Read Navajo LUKE 7 Bible Online

LUKE 7 - Navajo bible

LUKE 7

¹Áko diné dahwíísts'ą́'ígíí ałtso bich'į' niyázh'níłti'go Kapérniyamgi jiníyá.

²Áádóó siláo neeznádiin yilt'éego yinanit'a'í ła' bá naal'a'í ayóogo bił nilínígíí, éí daatsaahgo dadootsaałjį' ahoolzhiizh lá.

³Áko Jesus baa hozdiizts'ą́ą'go, Áádę́ę́' shaazhdoogáałgo shá naal'a'í náábizhdidoołááł, jiníigo Jew dine'é aląąjį' naazíinii Jesus bich'į' ajííł'a'.

⁴Áko Jesus yaa yíkaigo, t'áá íiyisí nídayooskango ádaaní, Díí bá ádííníiłii t'áá yą́ą́h nilį́,

⁵háálá nihidine'é ayóó'áyó'ní, áádóó kin bii' áłah ná'ádleehígíí nihá áyiilaa.

⁶Áko Jesus yił dah diikai. Bighan t'áá áyídí hadziihgo, siláo binanit'a'í bik'isóó ła' hach'į' ayííł'a'go áháłní, Bóhólníihii shaa wóóya' lágo, háálá shighan góne' shił yah adíínáałgi doo bą́ą́h nishłį́į da,

⁷áádóó t'áadoosti'ee doo nidááh deesháał da nidi. T'óó saad bee handziih, áko shá naal'a'í náádidoodááł.

⁸Háálá shí ałdó' shinanit'a'í hólǫ́, áádóó siláo binanit'a'í nishłį́, áko ła', Ákǫ́ǫ́ díínááł, bidishniihgo dah diighááh; náánáła', Hágo, bidishniihgo shaa yighááh, áádóó shinaalte', Kónínééh, bidishniihgo t'áá áko éí áyiił'įįh.

⁹Áko Jesus díidí yidiizts'ą́ą'go hak'ee t'óó bił ahóóyóí, áádóó názyizgo diné bikéé' nooyéłígíí áyidííniid, Ánihidishní, Oodlą́ bee aa dzódlí kót'éii Ízrel dine'é bitahgi nidi t'ah doo ła' bik'ínísháah da.

¹⁰Áádóó siláo yinanit'a'í éí yiyííł'aadígíí hooghangi nákai, nít'éé' éí naal'a'í yá'át'ééh násdlį́į́' lá.

¹¹Áádóó náábiiskání Néin hoolyéedi kin haal'áágóó jiníyá, áko hódahooł'aahii índa diné t'óó ahayóí hoł yíkai.

¹²Nít'éé' kin haal'áago bił yah e'atiin bidáádílkałjį' ajííyáago, jó'akon, ła' dadziztsą́ lágo ch'ího'deeltį́, éí t'áá hó t'éiyá asdzání bąąh áhásdįįdii nilíinii biyáázh jílį́į́ nít'éé' lá, áádóó kin haal'áádóó diné lą'í baa áłah nilį́.

¹³Áko Bóhólníihii hoołtsą́ągo haa a'ááh niizį́į'go áhodííniid, T'áadoo nichaí.

¹⁴Áádóó hwíighahgi deeyáago bee nidaho'diltéhígíí yideelchidgo, da'íłteehii deizį'. Áko daaztsánígíí áyidííniid, Dinééh, ándishní, Nídiidááh.

¹⁵Áádóó neezdáago, ayá'niiłti'. Áádóó hamá yaa náhoníłtį́.

¹⁶Áko t'áá ałtso t'óó bił daayée'go Diyin God yaa dahaniihgo ádaaní, Diyin God yá halne'ii ayóó át'éii nihitahgi nídiidzáá lá! áádóó, Diyin God bidine'é yíká adoolwoł yiniyé yaa níyáá lá!

¹⁷Áádóó Judíya kéyah biyi'góó t'áá át'éé nít'éé' índa binaagóó díí bee haa hane'go adahideezdláád.

¹⁸Áko John hódahooł'aahígíí díí t'áá ałtso yee hoł nídahoolne'.

¹⁹Áko John hóhooł'aahii nidilt'éego hágo bizhdííniidgo, éí Jesus bich'į' ajííł'a'go kóbididoohniił bijiní, Da' niísh doogááł ha'nínę́ę ánít'į́, éí doodago náánáła' daats'í bíká dadíit'į́į' doo?

