Read Navajo LUKE 12 Bible Online

LUKE 12 - Navajo bible

LUKE 12

¹Ts'ídá ákohgo, diné doo jóołta' ánéelą́ą́'góó áłah silį́į'go t'áá hazhó'ó ałk'i na'asdee', áko hódahooł'aahii áłtsé bich'į' ayázh'niiłti'go ájíní, Férisii danilíinii bidíík'ǫsh bee taos'nii' niilyółí bits'ąą ádaa ádahołyą́, éí t'óó áhodi'į́ át'é.

²Nidi t'óó bił ída'ít'éhígíí t'áá ałtso dadoo'nih, áádóó nidanil'inígíí t'áá ałtso béédahodoozįįł.

³Éí bąągo t'áá nahont'inee ádadooniidígíí éí t'áadoo bahat'aadí dadidoots'į́į́ł, áádóó danihighangóó t'áá ádíighahígo bee ahiłjeeh nídanołniih nít'éé' yę́ę éí kin bighą́ą́'dóó baa dahodoonih.

⁴Shik'isóó, ánihidishní, Ats'íís dayiiłhééhdóó bik'ijį' t'áadoo ánáádayódle'í da łeígíí éí diné t'áadoo béédaałdzidí.

⁵Nidi béédaałdzid dooleełígíí bee nihi'nishnííh: iisxį́į́dóó bik'ijį' hool'áágóó ti'hoo'nííh bił haz'ą́ą́ góyaa idi'yoołhą́ąłgo yee bóhólníhígíí éí béédaałdzid; t'áá aaníí ánihidishní, Béédaałdzid!

⁶Da' tsídiiłbáhísh ashdla'go doo naaki sindáo bą́ą́h ílį́įgo nahaniih da? Ákondi éí Diyin God t'ááłá'í nidi doo yaa yoonéeh da.

⁷Jó, nihitsii' t'ááłá'í níláhígo nidi ałtso dayéélta'. Éí bąą t'áadoo nídaałdzidí; tsídiiłbáhí t'óó ahayóí nidi biláahgo da'nohłį́.

⁸Áádóó ánihidishní, T'áá háiida diné binááł shee ádééhodzílzinígíí, éí ałdó' Diyin God bidiyingo nidaal'a'í bidááhdę́ę́' Diné Silį́į'ii hwee ádééhólzin doo,

⁹nidi diné binááł doo hwééhasin da shijinínígíí Diyin God bidiyingo nidaal'a'í bidááhdóó doo hwééhodi'doolzįįł da.

¹⁰Áádóó t'áá háiida Diné Silį́į'ii bik'ijį' jílį́įgo hadzoodzí'ígíí, éí bá yóó'anídidoot'ááł, nidi t'áá háiida Níłch'i Diyinii baa'ihgo yá haadzí'ígíí, éí ts'ídá doo bá yóó'anídidoot'áał da.

¹¹Áádóó kin bii' áłah nída'adleehí naaznilgóó, áádóó naat'áanii índa bídahólníihii naazdáágóó nidanihii'éeshgo, ha'át'éegoda, doodaii' ha'át'íhída bee hadadoohdzihígíí, doodaii' ha'át'íhída dadidoohniiłígíí, t'áadoo bik'ee ádił nídahodołchiłí,

¹²háálá Níłch'i Diyinii ts'ídá ákwe'é oolkiłgo bee hadadoohdzihígíí yee nanihinitin doo.

¹³Nít'éé' áłah silį́'ígíí ła' áhodííniid, Na'nitiní, shínaaí shá ábidiní, Nitsilí íí' dooleełii bił ałts'á'dí'nííł.

¹⁴Nidi ábizhdííniid, Kwá'ásiní, háishą' ánihwii'aahii, doodaii' naalye'é bąąh ádahasdįįdii niidii'aahii nishłį́įgo nihá áshiilaa?

