Read Navajo MARK 9 Bible Online

MARK 9 - Navajo bible

MARK 9

¹Áádóó ánááhodi'ní, T'áá aaníígóó ánihidishní, Kǫ́ǫ́ naazínígíí ła', Diyin God bee bóhólníihgo bił haz'áanii bibee adziilii yił yígháhígíí t'áadoo dayiiłtséhí aniné ts'ídá doo deidoolįh da.

²Áko hastą́ą́h yiską́ą́dóó bik'ijį' Jesus éí Peter áádóó James áádóó John dziłghą́ą́'góó t'áá sáhí hajizh'eezh, ákohgo t'áá dabinááł łahgo ázhnoolningo áho'diilyaa,

³áko ha'éé' [yasgi át'éego] t'áá íiyisí łigaigo bits'ádi'nílííd silį́į́', nahasdzáán bikáa'gi t'áadoo ákót'éego łigaii ó'óle'í da.

⁴Áádóó Iiláíjah índa Mózes, Jesus yił ałch'į' yádaalti'go dajiiłtsą́.

⁵Áko Peter éí Jesus áyidííniid, Na'nitiní, dooládó' yá'át'éeh da kwe'é neiikaígíí; haa'íshą', chaha'oh táa'go ádadiilnííł, ła' ni ná, ła' éí Mózes bá áádóó ła' éí Iiláíjah bá.

⁶Háálá bee hazdoodzihii doo hoł bééhózingóó biniinaa kót'éego hadzoodzíí', háálá t'áá íiyisí nídadzisdzííd.

⁷Nít'éé' k'os hoł łeeshoogizhgo biyi'dę́ę́' iinéé' diists'ą́ą'go ání, Díí shiYe' ayóó'óósh'níinii jílį́, dahwíísółts'ą́ą́'!

⁸Nidadzizghal nít'éé' Jesus éí diné bił nidzizį́į́ nít'éé' yę́ę t'áadoo hooyání háájí shį́į́ silį́į́' lá, Jesus t'éí t'áá sáhí sizį́įgo dajiiłtsą́.

⁹Áko dziłghą́ą́'dę́ę́' hadah níjookahgo hadzoodzíi'go ábijiní, Danóoł'į́'ígíí t'ááká diné ła' bee bił dahoołne' yíila', Diné Silį́į'ii daaztsą́ą́dę́ę́' náádiidzáago índa.

¹⁰Áko áhodoo'niidígíí doo baa dahojilne' da, nidi da'aztsą́ą́dę́ę́' náádidoodááł nínígíí éí lá ha'át'íí ááhyiłníí lá dajiníigo bínda'ahízhdílkid.

¹¹Áádóó kódajiníigo Jesus nidayízhdééłkid, Ha'át'íishą' biniyé bee haz'áanii yínda'niłtinii éí Iiláíjah átsé doogááł daaní?

¹²Áko ánáábizhdoo'niid, Iiláíjah t'áá aaníí átsé doogááł, áko t'áá ałtsoní hasht'éidoodlííł, ákoshą' haa yit'éego Diné Silį́į'ii kót'éego yeinít'į́įgo bee ak'e'ashchį́, Lą'ígóó ti'hwiizhdoonih, áádóó doo ił jílį́į da doo?

¹³Nidi shí ánihidishní, Iiláíjah t'áá íídą́ą́' níyá, áko t'áá bee ak'e'ashchínígi át'éego t'áá bí danízinígi ádayííł'įįd.

¹⁴Áko hódahooł'aahii ła'ígíí baa níjíkai, nít'éé' t'óó ahayóí baa áłah ílį́įgo bee haz'áanii yínda'niłtinii yił ałghada'dit'ááh lágo dajiiłtsą́.

¹⁵T'áá áko áłah ílínígíí dahoołtsą́ągo t'áá íiyisí t'óó bił adahóóyóí, áko k'é dahałníigo hadááh heezhjéé'.

¹⁶Áko bee haz'áanii yínda'niłtinii nayízhdééłkidgo ábijiní, Ha'át'íishą' baa nídaaht'į́?

¹⁷Áko diné áłah nilínígíí ła' ání, Na'nitiní, shiye' bił naa ní'áázh, jó, éí níłch'i doo yájíłti'góó áhoolaii hayi' hólǫ́,

¹⁸áádóó t'áá nahwiiłáágóó naa'anáhwiilghą́ąhgo hazhéé' hahagháahgo hawoo' ahízhdíłk'ash índa k'ééjíjił, nít'éé' nídahooł'aahii ábidishní, Bii'dę́ę́' hadanołchééh, nidi ch'ééh ádayííł'įįd.

