Read Navajo LUKE 21 Bible Online

LUKE 21 - Navajo bible

LUKE 21

¹Nít'éé' hajííghalgo diné da'at'íinii béeso adaha'níiłgi bibéeso adayiiníiłgo jiiłtsą́,

²áko asdzání bąąh áhásdįįdii bahojoobá'í léi' béeso ts'ídá a'ohgo ílínígíí naaki ayíínilgo jiiłtsą́.

³Áádóó ázhdííniid, T'áá aaníígóó ánihidishní, Díí asdzání bąąh áhásdįįdii bahojoobá'í nidi t'áá ádzíłtso haláahgo i'íínilgo át'é,

⁴háálá t'áá ádzíłtso t'áá ałtsoní bee bilááh dazhneel'ánígíí éí lą'í adadziiznil, nidi díí asdzání t'áá íiyisí bahojoobá'í nidi, t'áá yee hinánígi ałtso ayíínil.

⁵Nít'éé' kin bii' sohodizin tsé da'ílíinii índa aa yílyáii bee naashch'ąą'ígíí ła' baa yádajiłti'go hodiizts'ą́ą'go áháłní,

⁶Díí k'ad danół'ínígíí tsé doo ła' t'áá ałk'i dah si'ą́ą da dooleełígíí beidoołkááł, nidi t'áá ałtso naa'ahidoolkał.

⁷Áko nidahódééłkidgo ádaaní, Na'nitiní, hahgoshą' díí ákódahodoonííł, áádóó k'adę́ę ákóhánéehgo ha'át'íísh bee ééhózin dooleeł?

⁸Áko ázhdííniid, Ádaa ádahołyą́, áko doo yóó'adanihidi'nóot'ah da, háálá lą'í, Shí Christ ásht'į́, daaníigo shízhi' yee ádadójíigo nidahidookah áádóó, K'ad áajį' ahoolzhiizh! daaníigo. T'ááká bikéé' dah dahidoohkááh yíila'.

⁹Anaa' dahólǫ́ǫgo índa hahóó'áago dadoohts'a'go, éí t'áadoo bik'ee nihił daayé'í, háálá díí áłtsé ts'ídá ádadoonííł, nidi nihodoogáłígíí éí doo t'áá hooshch'į' ádooníił da.

¹⁰Ákohgo ábizhdííniid, Ał'ąą dine'é ałch'į' nídahidiibáah dooleeł, áádóó łahgo nihokáá' bee bóhólníihgo bił haz'áanii índa náánáła' nihokáá' bee bínááhólníihgo bił nááhást'áanii yił ałch'į' nídahidiibáah dooleeł,

¹¹áko łahgóó ayóó át'éego ni' nídahidi'náah doo, áádóó nídahodichįįh áádóó nidahałniih doo, índa yá'ąąshdę́ę́' bik'eda'íyée'ii índa bee éédahózinii ayóó ádaat'éii nídeiltséeh dooleeł.

¹²Nidi díí t'áá át'é t'ah doo ánééhgóó danihiidoołtsołgo atídanihił'į́į doo, kin bii' áłah nída'adleehígíí índa awáalyaajį' adanihii'éeshgo, áádóó shízhi' biniinaa aláahgo naat'áanii índa naat'áanii naazdáágóó bidááhdę́ę́' nidanihii'éesh doo.

¹³Áko éí baa hoolzhiizhgo nihí shá dahołne'go nihá ashja doolííł.

¹⁴Éí bąą nihijéí bii' hazhó'ó hasht'e'nitsídanohkees, bee ák'ihadadidoohdzihii t'áá bítséedi t'áadoo nabik'ítsídaałkeesí,

¹⁵háálá saad índa bee hódzáanii nihaa dadideesh'ááł, éí nihits'ą́ą́jí danilíinii t'áá ałtso doo yídaneel'ą́ą da doo, índa yich'į' doo hadaodziih ádaat'ée da doo.

¹⁶Nihishchíinii áádóó bił hadashoojée'ii áádóó danihik'éí índa danihik'isóó nidi ninádanihididoo'ááł, áko nihí ła' nidanihidoołtsił;

¹⁷shízhi' biniinaa diné t'áá ałtso nihik'ee dadiniih dooleeł.

¹⁸Ákondi nihitsiits'iin bąąhdóó nihitsii' t'ááłá'í nidi doo yóó'adoodił da.

¹⁹Hada'íínółnínígíí binahjį' dadoohdzih.

²⁰Nidi Jerúsalem éí siláo bináshzhiizhgo daołtsą́ągo, ádooldįįłígíí t'áá áyídídę́ę́' hadziihgo nihił béédahodoozįįł.