¹⁵Áádóó ánáábizhdoo'niid, Ádaa ádahołyą́, t'áadoo ha'át'íhída bidádanoołníní, háálá diné t'áadoo le'é jit'íinii éí doo íiyisí bee jiináanii át'ée da.

¹⁶Áko hane' bee ak'idi'dootį́įłii bee bich'į' hadzoodzíi'go ájíní, Diné at'į́į́ léi' bidá'ák'ehgi t'áá íiyisí ná'neest'ą́,

¹⁷áádóó t'áá biyi'ídi nitsíkeesgo íinízin, Haaléit'ée dooleeł lá? Náníłt'ánígíí la' t'áadoo nooh náánóoshchíiłgi da.

¹⁸Áko ádííniid, Ko lá ádeeshnííł ni: kin bii' nooh nída'ashchíhígíí táádeideesh'niłgo t'ah bitisígo ádaníłtsogo ánáádadeeshdlííł, áko náníłt'ánígíí índa shinaalye'é t'áá ałtso ákóne' nooh dadeeshchííł.

¹⁹Áko shii' sizíinii ábidideeshniił, Shii' sizíinii, nee hólóonii lą'í nááhai bíighahgóó hasht'e'niilyá; t'óó háánílyį́įhgo íyą́ą doo índa ídlą́ą doo, áádóó nił honeedlį́į le'.

²⁰Nidi Diyin God áhodííniid, Doo áhályáanii nílį́! Díí tł'éé' nii' sizíinii naa náádiilyé, ákoshą' díí hasht'e'nííníláhígíí, háí bí dooleeł?

²¹Áko t'áá háiida naalye'é da'ílíinii ádá nihizhdi'níłígíí éí Diyin God bich'į' ajit'ínígíí hwee ádingo át'é.

²²Áádóó hódahooł'aahii ábizhdííniid, Éí bąą ánihidishní, Ha'át'íí lá deeshį́į́ł lá? doodaii', Ha'át'íí lá bee hadideeshnííł lá? t'áadoo danohsingo bee dahinohnáa dooleełígíí bíká ádił nídahodołchiłí.

²³Háálá jiinánígíí éí ch'iyáán biláahgo ílį́, áádóó hats'íís éí éé' biláahgo ílį́.

²⁴Gáagii bee nitsídaahkees: éí doo k'ééda'didléeh da, doo nidi nída'agish da, kin bii' nooh nída'achíihii doo bee dahólǫ́ǫ da, ákondi Diyin God ba'ałtso'. Dooládó' tsídii biláahgo da'nohłį́į da lá!

²⁵Áádóó nihí ła' ádił náhodołchiłgo hinohnánígíí t'įįhdígoósh bilááh ádoohłíiłgo bínooł'ą́?

²⁶Ákoshą' a'ohgo áníłtsoígíí nidi doo óohnééh át'éégóó, ha'át'íí biniyé náánáła'ígíí nihida'diił'á?

²⁷Ch'ilátah hózhóón nidanise'gi bee nitsídaahkees; éí doo nidaalnish da, índa doo da'adiz da, nidi ánihidishní, Azhą́ Sálaman ayóó ájít'éé nít'ée' nidi, doo díí ła' hadít'éhígi át'éego hazhdít'ée da nít'éé'.

²⁸Nidi Diyin God nihokáá'góó ch'ilígíí díí jį́ nidanise'go áádóó yiską́ągo konk'eh góne' ahidoolkałígíí nidi nizhónígo haidósingo, t'įįhdígo da'iinohdláanii, dooládó' éidíígíí biláahgo hadadinoht'éego ánihósin da lá!

²⁹Dadoohsį́įłii índa dadoohdlį́įłii t'áadoo bíká ádił nídahodołchiłgo hádaaht'íní.

³⁰Háálá nihokáá' dine'é t'áá ałtso éidí hádaat'į́, áko nihiTaa' éí bídin danohłį́įgo chodaoł'ínígíí nihá bił bééhózin.