¹⁹Áko ánáábizhdoo'niidgo ájíní, Doo da'oodlą́ą́góó ahoolchíiłii danohłíinii, haash nízáagi nihił honishłǫ́ǫ doo? Haash nízáagi nihich'į' ha'ííníshníi dooleeł? Níláhdę́ę́' hoł shaa nohkááh.

²⁰Áko ashkii bił baa jíkai, nít'éé' níłch'i bi'iiníziinii éí Jesus yiyiiłtsą́ągo t'áá áko ashkii ahaniiní'ą́, áko naa'ajíígo'go hazhéé' hahagháahgo nidzimaas.

²¹Áko Jesus éí ashkii bizhé'é nayízhdééłkidgo ábijiní, Hádą́ą'shą' kót'į́ silį́į́'? Áko ájíní, T'áá áłchíní nilį́į́dą́ą́'.

²²Áko t'áá hodiyoołhéełgo t'áá ahą́ą́h dzídza náhwiilghą́ą́h índa taah náhwiilghą́ą́h, nidi bíninil'ą́ą́ ládą́ą́' nihaa jiiníbaahgo nihíká anilyeed.

²³Nít'éé' Jesus áháłní, Iisínídląądgo lą́ą! Diyin God yoodláanii yee' t'áá ałtsoní bá bohónéedzą́.

²⁴T'áá áko ashkii bizhé'é chayi' yádeesti'go ání, Ooshdlą́, nidi hózhǫ́ ooshdlą́ą doogi bee shíká anilyeed!

²⁵Nít'éé' Jesus éí diné t'óó ahayóí kodę́ę́' dayíjeehgo jiiłtsą́ągo níłch'i nichxǫ́'ígíí dzideeztehgo ábijiní, Ni, níłch'i doo yájíłti'góó áádóó doo azdiits'a'góó áhwiinilaii hwii'dę́ę́' haninááh, áádóó t'ááká hwiih náodza' yíila', nidishní.

²⁶Ákohgo hadoolghaazhgo t'áá íiyisí ahanihoní'ą́ągo hwii'dę́ę́' hahóóle', áko ashkii daaztsą́ nahalin silį́į́', áko diné aghá'ánéelą́ą'go, Daaztsą́, dadííniid.

²⁷Nidi Jesus hála' yiyiiłtsoodgo náhodiidzį́į́z, áko dziizį'.

²⁸Áko Jesus hooghan góne' yah ííyáago bídahooł'aahii t'áá sahdii nidabídééłkidgo ádabidííniid, Nihíshą' éí haa yit'éego hadaniilchéehgo ch'ééh ádeiil'įįd?

²⁹Áádóó ánáábizhdoo'niid, Sohodizingo [áádóó hodílzingo doo adą́ą́góó] t'éiyá kódaat'éhígíí hadínóolkał.

³⁰Áádóó dah náázhdiikaigo Gálilii kéyah góne' ch'íjíkai. Áko éí diné ła'da doo yidoonih da dzinízin,

³¹háálá hódahooł'aahii nazhnitingo kóbijiní, Diné Silį́į'ii diné bílák'eejį' ninábidi'doot'áałgo dabidiyoołhééł, áko bi'diisyį́į́dóó bik'ijį' táá' yiską́ągo náádidoodááł.

³²Nidi bee ha'oodzí'ígíí t'áadoo bik'idazh'diitą́ą da, áádóó t'óó bíndabízhdídóołkiłgi nidi bits'ąą dajíítiid.

³³Áádóó Kapérniyamgi jíkaigo hooghangi yah ajííyáago hódahooł'aahii nayízhdééłkidgo ábijiní, Níláhdę́ę́' wohkahgoshą' ha'át'íí baa nídaaht'į́į́ nít'éé'?

³⁴Nidi t'áadoo hadaasdzíi' da, háálá jookahdę́ę́', Háí lá nihitahdóó aláahdi át'ée dooleeł lá, dajiníigo baa nídajit'į́į́ nít'éé'.

