Read Navajo LUKE 11 Bible Online

LUKE 11 - Navajo bible

LUKE 11

¹Ákódzaago łahgo haz'ą́ą́ léi'gi Jesus sozdilzin, nít'éé' áá hodzoost'įįdgo hóhooł'aahii ła' áhodííniid, Bóhólníihii, sodadiilzin dooleełígíí bínanihiníłtin, t'áá John bídahooł'aahii sodizin yíneineestą́'ígi át'éego.

²Áko ábizhdííniid, Sodadołzingo kódadohní: NihiTaa' [yá'ąąshdi honílóonii], nízhi' diyingo óolzin le'. Bee nóhólníihii náásgóó k'ee'ąą yilzhish le'. [Bee íinínízinii t'áá yá'ąąshdi ááníłígi át'éego nahasdzáán bikáa'gi ááníił le'.]

³Ch'iyáán t'áá ákwíí jį́ niha'iyíłtsódígíí t'áá ákwíí jį́ nihaa hidí'aah.

⁴Áádóó nich'į' nida'ayiilzíhígíí nihá yóó'anáhidí'aah, háálá t'áá nihí nihich'į' bąąhági ádaaníiłii t'áá ałtso bá yóó'anídahidiit'aah, áádóó nihí hodínóotahjį' nihi'óółnííh lágo, [nidi bąąhági át'éii bits'ą́ąjį' yisdánihiyínííł].

⁵Áádóó ábizhdííniid, Háishą' nihí ła' nihik'is hólǫ́ǫgo tł'é'ííłníi'go baa nooyáago ábididoohniił, Shik'is, bááh táa'go sha'nínííł,

⁶háálá shik'is ła' nízaadę́ę́' yigáałgo shaa níyá, áko t'áadoo biyaa nooshkáłí da?

⁷Nít'éé' wóne'dę́ę́' haadzíi'go ádidooniił, T'áadoo shaa nánít'íní; t'áá íídą́ą́' dádi'níłkaal, áádóó sha'áłchíní bił da'ashhosh; doo nídoosh'néehgo na'óstsóód át'ée da.

⁸Ánihidishní, Azhą́ hak'is nilį́į nidi doo nízhdidoo'nahgo baz'doołtsoł da, nidi doo diiłheełgóó adókeedígíí biniinaa nízhdidoo'nah, áko t'áá yinízinígi ánéelt'e'go baz'doołtsoł.

⁹Áádóó ánihidishní, Da'íínóhkeed, áko deínóhkeedígíí nihaa dadoolyééł; hádaaht'į́, áko hádaaht'ínígíí bik'ídadoohkah; dáádílkał nídanołts'in, áko nihá ąą ádadoolnííł.

¹⁰Háálá t'ááłá'í jinítínígo dajókeedii éí haa dahalyé, hádajit'ínígíí bik'ídajiikááh, índa dáádílkał nídazniłts'inígíí há ąą ádaalne'.

¹¹Háishą' nihitahdóó azhé'é nilíinii ła' biye' éí [łees'áán bíyííkeedgo, da' tséésh yeidoo'ááł, doodaii'] łóó' bíyííkeedígíísh tł'iishda yeidoołtééł,

¹²doodaii' naa'ahóóhai biyęęzhii bíyííkeedgo, da' séígo'ísh yéídoołtééł?

¹³Áko nihí doo yá'ádanoht'ée da nidi, aa doolyéełii yá'ádaat'éehii nihada'áłchíní baa dadoohłéełgo nihił béédahózin, éí bilááh át'éego nihiTaa' yá'ąąshdi hólóonii Níłch'i Diyinii bídayókeedii yeidiyii'aah.

¹⁴Łah níłch'i doo yájíłti'góó áhoolaii hayi'dóó hainííłchą́ą́', áko níłch'i bi'iiníziinii hanoolchą́ą'go doo yájíłti'ígíí yájíłti' nídzísdlį́į́', áko diné yíl'áhígíí t'óó bił adahóóyóí.

