Read Navajo LUKE 23 Bible Online

LUKE 23 - Navajo bible

LUKE 23

¹Ákohgo diné áłah silį́'ígíí t'áá át'é nídiijéé', áádóó Jesus éí Páílat yidááhdę́ę́' nideizlóóz.

²Áko hak'i dahodii'aahgo yaa nídiikaigo ádaaní, Díí dinéhígíí nihidine'é t'áá ádzaagóó neinitingo yóó'ayii'éésh lá, áádóó Síízar ałdó' t'áadoo nályééh bich'į' nidahohłéhí, nihiłníigo, índa, T'áá bí Aláahgo Naat'áanii Christ nishłį́, níigo nihił béédahoozin.

³Áko Páílat, Da' niísh Jew dine'é Aláahgo biNanit'a'í nílį́? hałníigo nahódééłkid. Áko ábizhdííniid, Jó, bee háínídzíí'.

⁴Áádóó Páílat éí aláahgo nááda'iiłniihii índa diné áłah silį́'ígíí áyidííniid, Díí diné yee ádąąh dah hast'áanii doo ła' bá shił bééhoozin da.

⁵Nidi dooda yee naastee'go ádaaní, Jó, Gáliliidóó háát'i'go Judíya t'áá át'éé nít'éé' bii' t'áá kojį' nidi, na'nitingo diné yił hááhoniłcha'.

⁶Áko Páílat éí yidiizts'ą́ą'go t'áá daats'í aaníí Gálilii dine'é ła' jílínígíí yína'ídééłkid.

⁷Nít'éé' Hérad éí kéyah yii' naat'áanii nilínígíí bii'dę́ę́' nijigháago bił bééhoozingo, Hérad yich'į' ahóół'a'; íídą́ą́' Hérad t'áá bí Jerúsalemdi naaghá.

⁸Áko Hérad éí Jesus yiyiiłtsą́ągo, t'áá íiyisí yąą bił hóózhǫǫd, háálá t'ah ałk'idídą́ą́' hwiideestsééł ch'ééh nízin, háálá haa hodiizts'ą́ą́', áko álílee k'ehgo bee ééhózinii ła' shinááł ázhdoolííł hó'ní.

⁹Áádóó t'áá nízaadgóó nahódééłkid, nidi t'áadoo bich'į' hadzoodzíi' da.

¹⁰Áko aláahgo nááda'iiłniihii índa bee haz'áanii yínda'niłtinii t'áá chaałída hak'i dahodii'aahgo naazį́.

¹¹Áádóó Hérad índa bisiláo éí doo bił jílį́į́góó há nidahast'i', índa éé' ayóó ánóolninii yee hadahodiilaago Páílat yich'į' nát'ą́ą́' anáhóół'a'.

¹²Áko t'áá éí bijį́ Hérad índa Páílat ałk'is silį́į́', háálá díí bítséedidą́ą́' ałk'ee di'niih nít'éé'.

¹³Ákohgo Páílat éí aláahgo nááda'iiłniihii índa naat'áanii danilíinii índa diné ałdó' áłah áyiilaago,

¹⁴áyidííniid, Diné t'áá ádzaagóó neinitingo yóó'ayii'éésh dadohníigo díí diné bił shaa noohkai, áko nihinááł nabídééłkid. Jó akonee', díí diné bik'i dahodooh'aahígíí bąąhági át'éii bąąh ádingo shił bééhoozin;

¹⁵Hérad nidi ch'ééh áát'įįd, háálá t'óó nihich'į' anáhóół'a'. Jó akonee', biniinaa dazdootsaałígíí bą́ą́h ílį́įgo ájíít'įįdii éí t'áá ádin;

¹⁶éí bąą t'óó náhodínéestsxisgo hwéédideeshchił.

¹⁷[Jó, hodílzingo áłah ná'ádleeh néi'aahgo awáalyaaí t'ááłá'ígo hach'į' ch'ééyiiłt'e'go bee haz'ą́.]

¹⁸Nidi t'áá ałtso hadadeeshghaazhgo ádaaní, Eii diné sołhé, Barábasgo nihich'į' ch'ééníłt'e'.

¹⁹(Éí dinéhígíí kin haal'áagi hááhoniłcha'go naat'áanii yił da'ahigą́ągo, índa diné neiłtseedgo biniinaa awáalyaa góne' yah eelt'e'.)