³¹Nidi bee bóhólníihgo bił haz'áanii hádaaht'į́, áko éidí t'áá ałtso nihá bíidoolyééł.

³²Shidibé ch'į́dí danohłíinii, t'áadoo nídaałdzidí, háálá nihiTaa' bił hóshǫ́ǫgo bee bóhólníihgo bił haz'áanii nihaididoo'ááł.

³³Nihee dahólónígíí t'áá ałtso nihaa nidahóniih, áádóó badahojoobá'íígíí bitaa daahniih; béeso bizis doo hadadootihii, índa naalye'é ałtaas'éí da'ílíinii doo ádoodįįłii yá'ąąshdi ani'įįhii doo yidínóo'į́įłdi, índa ch'osh ałchozhii doo yidoołchǫǫłdi ádá ádaałnééh.

³⁴Háálá nihinaalye'é siláadi, t'áá ákwii ałdó' nihijéí hólǫ́ǫ doo.

³⁵Áká dasoołzaaz áádóó nihibee hool'iní dadiltłi'go ádeínóhsin,

³⁶áko diné ła' binanit'a'í iigehdę́ę́' nídoodáałgo yiba' naháaztánígi át'éego, áko nádzáago dáádílkał néidínóołts'į́į́ł, t'áá áko yá ąą deididootį́łígíigi át'éego áda'díínółzin.

³⁷Nidaal'a'í hada'ídées'į́į'go binanit'a'í nádzáago biidoołtséłígíí, éí bik'idahojidlí; t'áá aaníígóó ánihidishní, Bí áká doolzisgo bikáá' adání yich'į' dah yidínóołbįįłgo yiyaa nidi'yookááł.

³⁸K'adę́ę tl'é'ííłniihgo, éí doodaii' tł'é'ííłníí'dóó bik'ijį', t'áá ákódaat'éego hada'ídées'į́į'go yaa nádzáago éí nidaal'a'ígíí bik'idahozhdoodliił!

³⁹Nidi díí nihił béédahózin le', kin bee bóhólníihii ts'ídá ákohgo ani'įįhii doogáłígíí hoł bééhózingo, ha'dzisíid doo nít'éé', índa hakin doo hats'ą́ą́' wótsid át'éégóó ázhdoolííł nít'éé'.

⁴⁰Éí bąą nihí ałdó' hasht'e'áda'díínółzin, háálá Diné Silį́į'ii doo nidayínóhłíi da yę́ęgi hoolzhishgo doogááł.

⁴¹Peter áhodííniid, Bóhólníihii, da' díí hane' bee ak'idi'dootį́įłiísh nihí nihich'į' bee háínídzíí', diné t'áá ałtso daats'í bich'į'?

⁴²Áko Bóhólníihii ádííniid, Ákoshą' háí ba'ahódlíigo índa hóyą́ągo aa áhályáanii nilį́, éí binanit'a'í bighan haz'ą́ągi nidaakaígíí t'áá ałtso t'áá áajį' anáhwiilzhíishgo yaná'áltso' doo biniyé nibidi'dooltééł?

⁴³Naal'a'í jílíinii ákójít'į́įgo hananit'a'í níyáago éí hak'ihojidlí.

⁴⁴T'áá aaníígóó ánihidishní, Hananit'a'í bee hólóonii t'áá ałtso bee hóhólníihgo nihodoołtééł.

⁴⁵Nidi éí naal'a'í t'áá hajéí biyi'ídi ázhdííniidgo, Shinanit'a'í la' doo hah nádáah da, áko diné nidaal'a'í índa asdzání nidaal'a'í bitaa'jiłhaałgo, áádóó ajiyą́ągo áádóó ajidlą́ągo índa tsi'njigháago baa nízhdidoodááł,

⁴⁶éí naal'a'í jílíinii hananit'a'í yoołkáałii doo ni'jólíí góne' índa hoolzhish doo hoł bééhózin góne' nídoodáałgo atíhodoolííł, índa doo da'oodláanii yitah hodoołt'eeł.

