Read Navajo LUKE 4 Bible Online

LUKE 4 - Navajo bible

LUKE 4

¹Áko Jesus, Níłch'i Diyinii bii' hadeezbingo Jórdandę́ę́' nádzá, áádóó Níłch'i Diyinii dahodiisáago

²honoojíidi dízdiin hwiiską́, áadi níłch'i bida'iiníziinii binanit'a'í hóneeztą́ą́'. Áko éí neiłka'ígíí biyi' t'áadoo ajííyą́ą' da; t'áá éí neiłka'ígíí bíighah azlį́į'go índa dichin dzizlį́į́'.

³Níłch'i bida'iiníziinii binanit'a'í áhodííniid, Diyin God biYe' nílį́į́ ládą́ą́' díí tsé bááh nídoodleełgo bá handziih.

⁴Nít'éé' Jesus haadzíi'go ííłní, Diyin God bizaad bee ak'e'ashchíinii kóní: Diné doo bááh t'éí yee hináa da doo, nidi saad t'áá ałtso Diyin God yee hahadziihii yee hináa doo.

⁵Nít'éé' níłch'i bida'iiníziinii binanit'a'í hoł híi'áázh, áko nahasdzáán bikáa'gi bee ídahólníihgo bił nahaz'áanii t'áá ałtso dzineesk'oł nahalingo bik'izhdooghał biniyé hach'į' yit'íní áyiilaa,

⁶áko níłch'i bida'iiníziinii binanit'a'í áhodííniid, Díí bee ídahólníihgo bił nahaz'áanii índa yee ayóó ádaat'éii t'áá át'é naa dideesh'ááł, háálá éí shaa deet'ą́, áádóó t'áá háiida baa dideesh'ááł niizį́'ígíí éí baa dideesh'ááł.

⁷Áko shich'į' nahosínísáago, díí t'áá át'é ni dooleeł.

⁸Áádóó Jesus hanáánáádzíi'go ííłní, [Séítan nílíinii, shidinínáágóó aninááh, háálá] kót'éego bee ak'e'ashchį́: Bóhólníihii niDiyin God bich'į' nahółáa doo, áádóó t'áá bí t'éiyá bá nanil'a' doo.

⁹Nít'éé' Jerúsalemgóó ahóólóóz, áko kin bii' sohodizin bikáá'dóó dego yaa'áhígíí bílátahgi dah hwiisį', áko ánááhodi'ní, Diyin God biYe' nílį́į́ ládą́ą́', kodóó hadah dah diilyeed,

¹⁰háálá kót'éego bee ak'e'ashchį́: Diyin God éí bidiyingo nidaal'a'í naa ádahalyą́ągo íidoolííł,

¹¹áádóó, Bíla' yee dah daníłteehgo doo tsé bik'ą́ą́h didííltał da.

¹²Áko Jesus éí níłch'i bida'iiníziinii binanit'a'í yich'į' hanáánáádzíi'go ání, Bóhólníihii niDiyin God t'ááká nabínóótaah lágo, ha'ní.

¹³Níłch'i bida'iiníziinii binanit'a'í na'íhontaah ałtso yee nahóneeztą́ą'go, ashja nááhoodzaago índa nízingo hats'ą́ąjį' dah diiyá.

¹⁴Áádóó Níłch'i Diyinii bibee adziil yee Jesus Gáliliijį' nádzá, áádóó bee baa hane'ígíí kéyah t'áá át'éé nít'éé' bikáá'góó adahosiists'ą́ą́'.

¹⁵Áádóó ákwii kéédahat'ínígíí kin yii' áłah nídaadleeh góne' t'áá ałtso naz'neeztą́ą'go haa dahaniih.

¹⁶Názarethdi hodi'neeszánígi jiníyá, áko háá'áyį́į́h jį́ azlį́į'go, t'áá áńjiit'įįhígíí bik'ehgo kin bii' áłah ná'ádleeh góne' yah ajííyáago, bich'į' íízhdóołtah biniyé dziizį',

¹⁷áko Aizéíyah éí Diyin God yá halne'ii binaaltsoos haa deiz'ą́. Ąą ájiilaago, kót'éego bee ak'e'ashchínígíí bik'izhníghal:

¹⁸Bóhólníihii biNíłch'i Diyinii shił hólǫ́, háálá badahojoobá'íígíí éí hane' yá'át'éehii bee bił dahashne' doogo biniyé ak'ah shik'i yaadziidgo shíísį́į́'. [Bijéí daneezgaígíí hasht'éédadeeshdlííł biniyé,] daasnáanii éí béédahididoochiłígíí bee bił dahashne' dooleeł biniyé, doo da'oo'ínígíí da'oo'į́ nídadoodleeł biniyé shiníł'a',

¹⁹k'ad yihahígíí Bóhólníihii doogáałgo bá ashja ósin dishníigo baa hashne' dooleeł biniyé shiníł'a'.

²⁰Áko naaltsoos yisdisii ałch'į' áńjiidlaago naal'a'í baa názhní'ą́ągo dah názneezdá, áko kin bii' áłah ná'ádleeh góne' áłah nilínígíí dahodiniilgęęzh.

²¹Áádóó bich'į' ayázh'niiłti', Díí Diyin God bizaad bee ak'e'ashchíinii dasidoots'ą́'ígíí díí jį́ bohoolyaa.

²²Áko t'áá ałtso yá'át'éehgo há hadaasdzíí', áádóó saad bee ajooba'ii bee hadzoodzí'ígíí bik'ee t'óó bił adahayóigo ádadííniid, Da' díísh doo Jóseph biye' át'į́į da?

