Read Navajo LUKE 16 Bible Online

LUKE 16 - Navajo bible

LUKE 16

¹Jesus bídahooł'aahii ałdó' áyidííniid, Diné léi' ła' ajit'į́įgo hanaalye'é há yaa áhályáanii hwee hólǫ́, nít'éé' éí yik'i dahodii'ą́ągo ádeiłní, Ninaalye'é t'óó yóó'ayiinííł.

²Nít'éé' hágo bizhdííniidgo ábijiní, Haa shį́į́ yit'éego naa hodiists'a'. Naaltsoos bik'ehgo shinaalye'é baa áhólyánígíí yah anáníłtsóós, háálá kodóó shinaalye'é doo shá baa ánááhólyą́ą da doo.

³Áko naalye'é baa áhojilyą́ą́ nít'é'ígíí t'áá hayi'ídi ázhdííniid, Haa lá deeshnííł lá, jó, shinanit'a'í binaalye'é baa áháshyą́ą́ nít'é'ígíí yits'ááshiníłt'e'? Áko la' na'ageed bich'į' doo shidziil da, índa adókeed baa yánísin.

⁴Ádeeshníłígíí lá bee hasht'e'nitsíníkéez ni. Kósht'į́įgo naalye'é baa áháshyą́ą́ nít'é'ídóó ats'ááshi'deelt'e'go t'óó diné dabighangóó tádísháah doo.

⁵Ákohgo binanit'a'í yąąh hadeis'áhígíí t'ááłá'í nítínígo hágo yidííniidgo, áłtséhígíí áyidííniid, Shinanit'a'íshą' díkwíí nąąh hayííł'á?

⁶Nít'éé' ázhdííniid, Ak'ah tóshjeeh t'ááłáhídi neeznádiin bee shąąh háá'á. Áádóó ánááhodoo'niid, Nąąh háá'áhígíí nídiiłtsóosgo tsį́įłgo nídaahgo, t'áá ashdladiinígo ánílééh.

⁷Náánáła'ígíí ánéidoo'niid, Nishą' éí díkwíí nąąh háá'á? Áko ání, Tł'oh naadą́ą́' neeznádiin azis hadeezbingo bee shąąh háá'á. Nít'éé' ánéidoo'niid, Nąąh háá'áhígíí nídiiłtsóosgo t'áá tseebídiinígo ánílééh.

⁸Áko naalye'é yaa áhályáanii doo ákwii áát'įįdígíí hóyą́ągo ádzaaígíí binahjį' binanit'a'í baa haznih, háálá díí hoolzhishígíí biyi' nihokáá' dine'é áda'ahil'ínígíí yee adinídíín ba'áłchíní yiláahdi dahóyą́.

⁹Áádóó ánihidishní, Na'adlo' bee at'į́ bee nihik'is ádá ádaałne', áko at'į́ ásdįįdgo nihik'is ádaahłaaígíí hool'áágóó kéédahat'į́į́ góne' nihaa dahodidoo'ááł.

¹⁰T'áá háiida t'áá kóníshéhí nidi bee ba'ahódlíhígíí, t'áá éí ałdó' lą'í bee ba'ahódlí, áádóó t'áá háiida t'áá kóníshéhí nidi bee bina'adlo'ígíí, t'áá éí ałdó' lą'í bee bina'adlo'.

¹¹Ákohgo at'į́ doo t'áá ákogi át'éii aya'iidoolohígíí nidi doo bee nihada'ahódlíi da nít'ée'go, ákoshą' háí at'į́ t'áá aaníinii yee niha'iidooliił?

¹²Áádóó diné náánáła' bíhígíí nidi doo bee nihada'ahódlíi da nít'ée'go, háishą' t'áá danihíhígíí nihaididoo'ááł?

¹³Naal'a'í ła'da doo t'áá łahjį' naat'áanii naaki bá nijól'a' át'ée da, háálá ła' bik'eezhdiniih doo, ła' éí ayóó'ájó'níi doo, éí doodaléi' ła' doo nahdi jó'níi da doo, ła' éí jijoołáa doo. Diyin God índa at'į́ doo t'áá łahjį' bá nijól'a' át'ée da.

¹⁴Férisii danilíinii, éí béeso yíchą́deídéelni'ii, díidí deidiizts'ą́ą'go há nídahodiiłt'i'.

¹⁵Nidi ábizhdííniid, Nihí éí diné dabinááł doo nihidahodiit'i'góó ídadi'diilnííł danohsin, nidi Diyin God éí nihijéí bił bééhózin, háálá diné bitahgóó ayóó ádaat'é dawó'níinii éí Diyin God binááł nádį́'ídi t'óó baa'ihii ádaat'é.

