Read Navajo DEUTERONOMY 1 Bible Online

DEUTERONOMY 1 - Navajo bible

DEUTERONOMY 1

¹Mózes díí saadígíí bee Ízrel dine'é t'áá ałtso bich'į' bee hadzoodzíí': éí Jórdan tooh ha'a'aahjigo k'íhoneezláá góyaa Tónteel Łichíí' binaashiijí éí Péíran honoojí áádóó Tófel áádóó Léíban áádóó Hazíírath índa Dáízahab nahós'a'gi hadzoodzíí'.

²Dził Hórebdóó Dził Síyerjí ahééhonít'i'go áádóó Kéídesh-barníyajį' joogáałgo ła'ts'áadah yiłkááh.

³Nít'éé' dízdiin náhááh góne' áádóó ła'ts'áadah nídízííd binih índa ła'a jį́į́ góne' Mózes éí Bóhólníihii t'áá bí bibik'eh ó'oo'níiłii haidiní'ánígíí bik'ehgo Ízrel dine'é t'áá ałtso bich'į' bee hadziisdzíí'.

⁴Éí Ámor dine'é aláahgo binanit'a'í Sáíhan wolyéii Héshban kin haal'áagi kééhat'į́į́ nít'é'ígíí áádóó Béíshan nahós'a'dóó aláahgo naat'áanii Ag wolyéii Áshtarath kin haal'áagi Édriyaigi kééhat'į́į́ nít'é'ígíí nidzistseedóó bik'ijį':

⁵Jórdan tooh ha'a'aahjigo Mó'ab dine'é bikéyahgi Mózes kójíníigo díí bee haz'áanii baa ch'íhojii'aahgo hahoolzhiizh;

⁶Dził Hórebgi Bóhólníihii nihiDiyin God kóníigo nihich'į' haadzíí', Díí dziłgi kééhoht'į́įgo nízaad nihoolzhiizh;

⁷k'ad dah doohnéehgo Ámor dine'é bikéyah deílk'idgóó áádóó k'ídahoneezláagi kéédahat'ínígíí bitahgóó, dadzígaigóó áádóó dah daask'idgóó áádóó dahoníts'aa'góó áádóó shádi'áahjigo áádóó tónteel bibąąhgóó Kéínan dine'é bikéyahjigo áádóó Lébanan kéyahgi dził daní'áágóó índa ayóó át'é Yufréítiiz wolyéego tooh nílínígíí bich'į'go dadohnééh.

⁸Shoo, t'áá nihilą́ąjį' kéyah nihá hasht'eishłaa; kéyah biih doohkahgo nihíí' ádadoohłíiłii Bóhólníihii éí danihizhé'é yę́ę yich'į' yee ádee hadoodzíí'; éí Éíbraham, Áízak áádóó Jéíkab bada'áłchíní náás ahidoolchíiłii yeidiní'ą́.

⁹Íídą́ą́' shí nihich'į' haasdzíi'go ádíshní, T'áá sáhí nihaa áháshyą́ągo doo bíneesh'ą́ą da.

¹⁰Bóhólníihii nihiDiyin God ayóó át'éego k'ee'ąą nihidínéest'ą́; jó, díí jį́ yá biyi'di sǫ' yíl'áhígi ánóohłą́ą́' soolį́į́'.

¹¹Danihizhé'é yę́ę éí Bóhólníihii Diyin God k'ad ánóohłą́'ígíí łá'í nootínígo míildi ákónánóohłą́ą'go ánihidoolííł, áko nihik'ijidlíi dooleełgo t'áá íídą́ą́' yee nihá nihoní'ą́.

¹²Shide ádahwíínóhsinígíí áádóó shide áhoot'é ádashíínóhsinígíí índa na'ahíyádaałti'ígíí haash yit'éego t'áá shí t'éí bííníshghah doo?

¹³Ał'ąą dine'é danohłínígíí nihitahdóó diné dahóyáanii áádóó ak'idi'yiitįįhii índa béédaho'dílzinii nídadoohníiłgo nihindant'áago ádeeshłííł.

¹⁴Áádóó shich'į' hadasoohdzíi'go ádadooniid, Bee nihich'į' háínídzí'ígíí bida'ííníilzingo yá'át'ééh.

¹⁵Áko ał'ąą dine'é danohłíinii nihá aląąjį' naazíinii nihá ninínil; éí diné dahóyáanii áádóó béédaho'dílzinii nihindant'áa doogo nihá ninínil; éí míilgo ádazhnéelą́ą'ii áádóó neeznádiingo ádazhnéelą́ą'ii áádóó ashdladiin ádazhnéelt'e'ii índa neeznáá dazhníjaa'ii hondant'áa doo, áko ał'ąą dine'é danohłíinii nihitahgi nihee bídahólníih doo biniyé ninínil.