⁴⁷Áko naal'a'í éí binanit'a'í íinízinígíí bił bééhoozin nidi, t'áadoo hasht'ediidzaagóó áádóó íiznízinígíí doo yik'ehgo ádzaagóó, éí yéego nábidí'nóolghał.

⁴⁸Nidi binanit'a'í íinízinii doo bił bééhózinii, éí biniinaa nídí'nóolghałii doo áyiilaagóó, éí doo yéego nídí'nóolghał da. T'áá háiida t'óó ahayóí baa deet'ánígíí éí t'óó ahayóí bínéídóokił, áádóó t'áá háiida t'óó ahayóí baiszįįdígíí éí t'ah aláhídi ánéelą́ą'go bínéídóokił.

⁴⁹Nahasdzáán bikáá' kǫ' dideeshtłił biniyé níyá, áko t'áá íídą́ą́' diiltłah le' nisin!

⁵⁰Nidi bee shidi'doolzįhígíí shá hólǫ́, áko dooládó' lá bíighah adooleełjį' ádił ninisdzíił da!

⁵¹Da' nahasdzáán bikáa'gi t'áá k'é hólǫ́ǫ doo biniyé jiníyá danohsingoósh shaa nitsídaahkees? Dooda, nihidishní, nidi ałts'á'áldah biniyé,

⁵²háálá kodóó náásgóó hooghan t'ááłá'íígíí biyi'dóó ashdlajilt'éego ałts'ájíkah doo, tá'ígíí éí naakiígíí yił ałk'ijį' danidlį́į doo, índa naakiígíí éí tá'ígíí yił ałk'ijį' danidlį́į doo;

⁵³ałts'á'áldah doo, azhé'é nilíinii biye' yik'ijį' nilį́į doo, aye' nilíinii bizhé'é yik'ijį' nilį́į doo, amá nilíinii bich'é'é yik'ijį' nilį́į doo, ach'é'é nilíinii bimá yik'ijį' nilį́į doo, bizháá'áád ídlíinii bizháá'áád yik'ijį' nilį́į doo, áádóó azháá'áád nilíinii yizháá'áád nilínígíí yik'ijį' nilį́į doo.

⁵⁴Diné yíl'áhígíí ałdó' ábizhdííniid, E'e'aah biyaají k'os haleehgo daołtséehgo, t'áá áko ádadohniih, Nahodoołtį́į́ł lá, áko t'áá ákót'įįh.

⁵⁵Áádóó shádi'ááhdę́ę́' diyołgo baa ákodanoohsįįhgo ádadohniih, T'áá íiyisí hodínóogah lá, áko t'áá ákót'įįh.

⁵⁶Nihí t'óó ádahodoł'íinii! Nahasdzáán índa wódahgo áhoot'éii binahjį' áhoot'ée dooleełgi nihił béédahózin, nidi ha'át'éegoshą' díí k'ad hoolzhishígíí biyi' ádahoot'é dooleełii doo nihił béédahózin da?

⁵⁷Áádóó ha'át'éegoshą' t'áá nihí ts'ídá t'áá ákogi át'éii doo bee hasht'e'nitsídanohkees da?

⁵⁸Háálá nik'i hodii'áanii t'ah naat'áanii bich'į' nił yi'ashgo hazhó'ó bił aha'díí'nít'ą́ągo néididoochił, doodaii' éí ánihwii'aahii yaa nidoolóós, áádóó ánihwii'aahii yah i'iiníiłii yaa nidoołtééł, áko índa yah i'iiníiłii yah andoołt'eeł.

⁵⁹Ándishní, Ts'ídá doo ch'ééndi'doolt'eeł da, t'ááłá'í sindáo t'áá nidziihígi ák'é ninéínídláago índa.