Read Navajo LUKE 5 Bible Online

LUKE 5 - Navajo bible

LUKE 5

¹Ákódahoodzaago Genésaret be'ek'id bąąhgóó dzizį́įgo, diné yíl'áhígíí Diyin God bizaad deididoots'į́į́ł biniyé hach'į' ałk'i naakai.

²Nít'éé' be'ek'id bąąhgi tsinaa'eeł naaki sinilgo jiiłtsą́, nidi łóó' hadayiileehí tsinaa'eeł yiyi'dę́ę́' haakaigo biłóó' bee hadahaltsósí dayiigis lá.

³Áko Sáíman bitsinaa'eeł biih jííyáago, Tábąąhdóó t'áá áháníjį' ni'níł'eeł, bizhdííniid. Áko tsinaa'eeł biyi'dóó dasneezdáago diné áłah silį́'ígíí nazneeztą́ą́'.

⁴Áádóó ałtso niyázhníłti'go Sáíman ábizhdííniid, Tó ditą́ąjį' ni'níł'eeł, áádóó nihiłóó' bee hadahaltsósí bee hadadi'yoołtsos biniyé taah daałtsóós.

⁵Áko Sáíman áháłní, Na'nitiní, tł'éé' bíighah dayíníilníísh, ákondi t'áadoo ła' shódeisiilt'e' da! Nidi nizaad k'ehgo k'ad łóó' bee hahaltsósí taah deestsos.

⁶Ákódadziidzaago, łóó' t'óó ahayóí biyada'dziiłtsooz, áádóó hałóó' bee hahaltsósí hats'ą́ą́' dahadlaadgo,

⁷náánáła' tsinaa'eeł biyi'di diné bił ałch'odajó'nínígíí háká adoojah biniyé ách'į' bídazh'deezhgish. Áádę́ę́' haa da'as'éelgo tsinaa'eeł t'áá áłah łóó' bii' hadazhdééłbįįdgo bąą tsinaa'eeł hats'ą́ą́' táłtł'ááh nidééh.

⁸Sáíman Peter éí yiyiiłtsą́ągo Jesus yiyaajį' nitsidinígo'go kójíní, Bóhólníihii nílíinii, shits'ánínááh, háálá bąąhági ááníiłii nishłį́.

⁹Háálá łóó' t'óó ahayóí hadadzistsoozígíí bąą hoł naakaígíí bił t'óó hoł adahayóí;

¹⁰James índa John éí Zébedii biye'ké nilį́įgo, Sáíman yił ałch'odaa'níhígíí ałdó' ákódaadzaa. Áádóó Jesus éí Sáíman áyidííniid, T'áadoo bik'ee nił yé'í; kodóó náásgóó diné niłnée doo.

¹¹Áko bitsinaa'eeł tábąąhjį' ninádeis'éelgo, t'áá ałtsoní t'áá ákǫ́ǫgo Jesus bikéé' dashdiikai.

¹²Ákódahoodzaago kin haal'áá léi'gi nijigháá nít'éé', łóód ats'íís yiyáanii biiłhéé léi' hadááh níyá; éí Jesus yiyiiłtsą́ągo yiyaajį' nitsidinígo'go náyookąąhgo ání, Bóhólníihii, íinínízin ládą́ą́' nááshididííłááł.

¹³Áko Jesus k'ídeesníi'go hodeelchidgo áháłní, Íinisin lą́ą; łóód nąąh óodįįh. T'áá áko łóód ats'íís yiyáanii naałdzidii hąąh ásdįįd.

¹⁴Áko áhodííniid, T'ááká diné ła'da bił hóólne' lágo, nidi nílááh dah diináahgo náá'iiłniihii bíni'dii átsé niníł'į́, áádóó nááni'diilzáhígíí bąą nááhániihii Mózes yee nihoní'áanii bik'ehgo náá'ayíłniih, áko éí bee nilóód náádzíi'ii diné bił béédahózin doo.

¹⁵Nidi t'óó yówehda bee haa hane'ígíí adahideezdláád, áko t'óó ahayóí deididoots'į́į́ł biniyé áádóó bąąh dah nidahaz'ánígíí náádabidi'doodlááł biniyé haa áłah silį́į́'.

¹⁶Nidi bits'ą́ą́' honoojíígóó dashdiiyáago áadi sozdoolzin.

¹⁷Ákódahoodzaago łah jį́įgo nináázh'nítingo, ákwii Férisii danilíinii índa bee haz'áanii yínda'niłtinii, éí Gáliliidi índa Judíya kéyahdi kin hadaas'áhídę́ę́' t'áá ałtso índa Jerúsalemdę́ę́' neheeskaigo naháaztą́ą́ lá, áádóó Bóhólníihii bibee adziilii bee náázhdi'doołááł biniyé hoł hólǫ́.

¹⁸Nít'éé' diné léi' bitah doo nahwii'náágóó bik'i antéhí yee hach'į' dayíłtsóós, áko éí yahadooltéełgo hayaajį' nidooltééł danízin,

¹⁹nít'éé' t'óó ahayóí áłah ílį́įgo biniinaa yah adahozhdoołtééł góne' ch'ééh hadazneeztą́ą'go, kin bighą́ą'jį' hadahodzistį́, áádóó kin bighą́ą́'dę́ę́' ąą dazdeeznilgo haníi'jį' Jesus bidáahjį' bik'i antéhí bee hadah adahodzizlo'.

