Read Navajo LUKE 19 Bible Online

LUKE 19 - Navajo bible

LUKE 19

¹Jérikodi Jesus níyáago kintahgóó hadiiyá.

²Nít'éé' diné ła' Zakíyas joolyéé léi', éí aląąjį' tax nahalyéhígíí yiniyé sidáii jílį́, áádóó ajit'į́į́ lá.

³Diné chilí jílį́įgo Jesus éí diné bił nooyéłígíí biniinaa Jesus yideestsééł ch'ééh jinízin.

⁴Áko alą́ąjį' dashdiilwodgo, tsin síkamor sikaadii bąąh hadzis'na', háálá Jesus ákǫ́ǫ́ ch'ídoogááł.

⁵Áko Jesus ákwii yigáałgo dego honééł'į́į'go áhodííniid, Zakíyas, tsxį́įłgo hadaninááh, háálá díí jį́ nighandi sédáa dooleeł.

⁶Áko tsxį́įłgo hadajííyá, áádóó baazhníyáago bąą hoł hóózhǫǫd.

⁷Diné t'áá ałtso éidíígíí dayiiłtsą́ągo doo bił adaaníígóó Jesus yaa nídaast'įįdgo ádadííniid, Diné bąąhági ááníiłii ba'ałk'ee hwiidoołkáałgo bił yah ajííyá.

⁸Nít'éé' Zakíyas yiizį'go Bóhólníihii áyidííniid, Jó'akon, Bóhólníihii, shinaalye'é ałníí'dóó badahojoobá'íígíí bitaa deeshnih, áádóó diné ła' t'áá ádzaagóó t'áadoo le'é bee bida'délo'ii, éí dį́įdi ahą́ą́h nániiláago baa náhideesh'nił.

⁹Nít'éé' Jesus áhodííniid, Díí jį́ bee yisdá'iildéehii díí hooghanígi hazlį́į́', jó, éí ałdó' Éíbraham bits'ą́ą́dóó oochíiłii ła' jílį́.

¹⁰Háálá Diné Silį́į'ii éí yóó'adahaaskaígíí haidínóotaałgo áádóó yisdánéidiyoo'niłgo yiniyé níyá.

¹¹Díidíígíí deidiizts'ą́ą'go, Jerúsalemjį' t'áá áyídídę́ę́' joogáłígíí índa Diyin God bee bóhólníihgo bił haz'áanii t'áá áko yidooltsééł danízinígíí biniinaa, hane' bee ak'idi'dootį́įłii bee bił ahozh'niilne'.

¹²Áko ázhdííniid, Diné ayóó át'éii ła' nízaadi kéyah léi'góó deesháałgo áadi bee óhólníihgo bił haz'áanii ádá shóideesht'eeł, áádóó índa nídeeshdááł niizį́į́'.

¹³Áko t'ah doo dah diighááhgóó bá nidaal'a'í neeznált'éego hágo yidííniidgo, béeso lą'í bą́ą́h ílíinii máína yolyéhígíí neeznáá yitaiznii', áko áyidííniid, Nánísdzáajį' díí bee naanish ádadoohłííł.

¹⁴Nidi hadine'é dahojoołá, áko diné ła' biniyé nii'nilgo hakéé' dayííł'aadgo ádaaní, Díí diné nihá hoo'áał dooleełígíí doo daniidzin da.

¹⁵Áko nít'éé' bee óhólníihgo bił haz'áanii baa deet'ą́ągo nádzáago nida'dziisnii'góó bíńdaniidee'ígíí bił bééhodoozįįł biniyé, Shá nidaal'a'í béeso bitaa sínii'ígíí hágo dabidohní, dííniid.

¹⁶Áko áłtséhígíí bich'į' niníyáago ábíłní, Bóhólníihii, nibéeso éí neeznáá bínániidee'.

¹⁷Áko áyidííniid, Yá'át'éehgo naal'a'í nílíinii, yá'át'éhígi íinidzaa! T'įįhdígo bee na'ahoosdlí'ígíí yá'át'éehgo ninaanish silį́į́', éí bąą neeznáago kin hadaas'á bee nóhólníih doo.

¹⁸Áádóó naaki góne'ígíí ałdó' níyáago ání, Bóhólníihii, nibéeso éí ashdla' bínániidee'.

¹⁹Áko áhodííniid, Ni ałdó' ashdla'go kin hadaas'á bee nóhólníih doo.

²⁰Ła'ígíí ałdó' náánádzáago ánáádoo'niid, Bóhólníihii, kǫ́ǫ́ nibéeso si'ą́, bee ádít'oodí bił yishjashgo séł'ą́ą́ nít'éé';

²¹ninásdzidgo bąą, háálá diné hashkéii nílį́, áádóó t'áá jíík'e sha'doolyééł t'éí nínízin índa t'áadoo k'idííníláii nánígish.

²²Nít'éé' áháłní, T'áá ni nizaadígíí bee naa nídéesht'įįł, bąąhági ááníiłgo naal'a'í nílíinii! Jó, diné hashkéii nishłį́, t'áá jíík'e sha'doolyééł t'éí nisin, índa t'áadoo k'idííláii náshgishgo nił bééhózin lá.

²³Ákoshą' ha'át'éego shibéeso doo béeso bá hooghan góne' nííní'ą́ą da, áko nánísdzáago ínáóltą'í bił shaa náninídee' doo nít'éé'?