²⁰Éí bąą Páílat éí Jesus béédideeshchił nízingo hach'į' hanáánáádzíí',

²¹nidi dadilwoshgo ádaaní, Tsin ałnáoszid bikáa'jį' bił o'ołkaałgo sołhé héii, bił o'ołkaałgo sołhé!

²²Páílat táadi hadzidziih góne' ánáábizhdoo'niid, Ha'át'éegoshą', ha'át'íí doo aaníí shį́įshą' baa nijiyá? Bee ádąąh dah hodzist'ą́ągo biniinaa dazdootsaałii doo ła' há shił bééhoozin da; éí bąą t'óó náhodínéestsxisgo hwéédideeshchił nisin.

²³Nidi hoł i'doolkałgo yéego dayókeedgo hodi'yoolyéłígíí yee naastee'go [aláahgo nááda'iiłniihii ałdó'] ádaanínígíí yee ak'eh dadeesdlį́į́'.

²⁴Áko Páílat éí diné dayókeedígíí bi'doolnííł biniyé bee lą́ adzisłį́į́'.

²⁵Naat'áanii yił ahoogą́ą'ii índa diné neiłtseedii awáalyaa góne' yah eelt'e'ígíí nídayókeedgo bich'į' ch'éézhníłt'e', nidi Jesus éí t'áá bí danízinígi ádeidoolííł biniyé diné baazhníłtį́.

²⁶Áádóó dah dahodiilóóz, nít'éé' Sairíinii hoolyéédę́ę́' diné léi', Sáíman joolyéego, éí dáda'ak'ehdę́ę́' joogáałgo dahasił, áko hawostisgi tsin ałnáoszid dah deiztą́ągo, Jesus bikéé' nihizhnítą́.

²⁷Nít'éé' diné t'óó ahayóí áádóó asdzání éí Jesus yaa ák'idadiit'aahgo daachago Jesus yikéé' nánízą́.

²⁸Nidi Jesus hach'į' názyizgo áháłní, Jerúsalem bich'é'éké danohłíinii, t'áadoo shaa daahchaí, nidi t'áá nihí índa niha'áłchíní baa daahcha.

²⁹Háálá jó'akon, diné kódazhdidooniiłígíí t'áá áhánídę́ę́' bich'į' yoołkááł, Doo da'ałchíhígíí índa doo daaltsánígíí, índa doo dabi'doolt'ódígíí éí dabízhánee'!

³⁰Áadi índída dził kódeiłníi dooleeł, Nihik'i daołdaas, áádóó dah daask'idígíí, Nídanihidoł'įįh, daaníigo yaa nídidookah.

³¹Háálá tsin ditłée'go kódaat'į́įgo, ákoshą' tsin sigango haa daat'į́į doo?

³²Ádąąh dah hast'ánígíí nidilt'éego ałdó' nidootsiłjį' hoł bi'deet'eezh.

³³Áádóó Tsiits'in hoolyéego haz'ánígi íldee'go, ákwii tsin ałnáoszid bikáa'jį' hoł ada'askaal, ádąąh dah hast'ánígíí ałdó', ła' honish'náájígo dah hidiilt'e', ła' éí honishtł'ajígo dah hidiilt'e'.

³⁴Áko Jesus ádííniid, ShiTaa', díí yaa naakaígíí t'áadoo bik'ijį' síníł'ání, háálá doo bił béédahózingóó ádaat'į́. Áádóó ha'éé' ałtaadeis'nii' biniyé yáá'iilt'e' yaa naaskai.

³⁵Áádóó diné dadéez'į́į'go naazį́, áádóó naat'áanii éí há nidahałt'i'go ádaaní, Ła' éí yisdádziiznil; Diyin God biChrist éí Diyin God néidiiłtíinii jílį́į́ ládą́ą́', háni'dii t'áá hó yisdá'ázhdílteeh!

³⁶Siláo ałdó' há nidahałt'i'go hayaajį' niikaigo ch'il na'atł'o'ii bitoo' dók'ǫ́zhígíí haa deiziidgo

³⁷ádaaní, T'áá aaníí Jew dine'é Aláahgo biNanit'a'í nílį́įgo, t'áá ni yisdá'ádílteeh!

