Read Navajo LUKE 14 Bible Online

LUKE 14 - Navajo bible

LUKE 14

¹Áko Jesus łah háá'áyį́į́h jį́į́ góne' Férisii naat'áanii nilíinii ła' bikin góne' azhdooyį́į́ł biniyé yah ajííyá, nít'éé' t'áá íiyisí hadahasííd.

²Nít'éé' jó'akon, diné ła' bitah nahonichaad léi' jiiłtsą́.

³Áko Jesus hadzoodzíi'go bee haz'áanii yínda'niłtinii índa Férisii danilíinii ábizhdííniid, Háá'áyį́į́h jį́į́ góne'ésh nááhodi'doodláałgo bee haz'ą́, dooda daats'í?

⁴Nidi t'áadoo ha'át'íhída dadííniid da. Áko diné jiiłtsoodgo náábizdiisá, áádóó béézh'níłnii'.

⁵Áko diné danilíinii ábizhdííniid, Háishą' háá'áyį́į́h jį́į́ góne' nidi nihitélii, doodaii' nihibéégashii tó hahadleeh góyaa íítłizhgo, da' doósh t'áá áko háidoołtéel da?

⁶Áko díí bich'į' doo t'ą́ą́' háádadzódziih át'ée da.

⁷Áádóó bida'asnii'ígíí aląąjį' naazíinii dah nídandaahgóó nídahozhdii'ánígíí Jesus yiyiiłtsą́ągo hane' bee ak'idi'dootį́įłii yaa ch'íhoní'ą́ągo áháłní,

⁸Diné ła' iigehdę́ę́' hágo nidííniidgo, t'ááká aląąjį' naazíinii dah nídandaahgóó bich'į' ch'í'ídiyííltééł yíila', háálá diné t'ah niláhígo át'éii ił nilíinii hágo yididooniiłgoda át'é,

⁹áko nihi'níłnii'ígíí níyáago ándidooniił, Bik'i dah sínídáhígíí díí diné baa ní'aah, áko t'óó baa yádíníízįįłgo t'áá a'ohgo ádaat'éii dah nídinibįįhgi dah díníídaał.

¹⁰Nidi ni'ílnii'go, ákǫ́ǫ́ díínáałgo t'áá a'ohgo ádaat'éii dah nídinibįįhgi dah díníídaał, áko ni'níłnii'ígíí ándidooniił, Shik'is, aláahgo ádaat'éii dah nídinibįįhgi dah nídaah, áko nił da'ayánígíí t'áá ałtso bił nílį́į doo.

¹¹Háálá t'ááłá'í jinítínígo ayóó ájít'é ízh'dólzinígíí éí a'ohgo ájít'é áhodi'doolnííł, nidi t'áá háiida a'ohgo ádaa nitsídzíkeesígíí éí ayóó át'éii jílį́įgo áhodi'doolnííł.

¹²Diné ho'níłnii'ígíí ałdó' ábizhdííniid, Ałní'ní'ą́ągo adánígíí áníléehgo, doodaii' i'íí'ą́ągo áda'íínísįįdgo t'ááká nik'is danilíinii, doodaii' bił háíníjéé', doodaii' nik'éí danilíinii, doodaii' bił kéédahót'íinii da'at'ínígíí bida'óółnííh yíila', háálá ákónít'į́įgo k'éédandidoodlííł, índa ná nináda'doodlééł.

¹³Nidi áda'íínísįįdgo, badahojoobá'íígíí áádóó bąąh dah nidahaz'ánígíí áádóó nida'niłhodígíí índa doo da'oo'íinii bida'dííłnih,

¹⁴áko nik'ihojidlíi dooleeł, háálá éí t'áadoo yee k'éédadó'ne'í da. Ts'ídá t'áá ákogi ádaaníiłii náábi'diiljée'di índa k'ééndi'doolnííł.

¹⁵Bił da'jiyánígíí ła' díí yidiizts'ą́ą'go áháłní, Diyin God bee bóhólníihgo bił haz'ą́ądi bááh jidooyį́łígíí házhánee'!

¹⁶Nidi ábizhdííniid, Diné léi' ła', łah ayóó át'éego áda'íísįįdgo lą'í yida'asnii'.

¹⁷Áko baa hoolzhiizhgo bá naal'a'í ayííł'a'go, bida'asnii'ígíí áyidííniid, Hágo, háálá t'áá ałtsoní k'ad bee hasht'ehodiidzaa.

