Read Navajo LUKE 3 Bible Online

LUKE 3 - Navajo bible

LUKE 3

¹Áko Taibííriyas Síízar ts'ídá aláahgo naat'áanii nilį́įgo ashdla'áadah náhááh góne', áádóó Pántiyas Páílat éí Judíya yinanit'a'í nilį́įgo, Hérad éí Gáliliidi naat'áaniishchíín nilį́įgo, Hérad yił háá'ázhígíí, Philip, éí Ituríya índa Trakonáítis kéyahdi naat'áaniishchíín nilį́įgo, índa Laiséíniyas éí Ábiliindi naat'áaniishchíín nilį́įgo,

²Ánas índa Kéíyafas aláahgo náá'iiłniihii nilį́įgo, íídą́ą́' Zekaráíyah biye' John, honoojíidi Diyin God bich'į' haadzíí',

³áko John éí Jórdan tooh binaagóó kéyah t'áá át'é yii' nahalne'go tádíghááh. Łahgo át'éego Diyin God bich'į' tsínádahodiikeesgo habąąhági át'éii há yóó'iididoo'áałgo tó bee ho'didoolzįhjí yee na'neeztą́ą́',

⁴Aizéíyah éí Diyin God yá halne'ii bizaad naaltsoos t'áá yee yik'e'ashchínígi át'éego: Honoojíidi ła' jidilwoshgo hwiinéé' diits'a'go hojilne': Bóhólníihii bá honít'i'ii hasht'edahohłééh, be'atiin k'éhézdongo ádaahłééh.

⁵Deíldzisgóó t'áá ałtso háádahodidoobį́į́ł, áádóó daadził índa dah daask'idgi t'áá ałtso wóyahgo ádadoolnííł, áádóó nidahoneeshtł'iizhígíí k'éhézdon ádadoolnííł, áádóó hodiwolgo dahonít'i'góó dahodilkǫǫh ádadoolnííł.

⁶Índa nihokáá' dine'é t'áá ałtso Diyin God bibee yisdá'iildéehii bił ííshją́ą́ dadooleeł.

⁷Éí bąą t'óó ahojíyóí tó bee dahodi'doolzįh biniyé baa dziiskaígíí áhodííniid, Tł'iish ba'áłchíní danohłíinii! Háishą' Diyin God t'óó báhádzidgo bibee até'él'íinii bits'ą́ąjį' dah dadínóohchééh nihidííniid?

⁸Éí bąą łahgo át'éego Diyin God bich'į' tsíńdahidohkeesgo beełt'éego nihits'ą́ą́dóó aneest'ą' dahóle', áádóó t'óó ádaa dadzíínóhdlíigo t'áá nihiyi'ídi, Éíbraham yę́ę éí nihizhé'é nilį́, t'áadoo dadohníní, háálá ánihidishní, Diyin God díí tsé kǫ́ǫ́ naaznilígíí bee Éíbraham ba'áłchíní íidoolíiłgo yíneel'ą́.

⁹K'ad nidi tsin bihétł'óól biniyé tsénił si'ą́, áko tsin t'áá ałtso bineest'ą' doo yá'át'ééhgóó bąąh nídahadleehígíí k'ídahalne'go kǫ' biyi' góne' adahaltł'iid.

¹⁰Áko áłah silį́'ígíí nidahódíłkidgo ádaaní, Ákoshą' haa dadii'nííł?

¹¹Áko bich'į' hadzoodzíi'go ábijiní, T'áá háiida bi'éétsoh naaki bee hólónígíí, éí bee ádinígíí ła' baazhdoołtsos, áádóó t'áá háiida ch'iyáán bee hólónígíí ałdó' t'áá ákózhdoonííł.

¹²Tax nahalyéhígíí yiniyé naazdáii ałdó' tó bee dabidi'doolzį́į́ł yiniyé deíkáahgo ádahodííniid, Na'nitiní, nihíshą' haa dadii'nííł?

¹³Áko ábizhdííniid, Nihaa deet'ánígíí t'áadoo biláahgo dayínóhkeedí.

¹⁴Siláo ałdó' ádahałní, Nihíshą' ałdó' haa dadii'nííł? Áádóó ábizhdííniid, T'ááká diné ła'da t'áá nihizááká bighada'oołyééł lágo, doo nidi t'áá ádzaagóó bik'i dahodidooh'áał da, nidi nihich'į' nida'iilyéhígíí nihił dabíighah doo.

¹⁵Áko diné nida'oozlíí', áádóó t'áá ałtso dabijéí biyi'di, John daats'í Christ át'į́, danízingo yaa nitsídaakees,

¹⁶nít'éé' John éí diné t'áá ałtso ííłní, Shí t'éí tó bee danihisį́į́h, nidi ła' shiláahgo át'éii yigááł, éí bikétł'óól k'e'deesh'ał nidi doo bą́ą́h nishłį́į da; éí Níłch'i Diyinii índa kǫ' yee danihisį́įh dooleeł.