¹⁵Nidi ła' ádadííniid, Níłch'i bida'iiníziinii binanit'a'í Béíyalzííbab yolyéii bee níłch'i bida'iiníziinii ayi'dę́ę́' hahizhniłkaad lá,

¹⁶nidi náádaała', hákada'iiłhilgo nidahódééłkidgo ádaaní, Yá'ąąshdę́ę́' bee ééhózinii ła' dadíníil'įįł.

¹⁷Nidi yaa nitsídaakeesígíí hoł bééhózingo ábizhdííniid, Ła' hooghandóó danilíinii t'áá bí ałk'i néijahgo éí t'áá ádzaaí neheleeh, áádóó łahgo dah oonééł t'áá bí ałk'i néijahgo t'óó ałts'á'áldah doo.

¹⁸Séítan ałdó' t'áá bí ák'inéilwodgo, hait'éegoshą' áko bee bóhólníihgo bił haz'áanii dina' dooleeł? Háálá, Béíyalzííbab bee níłch'i bida'iiníziinii ayi'dę́ę́' hahizhniłkaad, dashidohní.

¹⁹Áko Béíyalzííbab bee níłch'i bida'iiníziinii ayi'dę́ę́' hahinishkaadgo, ákoshą' nidanohtinígíí éí háí bibee adziilii shį́į́ bee ayi'dę́ę́' hadeiniiłkaad? Éí bąą éí t'áá bí nihaa nídadóot'įįł.

²⁰Nidi Diyin God bílázhoozh bee níłch'i bida'iiníziinii ayi'dę́ę́' hahinishkaadgo, áko éí bee t'áadoo bahat'aadí Diyin God bee bóhólníihgo bił haz'áanii bił nihaa honíyá.

²¹Diné bidziilii éí yee naabaahii t'áá át'é bee hólǫ́ǫgo, t'áá bí bighan yich'ą́ą́h naagháago binaalye'é hazhó'ó sinil łeh,

²²nidi diné náánáła' halááh ábóodziilgo hak'iilwodgo hak'eh didoodleeł, áko bee nijibaahii beijólíhígíí haghaidoo'nił, áádóó hanaalye'é ałts'ádeidooniłgo neidoonih.

²³Diné doo shich'ijí jílínígíí éí shits'ą́ą́jí jílį́, áádóó doo shił ahanizh'niiłkaadígíí éí ta'izhnoołkaad.

²⁴Níłch'i nichxǫ́'ígíí diné yii'dę́ę́' haagháahgo, háádoolyįhgi haintáago tó ádaadingóó hahidiighááh, nidi doo ła' yik'éghááhgóó ániih, Shighandóó ch'íníyáhígóó nídeeshdááł.

²⁵Áko nádáahgo nahashzhóo'go índa hasht'ehoolyaago yik'éghááh.

²⁶Áko dah náádiidáahgo, náánáła' níłch'i tsosts'idgo t'ah biláhígo doo yá'ádaashóonii yił nákah, áko éí yił hwiih yikahgo hwii' kéédahat'į́į łeh, áko diné áłtséédą́ą́' át'éhę́ę t'óó nówehda át'įįh.

²⁷Kójíníigo nít'éé' áłah ílínígíí bitahdę́ę́' asdzání léi' ła' hadoolghaazhgo áháłní, Nishchínígíí índa yíníłt'ódígíí éí bik'ihojidlí!

²⁸Nidi ázhdííniid, Ákondi Diyin God bizaad deidiits'a'go yik'eh dahół'ínígíí éí aláahgo bik'idahojidlí!

²⁹Áko diné hach'į' ahinééltihgo ayázh'niiłti'go ájíní, Díí k'ad dine'é doo yá'át'ééhgóó ahoolchíiłii bee ééhózinii hadeintá, nidi bee ééhózinii doo ła' bá ádoolníił da, t'áá hazhó'ó Jónah Diyin God yá halne'ii bee ééhózinii silį́'ígíí t'éiyá.