¹⁶Íídą́ą́' ánihwii'aahii danilíinii ádabidííniid, Nihik'isóó danilíinii bitahgi ahé'éts'ihgo hazhó'ó bá deísółts'ą́ą́' áádóó diné bik'is yił índa ła' dé'éyóní yił ałch'į' saad hółǫ́ǫgo t'áá ákogi át'éego bá hasht'éédaał'į́į doo.

¹⁷Aa hwiinít'į́įgo ánihwiit'aahgi diné doo ła' a'ohgo baa nitsídoohkos da, nidi a'ohgo í'dólzinii, doodaii' aláahgo í'dólzinii t'áá aheełt'éego yínółts'ą́ą́'; diné ánoolninígíí t'áadoo béédaałdzidí, háálá ánihodiit'aahígíí Diyin God bee bóhólnííh. Nidi ahé'éts'ihígíí nihá nantł'ago shaa didooh'áałgo hazhó'ó baa nídéesht'įįłgo hwíídéests'įįł.

¹⁸Jó, í'doołíłígíí t'áá ałtso nihich'į' bee haasdzíí'.

¹⁹Dził Hóreb hoolyéédóó dah dii'ná yę́ędą́ą́' ts'ídá ayóó át'éego áádóó t'óó báhádzidgo honoojí t'áá át'é dahoołtsą́; Bóhólníihii nihiDiyin God ánihidííniidígi át'éego Ámor dine'é bidził ní'áhígóó nii'náago Kéídesh-barníyajį' ninii'ná.

²⁰Áádóó ánihidííniid, Ámor dine'é bidził daní'áhígóó éí Bóhólníihii nihiDiyin God nihaa hodiní'áníjį' nooná.

²¹Jó, Bóhólníihii nihiDiyin God nihilą́ąjį' kéyah nihá hasht'eyiilaago ákóde dohnéehgo nihíí' ádaahłééh; éí danihizhé'é yę́ę biBóhólníihii Diyin God nihich'į' yee haadzíi'go ání, T'áadoo nihił daayé'í; t'áadoo nihąąh nidahwiikaadí.

²²Áko t'áá ánółtso shich'į' ninoohkaigo ádashidooniid, Diné ła' nihilą́ąjį' dadiil'aałgo nihá kéyah hadeidoosił, áko áádę́ę́' nákaigo háádóogo ákóde yah adii'néłígíí índa kin hadaas'áá góne' yah ahidii'néłígíí yee nihił nídahodoolnih.

²³Ákóhodoo'niidígíí shił hóóshǫǫdgo nihitahdóó diné naakits'áadah yilt'éego ał'ąą dine'é nohłínígíí nihik'eh nítį́įgo nídiinil.

²⁴Nít'éé' dziłghą́ą́'góó haaskai, áádóó Éshkol honíteel góyaa yíkaigo kéyah hadeisid.

²⁵Áádóó éí kéyahdę́ę́' aneest'ą' ła' nihá nídeizhjaa' áádóó saad yee nihił nídahoolne'go ádaaní, Kéyah yá'áhoot'ééh léi'gi Bóhólníihii nihiDiyin God nihaa hodee'aah lá.

²⁶Azhą́ ákót'ée nidi t'áadoo ákóde yah adahisoonáa da; Bóhólníihii nihiDiyin God yee haadzíi'ii bich'į' nídadoołtee'.

²⁷Nihiníbaal góne' saad dahonohłǫ́ǫgo ádadooniid, Bóhólníihii nihijoołáago biniinaa Ííjip kéyahdę́ę́' hanihíí'eezhgo Ámor dine'é yílák'ee nihididoo'áałgo ádanihidoołdįįł.

²⁸Háajigo yee' dah didii'nééł? Nihik'isóó yee' t'óó nihąąh nidahwiiskaadgo kódaaní, Nihiláahgo diné ayóida ádaat'é áádóó ayóó ádaníłnééz, áádóó ayóó át'éego kin hadaas'á; tsé ditą́ągo binaa ahéédaastł'inígíí k'asdą́ą́' yá bidadiitł'in, áádóó yé'iitsoh bada'áłchíní áadi nidaakaigo hadasiilzid.

²⁹Áádóó ánihidishní, T'áadoo bik'ee nihił daayé'í índa t'áadoo béédaałdzidí.

³⁰Bóhólníihii nihiDiyin God nihilą́ąjį' hooleełii nihá ana'ał'į́į doo; jó, nihinááł Ííjip kéyahgi nihá áát'įįdígi át'éego nihá ááníił doo.