¹⁷Éí ásaa' bee ąąh oolch'íhígíí dah joo'ááł, áko háá'jíłch'ihgi hozhdidooshǫǫłgo hatł'oh naadą́ą́' nooh níjílchíihgi yah ahizhdooyééł, nidi azhool t'éí kǫ' doo nitséesii bee adizhdoołk'ą́ą́ł.

¹⁸Áko John lą'ídi bee nida'nitinii ał'ąą ádaat'éego yíneedlį́įgo hane' yá'át'éehii yee diné yił halne'.

¹⁹Nidi John éí Hérad naat'áaniishchíín nilíinii, bitsilí be'asdzą́ą́ Heródiyas yolyéhígíí yiniinaa, índa bąąhági ádzaaígíí t'áá ałtso yiniinaa yich'ahóóshkeed,

²⁰áko Hérad éí díí t'áá ałtso t'áá biláahjį' bąąhági ánáánádzaago John yah ayííłt'e'.

²¹Ákódzaago diné t'áá ałtso tó bee dabi'doolzį́į́' áádóó Jesus ałdó' tó bee bi'doolzį́į'go sodilzingo yádiłhił ąą ádzaa,

²²áádóó Níłch'i Diyinii hasbídí ánoolinígi át'éego hak'ijį' hadahóóle', áádóó yádiłhił biyi'dę́ę́' iinéé' diists'ą́ą'go ání, ShiYe' ayóó'óósh'níinii nílį́; t'áá íiyisí naa shił hózhǫ́.

²³Jesus t'óó nídí'níitą́ą́' yę́ędą́ą́' tádiin daats'í binááhai, éí Jóseph biye' (bi'dó'níigo), Jóseph éí Híílai biye',

²⁴Híílai éí Máthat biye', Máthat éí Líívai biye', Líívai éí Mélkai biye', Mélkai éí Jána biye', Jána éí Jóseph biye',

²⁵Jóseph éí Matatháíyas biye', Matatháíyas éí Éímas biye', Éímas éí Néíham biye', Néíham éí Éslai biye', Éslai éí Néígeiyai biye',

²⁶Néígeiyai éí Méíyath biye', Méíyath éí Matatháíyas biye', Matatháíyas éí Sémeiyai biye', Sémeiyai éí Jóseph biye', Jóseph éí Júdah biye',

²⁷Júdah éí Joána biye', Joána éí Ríísa biye', Ríísa éí Zerábabel biye', Zerábabel éí Sheáltiyel biye', Sheáltiyel éí Níírai biye',

²⁸Níírai éí Mélkai biye', Mélkai éí Ádai biye', Ádai éí Kósam biye', Kósam éí Elmódam biye', Elmódam éí Er biye',

²⁹Er éí Jáshowa biye', Jáshowa éí Eliyíízer biye', Eliyíízer éí Jórim biye', Jórim éí Máthat biye', Máthat éí Líívai biye',

³⁰Líívai éí Símiyan biye', Símiyan éí Júdah biye', Júdah éí Jóseph biye', Jóseph éí Jónan biye', Jónan éí Iiláíyakim biye',

³¹Iiláíyakim éí Mííliya biye', Mííliya éí Míínan biye', Míínan éí Mátatha biye', Mátatha éí Néíthan biye', Néíthan éí David biye',

³²David éí Jésii biye', Jésii éí Óbed biye', Óbed éí Bó'az biye', Bó'az éí Sálman biye', Sálman éí Náshan biye',

³³Náshan éí Amínadab biye', Amínadab éí Ram biye', Ram éí Hézran biye', Hézran éí Píírez biye', Píírez éí Júdah biye',

³⁴Júdah éí Jéíkab biye', Jéíkab éí Áízak biye', Áízak éí Éíbraham biye', Éíbraham éí Tíírah biye', Tíírah éí Néíhor biye',

³⁵Néíhor éí Síírug biye', Síírug éí Ríyo biye', Ríyo éí Pííleg biye', Pííleg éí Ííber biye', Ííber éí Séílah biye',

³⁶Séílah éí Kéínan biye', Kéínan éí Arfáksad biye', Arfáksad éí Shem biye', Shem éí Nóah biye', Nóah éí Léímek biye',

³⁷Léímek éí Miithúzelah biye', Miithúzelah éí Íínak biye', Íínak éí Jéíred biye', Jéíred éí Mahéílalííyel biye', Mahéílalííyel éí Kéínan biye',

³⁸Kéínan éí Íínas biye', Íínas éí Seth biye', Seth éí Ádam biye', Ádam éí Diyin God biye'.