²⁰Áko diné éí Jesus yaa ní'áazhgo áyidííniid, John Tó Yee Asį́įhii nich'į' anihííł'a'go kóbididoohniił nihiłní, Da' niísh doogááł ha'nínę́ę ánít'į́, éí doodago náánáła' daats'í bíká dadíit'į́į' doo?

²¹Áko t'áá ákwe'é oolkiłgo lą'í ka nidaakaii índa bąąh nidahałniih hadaałt'é áńdajidle' áádóó níłch'i bi'iiníziinii bii' dahólónígíí biyi'dę́ę́' hahizneeskaad, índa lą'í doo da'oo'ínígíí da'oo'į́įgo áńdajidle'.

²²Áko Jesus hach'į' hanáánáádzíi'go áhodííniid, Nihílááh nááht'ash, díidí woołtsánígíí índa disoots'ą́'ígíí bee John bił hodoołnih: doo da'oo'ínígíí da'oo'į́ áńdaalne', nida'niłhodígíí nidaakai áńdaalne', łóód ats'íís yiyáanii naałdzidii bee bąąh dah nidahaz'ánígíí hadaałt'é áńdaalne', áádóó bijédaahkałígíí da'diits'a' áńdaalne', daneeznánígíí nááhidiiljeeh, badahojoobá'íígíí hane' yá'át'éehii bee bił dahane', dohníigo.

²³Áádóó t'áá háiida doo bił naaki danilį́į́góó shaa nitsídaakeesígíí éí bik'idahojidlí.

²⁴Áko John bá naal'a'í dah nídiit'áazhgo, Jesus éí áłah ílínígíí yich'į' John baa ayázh'niiłti'go ájíní, Ha'át'íishą' dadínóoł'įįłgo honoojíígóó nidasoohkai? Lók'aa' níyol bighádígíí daats'í?

²⁵Nidi ha'át'íishą' deidoołtséełgo ákǫ́ǫ́ nidasoohkai? Diné éí éé' daalzhólíii yee hadít'éii daats'í? Jó'akon, diné t'áá íiyisí ílį́įgo hadadít'éii índa t'áá ałtsoní yee nída'aldįįhii éí aláahgo naat'áanii dabinághangóó kéédahat'į́.

²⁶Áko ha'át'íishą' deidoołtséełgo ákǫ́ǫ́ nidasoohkai? Diyin God yá halne'ii daats'í? Éí lą́ą, áádóó Diyin God yá halne'ii yiláahgo át'éii nilíinii nihidishní.

²⁷Jó, éí kót'éego bee ak'e'ashchínígíí át'į́: Jó'akon, shá halne'ii nilą́ąjį' deesh'aał, éí ná honít'i'ii nilą́ąjį' ná hasht'eidoolííł.

²⁸Nihił hashne', Diné nidahaazhchíinii bitahdóó doo ła' John Tó Yee Asį́įhii yiláahgo át'ée da, nidi t'áá háiida Diyin God bee bóhólníihgo bił haz'áanii biyi' a'ohgo ájít'éii nidi éí John biláahgo ájít'é.

²⁹Áádóó diné t'áá ałtso índa tax nahalyéhígíí yiniyé naazdáii John Tó Yee Asį́įhii tó yee dabíísį́į'ii éí díí deidiizts'ą́ą'go ádadííniid, Diyin God ts'ídá t'áá ákogi át'éé lá,

³⁰nidi Férisii danilíinii índa bee haz'áanii yínda'niłtinii éí Diyin God binahat'a' doo ádá deinidzin dago biniinaa, John tó yee dabidoosį́łígíí doo deinízin da nít'éé'.

³¹Bóhólníihii ání, K'ad diné ahoolchíłígíishą' ha'át'íí bił ahąąh nideeshniłgo binahjį' baa hodeeshnih, áádóó ha'át'íishą' nidahalin?

³²Jó, éí nida'iiniihgóó áłchíní nidaháaztą́ągo yił nidaanéhígíí kót'éego yich'į' ádaanínígíí nidahalin, Tsin bee í'dílzoołí nihá nidasii'ne', nidi doo da'oołzhiizh da; nihich'į' atídadiniidlį́į́', nidi nihí t'áadoo daohcha da.