²³Áko ábizhdííniid, Kóhá'nínígíí t'áá aaníí bee shá hadadoohdzih, Azee' ííł'íní, t'áá ni náá'ádiidlááh. T'áá Kapérniyamgi íinidzaago bee naa dahosidiits'ą́'ígíí, éí ałdó' kwe'é nikéyahgi baa nidíínaał.

²⁴Áko ánááhodoo'niid, T'áá aaníí ánihidishní, Diyin God yá halne'ii doo ła'da t'áá bí bikéyahgi ts'ídá doo hodi'nidzin da.

²⁵Nidi t'áá aaníígóó ánihidishní, Iiláíjah hináádą́ą́' t'áadoo nahałtiní táá' nááhaidóó ba'aan hastą́ą́h nídeezid, áko Ízrel bikéyahgi t'áá át'éé nít'éé' t'áá íiyisí hodííchįįd; íídą́ą́' éí kéyahgi asdzání bąąh ádahasdįįdii lą'í dahólǫ́ǫ nidi,

²⁶Iiláíjah doo ła' bich'į' abi'dool'a' da, nidi Sáídan kéyahdi Zárefathgóó t'éiyá asdzání bąąh áhásdįįd léi' bich'į' abi'dool'a'.

²⁷Áádóó Iiláísha Diyin God yá halne'ii ałdó' hináádą́ą́' Ízrel bikéyahgi łóód ats'íís yiyáanii naałdzidii bee bąąh dah nidahaz'ánígíí t'óó ahayóí nít'éé', nidi t'áadoo ła' náábi'dooldzí'í da, nidi Néíyaman, Síriyadę́ę́' diné nilíinii, t'éiyá nábi'dooldzíí'.

²⁸Áko kin bii' áłah ná'ádleehí yii' áłah nilínígíí t'áá ałtso, díidí deidiizts'ą́ą'go t'áá íiyisí bádahóóchįįd.

²⁹Áko hach'į' dah diijée'go kin sinilídóó ch'íhódahazyil. Dah yisk'id bighą́ą'gi dabikin sinil, áko hatsii' ha'yaago hadah adahodiyiilghą́ą́ł danízingo tsédáa'jį' adahazlóóz.

³⁰Nidi t'óó bitahgóó ch'ízhníyáago dashdiiyá.

³¹Áádóó kéyah Gáliliigi Kapérniyam kin haal'áhí góyaa jiníyá. Áko t'áá háá'áyį́į́h jį́ ná'oodleeł góne' nazh'nitin,

³²áko nazh'nitinígíí yik'ee t'óó bił adahayóí, háálá hazaad bidziilgo bee yájíłti'.

³³Áádóó kin bii' áłah ná'ádleehí biyi' góne' diné ła' níłch'i bi'iiníziinii nichǫ́'íii bii' hólǫ́ǫ́ léi' sidáá lá; éí yéego hadoolghaazhgo ání,

³⁴Yíiyá! Haashą' nihidíílííł, Názarethdóó Jesus nílíinii? Da' ánihidííłdįįłgoósh yíníyá? Ánít'íinii shił bééhózin, Diyin God bits'ą́ą́dóó Diyinii nílį́.

³⁵Nidi Jesus éí yideeztehgo ííłní, T'áadoo ádíníní, hayi'dę́ę́' haninááh! Áko níłch'i bi'iiníziinii áłah ílínígíí bitahjį' ahoyííłhango, t'áadoo atíhoolaaí, hayi'dę́ę́' haalwod.

³⁶Áko t'áá ádzíłtso t'óó hoł adahayóigo áda'ahizhdi'ní, Díí saadígíishą' ha'át'íí át'é? Háálá bee óhólníihii índa bee adziilii bee níłch'i danchxǫ́'íii yich'į' hahadziihgo diné biyi'dę́ę́' hahaazhjéé'!

³⁷Áko ákwii kéyahígíí binaagóó t'áá át'éé nít'éé' bee haa hane'go adahideezdláád.

³⁸Áádóó nízhdii'na'go kin bii' áłah ná'ádleehí biyi'dę́ę́' ch'ízhníyáago, Sáíman bighangi yah ajííyá. Nít'éé' Sáíman be'asdzą́ą́ bimá t'áá íiyisí bitah honeezgai lá, áko yá nídahookąąh.

³⁹Áádóó bíighahgi dziizį'go tah honiigááh, Bits'áníldóóh, bizhdííniid, áko bits'áldogo t'áá áko nídii'na'go há chooz'įįd.

⁴⁰Áko k'adę́ę e'e'aahgo, t'áá ałtso naałniih ał'ąą ádaat'éii bee bąąh dah nidahaz'ánígíí haa dayiizhjaa', áko t'áá ałtso bik'i dah dahizhdeesnii'go hadaałt'é áńdajiidlaa.

⁴¹Áádóó diné lą'í dabiyi'dę́ę́' níłch'i bi'iiníziinii hahaazhjéé', éí dadilwoshgo ádaaní, Ni Christ Diyin God biYe' nílį́! Nidi Christ jílį́įgo bił béédahózingo bąą dzideeztehgo hadadoodzihígi t'áadoo bee bá hojiił'a' da.

⁴²Áádóó hoos'įįdgo dashdiiyáago doo naagháhígóó ajííyá. Áko diné hadahontáago haa haaskaigo ch'ééh doo haa daadlee'góó bits'ą́ą́' dashdiiyá,

⁴³nidi ábizhdííniid, Náánáłahdi kin hadaas'áhígi ałdó' Diyin God bee bóhólníihgo bił haz'áanii baa hane' bee bił ninááháshne' dooleeł, háálá éí biniyé shi'deel'a'.

⁴⁴Áádóó Judíya kéyahdi kin bii' áłah nída'adleehígíí biyi' Diyin God baa ninááhojilne'.