²⁰Áko bida'oodlą' yee aa dadzólíii jiiłtsą́ągo ájíní, Kwá'ásiní, ádił ni'iyínílzí'ígíí ná yóó'adoot'ą́.

²¹Áko bee haz'áanii yínda'niłtinii índa Férisii danilíinii nida'ídí'níiłkidgo ádaaní, Díí Diyin God í'diilyaago hahadziihígíishą' háí át'į́? Háishą' ádił ni'iidzííh á yóó'iidii'aah? Diyin God t'éiyá ni.

²²Nidi baa nitsídadzikeesígíí Jesus bił bééhoozingo áhodííniid, Ha'át'íishą' biniyé danihijéí bii' t'óó nihił daahaadago nitsídaahkees?

²³Háidíígíishą' doo nantł'agóó bee ha'doodzih? Ádił ni'iyínílzí'ígíí ná yóó'adoot'ą́, ha'nííjí daats'í, éí doodago, Nídii'néehgo dah diinááh, ha'nííjí daats'í?

²⁴Nidi nahasdzáán bikáa'gi Diné Silį́į'ii ádił ni'iidzííh á yóó'iidii'aah yee bóhólníihgo nihił béédahózin doo, jidííniidgo bitah doo nahwii'nánígíí ábizhdííniid, Nídiidááh, nidishní, áádóó bik'i nítéhí nídiiníiłgo nighangóó nídídááh.

²⁵T'áá áko hanááł nídii'na'go yik'i sitį́į́ nít'éé' yę́ę néidiinil, áádóó Diyin God yaa haniihgo bighangóó dah nídiidzá.

²⁶Áko t'áá ałtso t'óó bił adahayóigo Diyin God yaa dahaznih áádóó t'áá bił daayée'go ádaaní, Díí jį́ doo nihił béédahózin da yę́ę daníil'į́į́'.

²⁷Éí ákódahoodzaadóó bik'ijį' ch'ízhníyá, nít'éé' tax nahalyéhígíí yiniyé sidáii Líívai yolyéego, tax nahalyéhígi sidáago jiiłtsą́, áko, Shikéé' yínááł, bizhdííniid.

²⁸Áádóó nízhdii'na'go t'áá ałtsoní t'áá ákǫ́ǫgo bikéé' dashdiiyá.

²⁹Nít'éé' Líívai t'áá bí bighangi ayóó át'éego Jesus yá áda'íísįįd, áádóó ákwii tax nahalyéhígíí yiniyé naazdáii índa binaadę́ę́' danilíinii t'óó ahayóí yił da'ayą́ągo nidaháaztą́.

³⁰Áko Férisii danilíinii índa bee haz'áanii yínda'niłtinii yił łá'í danilíinii éí hódahooł'aahii yaa nídaast'įįdgo ádaaní, Ha'át'éegoshą' tax nahalyéhígíí yiniyé naazdáii índa bąąhági ádaaníiłii bił da'ohsą́?

³¹Áádóó Jesus hach'į' haadzíi'go áhodííniid, Diné doo bąąh dah nidahaz'ánígíí éí azee' ííł'íní doo yich'į' dadikáah da, nidi bąąh nidahaz'ánígíí t'éiyá;

³²ts'ídá t'áá ákogi ádaat'éii doo bíká ádideeshniił biniyé níyáa da, nidi bąąhági ádaaníiłii, Łahgo át'éego Diyin God bich'į' tsíńdadohkeesgo nihibąąhági át'éii bits'áhóhkááh, bidideeshniił biniyé níyá.

³³Áádóó ádahodííniid, John bídahooł'aahii t'áá ahą́ą́h hodílzingo doo adą́ yee ádá nídahool'aah áádóó sonídadilzįįh, Férisii danilíinii bídahooł'aahii ałdó' t'áá ákódaat'į́, nidi ni nídahooł'aahii éí doodį́įłii áádóó doodlį́įłii deiyą́.

³⁴Áko Jesus áhodííniid, Iiyehii t'ah yił naakaigo iigehgi neheeskaígíísh dahodísingo doo da'ayą́ą́góó ádadoohłííł? Dooda lą́ą!

³⁵Nidi iiyehii hats'ą́ą́' nídidooltéłígíí beidoołkááł, áko éí bijį́įdi índa dahozdísingo doo da'jiyą́ą da doo.

³⁶Áádóó hane' bee ak'idi'dootį́įłii ła' yee hoł nááhoolne': Diné ła'da éé' ániidíígíí yiididoozǫ́ǫsgo éé' haastihii doo yineididoo'áał da; ákódziidzaago, éé' ániidíígíí azdoozǫ́ǫ́s, áádóó ániidíígíí bidoodǫ́ǫzii haastihígíí doo bił aheełt'ée da dooleeł.

³⁷Áádóó diné ła'da wáin ániidíígíí tó abid hadaastihii doo yiih yikaah da; ákódziidzaago, wáin ániidíígíí tó abid deidoołdohgo t'áá ádzaaí dooleeł, áádóó tó abid ałdó' t'áá ádzaaí dadooleeł.

³⁸Nidi wáin ániidíígíí tó abid ádaaniidíígíí biih yikááh [áko t'áá áłah nízaadgóó choo'į́].

³⁹Áádóó diné éí wáin ałk'idą́ą́' ádaalyaaígíí yidlą́ągo, ániidíígíí doo yidínóozįįł da, háálá ání, Wáin ałk'idą́ą́' ádaalyaaíjígo yá'át'ééh.