³⁰Háálá t'áá Jónah éí Níneveh dine'é yá bee ééhózinii silį́'ígi át'éego, t'áá ákót'éego Diné Silį́į'ii ałdó', díí k'ad ahoolchíłígíí bá bee ééhózinii dooleeł.

³¹Kéyah Shádi'ááh hoolyéedi asdzání naat'áanii jílį́į́ nít'é'ígíí díí k'ad ahoolchíłígíí ánihwiit'aah beiníłką́ądi bił náázhdidoojahgo bá nihozhdoo'ááł, háálá Sálaman bibee hódzáanii yízdóołts'įįł biniyé ni' nineel'ą́ą́dę́ę́' jiníyá, nidi jó'akon, Sálaman yiláahgo ayóó át'éii k'ad kwe'é naaghá.

³²Níneveh dine'é yę́ę ánihwiit'aah beiníłką́ądi díí k'ad ahoolchíłígíí yá nidahodoo'áałgo yee deidoozįįł, háálá Jónah éí Diyin God bizaad yaa hoolne'ígíí binahjį' łahgo át'éego Diyin God yich'į' tsíńdadeezkéezgo dayoosdląądgo ádił nida'iiszí'ígíí yits'áhaaskai, nidi jó'akon, Jónah yiláahgo ayóó át'éii éí kǫ́ǫ́ naaghá.

³³Diné doo ła'da bee hool'iní yidiiłtłi'go nahont'ingi nií'aah da, doo nidi tsits'aa' yił yaa nií'aah da, nidi bá ya'ii'áhígi dah yi'ááh, áko yah ahikáhígíí bá adinídíingo da'oo'į́į łeh.

³⁴Bee hool'iní bee adinídínígi át'éego nináá' éí nits'íís bee bá adinídíín, nináá' yá'át'éehgo, nits'íís t'áá át'é bił hool'in, nidi nináá' doo yá'át'ééhgóó, nits'íís t'áá át'é bił chahałheeł.

³⁵Éí bąą ádaa áhólyą́, doodago adinídíín niyi'di hólónígíí éí bił chahałheeł doo.

³⁶Éí bąągo t'áá át'é adinídíín bee nits'íís bił hool'ingo t'áadoo łahjį' bił chahałheełí, t'áá bee hool'iní i'dííłdláadgo ná adiníłdínígi át'éego t'áá át'é adinídíin dooleeł.

³⁷T'ah yájíłti'go, nít'éé' Férisii danilíinii ła' adiidį́į́ł hodííniid, áádóó yah ajííyáago azhdooyį́į́ł biniyé dasneezdá.

³⁸Nít'éé' Férisii honíł'į́įgo t'áadoo átsé Jew dine'é binahagha' bik'ehgo tá'ázdígisí izh'niiyą́ą'go t'óó bił ahóóyóí.

³⁹Áko Bóhólníihii áhodííniid, Jó, Férisii danohłíinii, bee adlání índa łeets'aa' bikáá'dę́ę́' t'éiyá táádaahgis, nidi agha'ílyé índa bąąhági át'éii nihiyi' hadadeezbin.

⁴⁰Doo ádahalyáanii danohłíinii, da' akáá'dę́ę́' áyiilaaígíísh ałdó' doo ayi'dę́'ígíí áyiilaa da?

⁴¹Nidi ayi'diígíí badahojoobá'íii baa dahidoohnił, áko t'áá ałtsoní nihá chin bąąh ádin doo.

