Read Navajo LUKE 6 Bible Online

LUKE 6 - Navajo bible

LUKE 6

¹Łah háá'áyį́į́h jį́ azlį́į'go tł'oh naadą́ą́' bitahgóó Jesus joogááł, nít'éé' hódahooł'aahii bił jookahgo tł'oh naadą́ą́' ła' deinizhgo, bílák'eejį' deidiniyishgo dayííyą́ą́'.

²Nidi Férisii danilíinii ła' ádadííniid, Ha'át'éegoshą' háá'áyį́į́h jį́į́ góne' doo bee haz'ánígíí baa naahkai?

³Áádóó Jesus hach'į' haadzíi'go ádííniid, Da' t'ahásh doo David índa yił naakaígíí dichin daazlį́į'go ádaadzaa yę́ęgi dayínółta' da?

⁴Shą́ą́', éí Diyin God bikin góne' yah ajííyáago, Diyin God bich'į' bááh nááhániihii nízhdii'ą́ągo jííyą́ą́', áádóó hoł naakaígíí ałdó' ła' baz'níłtsood, éí ła'da doo yidooyį́į́łgóó bee haz'ą́ą́ nít'éé' yę́ę, nááda'iiłniihii t'éiyá deiyą́ągo bee bá haz'ą́ą́ nít'éé'.

⁵Áádóó áhodííniid, Diné Silį́į'ii háá'áyį́į́h jį́ ałdó' bee bóhólnííh.

⁶Łah háá'áyį́į́h jį́ náá'ásdlį́į'go kin bii' áłah ná'ádleeh góne' yah ajííyáago naz'neeztą́ą́', nít'éé' diné bíla' nish'náájígo bąąh dah haz'ą́ą́ léi' ákwe'é naagháá lá.

⁷Áko háá'áyį́į́h jį́į́ góne' daats'í nááhozhdidoołááł danízingo bee haz'áanii yínda'niłtinii índa Férisii danilíinii hak'i dahodidoo'ááł biniyé hadahasííd.

⁸Nidi baa nitsídadzikeesígíí bił bééhoozin, áko diné bíla' bąąh dah haz'ánígíí áyidííniid, Hágo, kodi yiizįįh. Áko nízhdii'na'go ákwii dziizį'.

⁹Áádóó Jesus áhodííniid, Łahgo haz'ą́ nanihídíshkid, Háá'áyį́į́h jį́į́ góne' daats'í yá'át'éehgo ázhdooníiłgo bee haz'ą́, éí doodaii' atízh'doolííł daats'í; hináanii yisdázhdoołtééł, éí doodaii' azhdiyoołhéełgo daats'í bee haz'ą́?

¹⁰Áádóó t'áá ałtso bitah dzideezghalgo diné bíla' bąąh dahaz'ánígíí ábizhdííniid, K'ídílchííd. Áko ákódziidzaago hála' bąąh dahaz'áanii hadaałt'é násdlį́į́'.

¹¹Nidi t'áá íiyisí bádahazhchįįdgo Jesus atídeidoolíiłgo yaa nídaast'įįd.

¹²Ákwe'é yoołkááł yę́ędą́ą́' sozdidoolzįįł biniyé dayílk'idgóó ajííyá, áko tł'éé' bíighah Diyin God bich'į' sozdilzin.

¹³Hoos'įįdgo hódahooł'aahii hágo bizhdííniid, áko bitahdóó naakits'áadah yilt'éego nídziizláá', éí ałdó' daal'aadii bee jíízhi';

¹⁴Sáíman, (náánáła' yízhí yee hóózhi'go Peter yinílyée doo, hodííniid) índa yił háá'áázh Andrew índa James áádóó John áádóó Philip áádóó Barthálemew

¹⁵áádóó Matthew áádóó Thomas áádóó James éí Alfíyas biye' áádóó Sáíman éí Zélat yolyéhígíí,

¹⁶Júdas éí James biye' índa Júdas Iskáriyat, éí nináhodidoo'áłígíí.

¹⁷Áádóó bił bidáájookaigo k'íhoneezláagi dziizį', hódahooł'aahii t'óó ahayóí bił, áádóó diné t'óó ahayóí Judíyadę́ę́' t'áá át'é índa Jerúsalemdę́ę́' áádóó Táir índa Sáídan tónteel bibąąhdę́ę́', éí dahodidoots'į́į́ł áádóó naałniihii bits'ąą náádabidi'dooljah biniyé neheeskai,

¹⁸áko níłch'i danchxǫ́'íii yik'ee ti'dahooníhígíí nááhizhdiiłjéé'.