²¹Áyąądą́ą́' Judíyagi kéédahojit'ínígíí dziłjį' choda'iizhdooł'įįł, áádóó kin hadaas'áagi kéédahojit'ínígíí ch'íhizhdookah, índa binaagóó kéédahojit'ínígíí éí doo ákóne' adahizhdookah da,

²²háálá bee ak'e'ashchínígíí ałtso bohodoolnííł biniyé díí k'ééhodi'nééh yoołkááł át'ée dooleeł.

²³Éí beiníłką́ągo dadzooltsánígíí índa awéé' dahałt'o'ígíí doo hasht'é'égóó yínííł biishdínóodah! Háálá nahasdzáán bikáá'góó t'áá íiyisí yínííł łą́ą doo, índa díí dine'é t'óó báhádzidgo atídabidi'doolnííł.

²⁴Diltłish deeníinii bee bidi'doogą́ą́ł, áádóó ał'ąą dine'é t'áá ałtso bitahgóó yisnááh danilį́įgo adabidi'yoot'ish, áádóó doo Jew dine'é danilíinii bił hoolzhishígíí bíighah azlį́į'jį' doo Jew dine'é danilíinii Jerúsalem yik'i nidookah.

²⁵Jį́honaa'éí áádóó tł'éhonaa'éí índa sǫ' bee éédahózingo deidooltsééł, índa nihokáá' dine'é t'áá íiyisí bich'į' nidahwii'náa dooleeł, tónteel índa tó bíígháán náádadiidáhígíí dadiits'a'go biniinaa t'óó hoł dahalą́ą doo.

²⁶Yéé' bik'ee índa nahasdzáán bikáa'gi báhádzidii nawólníinii bik'ee háni' áńdaadįįh doo, háálá yá'ąąshdi bee dahółdzilii dadoogał.

²⁷Ákohgo índa Diné Silį́į'ii k'os bił yildohgo áádóó bee adziil índa ayóó át'é ats'ádi'nílííd yił yigáałgo deizdoołtsééł.

²⁸Nidi díigi áhooníiłgo hodeeshzhiizhgo de ádaahnéehgo dego dasídóo'į́į' doo, háálá nihéédahididoochiłígíí k'adę́ę baa hoolzhíish doo.

²⁹Hane' bee ak'idi'dootį́įłii ałdó' yee hoł hoolne': Fig sikaadii índa tsin naazkaadii t'áá ałtso danół'į́;

³⁰jó, éí nídeitsóohgo danół'į́įgo k'adę́ę ch'ínáshį́įgo nihił béédahózin łeh.

³¹Nihí ałdó' díidíígíí bidahoolníiłgo danół'į́įgo Diyin God bee bóhólníihgo bił haz'áanii t'áá áyídídę́ę́' bił nihoolzhiizhgo nihił béédahodoozįįł.

³²T'áá aaníígóó ánihidishní, Díí oochíłígíí doo bił yóó'ahodoogáał da, díidí t'áá ałtso ádaadzaago índa.

³³Yádiłhił índa nahasdzáán bił yóó'ahodoogááł, nidi shizaad t'éiyá doo bił yóó'ahodoogáał da.

³⁴Nidi nihí ádaa ádahołyą́, áko ádił ná'ahanaad áádóó na'adlą' índa díí k'ad iiná bida'diił'áhígíí doo nihijéí bii' daahéeł da doo, áko éí bijį́ doo t'áadoo hooyání bił nihaa hodoolzhish da.

³⁵Háálá nahasdzáán bikáá' t'áá át'éé nít'éé' kéédahojit'ínígíí t'áá ádzíłtso łoh á si'ą́ nahalingo haa hodoolzhish.

³⁶Éí bąą t'áá áłahjį' hada'ísídół'į́į́' índa sodadołzin, éí danihidziilgo ádanihi'di'doolníiłgo díí ádahodooníłígíí t'áá ałtso bits'ąą dadoohdzih índa Diné Silį́į'ii bidááhdę́ę́' deidoohsįįł biniyé.

³⁷Áko t'áá ákwíí jį́ kin bii' sohodizin bił haz'ą́ą́ góne' nazh'nitin, nidi tł'ée'go t'éí ch'ééjídáahgo Dził Álivz hoolyéedi náhwiilkááh.

³⁸Áko t'áá ákwíí abíní kin bii' sohodizin bił haz'ą́ą́ góne' diné t'áá ałtso dahwíists'ą́ą́' biniyé haa áłah nádleeh.