³³Háálá John Tó Yee Asį́įhii łees'áán doo bich'iyą'góó índa wáin doo yidlą́ą́góó níyá, áko nihí ádadohní, Níłch'i bi'iiníziinii biyi' hólǫ́ǫ́ lá.

³⁴Diné Silį́į'ii éí doodį́įłii áádóó doodlį́įłii yiyą́ągo níyá, áko ádadohní, Jó'akon, diné dibidii índa adláanii nilį́į́ lá, tax nahalyéhígíí yiniyé naazdáii índa bąąhági ádaaníiłii yich'ooní nilį́į́ lá!

³⁵Áko hódzą́ ááníłígíí bee t'áá ákogi át'éego bééhózin.

³⁶Áádóó Férisii ła' adiidį́į́ł hodííniid, áko éí Férisii bighangi jiníyáago azhdooyį́į́ł biniyé dzineezdá.

³⁷Nít'éé' kin haal'áagi asdzání ła', bąąhági ááníiłii nilį́įgo, Férisii bighan góne' dzizdáago ajiyą́ągo bił bééhoozin, áko tózis tsé alabáster yolyéhígíí bee ályaago ak'ah yee yah ayíí'ą́,

³⁸áko Jesus tł'azdéestį́įgo hakee' yich'į' yiizį'go yichago binák'eeshto' yee hakee' néístłée'go bitsii' yee hakee' yiyíít'óód, áádóó hakee' yizts'ǫs, índa ak'ah yik'ijį' yayiiziid.

³⁹Áko éí Férisii hágo hodííniidii díí yiyiiłtsą́ągo, t'áá biyi'ídi ání, Díí diné Diyin God yá halne'ii nilį́įgo, díí asdzání hódílnihígíí át'íinii hoł bééhózin doo nít'éé', háálá asdzání bąąhági ááníiłii nilį́.

⁴⁰Áádóó Jesus haadzíi'go áhodííniid, Sáíman, bee nich'į' hadeesdzihii hólǫ́. Áko ádííniid, Ha'át'íishą', Na'nitiní?

⁴¹Jesus áhodííniid, Béeso a'iiníiłii léi' diné nidilt'éego yąąh hayííł'á; ła' ashdladi neeznádiin denériyas, náánáła' éí ashdladiin.

⁴²Áko t'áá áłah t'áadoo nináyódléłí dago, t'áá áłah t'óó yá yik'i adeezo. Éí bąą háidíígíishą' agháago ayóó'áhó'níi dooleeł?

⁴³Sáíman haadzíi'go ádííniid, Atisgo bąąh háá'áhígíí shį́į́. Áko áháłní, T'áá ákóne' háínídzíí'.

⁴⁴Áádóó asdzání bich'į'go nídzízyizgo Sáíman ábizhdííniid, Díí asdzáníísh yíní'į́? Shí nighan góne' yah ííyáago shikee' biniyé tó ła' t'áadoo shéíníką́ą da, nidi bí t'éiyá binák'eeshto' yee shikee' néístłée'go bitsii' yee yiyíít'óód.

⁴⁵Ni t'áadoo shisíníts'ǫs da, nidi díí asdzání t'áá yah ííyáádóó t'áadoo áhodiilzéhí shikee' néineezts'ǫ́ǫ́z.

⁴⁶Shitsii't'áagi t'áadoo ak'ah bik'i yeiniziid da, nidi bí t'éiyá shikee' ak'ah yik'i yayiiziid.

⁴⁷Éí bąą ándishní, Habąąhági át'éii t'óó ahayóígíí há yóó'anídoot'ą́ągo bąą, t'áá íiyisí ayóó'í'jó'ní, nidi t'áá háiida a'ohgo há yóó'anídoot'ánígíí, t'áá éí a'ohgo í'jó'ní.

⁴⁸Áko asdzání áyidííniid, Bąąhági íínít'įįdígíí ná yóó'adoot'ą́.

⁴⁹Áko da'jiyáníjį' bił nidzíiztánígíí kóda'ahidoo'niid, Díishą' háí át'į́įgo bąąhági át'éii nidi á yóó'iidii'aah?

⁵⁰Áko asdzání éí áyidííniid, Ne'oodlą' bee aa dzíínílíii yisdánííłtį́; nił hózhǫ́ǫgo náádááł.