Read Navajo LUKE 9 Bible Online

LUKE 9 - Navajo bible

LUKE 9

¹Áko naakits'áadahígíí áłah ájiilaago níłch'i bi'iiníziinii t'áá ałtso ayi'dę́ę́' hadeiniiłkaad doo biniyé, índa bąąh nidahałniihii doo át'éhí da áńdeidle' doo biniyé bee adziilii áádóó bee óhólnííh bitaazdeez'ą́,

²índa Diyin God bee bóhólníihgo bił haz'áanii baa dahojilne' doo biniyé, áádóó hadaałt'é áńdazh'doodlííł ałdó' biniyé adziis'a'.

³Áko ábizhdííniid, Dasidoohkaigóó ha'át'íhída t'áadoo dayínóhłéhí, gish dooda, azis bee na'aljidí dooda, yist'éí dooda, béeso nidi dooda, éé' naakigo ałdó' dooda.

⁴Áko t'áá haa'ída hooghangi yah adahisoohkaigo, dah náádahidoohkaijį' t'áá ákwii nahísóotą́ą doo.

⁵T'áá háiida doo danihinízinígíí éí bee hwéédahózin doo biniyé kin haal'áádóó dah náádahidoohkáahgo nihikee' łeezh bąąh nidahinołdéeh doo.

⁶Áko dashdiikaigo kin dah naazhjaa'góó ch'íjiikáahgo, t'áá át'éé nít'éé' hane' yá'át'éehii baa dahojoolne', áádóó t'áá ałtsogóó hadaałt'é áńda'jiidlaa.

⁷Hérad, naat'áaniishchíín nilíinii, ádahóót'įįdígíí t'áá ałtso yiyíínii'go bik'ee t'óó bił haada, háálá ła' ádaaní, John yę́ę daaztsą́ą́dę́ę́' náádiidzáá lá,

⁸ła' éí ádaaní, Iiláíjah yę́ę nádzáá lá, áádóó náádaała' éí, Ałk'idą́ą́' Diyin God yá dahalne'ii yę́ę ła' daaztsą́ą́dę́ę́' náádiidzáago át'į́į́ lá, náádadi'ní.

⁹Áko Hérad ání, John la' bitsiits'iin kíníłne' ni', ákodashą' díí háí át'į́įgo kót'éego baa hodiists'a'? Áko hwiideestsééł hó'ní.

¹⁰Áko daal'aadii nákaigo, ádáát'įįdígíí yee hoł dahoolne'. Áko dashdii'eezhgo Bethséyida hoolyéego kin haal'áhígíí bit'áahjį' t'áá sáhí bił jíkai.

¹¹Diné t'óó ahayóí éí bił béédahoozingo, hakéé' yíkai, áko baa hoł hózhǫ́ǫgo Diyin God bee bóhólníihgo bił haz'áanii bee bich'į' hadzoodzíí', áádóó hadaałt'é nídeeshdleeł danízinígíí éí hadaałt'é áńdajiidlaa.

¹²Áko doozhǫǫgo yaa adeez'ą́ągo naakits'áadahígíí haa yíkaigo ádahodííniid, Diné yíl'áhígíí nídayínóhkááh bidiní, áko kin naazhjaa'góó índa kéyah binaagóó ahidookah, áadi dabiidoołkááł, áádóó ch'iyáán nideidiyoołnih, jó, díí doo naagháhígi ádeiit'į́.

¹³Nidi ábizhdííniid, T'áá nihí bada'nołtsóód. Nít'éé' ádaaní, Łees'áán t'áá ashdla'í índa łóó' t'áá naakíhí t'éiyá nideijaah; t'óó daats'í níláhgóó diikahgo díí diné t'áá ałtso bá ch'iyáán nidahidiilnih.

¹⁴Háálá ashdladi mííl daats'í diné ánéelą́ą́' lá. Áko hódahooł'aahii ábizhdííniid, Ashdladiin daníjaa'go dinohbįįh dabidohní.

¹⁵Ákódabizhdííniidgo t'áá ałtso dadineezbin.

