanútha nahós'a'jį' tsé'naa hoł ni'ní'éél.

¹¹Férisii danilíinii neheeskaigo nidahódíłkidgo yaa nídiikai, áko hákada'iiłhilgo ádaaní, Yá'ąąshdę́ę́' nibee adziilii bee bééhózinii ła' dadíníil'įįł.

¹²Jesus yéego ádił hadzoodzolgo ájíní, Ha'át'íí lá biniyé díí k'ad ahoolchíiłii bee ééhózinii hadeintá? T'áá aaníígóó ánihidishní, Díí k'ad ahoolchíiłii bee ééhózinii doo ła' bá ádoolníił da.

¹³Áko bits'ą́ą́' dashdiiyáago tsinaa'eeł biih náádzoodzáago tsé'naa dah náádazh'diił'éél.

¹⁴Hódahooł'aahii łees'áán ła' dayíjáah doo yę́ę yaa dayooznah lá, áko łees'áán t'ááłá'í t'éiyá tsinaa'eeł biyi' si'ą́ą́ lá.

¹⁵Hazhó'ó ábizhdííniidgo ájíní, Férisii danilíinii bidíík'ǫsh bee taos'nii' niilyółí índa Hérad bidíík'ǫsh bee taos'nii' niilyółí bits'ąą ádaa ádahołyą́.

¹⁶Áko éí yaa nídaat'į́įgo áda'ahidi'ní, Łees'áán nihee ádin, éí biniinaa ánihidííniid.

¹⁷Áko Jesus éí yaa ákoniizį́į'go áháłní, Ha'át'íishą' biniyé łees'áán nihee ádinígíí baa nídaaht'į́? Da' t'ah doósh nihił éédahoozįįh da, doo nidi ak'ida'doohtįįh da? Da' nihijéísh doo binídahaz'áa da daazlį́į́'?

¹⁸Nihináá' dahólǫ́ǫ nidiísh doo bee da'ooh'į́į da? Nihijaa' dahólǫ́ǫ nidiísh doo bee da'doohts'a' da? Índa doósh éédaałniih da?

¹⁹Diné ashdladi míildi ánéelą́ą'go łees'áán ashdla' bá nihéti' yę́ędą́ą'shą' ch'ínííłna'ígíí díkwíí ts'iizis hadadoołbįįd ni'? Áko ádahodííniid, Naakits'áadah lą́ą.

²⁰Áádóó dį́įdi mííl jíl'áago łees'áán tsosts'id há nihéti' yę́ędą́ą'shą' ałdó' ch'ínííłna'ígíí díkwíí ts'iizis hadadoołbįįd ni'? Áko ánáádabizhdi'ní, Tsosts'id lą́ą.

²¹Áko ábizhdííniid, Da' ákoósh t'ah doo ak'ida'doohtįįh da?

²²Áko Bethséyida kin haal'áhídi jíkai. Áko diné doo oo'į́į da léi' haa deizlóozgo, Bididííłchił, dahałníigo nídahookąąh.

²³Áko Jesus éí diné doo oo'ínígíí bíla' jiiłtsoodgo kintahdóó ch'íznílóóz, áko áadi binák'ezhdíízhée'go hála' t'áá ałch'ishjí bee bik'i dasdeesnii'go ábijiní, Ha'át'íhígíidaásh yíní'į́?

²⁴Áko hajííghalgo ájíní, Diné éí tsin naazkaadii nidahalingo tádazhdikáahgo yish'į́.

²⁵Áádóó Jesus éí diné bináá' yik'i náádiilnii', áko hazhó'ó k'éhézdon dzidéez'į́į'go hanáá' hadaałt'é násdlį́į́', áko t'áá ałtsoní nizhónígo daat'į́įgo jiiłtsą́.

²⁶Áko Jesus hooghangóó dah náhodiił'a'go áháłní, T'ááká kintahjį' nídóódza' yíila', [áádóó ła'da bee bił hóólne' yíila'].

²⁷Áádóó Jesus hódahooł'aahii bił Sesaríya Fílipaigi kin dah naazhjaa'góó jíkai, áko ákǫ́ǫ́ jookahgo nabízhdééłkidgo ábijiní, Diné ádaaníigoshą' éí háí ájít'į́ dashiłní?

²⁸Áko hoł dahoolne'go ádaaní, Ła' John Tó Yee Asį́įhii yę́ę át'į́; náánáła' éí Iiláíjah yę́ę át'į́, nidi náánáła' éí Diyin God yá halne'ii yę́ę ła' át'į́, daaní.

²⁹Áko ninááhózhdééłkidgo áhojiní, Nidi nihíshą' éí háí ájít'į́ dashidohní? Áko Peter hanáánáádzíi'go áhodííniid, Ni Christ ánít'į́.

³⁰Áko hadzoodzíi'go áhojiní, T'ááká diné ła'da shee bił dahoołne' yíila'.

³¹Áko náhozhdíníitą́ą'go áhojiní, Diné Silį́į'ii ts'ídá lą'ígóó ti'hwiidoonih, áko diné yá aląąjį' naazíinii áádóó aláahgo nááda'iiłniihii índa bee haz'áanii yínda'niłtinii doo dahodínóozįįł da, áko hodi'yoolyééł, áádóó táá' yiską́ągo náázhdidoodááł.

³²Díí t'áadoo nazhnił'iní bee hadzoodzíí'. Nít'éé' Peter ats'áhonílóozgo hodeezteh.

³³Nidi nídzízyizgo hódahooł'aahii bik'izhnághalgo Peter dzideeztehgo ábijiní, Séítan nílíinii, shidinínáágóó aninááh, háálá doo Diyin God k'ehgo nitsíníkees da, nidi diné k'ehgo t'éí nitsíníkees.

³⁴Áko diné yíl'áhígíí hódahooł'aahii bił hágo bizhdííniidgo ájíní, Diné t'áá háiida shikéé' dashdiigháahgo ádeizhdiyoo'nah, hatsin ałnáoszid nízhdidootį́į́ł áádóó shikéé' joogáał doo.

³⁵Háálá t'áá háiida jiinánígíí bąąh hą́ą́snízinii éí yóó'azhdootłish, nidi t'áá háiida shí shiniinaa índa hane' yá'át'éehii biniinaa jiinánígíí ninázhdiní'ą́ągo, éí jiináa dooleeł.

³⁶Jó, diné ła'da nahasdzáán t'áá si'ą́ą́ nít'éé' hóó' dooleeł biniyé t'áá ákójínéehgo hwii' sizíinii yóó'azhdíí'ą́ągoshą', haa néelą́ą́' há bínéidoodił?

³⁷Diné ła'da t'áá hó hwii' sizíinii ha'át'íí bił aheełt'éé shį́įshą' bił ałnázhdoolééł?

³⁸Áko t'áá háiida díí adilyé bee índa bąąhági át'éego ahoolchíiłii biyi' ła' shizaad áádóó shí shaa yázniizį́'ígíí, t'áá éí Diné Silį́į'ii biTaa' bits'ádi'nílíidii yee diyingo nidaal'a'í yił yíkaigo haa yádínóozįįł.