³⁵Áko jineezdáago naakits'áadahígíí hágo bizhdííniidgo ábijiní, Diné t'áá háiida ła' alą́ąjį' na'ázhdiiltéego éí akéédę́ę́' jílį́į doo, áádóó t'áá ałtso binaal'a'í jílį́į doo.

³⁶Áko áłchíní yázhí ła' biníi'gi bidziisį', áádóó nízhdiiłtį́įgo hódahooł'aahii ábizhdííniid,

³⁷T'áá háiida áłchíní yázhí kót'éhígíí ła' shízhi' bee bich'į' k'éznídzinígíí éí shich'į' k'éznídzin, áádóó t'áá háiida shich'į' k'éznídzinígíí éí doo shí t'éí shich'į' k'éznídzin da, nidi shiníł'a'ígíí ałdó' bich'į' k'éznídzin.

³⁸Nít'éé' John áháłní, Na'nitiní, diné léi' nízhi' bee níłch'i bida'iiníziinii hainiiłkaadgo dahwiiltsą́, áko, T'áadoo ánít'íní, dahodii'niid, háálá doo hoł nikéé' neiikai da.

³⁹Nidi Jesus ání, T'áadoo ánít'íní, t'áadoo dabidohníní, háálá diné ła' shízhi' bee naanish ayóó át'éii yaa naagháago t'áá áko doo nichxǫ́'ógo shá hadoodzih da.

⁴⁰Háálá doo nihik'ijį' nilínígíí éí nihich'ijí nilį́.

⁴¹Jó, t'áá aaníígóó ánihidishní, Christ bíí' nohłį́įgo ła'da shízhi' bee tó doohdlį́į́ł biniyé nihainíką́ągo, éí baa doolyéłígíí ts'ídá t'áá aaníí baa doolyééł.

⁴²T'áá háiida díí áłchínígi át'éego a'ohgo ádaa nitsídaakeesgo dashoodlánígíí ła'da bąąhági át'į́ ájiilaaígíí, t'áá hó tsé daashjéé' nitsaii hazéédéet'ą́ągo tónteel biih hodi'yoolghanjígo, há yá'át'éeh doo.

⁴³Áádóó níla' bąąhági ánít'į́ ánóhsingo, éí k'ínígéésh, háálá t'ááłáhíjí níla' nidi iiná biih yíníyáájígo doo ná yá'át'éeh da, nidi níla' t'áá ałch'ijígo hool'áágóó ti'hoo'nííh bił haz'ą́ąjį' kǫ' doo nitséesii biih nidi'yoolghą́ą́łjí agháago doo ná yá'át'éeh da

⁴⁴[ákwe'é haz'ą́ągi ch'osh doo daninée da, índa kǫ' doo nitsées da].

⁴⁵Áádóó nikee' bąąhági ánít'į́ ánóhsingo, éí k'ínígéésh, háálá na'níłhod nidi iiná biih yíníyáájígo doo ná yá'át'éeh da, nidi nikee' t'áá ałch'ijígo hool'áágóó ti'hoo'nííh bił haz'ą́ąjį' [kǫ' doo nitséesii biih] nidi'yoolghą́ą́łjí agháago doo ná yá'át'éeh da

⁴⁶[ákwe'é haz'ą́ągi ch'osh doo daninée da, índa kǫ' doo nitsées da].

⁴⁷Áádóó nináá' bąąhági ánít'į́ ánóhsingo, hadíí'ááł, háálá nináá' t'ááłá'í nidi Diyin God bee bóhólníihgo bił haz'áanii biih yíníyáájígo doo ná yá'át'éeh da, nidi nináá' t'áá ałch'ijígo hool'áágóó ti'hoo'nííh bił haz'ą́ąjį' kǫ' biih nidi'yoolghą́ą́łjí agháago doo ná yá'át'éeh da,

⁴⁸ákwe'é haz'ą́ągi ch'osh doo daninée da, índa kǫ' doo nitsées da.

⁴⁹Áshįįh ak'é'niłígi át'éego t'áá ádzíłtso kǫ' hak'ídadoo'nił [áádóó nááhániihígíí t'áá ałtso áshįįh bee halniihgo ádadoolnííł].

⁵⁰Áshįįh éí yá'át'ééh, nidi áshįįh doo halniih da silį́į'goshą' ha'át'éego halniih áńdoolnííł? Áshįįh nihiyi'di dahólǫ́ nidahonohłin doo, áádóó k'é da'ahíínóhníi doo.