Read Navajo DEUTERONOMY 11 Bible Online

DEUTERONOMY 11 - Navajo bible

DEUTERONOMY 11

¹Éí bąą Bóhólníihii nihiDiyin God ayóó'ádeínóh'ní; éí yich'į' nihííł'aadii áádóó yee nihwiiz'áanii áádóó yee nihodii'aahii índa bibik'eh ó'oo'níiłii t'áá áłahjį' bik'eh dahonoł'į́.

²Díí jį́ díí nihił béédahoozįįh; jó, niha'áłchíní doo bił béédahózinígíí doo bich'į' yáshti' da; jó, Bóhólníihii nihiDiyin God t'áá hashkée na'nitinígíí áádóó yee ayóó át'éii áádóó bíla' ayóó ábóodziilii índa bigaan bits'áhoníyée'ii doo dayiiłtsą́ą da.

³Áádóó álílee ádaat'éii áádóó áhooníiłii Ííjip dine'é bitahgi aláahgo naat'áanii Féro wolyéii áádóó bikéyah t'áá át'éé nít'éé' áyííł'įįdígíí,

⁴áádóó Ííjip dine'é bisiláo áádóó dabilį́į́' yee nidaabaahii índa bitsindaabąąs bijáád naakiígíí yee nidaabaahii yee nihikéé' yinéełgo Tónteel Łichíí' ha'naa ninoonáago nihikéédę́ę́' íínáago bik'ijį' Bóhólníihii nilíinii tó ahínéideesk'ołgo áhásdįįdgo díí jį́įdi doo ła' nijigháa da.

⁵Áádóó honoojíidi wohnéełgo kwe'é noohkaijį' ánihííł'įįdii,

⁶índa Iiláíyab éí Rúben dine'é náás ahoolchíiłii nilį́įgo biye'ké nidilt'é Déíthan áádóó Abáíram wolyéii bich'į' nahasdzáán ąą áhoodzaago, ba'áłchíní áádóó biníbaal índa t'áadoo le'é bee hólóonii t'áá bił, Ízrel dine'é t'áá ałtso binááł nahasdzáán abííłna'go éí niha'áłchíní doo dayiiłtsą́ą́góó doo bił béédahózin da.

⁷Nidi nihí ayóó ádaat'éii Bóhólníihii áyoolíłígíí t'áá ałtso danóoł'į́į́'.

⁸Éí bąą bik'eh ó'oo'níiłii t'áá át'é díí jį́ nihich'į' bee haasdzí'ígíí bik'eh dahonoł'į́, áko éí bee danihidziil doo, índa kéyah íí' dooleełii bich'į' disoonánígíí biih wohnéehgo ádíí' ádaahłééh,

⁹áádóó éí kéyah biyi' as'ahgóó anihídayiiłkaah doo; éí danihizhé'é yę́ę índa bada'áłchíní náás da'ahílchíihii yeididoo'áałgo Bóhólníihii yee ádee hadoodzíí'; éí kéyahgi abe' áádóó tsés'ná bitł'izh bee áda'azįįd.

¹⁰Jó, kéyah danihíí' dooleeł biniyé bich'į' disoonánígíí; éí Ííjip kéyahgi haz'ánídę́ę́' ch'ínoonánígíí doo bił ahehoołt'ée da; áadi k'ééda'dohdlééh yę́ędą́ą́' nihikee' bee tó háádahohłohgo nináda'nołhęshgo ch'il bił da'adáanii ayóogo nídahadleehgi át'éego ádahwíínóhsin nít'éé',

¹¹nidi kéyah danihíí' dooleeł biniyé bich'į' disoonánígíí éí deílk'idgóó áádóó deíldzisgóó nahałtinígíí t'éí bee nínáháltłoh.

¹²Bóhólníihii nihiDiyin God éí kéyah yaa áhályą́. Yihahígíí ałtso náhahjį' Bóhólníihii nihiDiyin God áłahjį' kéyah yik'i déez'į́į́'.

¹³Áádóó kót'ée dooleeł: bik'eh ó'oo'níiłii díí jį́ nihich'į' bee haasdzí' ígíí haleebee deísínółts'ą́ą'go, áko Bóhólníihii nihiDiyin God ayóó'ádeínóhníigo nihijéí t'áá át'é bee áádóó nihii' sizíinii t'áá át'é bee bá nidaał'a'go,

¹⁴baa náhwiilzhíishgo nihikéyahgi nihidahałtį́įhgo áádóó akée'di ninádaháłtį́hígíí nihá ánéish'įįh doo, áko nihitł'oh naadą́ą́' áádóó nihiwáin ániidíii índa áliv tsin naazkaadii bineest'ą' bik'ah hééł áńdaoł'įįh doo.

¹⁵Nihikéyah bikáá'góó nihinaaldlooshii bá ch'il nidanise'go ánéish'įįh doo, áko da'ohsą́ągo hwiih danohłį́į doo.

¹⁶T'áá nihí ádaa dahonohsą́ągo nihijéí doo bida'doodloh da; éí doodago łahjigo nídasooyizgo diyin dabidi'níinii bá nihídadidooł'aałgo bich'į' nidahohłáa doo.