¹⁶Áko łees'áán ashdla'ígíí índa łóó' naakiígíí nízhdiinilgo dego yá'ąąshgóó dzidéez'į́į'go sozdoolzin, índa nijiitíihgo hódahooł'aahii bitaa jiniih, éí diné yíl'áhígíí yitaa deidoonih biniyé.

¹⁷Áko da'jííyą́ą'go t'áá ádzíłtso hwiih dadzizlį́į́'. Áádóó nidahaasti'go bi'oh da'jííyą́'ígíí náádajiizdláa'go ts'iizis naakits'áadah hadazdeesbin.

¹⁸Łah hódahooł'aahii t'éí bił nijikaigo t'áá sáhí sozdoolzin, nít'éé' ábijiní, Diné ádaaníigoshą' háí ájít'į́ dashiłní?

¹⁹Áko hoł dahoolne'go ádaaní, John Tó Yee Asį́įhii yę́ę át'į́, nidi ła' éí, Iiláíjah át'į́, daaní; náánáła' éiyá, Ałk'idą́ą́' Diyin God yá dahalne'ii yę́ę ła' daaztsą́ą́dę́ę́' náádiidzáago át'į́, daaní.

²⁰Áko ábizhdííniid, Nidi nihíshą' éí háí ájít'į́ dashidohní? Peter áhodííniid, Diyin God biChrist nílį́.

²¹Nidi t'áá íiyisí hazhó'ó bee bich'į' hadzoodzíi'go ábizhdííniid, T'ááká diné ła'da díí bee bił dahoołne' yíila',

²²kójíníigo, Diné Silį́į'ii éí ts'ídá lą'ígóó ti'hwiidoonih, áko diné yá aląąjį' naazíinii áádóó aláahgo nááda'iiłniihii índa bee haz'áanii yínda'niłtinii doo dahodínóozįįł da, áko hodi'yoolyééł, áádóó tágí jį́ aleeh góne' nááhodi'doodlááł.

²³Áko t'áá ałtso ábizhdííniid, Diné t'áá háiida shikéé' dashdiigháhígíí éí ádeizhdiyoo'nah, áádóó t'áá ákwíí jį́ t'áá hó hatsin ałnáoszid jootį́įł doo, áádóó shikéé' joogáał doo.

²⁴Háálá t'áá háiida jiinánígíí bąąh hą́ą́sniizį́į'go éí yóó'azhdootłish, nidi t'áá háiida shí shiniinaa jiinánígíí ninázhdiní'ą́ągo éí jiináa dooleeł.

²⁵Háálá diné ła'da nahasdzáán t'áá si'ą́ą́ nít'éé' hóó' dooleeł biniyé hwii' sizíinii yóó'azhdíí'ą́ągo, doodaii' t'áá ákójínéehgo jiinánígíí yóó'azhdíí'ą́ągo, haa néelą́ą́' há bínéidoodił?

²⁶Háálá t'áá háiida shí índa shizaad baa yázniizį́'ígíí, éí Diné Silį́į'ii t'áá bí bee bits'ádi'nílíidii áádóó biTaa' índa diyingo nidaal'a'í bee bits'ádi'nílíidii yił níyáago hó ałdó' haa yádínóozįįł.

²⁷Nidi t'áá aaníígóó ánihidishní, Kǫ́ǫ́ naazínígíí ła' Diyin God bee bóhólníihgo bił haz'áanii t'áadoo dayiiłtséhí aniné ts'ídá doo deidoolįh da.

²⁸Díí ádahodoo'niidóó bik'ijį' tseebíí daats'í neiłka' góne' Jesus éí Peter áádóó John índa James yił dah diikaigo sozdidoolzįįł biniyé dził bighą́ą'jį' hadziskai.

²⁹Áko sozdilzingo, hanii'jį' łahgo ánoolningo ályaa, áádóó ha'éé' łigaigo bits'ádi'nílííd silį́į́'.

³⁰Áádóó jó'akon, diné nidilt'éego, Mózes índa Iiláíjah éí Jesus yił ałch'į' yádaalti'go,

³¹éí ałdó' t'áadoo bahat'aadí bits'ádi'nílíidgo bił nidzizį́. Áko Jerúsalemgi Jesus dazdootsaałgo bee nihoot'áanii łazh'doolíłígíí yaa yádááłti'.

