Read Navajo LUKE 20 Bible Online

LUKE 20 - Navajo bible

LUKE 20

¹Łah kin bii' sohodizin bił haz'ą́ą́ góne' diné nazhnitingo, hane' yá'át'éehii baa hojilne', nít'éé' aláahgo nááda'iiłniihii áádóó bee haz'áanii yínda'niłtinii índa diné yá aląąjį' naazíinii haa yíkai,

²áko ádahałní, Nihił hólne', ha'át'íí bee óhólnííh shį́įshą' bik'ehgo díidí baa naniná, éí doodaii' háishą' díí bee óhólnííh neidiní'ą́?

³Áko hach'į' t'ą́ą́' hanáádzíi'go áhodííniid, Shí ałdó' łahgo nanihídídéeshkił; k'ad shił dahołne',

⁴John lá háádę́ę́' bee óhólníihii bik'ehgo tó yee asį́į́h nít'éé'? Yá'ąąshdę́ę́' daats'í, éí doodaléi' diné bits'ą́ą́dóó daats'í?

⁵Áko yaa nídaat'į́įgo ádaaní, Yá'ąąshdę́ę́', dadii'niidgo la', ádidooniił, Ákoshą' haa yit'éego doo dahwiisoohdląąd da?

⁶Doodaléi', Diné bits'ą́ą́dóó, dadii'niidgo la', diné t'áá yíl'áá nít'éé' nihił nidazdiyoołniił, háálá John éí t'áá aaníí Diyin God yá halne'ii nilį́į́ nít'éé' dayó'ní.

⁷Áádóó ánáádadoo'niid, Bits'ą́ą́dóóígíí doo nihił béédahózin da.

⁸Áko Jesus áhodííniid, Shí ałdó' bee óhólnííh bik'ehgo díidí baa naasháhígíí doo bee nihił hodeeshnih da.

⁹Nít'éé' díí hane' bee ak'idi'dootį́įłii diné bee bił ahozh'niilne'go ájíní: Diné ła' ch'il na'atł'o'ii k'iidíílá, áko yaa ádahalyą́ą dooleełii yeisįįd, áádóó doo hah nídoodááłgóó náánáła' kéyahgóó ííyá.

¹⁰Baa hoolzhiizhgo há naalte' ła' dá'ák'eh yaa ádahalyánígíí bich'į' ajííł'a', ch'il na'atł'o'ii bineest'ą' ła' baa dazhdooyééł biniyé, nít'éé' aa ádahalyáanii éí naalte' t'óó nídeineesxaalgo ch'il na'atł'o'ii t'áágééd anídeis'a'.

¹¹Áko náánáła' naalte' anáájííł'a', nít'éé' éí ałdó' nínáádeineesxaal áádóó t'óó baa yáhásinígi ádayííł'įįdgo, ch'il na'atł'o'ii t'áágééd anínáádeis'a'.

¹²T'áá áko táá' góne'ígíí anáájííł'a'; éí ałdó' atídayííł'įįdgo ch'ídayiisxan.

¹³Áko ch'il na'atł'o'ii bee bóhólníihii ání, Haa lá deeshnííł lá? Shiye' ayóó'óósh'níinii lá hach'į' deesh'aał ni; éí índa hoł danilį́į doo sha'shin.

¹⁴Nidi ch'il na'atł'o'ii yaa ádahalyánígíí éí dayiiłtsą́ągo áda'ahidoo'niid, Díí ch'il na'atł'o'ii bíí' dooleełígíí át'į́į́ lá; haa'íshą' dadiyiilyéełgo bíí' dooleełii nihíí' dadooleeł.

¹⁵Áko ch'il na'atł'o'ii bitahdóó ch'ídahwiisxango dahwiisxį́. Áko lá ch'il na'atł'o'ii bee bóhólníihii haa hodoolííł lá?

¹⁶Éí lá doogááł ni, áádóó ch'il na'atł'o'ii yaa ádahalyánígíí neidoołtsił, áko éí ch'il na'atł'o'ii éí náánáła' yaa ádahalyą́ą dooleełii yaa néidoosįįł. Áko éidíígíí deidiizts'ą́ą'go ádaaní, T'ah nít'éé' lá t'áadoo ákót'įįh da łeh!

¹⁷Nidi hak'i níghalgo áháłní, Áko díí kót'éego bee ak'e'ashchínígíishą' ha'át'íí ááhyiłní? Kin ádeił'íní tsé doo deiniizį́'ígíí t'áá éí tsé bee naaná'ástł'inii silį́į́'.

¹⁸T'áá háiida éí tséhígíí bik'ijį' ajíígo'ígíí nihizhdooltǫǫł, nidi t'áá háiida hak'ijį' naalts'idígíí ch'íhodoołk'ááł.

¹⁹T'áá ákwii oolkiłígíí biyi' bee haz'áanii yínda'niłtinii índa aláahgo nááda'iiłniihii hodi'dooltsoł ch'ééh daniizį́į́', nidi diné yéédaaldzid, háálá éí hane' bee ak'idi'dootį́įłii binahjį' bí baa níjít'į́įgo bee hadzoodzíi'go yaa ákodaniizį́į́'.

²⁰Áko t'áá hadahasíidgo naalchi'í adeis'a', áko éí diné t'áadoo át'éhígóó nidaakaii ádahodil'į́įgo hazaad yee hak'i dahodidoo'ááł biniyé haa nahaakai, éí binahjį' naat'áanii yaa dahodidoo'áałgo éí hwee ádíhólníih dooleeł danízingo ádaat'į.

²¹Áko naalchi'í kódaaníigo Jesus nideídééłkid, Na'nitiní, nihił béédahózingo t'áá ákogi át'éego yáníłti' áádóó na'nítin, índa diné doo ła' a'ohgo baa nitsíníkees da, nidi t'áá aaníígóó Diyin God k'ehgo honít'i' bína'níłtin.