³⁸Kót'éego ałdó' [Gríik áádóó Látin índa Hííbrew k'ehjí bee ak'e'alchíhígíí] bee ak'e'ashchį́įgo hak'igi dah yistą́, Díidí Jew dine'é Aláahgo biNanit'a'í nilį́.

³⁹Nít'éé' ádąąh dah hast'ánígíí hoł bił o'oolkaalígíí ła' hwéédzíi'go ání, Christ nílį́į́ ládą́ą́' yisdá'ádílteeh, nihí ałdó' yisdánihínííł!

⁴⁰Nidi ła'ígíí bich'ahashkéego ábíłní, Da' Diyin Godísh doo bééníldzid da? Jó, ni ałdó' t'áá hógi át'éego dadíítsaałgo ná nihoot'ą́.

⁴¹Ni áádóó shí t'éí t'áá ánihidi'doolnííł góne' nihá nihoot'ą́, háálá íidzaaígíí biniinaa t'áá ánihi'dólne' góne' ánihi'dil'į́, nidi díí diné éí doo bąąhági ádzaa da.

⁴²Áádóó Jesus áyidííniid, Bóhólníihii, bee nóhólníihii biih yíníyáago shéénílniih doo.

⁴³Áko ábizhdííniid, T'áá aaníígóó ándishní, Díí jį́ Kéyah Hózhǫ́ǫdi shił honílǫ́ǫ doo.

⁴⁴Nít'éé' ałní'ní'ą́ągo daats'í, áádóó táadi ahéé'ílkidjį' t'áá át'éé nít'éé' chahóółhéelgo

⁴⁵jį́honaa'éí yiijį́į́', áádóó kin bii' sohodizin biyi' góne' ach'ą́ą́h naníbaalii ałch'áádláád.

⁴⁶Áko Jesus yéego hazhdoolghaazhgo ájíní, ShiTaa', shii' sizíinii nílák'edish'aah! jidííniidgo hajííyol.

⁴⁷Áádóó siláo binanit'a'í áhóót'įįdígíí yiyiiłtsą́ągo, Diyin God yaa haznihgo ání, T'áá aaníí díí diné ts'ídá t'áá ákogi át'éii nilį́į́ nít'éé' lá!

⁴⁸Áko diné áłah daazlį́į'ii, áhóót'įįdígíí dayiiłtsą́ągo, biyid nídeineests'ingo anáhaaskai.

⁴⁹Áádóó hwéédahósinígíí t'áá ałtso índa Gáliliidę́ę́' asdzání hakéé' yíkaígíí t'áá nízaadę́ę́' naazį́įgo díí áhóót'įįdígíí dayiiłtsą́.

⁵⁰Áko diné ła' Jóseph yolyéego Jew dine'é yá naazíinii ła' nilį́, éí diné yá'át'éehii áádóó t'áá ákogi át'éii nilį́,

⁵¹éí yindahaz'ą́ągo yaa naaskaígíí doo atah yee lą́ asłį́į' da. Éí Arimathíya hoolyéego Jew dine'é bikin haal'áádę́ę́' naaghá, áádóó éí Diyin God bee bóhólníihgo bił haz'áanii nayólí.

⁵²Díí dinéhígíí Páílat yaa níyáago Jesus bits'íís yíyííkeed.

⁵³Áko na'iidiiłtį́įgo áłts'óózígo yisdizígíí bee na'at'ą́hí łigaii dits'idgo ályaii yił yizdisgo tséní'ootséél góne' niiníłtį́, ákwe'é ts'ídá t'ah doo diné ła' niilteeh da nít'éé'.

⁵⁴Éí bijį́ hasht'ehodi'nééh yolyéego oo'ááł, áádóó háá'áyį́į́h jį́ k'adę́ę baa hoolzhíísh.

⁵⁵Áko Gáliliidę́ę́' asdzání hoł yíkaígíí akéé' yíkaigo tséní'ootséél deinééł'į́į́', áádóó hats'íís niiltínígíí ts'ídá át'éegi bił béédahoozin,

⁵⁶áko t'ą́ą́' nákaigo łikání halchinii spáis wolyéii índa tłah łikání halchinii hasht'edayiilaa. Áádóó bee haz'áanii bik'ehgo háá'áyį́į́h jį́į́ góne' háádaasyį́į́'.