⁴²Nidi Férisii danohłíinii, doo hojooba' ájíníi da! Háálá tólchiin áádóó ru yolyéhígíí índa ch'il t'áá ałtah áát'eełii neeznáá daníjoolígíí éí t'ááłá'ígo shijool Diyin God baa nídahidoh'aah, nidi ts'ídá t'áá ákǫ́ǫ́ át'éego áhooníiłii índa Diyin God ayóó'óó'níinii doo baa nídaaht'į́į da; díí akée'di ch'ét'ánígíí ádaahníił doo nít'éé', ła'ígíí t'áadoo baa dayoohnéhí.

⁴³Nihí Férisii danohłíinii, doo hojooba' ájíníi da! Háálá kin bii' áłah nída'adleehí dabiyi'góó aląąjį' naazíinii bá nidahaz'ą́ą́góó nihił ayóó ádahoot'é índa nida'iiniihgóó k'é danihidi'níigo nihił ayóó ádaat'é.

⁴⁴Bee haz'áanii bínda'nołtinii áádóó Férisii danohłíinii, t'óó ádahodoł'íinii, doo hojooba' ájíníi da! Háálá dajishcháá' doo daat'íinii nidahonohłin, áko éí diné t'áadoo bił béédahóziní yikáá' naaldeeh.

⁴⁵Bee haz'áanii yínda'niłtinígíí ła' haadzíi'go áhodííniid, Na'nitiní, díí háínídzí'ígíí bee t'óó baa yáhásinígi ánihidííníniid.

⁴⁶Áko ázhdííniid, Bee haz'áanii bínda'nołtinii, nihí ałdó' doo hojooba' ájíníi da! Háálá nihí bee haz'áanii diné bide ádaahłaa, nidi t'áá nihí éí nihílázhoozh t'ááłá'í nidi doo bee bidadinołníih da.

⁴⁷Doo hojooba' ájíníi da! Háálá danihizhé'é yę́ę Diyin God yá dahalne'ii nideistseed. Nihí k'ad Diyin God yá dahalne'ii yę́ę bee béédahaniih biniyé kin danizhónígíí nidaahnilgo ákóne' yóó'áńdaahdle'.

⁴⁸Áko danihizhé'é yę́ę yaa naaskaígíí t'áá aaníí baa dahołne'go bee lą́ nida'iyohłeeh, háálá éí dahalne'ii nideistseed índa nihí bee béédahaniih biniyé kin danizhónígíí nidaahnilgo ákóne' yóó'áńdaahdle'.

⁴⁹Éí bąą Diyin God bibee hódzáanii ałdó' ádííniid, Diyin God yá dahalne'ii índa daal'aadii hach'į' dadeesh'aał, ła' nidazdoołtsił, áádóó ła' éí atídazhdoolííł,

⁵⁰áko nahasdzáán niit'ą́ą́dóó wóshdę́ę́' Diyin God yá dahalne'ii t'áá ałtso dabidił dadeezna'ígíí díí k'ad oochíłígíí yá ninádínóodah,

⁵¹t'áá níléí Éíbel bidił deezna' yę́ędóó níléí Zekaráíyah bidił deezna' yę́ęjį', éí bikáá' náá'iiniihí índa kin bii' sohodizin bita'gi ábi'disdįįdígíí. T'áá aaníí ánihidishní, Díí oochíłígíí éí yá ninádínóodah.

⁵²Bee haz'áanii bínda'nołtinii, doo hojooba' ájíníi da! Háálá óhoo'aah bibee ąą ńdítį́hí yóó'adasootą́; t'áá nihí nidi doo yah ahisoohkai da, índa ła' yah ahidookahígíí ałdó' dasinoołtł'ah.

⁵³Áádóó díidí bee hadziidziihgo, bee haz'áanii yínda'niłtinii índa Férisii danilíinii hádahodiilchįįł danízingo índa tsístł'ah dahodíníilchééł danízingo t'áá bizáákáágóó nidahódééłkid,

⁵⁴hazaad ła' yee hákada'iiłhilgo haa nahaakai, éí yee hak'i dahodidoo'ááł biniyé.