²²Síízar bich'į' tax nahalyéegoósh bee haz'ą́, dooda daats'í?

²³Nidi bíkada'jiiłhilígíí bił bééhózingo áháłní, [Ha'át'íísh biniyé nashídanohtaah?]

²⁴Béeso denériyas yolyéhígíí ła' nihá nísh'į́. Háísh bitsiits'iin bik'i si'ą́ índa háísh bízhi' bikáá'? Áko ádadííniid, Síízar lą́ą.

²⁵Áko áhodííniid, Jó, éí bąą Síízar bíhígíí Síízar baa nídahoh'nííł, áádóó Diyin God bíhígíí Diyin God baa nídahoh'nííł.

²⁶Áko bee hadzoodzí'ígíí binahjį' diné binááł yee hákada'iiłhilígíí doo yídanéés'ąąd da, nidi bich'į' hadzoodzí'ígíí bąą t'óó bił adahayóigo t'áadoo ha'át'íhída náádadoo'niid da.

²⁷Sádjusii danilíinii ła' haa yíkai, éí aninéédę́ę́' doo náá'di'yiijeeh da daaní,

²⁸áádóó kódaaníigo nidahódééłkid, Na'nitiní, Mózes yę́ę kót'éego nihá ak'e'ashchį́, diné ła'da bił hajíí'áázh be'asdzą́ą́ hólǫ́ǫgo ba'áłchíní t'áadoo haleehí daaztsą́ągo, hak'is be'asdzą́ą́ nít'é'ígíí hwe'asdzą́ą dooleeł, áko hak'is yę́ę bá áłchíní hwee hodooleeł, níí nít'éé'.

²⁹Áko nít'éé' ashiiké t'áá ła' háájé'ígíí tsosts'id yilt'éé lá; alą́ąjį'ígíí be'asdzą́ą́ hazlį́į́', nít'éé' t'áadoo ba'áłchíní haleehí daaztsą́;

³⁰hakéédę́'ígíí éí hwe'asdzą́ą́ nít'é'ígíí néidiiłtį́įgo t'áadoo ba'áłchíní haleehí danáánáztsą́.

³¹Áádóó náá'ákéédę́'ígíí t'áá ákónáánádzaa, t'áá ákót'éego tsosts'id jilt'éé nít'éé' yę́ę t'áá ádzíłtso t'áadoo ha'áłchíní dahazlį́'í ádajídin.

³²Áádóó bik'ijį' asdzání ałdó' daaztsą́.

³³Áko aninéédę́ę́' náádi'yiijeeh bijį́įdishą', éí háí be'asdzą́ą́ jílį́į doo? Háálá t'áá tsosts'id yilt'éego be'asdzą́ą́ dzizlį́į́'.

³⁴Áko Jesus áhodííniid, Díí k'ad da'ahílchíhígíí ba'áłchíní nida'ayeh índa ahaa daha'nííł,

³⁵nidi aninéédę́ę́' náádi'yiijée'go atah dadooleełgo yą́ą́h da'nilíinii éí doo nááda'doogeh da, doo nidi ahaa dabi'dii'níił da doo,

³⁶háálá doo náádínóo'néeł da, jó, diyingo nidaal'a'í bił ahidajíłt'é, índa náádi'yiijeeh ba'áłchíní dajílį́įgo Diyin God ba'áłchíní dajílį́.

³⁷Jó, Mózes nidi dówózhii biyi'dę́ę́' bich'į' ha'oodzí'ígíí baa hane' binahjį' da'neeznáádę́ę́' náádi'yiijeehígíí ííshją́ą́ áyiilaa, háálá ádííniid, Bóhólníihii éí Éíbraham biDiyin God áádóó Áízak biDiyin God índa Jéíkab biDiyin God nilį́.

³⁸Áko daneeznáanii éí doo biDiyin God jílį́į da, nidi dahináanii biDiyin God jílį́, háálá hanáałgo t'áá ałtso dahiná.

³⁹Áko bee haz'áanii yínda'niłtinii ła' hadaasdzíi'go ádaaní, Na'nitiní, yá'át'éehgo bee hahínídzíí'.

⁴⁰Háálá t'ááłáhígo nináádahódídóołkiłgi nidi hach'į' dáátiid.

⁴¹Nidi áhodííniid, Ha'át'éegoshą', Christ éí David biye' nilį́, daaní?

⁴²Jó, David t'áá hó Sin binaaltsoosígíí biyi' ájíní, Bóhólníihii éí shiBóhólníihii áyidííniid, Shinish'náájí dah sínídá.

⁴³Nida'ana'í bik'i dííníl'eezgo ániishłaajį'.

⁴⁴Áko David éí shiBóhólníihii hałní, ákoshą' haa yit'éego biye' jílį́?

⁴⁵Áko diné t'áá ałtso da'íists'ą́ą'go bídahooł'aahii áyidííniid,

⁴⁶Bee haz'áanii yínda'niłtinii bits'ąą ádaa ádahołyą́, éí bi'éé' danineezgo nidaakaigo bił yá'ádaat'ééh, áádóó nida'iiniihgóó k'é dabidi'níigo bił ayóó ádaat'é, áádóó kin bii' áłah nída'adleehí dabiyi'góó índa áda'azįįdgóó aląąjį' naazíinii bá nidahaz'ą́ą́góó bił ayóó ádahoot'é,

⁴⁷índa asdzání bąąh ádahasdįįdii dabighan yaa nidahodikai índa t'óó ádaat'į́įgo nízaadgóó sodadilzin. Éí t'ah aláhídi át'éego bik'e'ashch'íi'go bá nidahodoot'ááł.