Read Navajo LUKE 13 Bible Online

LUKE 13 - Navajo bible

LUKE 13

¹Ts'ídá ákohgo ła' Jesus yił dahoolne'go ádaaní, Gáliliidóó dine'é nááda'jiisnii'go Páílat nahastseedgo náádajiisnii'ígíí hadił bił taozlį́įgo áyiilaa.

²Áádóó bich'į' hadzoodzíi'go ábizhdííniid, Éí Gáliliidóó dine'é ti'dahooznii'ígíí éí Gáliliigi dine'é t'áá ałtso yiláahdi bąąhági ádaat'į́įgo biniinaa ádzaásh danohsin?

³Dooda, nihidishní, nidi nihibąąhági át'éii doo łahgo át'éego Diyin God bich'į' tsíńdadookéezgo yóó'adasidoo'ą́ą́góó nihí ałdó' t'áá ákót'éego ádadoohdįįł.

⁴Doodaii' da' tseebííts'áadah yilt'éego Sailóomgi dego nízaadgóó astł'ingo ya'ii'áhígíí bik'iiłdáazgo nabistseedii, da' éísh Jerúsalemgi kéédahat'ínígíí t'áá ałtso yiláahgo bąąhági ádaadzaa danohsin?

⁵Ánihidishní, Dooda, nidi nihibąąhági ádaat'éii doo łahgo át'éego Diyin God bich'į' tsíńdahidookéezgo yóó'adasidoo'ą́ą́góó nihí ałdó' t'áá ákót'éego ádadoohdįįł.

⁶Áko díí hane' bee ak'idi'dootį́įłii bee hadzoodzíí': Diné ła' bich'il na'atł'o'ii bitahgi fig k'iidíílá, áko bineest'ą' bąąh hólǫ́ǫ daats'í nízingo yąąh háidéé'į́į́', nít'éé' t'áadoo ła' yik'íníyáa da.

⁷Nít'éé' ch'il na'atł'o'ii yaa áhályáanii áyidííniid, Jó'akon, díí k'ad táá' nááhai díí tsin bineest'ą' bąąh hááníshtaah, nidi doo ła' yiistséeh da. K'íníłne'; ha'át'íishą' biniyé dá'ák'ehgi t'áadoo biniyéhígóó íí'á?

⁸Áádóó yich'į' haadzíi'go ání, Shinanit'a'í, k'ad anáá'niihaígíí biyi' ałdó' t'áadoo baa náhát'íní dooleeł, áko bitsį́į́góó da'alį́į́' bichaan bił hááhodínéeshchał.

⁹Áádóó bik'ijį' bineest'ą' hazlį́į́' ládą́ą́', yá'át'éeh dooleeł, nidi doo bineest'ą' haleehgóó índa k'ídííłniił.

¹⁰Łah háá'áyį́į́h jį́į́ góne' kin bii' áłah ná'ádleehgi nazh'nitin nít'éé'.

¹¹Áko asdzání éí níłch'i bi'iiníziinii hayi'di hólǫ́ǫgo yaa náhootihgo hąąh dahas'ą́ągo tseebííts'áadah nááhai; éí ts'ídá doo k'ézdongo woozįįh át'ée da lá.

¹²Áko Jesus hoołtsą́ągo, hágo hodííniidgo áháłní, Asdzání, doo nidziilígíí bits'ąą néédoochid.

¹³Áádóó hak'i diilnii', t'áá áko k'íńdzísdǫǫdgo Diyin God baa hodziznih.

¹⁴Nidi háá'áyį́į́h jį́ azlį́į́' góne' Jesus éí asdzání náázdiisáhígíí biniinaa áłah ná'ádleehgo á dah náńdaahígíí, doo bił hóózhǫǫdgóó diné áłah silį́'ígíí áyidííniid, Hastą́ą́h jį́ t'éí na'anishgo bee haz'ą́; ákóne' nídaahkahgo hadaałt'é áńdanihi'dilne' doo, háá'áyį́į́h jį́į́ góne' éí dooda.

¹⁵Áko Bóhólníihii hach'į' hanáánáádzíi'go áhodííniid, Nihí t'óó ádahodoł'íinii! Da' t'ááłá'í nootínígoósh doo háá'áyį́į́h jį́į́ góne' nihibéégashii, doodaii' nihitélii bighandóó k'ééda'oh'a'go, áádóó taah nídaahdlóos da?

¹⁶Da' ákoósh díí asdzání, Éíbraham bitsi' nilį́įgo, Séítan t'áá yaa biztįhgo tseebííts'áadah nááhai nít'é'ígíí, háá'áyį́į́h jį́į́ góne' doo k'éédooldǫǫł da?

¹⁷Áko díidíígíí bee hadzoodzíi'go, hak'i dahodii'aahii t'áá ałtso ádaa yádaniidzį́į́', áádóó ayóó ádaat'éii ájoolíłígíí biniinaa diné áłah silį́'ígíí t'áá ałtso baa bił dahóózhǫǫd.