³²Peter índa yił naakaígíí t'áá íiyisí bił daniizį́į́', nidi t'áá dadéez'į́į'go hats'ádi'nílídígíí áádóó diné naaki hoł sizínígíí dayiiłtsą́.

³³Ákódzaago diné éí Jesus yits'ą́ą́' dah dii'áazhgo Peter éí Jesus áyidííniid, Bóhólníihii, dooládó' yá'át'éeh da kwe'é neiikaígíí; haa'íshą' chaha'oh táa'go ádadiilnííł, ła' ni ná, ła' Mózes bá, ła' éí Iiláíjah bá, nidi bee hadzoodzí'ígíí doo hoł bééhózingóó ázhdííniid.

³⁴Díí t'ah baa yájíłti'go, k'os hoł łeeshoogizhgo nídadzisdzííd.

³⁵Nít'éé' k'os biyi'dę́ę́' iinéé' diists'ą́ą'go ání, Díí shiYe' ayóó'óósh'níinii át'é, dayísółts'ą́ą́'.

³⁶Iinéé' dazdiizts'ą́ą́'dóó bik'ijį' Jesus t'áá sáhígo dajiiłtsą́. Áko díí doo baa dahojilne' dago, éí yoołkáłígíí biyi' dajiiłtsánígíí diné t'áadoo ła' bee bił dahojoolne' da.

³⁷Ákódzaago biiskání dziłghą́ą́'dę́ę́' hadáájookaigo, diné t'óó ahayóí hadááh nánízą́.

³⁸Áádóó jó'akon, diné yíl'áhígíí ła' hadoolghaazhgo ání, Na'nitiní, nánooshkąąh, shiye' nilíinii t'áá éí t'éiyá she'awé'ígíí shá dínííł'įįł;

³⁹jó, níłch'i bi'iiníziinii bik'i néilwo', áko t'áadoo hooyání háádílwosh, áádóó éí naa'anábiilghą́ąhgo bizhéé' hahagháahgo ánábiil'įįh, índa doo bits'áoya' át'éégóó atíbíł'į́.

⁴⁰Áko nídahooł'aahii, Éí bii'dę́ę́' hadanołchééh, bidishníigo néisiskan, nidi ch'ééh ádayííł'įįd.

⁴¹Áko Jesus haadzíi'go ádííniid, Doo da'oodláanii índa bízhą́ da'ílį́įgo ahoolchíiłii danohłíinii, haash nízáagi nihił honishłǫ́ǫgo nihich'į' ha'ííníshníi dooleeł? Níláhdę́ę́' niye' shaa nílóós.

⁴²Áko éí ashkii t'ah hach'į' yigáałgo, níłch'i bi'iiníziinii bik'iilwodgo naa'anáábiyííłhango ditsxizgo anáábiidlaa. Nidi Jesus éí níłch'i nichxǫ́'ígíí yideezteh, áádóó ashkii hadaałt'é ánáyiidlaago bizhé'é yaa néiníłtį́.

⁴³Áko t'áá ádzíłtso Diyin God bibee adziil ayóó át'éii bąą t'óó hoł adahayóí. Nidi t'ah nidi t'áá ádzíłtso t'áá ałtsoní yaa naayáhígíí bąą t'óó hoł adahayóigo, Jesus bídahooł'aahii áyidííniid,

⁴⁴Díí saadígíí nihijeeh dahidódlaad, háálá Diné Silį́į'ii éí diné bílák'eejį' ninábidi'doot'ááł.

⁴⁵Nidi bee hadzoodzí'ígíí t'áadoo yik'ida'diitą́ą da. Doo bił béédahózin da doo biniyé bił ch'aa'óolzin nít'éé', áko yee haadzí'ígíí t'óó bíndabídízhdóołkiłgi nidi bits'ąą dajíítiid.

⁴⁶Áko nít'éé', Háí lá aláahdi át'éé lá, dajiníigo ałghadazh'dit'ááh.