³¹Áádóó honoojíigi t'áá ałtsogóó naanááh'néełgo Bóhólníihii nihiDiyin God kojį' anihíí'eezhjį' diné biye' yaa áhályánígi át'éego náás nihiníjaa'go baa ákodanohsin.

³²Azhą́ díigi ádzaa nidi Bóhólníihii nihiDiyin God doo deinohdlą́ą da nít'éé'.

³³Wohnééłgóó nihá hojoo'į́įgo nihiníbaal ninádaahnił doo biniyé tł'ée'go kǫ' yee nihilą́ąjį' hooleełgo áádóó jį́įgo dah náádidoohnééłgóó k'os yee nihilą́ąjį' hooleełgo nihiní'eezh.

³⁴Áko Bóhólníihii éí nihizaad yidiizts'ą́ą'go yik'ee báhóóchįįd áádóó ádee hadoodzíi'go ání,

³⁵T'áá aaníí díí doo yá'át'ééhgóó ahijoolchíiłii doo ła' kéyah yá'áhoot'éehgi hwiizdoołtséeł da; éí danihizhé'é yę́ę baa dideesh'áałgo bich'į' bee ádee hadeesdzíí' nít'éé'.

³⁶T'áá hazhó'ó Jiifáneh biye' Kéíleb joolyéii éí t'éí hwiizdoołtsééł, áádóó bí t'éiyá kéyah yikáá' tádííyáhígíí bąą ba'áłchíní t'áá bił kéyah baa dideesh'ááł, háálá ts'ídá t'áá dzizį́į́ nít'éé' Bóhólníihii bikéé' joogááł nít'éé'.

³⁷Áádóó ałdó' nihiniinaa Bóhólníihii shich'į' báhóóchįįdgo áshíłní, Ni ałdó' kéyah doo biih díínáał da.

³⁸Nidi Nan biye' Jáshowa wolyéii nihiląąjį' sizínígíí éí díí kéyah yiih doogááł; éí chánah ádeínóhsin; jó, éí kéyahígíí Ízrel dine'é bíí' dooleełgo íidoolííł.

³⁹Áádóó ałdó' niha'áłchíní yázhí, Yisnááh dadooleeł, dadooniid yę́ę, éí íídą́ą́' doo yá'át'éehii índa yá'át'éehii doo yaa ákodanízinii, éí kéyah yiih dahidoonééł áádóó baa dideesh'áałgo bíí' dadooleeł.

⁴⁰Nidi nihí t'ą́ą́' háádoohnée łgo Tónteel Łichíí' bich'į'go ahééhonít'i'jí honoojí góne' adoohnééł.

⁴¹Áádóó shich'į' hadasoohdzíi'go ádadooniid, Nihí Bóhólníihii bich'į' ádił da'siilziih. Ákóde hidiikahgo anaa' ádahodiilnííł; Bóhólníihii nihiDiyin God yee nihich'į' haadzí'ígíí t'áá ałtso bik'ehgo ádadii'nííł. T'ááłá'í nootínígo bee na'abaahii bee áká daałzisgo t'áadoo nitsahadáhí dził daní'áágóó hadahishoojéé'.

⁴²Nít'éé' Bóhólníihii áshidííniid, Kóbididííniił, T'ááká ákóde dadohkááh lágo áádóó t'ááká anaa' ádahohłééh lágo, háálá doo nihitah honishłǫ́ǫ da; t'áá nihí ákǫ́ǫ́ dasidoohkaigo nihi'ana'í nidanihidoołtsił.

⁴³Áko nihich'į' haasdzíi' nidi t'áadoo dashisidoots'ą́ą' da, ákondi Bóhólníihii yee hahaasdzí'ígíí bich'į' nidasoołtee'go t'áadoo tsíhodeeskézí dził ní'áágóó hahishoojéé'.

⁴⁴Áádóó dziłghą́ą'di Ámor dine'é kéédahat'ínígi tsés'ná ádaat'ínígi át'éego nihich'į' dah diijéé' índa Síyer kin haal'áádóó Hórmah hoolyéejį' danihiníłtseed.

⁴⁵Áádóó t'ą́ą́' nánoohkaigo Bóhólníihii binááł daahcha nít'éé'; nidi Bóhólníihii t'áadoo nihidiizts'ą́ą' da.

⁴⁶Áko íídą́ą́' Kéídeshgi kéédahoht'į́įgo lą'í danihiiską́; éí yoołkáłígíí bik'ehgo áadi kéédahoht'į́į́ nít'éé'.