²⁴Áko ákǫ́ǫ́ naazínígíí áyidííniid, Béeso ba'ít'ánígíí bits'ą́ą́' nídooh'aahgo neeznáá máína neijaahígíí baa noh'aah.

²⁵(Nít'éé' ádahodííniid, Bóhólníihii, éíyee' máína neeznáá bee hólǫ́!)

²⁶Ánihidishní, T'ááłá'í jinítínígo ha'át'íhída hwee hólónígíí, biláahgo ła' haa náádoolyééł, nidi ha'át'íhída hwee ádinígíí, éí t'įįhdígo hwee hólónígíí nidi haghadoolyééł.

²⁷Nidi díí dashijoołáhígíí, bá hweesh'áał dooleełgo doo deinízin daígíí, kwe'é nidahoh'éeshgo shinááł nidaałtseed.

²⁸Ákót'éego Jesus haadzíi'go, Jerúsalem góde alą́ąjį' dah diiyá.

²⁹Dził Álivz hoolyéegi, Béthfajii áádóó Béthanii bich'į' t'áá áyídídę́ę́' joogáałgo, hódahooł'aahii naakigo dashdiił'a',

³⁰kójíníigo, Nihílááh, náyónaanídi nihidááhjí kin sinilíjį' doh'aash, ákwii t'áá noo'áázhgóó télii yázhí t'ah doo adiyeehígíí dahaastł'ǫ́ǫgo bik'ídooh'ash, éí k'e'dooh'ałgo nídoohłóós.

³¹Ła'da nanihídééłkidgo, Ha'át'íishą' biniyé k'e'oh'ad? nihiłníigo, Jó, Bóhólníihii choidooł'įįł, bididoohniił.

³²Áko bi'dool'aadígíí íí'áazhgo t'áá ábizhdííniidígi át'éego yik'íní'áázh.

³³Nít'éé' télii yázhí k'e'ji'adgo bee bídahólníhígíí ádahałní, Ha'át'íí biniyé télii yázhí k'e'oh'ad?

³⁴Áko ájíní, Jó, Bóhólníihii choidooł'įįł.

³⁵Áko Jesus baazhnílóozgo, habeeldléí éí télii yázhí bikáa'jį' adadziiznilgo Jesus yik'i dah neezdá.

³⁶Áádóó booyéełgo dabibeeldléí atiingóó yá dayíłkaad.

³⁷Áko Dził Álivz adah góyaa k'adę́ę dashdiigháahgo, t'óó ahayóí bikéé' nidaakaígíí éí ádahooníiłii ayóó ádaat'éii t'áá ałtso dayiiłtsánígíí bąą bił dahózhǫ́ǫgo dadilwoshgo Diyin God yaa dahaniihgo yaa nídiikai,

³⁸áko ádaaní, Aláahgo Naat'áanii, Bóhólníihii bízhi' bee bi'dójíigo yigáłígíí bik'ihojidlíi doo! Yá'ąąshdi hózhǫ́ǫ doo, índa aghánáhóó'áadi ni'deezlíid doo!

³⁹Áko diné yíl'áhígíí bitahdę́ę́' Férisii danilíinii ła' ádahodííniid, Na'nitiní, nikéé' nidaakaígíí t'áadoo ádadohníní, bidiní.

⁴⁰Áko haadzíi'go ání, Ánihidishní, Azhą́ díí dadiiłheel nidi, tsé nidi hadadidoolwosh.

⁴¹Kin haal'áhígíí t'áá áyídídę́ę́' yich'į' yigáałgo yiyiiłtsą́ągo yaa yícha,

⁴²kóníigo, Dooládó' ts'ídá t'áá díí jį́ bee ach'į' hózhóonii nił bééhózin le' laanaa nósh'níi da! Nidi k'ad éí nits'ąą nídees'į́į́'.

⁴³Háálá bich'į' hoolzhish, éí nida'ana'í łeezh ninídeidootsih índa ninídoot'ihgo doo ch'óoya' át'éégóó ándoolííł,

⁴⁴áádóó niyi'di kéédahat'ínígíí t'áá bił ni'jį' andi'yoolghą́ą́ł, índa tsé t'ááłá'í nidi doo ałk'i dah si'ą́ą́góó ádeidoolíłígíí éí bił neidoołkááł, háálá Diyin God naa níyáhígíí t'áadoo baa ákoninizį́į' da.

⁴⁵Áádóó kin bii' sohodizin bił haz'ą́ą́ góne' yah ajííyáago nida'iiłniihígíí ch'ízhneełkaadgo baa nízdiidzá,

⁴⁶kójíníigo, Jó, bee ak'e'ashchį́, Shikin éí kin bii' sohodizin át'é. Nidi aghada'ii'níiłii be'a'áán ádaahłaa lá.

⁴⁷Áádóó t'áá ákwíí jį́ kin bii' sohodizin bił haz'ą́ą́ góne' Jesus nazh'nitin nít'éé'. Nidi aláahgo nááda'iiłniihii áádóó bee haz'áanii yínda'niłtinii índa diné alááh dahideezínígíí dahodiyiilyééł ch'ééh daniizį́į́',

⁴⁸nidi ákódadooníiłgi doo bá ashja da'aléeh da, háálá diné t'áá ałtso t'áá íiyisí dahwíists'ą́ą́'.