¹⁸Éí bąą ázhdííniid, Diyin God bee bóhólníihgo bił haz'áaniishą' ha'át'íí nahalin? Ha'át'íishą' bił ahąąh nideeshniłgo binahjį' hodeeshnih?

¹⁹Jó, díí nahalin: Diné ła' mástad bílástsii' néidii'ą́ągo bidá'ák'ehgi k'iidíílá, áádóó dínéesą́ągo tsin silį́į́', áko tsídii nidahat'ahgo tsin bits'áoz'a' bąąhgóó bit'oh ádayiił'įįh.

²⁰Áádóó ánáázhdoo'niid, Diyin God bee bóhólníihgo bił haz'áaniishą' ha'át'íí bił ahąąh nideeshniłgo binahjį' hodeeshnih?

²¹Jó éí, asdzání ła' bááh bee niilyółí néidii'ą́ągo ak'áán táadi haaką́ągo yił tayooznii'go niilyółígíí nahalin.

²²Áko dah náázdiidzá áádóó kin hadaas'áágóó índa kin naazhjaa'góó nazh'nitingo Jerúsalemgóó joogááł.

²³Áko diné ła' áhodííniid, Bóhólníihii da' yisdáhaaskaígíísh t'áá díkwíí dooleeł? Áádóó ábizhdííniid,

²⁴Áhoołts'óózígo yah ahóót'i' góne' yah adahidoohkahgi yéego hádaaht'į́, háálá ánihidishní, T'óó ahayóí ákóne' yah adahidookahgi ch'ééh ádeił'į́į doo, nidi doo yídaneel'ą́ą da doo.

²⁵Kin bee bóhólníihii nídidoo'nahgo dádi'doołkał, áko nihí t'áá tł'óo'di nidasoozį́įgo, dáádílkał nídanołts'ingo ádadohníi doo, Bóhólníihii, [Bóhólníihii,] nihá ąą ánílééh. Áko ánihididooniił, Nidaahkaidę́ę́' doo shił bééhózin da.

²⁶Áko índa ádadidoohniił, Ninááł da'iidą́ą́' áádóó da'iidlą́ą́', áádóó nihikintahgi na'nítin nít'éé'.

²⁷Nidi ázhdidooniił, Ánihidishní, Nidaahkaidę́ę́' doo shił bééhózin da. Bąąhági át'éii baa deínóhkáahii t'áá ánółtso, shits'ánóhkááh!

²⁸Éíbraham áádóó Áízak áádóó Jéíkab índa Diyin God yá dahalne'ii t'áá ałtso Diyin God bee bóhólníihgo bił haz'ą́ągi deidoołtsééł, nidi nihí t'éiyá yówehjį' anihi'diistł'íid dooleeł, áadi daahchxa doo, índa nihiwoo' ahídadołk'ash dooleeł.

²⁹Ha'a'aahdę́ę́' áádóó e'e'aahdę́ę́' áádóó náhookǫsdę́ę́' índa shádi'ááhdę́ę́' diné áłah dooleeł, áádóó Diyin God bee bóhólníihgo bił haz'ą́ądi bikáá' adání yich'į' dah dadínóobįįł.

³⁰Áádóó jó'akon, ła' da'akéédę́'ígíí da'alą́ąjį' dooleeł, índa ła' da'alą́ąjį'ígíí da'akéédę́ę' dooleeł.

³¹Ts'ídá ákohgo Férisii danilíinii ła' yíkaigo ádahodííniid, Nílááh, kodóó háájída dínááh, háálá Hérad hodiyeesxééł nó'ní.

³²Nít'éé' Jesus kóhodííniid, Éí mą'ii bina'adlo'í ni' kóbidohní, Jó'akon, díí jį́ índa yiską́ągo níłch'i bida'iiníziinii ayi'dę́ę́' hadahinishkaad áádóó hadaałt'é áńda'ashdle' doo, índa táá' yiską́ągo shinaanish ádįįh.

³³Ákondi díí jį́ áádóó yiską́ągo índa náábiiskání shá honít'i'góó yisháał doo; doo yee' Diyin God yá halne'ii ła' Jerúsalemdóó tł'óo'di daotsa' át'ée da.

³⁴Jerúsalem, Jerúsalem nílíinii, Diyin God yá dahalne'ii naniłtseedii, áádóó nich'į' nídabi'dil'aahígíí bił nidziyíłne'ii! T'áá naa'ahóóhai bit'a' biyaa góne' biyázhí anéí'niłígi át'éego haadashą' néelą́ą'di na'áłchíní áłah ánéishdlaa doo nít'éé', nidi éí doo danohsin da!

³⁵Jó'akon, nihighan yóó'adíí'ą́. Áko ánihidishní, Kodóó doo náádashiidoołtséeł da, Bóhólníihii bízhi' bee bi'dójíigo yigáłígíí bik'ihojidlíi doo! dadooniidgo índa.