¹⁹Áádóó diné t'áá yíl'áá nít'éé' hodadidiilchił ch'ééh daniizį́į́', háálá hats'ą́ą́dóó adziil hólónígíí bee t'áá ałtso hadaałt'é áńdajiidlaa.

²⁰Áádóó hódahooł'aahii bich'į' hajííghalgo ázhdííniid: Nihadahojoobá'íígíí nihik'idahojidlí, háálá Diyin God bee bóhólníihgo bił haz'áanii éí danihíí'.

²¹K'ad dichin danohłínígíí nihik'idahojidlí, háálá hwiih dadoohłeeł. K'ad daahchaígíí nihik'idahojidlí, háálá anídaahdloh dooleeł.

²²Diné Silį́į'ii biniinaa diné nihik'ee dadiniihgo, áádóó t'áá sahdii nidanihinilgo áádóó danihódziihgo, índa danihízhi' baa'ihgo yaa yádaałti'go nihik'idahojidlí!

²³Éí beiníłką́ągo nihił dahózhǫ́ǫ le', áádóó ił hózhóonii baa nidaałgeed le', háálá yá'ąąshdi nihaa dahidoolyéełii ayóó ádaat'é éí bąą, háálá nihik'ee dadiniihii dabizhé'é yę́ę Diyin God yá dahalne'ii ákódayííł'įįd.

²⁴Nidi da'oht'ínígíí doo hojooba' ájíníi da, háálá nihí t'áá íídą́ą́' at'į́ bee ákidasoohdla'.

²⁵K'ad hwiih danohłínígíí doo hojooba' ájíníi da, háálá dichin dadoohłeeł. K'ad daahdlohígíí doo hojooba' ájíníi da, háálá yínííł danohłį́į doo áádóó daahcha dooleeł.

²⁶Diné t'áá ałtso yá'át'éehgo nihaa yádaałti'go doo hojooba' ájíníi da, háálá ákódanihił'íinii dabizhé'é yę́ę t'áá ákót'éego t'óó ádahodil'į́įgo dahalne'ii yaa yádaałti' nít'éé'.

²⁷Nidi da'doohts'a'ígíí ádanihidishní, Nihida'ana'í ayóó'ádeínóh'ní, nihik'ee dadiniihígíí bá yá'át'éhígi ádaaht'į́,

²⁸danihódziihígíí hózhǫ́ǫgo bá hadahohdziih, t'áá bita'ígi ádanihooł'įįłígíí bá sodadołzin.

²⁹Ła'da niniitsį' néidííłts'ingo, łahjígo bee bich'į' dah náádíníít'ááł, áádóó nibeeldléí nighayíltsoozii ni'éé' ałdó' t'áadoo bich'į' baa níchį'í.

³⁰Nída'dókeedígíí t'áá ałtso ba'iyínííł, áádóó ninaalye'é nighayii'níiłii t'áadoo bínéíníkeedí.

³¹Áádóó t'áá diné hach'į' ádaaníił le' danohsinígi át'éego, nihí ałdó' t'áá ákót'éego bich'į' ádaahnííł.

³²Ayóó'ádanihó'nínígíí t'éí ayóó'ádeínóh'níigo, éísh bee nihaa daha'niih doo? Háálá bąąhági ádaaníiłii nidi ayóó'ádabó'níinii ayóó'ádayó'ní.

³³Áádóó nihich'į' yá'át'éehgo ádaaníiłii bich'į' yá'át'éehgo ádaahníiłgo, éísh bee nihaa daha'niih doo? Háálá bąąhági ádaaníiłii nidi t'áá ákódaat'į́.

³⁴Áádóó k'ééshididoodlííł wóh'níinii ba'ayohłéego, éísh bee nihaa daha'niih doo? Bąąhági ádaaníiłii nidi ałhada'ii'nííł, t'áá éigi át'éego k'ééda'ahidil'į́.

³⁵Nidi nihida'ana'í ayóó'ádeínóh'ní, áádóó yá'át'éehgo ádaaht'į́, áádóó t'áadoo le'é ada'iyohnííł, t'áadoo k'ééshidi'doolnííł danohsiní, áko yá'ąąshdi nihaa dahidoolyéełii ayóó ádaat'ée dooleeł, áádóó nihí Ts'ídá Aláahgo Át'éii ba'áłchíní danohłį́į dooleeł, háálá éí doo ahééh danízinii índa doo yá'ádaashóonii yaa jooba'.