⁴⁷Nidi Jesus éí dahajéí biyi'di baa nitsídadzikeesígíí bił bééhoozingo, áłchíní yázhí ła' nízhdiiłtį́įgo hwíighahgi bijiisį',

⁴⁸áko ábizhdííniid, T'áá háiida díí áłchíní yázhí shízhi' bee bich'į' k'éznídzinígíí éí shich'į' k'éznídzin, áádóó t'áá háiida shich'į' k'éznídzinígíí, éí shiníł'a'ii bich'į' k'éznídzin, háálá nihitahgóó t'áá háiida t'áá a'ohgo ájít'éhígíí, éí ayóó át'éii jílį́.

⁴⁹John haadzíi'go ádííniid, Bóhólníihii, diné ła' nízhi' bee níłch'i bi'iiníziinii hainiiłkaadgo dahwiiltsą́, áko, T'áadoo ánít'íní, dahodii'niid, háálá doo hoł nikéé' neiikai da.

⁵⁰Nidi Jesus áhodííniid, T'áadoo ánít'íní, t'áadoo dabidohníní, háálá doo nihits'ą́ą́jí jílínígíí éí nihich'ijí jílį́.

⁵¹Áko yá'ąąsh góde Jesus ahodi'dooltéełjį' hodideeshzhiizhgo, Jerúsalemgóó dah dideeshááł jinízingo t'áá íiyisí háni' áhojiilaa.

⁵²Áádóó nidaal'a'í álą́ąjį' ayííł'a', áko dashdiikaigo Samériya dine'é bikin sinil léi'gi jíkai, bá hasht'edahozhdoolííł biniyé,

⁵³nidi t'áadoo bahat'aadí Jerúsalemgóó joogáałgo biniinaa doo dahoniizį́į' da.

⁵⁴Áko hóhooł'aahii James áádóó John díí yiyiiłtsą́ągo ádííniid, Bóhólníihii, Iiláíjah ádzaaígi át'éego yádiłhił biyi'dę́ę́' kǫ' dayídíikiłgo díí diné íidoołdįįłgoósh nił t'áá áko?

⁵⁵Nidi nídzízyizgo dzideezteh. [Áádóó ázhdííniid, Ádanoht'éii doo nihił béédahózin da,

⁵⁶háálá Diné Silį́į'ii doo diné íidoołdįįł yiniyé níyáa da, nidi yisdéídiyoonił yiniyé níyá.] Áko náánáła' kin sinilígóó dashdiikai.

⁵⁷Áádóó t'áá jookahgo diné léi' ła' áhodííniid, T'áá nanináágóó nikéé' naasháa dooleeł.

⁵⁸Áko Jesus áháłní, Mą'ii dootł'izhí be'a'áán dahólǫ́, áádóó tsídii wódahgo nidaat'a'ígíí bit'oh dahólǫ́, nidi Diné Silį́į'ii éí t'áadoo nizhnót'áałgi da.

⁵⁹Áádóó náánáła' ábizhdííniid, Shikéé' yínááł. Nidi áhodííniid, Bóhólníihii, átsé shizhé'é łeeh deeshtééłgóó nídeeshdáałgo bee sha'di'ní'aah.

⁶⁰Nidi Jesus ábidííniid, Bíni' daneeznáanii t'áá bí łeeh da'ahii'nííł, nidi ni, dah diináahgo Diyin God bee bóhólníihgo bił haz'áanii t'áá níłtéél nít'éé' baa nahólne'.

⁶¹Náánáła' ałdó' ání, Bóhólníihii, nikéé' naasháa dooleeł, nidi áłtsé shighandiígíí bílák'ee dadideeshnihgo bee sha'di'ní'aah.

⁶²Nidi Jesus áhodííniid, Diné ła' bee nihwiildlaadí jiiłtsoodgo t'ą́ąjį' nízdéest'į́į'go hojoołdlałígíí éí Diyin God bee bóhólníihgo bił haz'áanii biyi' chojoo'į́į dooleełígíí doo bą́ą́h jílį́į da.