¹⁷Éí biniinaa Bóhólníihii hashké nídzingo bik'e'íyée'go nihik'ijį' nilį́į dooleeł, áádóó yót'ááhdę́ę́' nahałtinígíí áidoosįįł, áádóó nihikédaayah doo bikáá' nida'nit'ą'góó íidoolííł, índa Bóhólníihii nilíinii kéyah yá'át'éehii nihaidiní'áanii bikáa'gi t'ahaa'go ałtso ádoohdįįł.

¹⁸Éí bąą díí shizaadígíí nihijéí bii' índa nihii' sizíinii bii' hazhó'ó hasht'e'nidahidohnííł, áádóó díí saad bee ééhózinii át'éego nihíla' índa nihináta'gi bídahaastł'ǫ́.

¹⁹Áádóó éí saadígíí bee niha'áłchíní nidanohtin, áádóó nihighan góne' bił nidahisóotą́ągo éí baa yádaałti', áádóó bił tádadohkááhgóó áádóó danohjeehgo índa nídahidoohjeehgo bee bich'į' yádaałti'.

²⁰Áádóó nihikin bich'é'étiin bá siláii índa yah ada'iiztiingi dáń'dítį́hí bikáa'gi bee ak'eda'ashchį́įgo ádaahłe' doo.

²¹Áko nihí áádóó nihada'áłchíní ałdó' as'ahgóó nihídeidéeską́; Bóhólníihii nilíinii danihizhé'é yę́ę kéyah yeididoo'áałgo yich'į' yee ádee hadoodzíí'; nahasdzáán bik'igi yádiłhił as'ahgóó abíyííłkánígi át'éego nihídayéełkaah doo.

²²Jó, díí bik'eh ó'oo'níiłii bee nihich'į' haasdzí'ígíí haleebee bik'eh dahonoł'į́įgo, éí Bóhólníihii nihiDiyin God ayóó'ádeínóh'níigo, áádóó bik'ehgo deínóhkáahgo, índa bąąh dashoojée'go.

²³Áko Bóhólníihii díí ał'ąą dine'é t'áá ałtso nihilą́ąjį' ch'íiniiłkaad doo áádóó ał'ąą dine'é nihiláahgo ayóó ádaat'éii áádóó nihiláahgo ayóó ádabóodziilii daabíhígíí danihíí' doo.

²⁴T'áá ałtsogóó kéyah bikáá' deínóhkáhígíí nihíí' dooleeł; éí honoojíídóó Lébanan hoolyéejį' índa tooh Yufréítiiz hoolyéédóó tónteel siyíníjį' nihá hoodzo doo.

²⁵Diné doo ła' nihich'į' woozįįh át'ée da doo, háálá Bóhólníihii nihiDiyin God éí kéyah bikáá' t'áá ałtsogóó deínóhkáahgi nihik'ee hóyée'go índa nihik'e'íyée'go ánihidoolííł; jó, ákót'éego Bóhólníihii nihich'į' yee haadzíi' ni'.

²⁶Shoo, díí jį́ nihidáahgi ak'ihojidlíii índa hóyée'go á ha'doodzihii hólǫ́ǫgo áshłaa.

²⁷Jó, nihik'idahojidlí, Bóhólníihii nihiDiyin God bibik'eh ó'oo'níiłii bik'eh dahonoł'į́įgo t'éiyá; éí díí jį́ nihich'į' bee haasdziih.

²⁸Áádóó hóyée'go nihá ha'oodzíí'; Bóhólníihii nihiDiyin God bibik'eh ó'oo'níiłii doo bik'eh dahonoł'į́į́góogo t'éiyá, nidi díí jį́ nihich'į' bee haasdziihii t'óó bits'áhisoohkaigo, diyin dabidi'níinii doo béédahonohsinígíí bikéé' yóó'ahisoohkaigo hóyée'go nihá ha'doodzih.

²⁹Áko kót'ée doo: Bóhólníihii nihiDiyin God éí kéyah nihíí' dooleełjį' anihíí'eezhgo Dzi ł Gérazim hoolyéii bighą́ą́'dóó ak'ihojidlíii baa dahołne' doo índa Dził Ííbal hoolyéii bighą́ą́'dóó hóyée'go á ha'iidziih baa dahołne' doo.

³⁰Éí Jórdan tooh wónaanídi sinil; bita'gi yíldzisgo iná'át'áhíjigo, Kéínan dine'é kéédahat'ínígóó Gílgal kin shijaa'ígíí binaashiijí Móreh hoolyéegi chéch'il sikaadígíí t'áá áyídígi sinil.

³¹Áko Bóhólníihii nihiDiyin God éí kéyah danihíí' dooleełgo nihaidiní'ánígíí bich'į' Jórdan tooh ha'naa nidoohnééł, áádóó ádíí' ádadoohłííł, índa ákwii kéédahoht'į́į doo.

³²Áko yee nihwiiz'áanii índa yee nihodii'aahii t'áá át'é bik'eh dahonoł'į́įgo ádaa daahsįįh; éí díí jį́ nihidááhgóó ninílá.