¹⁸Nít'éé' t'áá ałtso t'áadoo ła' doodaí ak'í'áhodi'ááh yaa nídiikai. Átséhígíí áhodííniid, Shí dá'ák'eh naháłnii', áko t'áá ákónéehee ákǫ́ǫ́ deesháałgo dínéesh'įįł; baa nánooshkąąh, sha'di'ní'aah.

¹⁹Náánáła' ánáádoo'niid, Shí éí béégashii ashdla' oołbąs bíighahgo naháłnii', áko bídadínéeshtahgóó deeshááł; baa nánooshkąąh, sha'di'ní'aah.

²⁰Áádóó náánáła' ánáádoo'niid, Shí éí asdzání bił ahaa nisht'áázh, éí bąą doo ákǫ́ǫ́ dósha' át'ée da.

²¹Naal'a'í nádzáago binanit'a'í yił hoolne'. Kin bee bóhólníihii báhóóchįįdgo bá naal'a'ígíí áyidííniid, Tsxį́įłgo kin haal'á bitah da'nítiingóó índa áłts'óózígo hadahodiyiit'i'góó dínááh, áko badahojoobá'íígíí áádóó bąąh dah nidahaz'ánígíí áádóó nida'niłhodii índa doo da'oo'íinii nihidíí'ish.

²²Naal'a'í ádííniid, Shinanit'a'í, bee háínídzí'ígíí ła'yidzaa, ákondi t'ah haz'ą́.

²³Naat'áanii éí naal'a'í ánéidoo'niid, Nílááh, da'nítiingóó índa dahonághangóó dínáahgo, áádę́ę́' diné naastee'ígíí nidi yah ahí'éésh, áko shikin bii' hadi'doobį́į́ł.

²⁴Diné átséédą́ą́' hoda'asnii'ii áda'íísįįdígíí doo ła' dazhdoolįh da, nihidishníigo ádíshní.

²⁵Áko jideeyáágóó diné t'óó ahayóí hoł dah diikai, áádóó Jesus nídzízyizgo diné ábizhdííniid,

²⁶Diné t'áá háiida shaazhníyáago hazhé'é, hamáda, hwe'asdzą́ąda, ha'áłchínída, bił hajííjée'da, hak'isóó áádóó halahkéida, índa t'áá hó jiinánígíí nidi doo jijoołáágóogo, éí doo shíhooł'aahii jóle' át'ée da.

²⁷T'áá háiida doo hatsin ałnáoszid jootį́į́łgóó, áádóó doo shikéé' joogááłgóó, éí doo shíhooł'aahii jóle' át'ée da.

²⁸Háálá háishą' nihitahdóó dego nízaadgóó astł'ingo ya'ii'áago ádeeshłííł niizį́'ígíí, da' doósh áłtsé dínóodaałgo bą́ą́h adooleełígíí yíídóołtah da, ałtso ályaajį' daats'í bíighah nízingo?

²⁹Éí doodago, kin biyaadę́ę́' haastł'inígíí hajíítł'ingo ch'ééh ájííł'įįdgo, dahoníł'ínígíí t'áá ałtso há nidahałt'i'go

³⁰ádaaníi doo, Díí diné i'niitł'in nít'éé' ałtso íidoolíiłjį' doo yínéés'ąąd da.

³¹Doodaii' háí aláahgo naat'áanii shį́įshą', náánáła' aláahgo naat'áanii yich'į' anaa' ííléehgo, da' doósh áłtsé dínóodaał da, áádóó yaa nitsídookos da, naadiindi mííl siláo yee shich'į' hideeskaígíí neeznáadi mííl bee bidááh deeshbahgo daats'í bíighah nízingo?

³²Doodago, t'ah nízaadę́ę́' yinéełgo, diné dzisnilii k'é náhodoodleeł jiníigo bich'į' jidooł'aał.

³³Áko t'áá háiida nihitahdóó t'áá ha'át'íhída bee hólóonii doo yóó'iidi'aahígíí, éí shíhooł'aahii doo jóle' át'ée da.

³⁴Áshįįh éí yá'át'ééh, nidi áshįįh doo halniih da silį́į'goshą', ha'át'éego halniih áńdoolnííł?

³⁵Ákót'įįhgo dá'ák'eh biniyé da'alį́į́' bichaan deesk'idii bitah doojih nidi, t'áadoo yee choo'íní da, áko éí diné t'óó yóó'iiłka'. T'áá hajaa' hólǫ́ǫgo azdiits'a'ígíí, háni' ajíists'ą́ą́'.