³⁶Éí bąągo t'áá nihiTaa' jooba'ígi át'éego dajiinohba'.

³⁷T'áadoo aa nídaaht'íní, áko nihí ałdó' doo nihaa nídahódóot'įįł da; t'áadoo át'éégóó t'áadoo diné bá hadahohdziihí, áko nihí ałdó' t'áadoo át'éégóó diné doo nihá hadadoodzih da; bąąhági át'éii ahá yóó'adahidoh'aah, áko nihí ałdó' nihibąąhági át'éii nihá yóó'adahididoot'ááł;

³⁸nihił dahadlee', áko nihada'doodił; le'dółt'e'go daneel'ą́ągo áádóó níłk'íbí'nees'nii'go áádóó yaa yisdzidgo índa wó'ąhazhóoshgo bił áłká dasoołzaaz doo. Háálá t'áá ła' bá ída'nóoł'ąąd yę́ęgi ánéelt'e'go nihá ínídadí'nóol'ąął.

³⁹Áádóó hane' bee ak'idi'dootį́įłii bee hach'į' hadzoodzíí', Da' doo oo'íiniísh t'áá bí na'ahidlóozgo bíighah? Da' doósh t'áá áłah ą'ádínóodah da?

⁴⁰Íhooł'aahii éí nabinitinii doo yiláahgo át'ée da, nidi ałtso íhooł'ą́ą'go índa nabineeztą́ą'ii t'áá yił aheełt'ée doo.

⁴¹Áko ha'át'íí biniyé nik'is binák'e'oolts'idígíí níníł'į́, nidi t'áá ni nástáán ninák'ee sitánígíísh doo baa ákonínízin da?

⁴²Éí doodaii' t'áá ni nástáán ninák'ee sitánígíishą' éí doo yíní'į́į́góó, ha'át'éego nik'is ábididííniił, Shik'is, ninák'e'oolts'idígíí ná haash'aah? T'óó áhodíl'íinii, áłtsé nástáán ninák'ee sitánígíí hantįįh, áko índa hazhó'ó ííní'į́įgo nik'is binák'e'oolts'idígíí bá hadíí'ááł.

⁴³Tsin yá'át'éehii éí aneest'ą' nichxǫ́'ígíí doo bąąh haleeh da, doodaii' tsin nichxǫ́'ígíí éí aneest'ą' yá'át'éehii doo bąąh haleeh da,

⁴⁴háálá tsin t'áá ałtso bineest'ą' bee béédahózin. Ch'il deeníní fig doo bąąh wóbée da, éí doodago tsin dadeeníinii ch'il na'atł'o'ii doo bąąh wóbée da.

⁴⁵Diné yá'át'éehgo hináanii éí bijéí bii' yá'ádaat'éehii hólóonii bits'ą́ą́dę́ę́' yá'át'éehii hahwiileeh, áádóó diné doo yá'áshóonii éí doo yá'ádaat'éehii bijéí bii' hólóonii bits'ą́ą́dę́ę́' doo yá'át'éehii hahwiileeh, háálá t'áá hajéí bii' hólónígíí t'áá éí bee yájíłti' łeh.

⁴⁶Ha'át'íishą' biniyé, Bóhólníihii, Bóhólníihii, dashidohní, nidi ádíshnínígíí doo bida'oł'į́į da?

⁴⁷T'áá háiida shaazhníyáago shizaad jidiizts'ą́ą'go bi'jił'ínígíí, éí bił ahijíłt'éhígíí bee nihił hodeeshnih:

⁴⁸jó, diné éí kin ííléehii níléí wóyahdę́ę́' tsé'éłkáa'gi ha'íítł'inígíí nahojílin, áko tó dááląądgo bízdeesxał, nidi doo hidó'nááł át'ée da, háálá tsé'éłkáa'gi bidziilgo ályaa éí bąą.

⁴⁹Nidi jidiizts'ą́ą'go doo bi'jił'ínígíí éí kin ájíléehgo atł'ááh nástł'inii t'áágééd t'áá łeeshtahdóó kin nizhní'ánígíí nahojílin, áko tó bízdeesxałgo t'áá áko ahiih nááłdááz, áko t'áá íiyisí yóó'i'íídéél.