¹⁶Bee haz'áanii Mózes baa deet'áanii índa Diyin God yá dahalne'ii binaaltsoos John níyáhíjį' bee nihoolzhiizh, áádóó wóshdę́ę́' Diyin God bee bóhólníihgo bił haz'áanii baa hane' yá'át'éehii baa hodeezne', áko diné t'ááłá'í nítínígo t'áá bizááká yiih hijeeh.

¹⁷Nidi yádiłhił índa nahasdzáán bił yóó'ahodoogááłjí éí doo bohónéedzą́ą da, nidi bee haz'áanii biyi'dóó t'ááłáhígo dah alzhin t'áadoo biniyéhí da dooleełjí éí agháago doo bohónéedzą́ą da.

¹⁸T'áá háiida hwe'asdzą́ą́ yóó'azhdíí'ą́ągo áádóó náánáłahjį' asdzání bá náá'dzísgehígíí éí azhdííláago át'é, áádóó asdzání yóó'abi'doot'ánígíí t'áá háiida bá náá'ázyehgo éí azhdííláago át'é.

¹⁹Diné ła' t'áá íiyisí at'į́į́ léi', éé' tsídídééh nahalingo łichí'ígíí índa áłts'óózígo yisdizígíí bee na'at'ą́hí łigaii dits'idgo ályaii yee hadít'é áádóó t'áá ákwíí jį́ ch'iyáán ałtaaskąądí t'éiyá yiyą́.

²⁰Áko bich'éédą́ą'gi adókeedí léi', Lázaras yolyéego sitį́, éí t'áá át'éé nít'éé' łóód bąąh hólǫ́.

²¹Diné at'ínígíí bibikáá' adání bikáá'dę́ę́' ch'iyáán hadahindéhígíí sha'dooltsoł jinízingo; t'ah nááyówehígo łééchąą'í nidi hach'į' dah yijahgo halóód deiłnaad.

²²Nít'éé' diné bahojoobá'íígíí daaztsą́ągo diyingo nidaal'a'í dah dabidiiłtį́įgo Éíbraham yílák'e deistį́. Áádóó diné at'íinii ałdó' daaztsą́ągo yóó'ábi'diilyaa,

²³áko hool'áágóó ti'hojoonííhdóó hajííghal, nít'éé' doo deighánídi Éíbraham jiiłtsą́, Lázaras dah yoołtéełgo.

²⁴Áko hazhdoolghaazhgo ájíní, Shizhé'é Éíbraham, t'áá shǫǫdí shaa jiiníbaah, áádóó Lázaras shich'į' díł'á, bíla' bílátahgi yee taah didoolnihgo shitsoo' yee néidínóołk'as, háálá díí kǫ' biyi'gi t'áá íiyisí ti'hooshnííh.

²⁵Nidi Éíbraham áhodííniid, Shiye', hinínáádą́ą́' t'áá ałtso yá'ádaat'éehii bee ákisínídla'ígíí béénílnííh áádóó éí t'áá bináłt'éego Lázaras bich'į' nahwii'náá nít'é'ígíí ałdó' béénílnííh, nidi k'ad éí kwe'é bił náhoojǫǫd, nidi ni t'éí t'áá íiyisí ti'hwiyínííh.

²⁶Áádóó nihí índa ni ałdó' nihita'gi doo tsé'naa nijóya'ígi át'éégóó hasht'ehoolyaa, áko kodóó naa doodáłígíí doo bohónéedzą́ą da, áádę́ę́' ła' nihaa doogáłígíí ałdó' doo bohónéedzą́ą da.

²⁷Áko ázhdííniid, Éí lá bąą shizhé'é, nánooshkąąh, shizhé'é bighangóó hodíł'á,

²⁸háálá bił háájéé' ashdla', áko oo'íinii k'ehgo bił dahozhdoolnih, áko éí ałdó' díí ti'hoo'níhígi doo nidahidookah da.

²⁹Nidi Éíbraham áhodííniid, Éí Mózes índa Diyin God yá dahalne'ii binaaltsoos bee dahólǫ́; bíni'dii éí dayíists'ą́ą́'.

³⁰Áko ázhdííniid, Dooda, shizhé'é Éíbraham, jó, ła' daaztsą́ą́dę́ę́' baa nádzáago, bił hoolne'go łahgo át'éego tsíńdadookosgo Diyin God yich'į' nídadooyis.

³¹Nít'éé' ánáábizhdoo'niid, Mózes índa Diyin God yá dahalne'ii doo dayíists'ą́ą́'góó, ha'át'éegoshą' áko da'aztsą́ą́dę́ę́' ła' náádiidzáii dayíists'ą́ą' doo.