Read Navajo DEUTERONOMY 12 Bible Online

DEUTERONOMY 12 - Navajo bible

DEUTERONOMY 12

¹Díí yee nihwiiz'áanii áádóó yee nihodii'aahii bik'eh dahonoł'į́į doo; éí danihizhé'é yę́ę biBóhólníihii Diyin God éí kéyah ádíí' ádadoohłíiłgo nihaidiní'ánígíí biyi' nihídeídíiską́ą́góó nahasdzáán bikáa'gi kéédahoht'į́įgo bik'eh ánóht'ée doo.

²Kéyah nihíí' dooleełígíí bikáá' t'áá ałtsogóó ał'ąą ana'í danilíinii bidiyin dabidi'níinii yá nidaal'a' yę́ęgóó ts'ídá ałtso nidahidoołchxǫǫł; dziłghą́ą́'góó áádóó dah daask'idgóó índa tsin dadootł'izh naazkaadii t'áá át'é biyaagóó yich'į' nidahałáhígíí ałtso nidahidoołchxǫǫł.

³Áádóó bibikáá' nááda'iiniihígíí naa'adahidoołtł'ił, áádóó bitsé nidaashch'ąą'go yadaa'áago ádaalyaii yich'į' nidahałáhígíí dadidoohséí, áádóó tsin bee e'elyaii ádaalyaii adahididoołk'ą́ą́ł, áádóó eda'alyaii bidiyin dabidi'níinii nidahidoohtsxił, índa éí nahaz'ánígóó dabízhi' ałtso nahjį' kódadoohłííł.

⁴Ana'í nidahałáhígi át'éego nihí éí t'áá ádzaagóó t'áadoo Bóhólníihii nihiDiyin God bich'į' nidahohłáhí.

⁵Nidi Bóhólníihii nihiDiyin God t'áá bí náhodidoo'áłígi nidine'é t'áá ałtso bitahgóó Bóhólníihii t'áá bí bízhi'ígíí dólzingo íidoolíiłgi nída'oohkąąhgo ahínáohkah doo.

⁶Índa ákwii didlidgo náádahołniihii, áádóó nááhidoonihgo náádahołniihii, áádóó t'áadoo le'é neeznáá daníjaa'ígíí éí t'ááłá'ígo shijaa', Bóhólníihii baa nídahidoh'aahii, áádóó bił yádi'diilnihgo náádahołniihii, áádóó bee ádee hadasoohdzíi'go náádahołniihii, áádóó t'áá nihí ádeinohsingo náádahołniihii, índa nihilį́į́' áádóó nihidibé alą́ąjį' nidahaazhchíinii náádahołniihii ninádahohjih doo.

⁷Ákwii Bóhólníihii nihiDiyin God binááł nída'ohdį́įh doo. Nihí áádóó niha'áłchíní bił baa nidaahkaígíí t'áá ałtso baa nihił nidahoozhǫǫh doo; éí Bóhólníihii nihiDiyin God yee nihik'ijidlí.

⁸Nihí éí díí kwe'é t'áá ałtso díí jį́ baa nideiikaígíí doo baa nidaahkai da doo; jó, t'ááłá'í jinítínígo, Díí t'áá ákóne' ásht'į́, daznízingo baa nidajikai.

⁹Jó, háá' áyį́į́h áádóó kéyah íí' dooleełii éí Bóhólníihii nihiDiyin God nihaidee'aahígíí t'ah doo biih wohnéeh da.

¹⁰Nidi Jórdan tooh ha'naa ninoonáago, áádóó ákwii kéédahoht'į́į doo biniyé Bóhólníihii nihiDiyin God éí kéyah nihaidiní'ánígíí ádíí' ádadoohłíiłgo áádóó ákwii nihinaagóó nihi'ana'í kéédahat'íinii t'áá ałtso yits'ąą nihaa áhályą́ągo háádahołyį́įhgo t'áadoo nitsihadáhí kéédahoht'į́įgo

¹¹ákwii haz'ą́ągi Bóhólníihii nihiDiyin God t'áá bí náhodidoo'áłígi bízhi' dólzin doo; áadi náádahołniihii t'áá ałtso nidahohjáah dooígíí nihich'į' bee haasdziih: éí didlidgo náádahołniihii, áádóó nááhidoonihgo náádahołniihii, áádóó t'áadoo le'é neeznáá daníjaa'ígíí éí t'ááłá'ígo shijaa' Bóhólníihii baa nídahidoh'aahii, áádóó bił yádi'diilnihgo náádahołniihii, índa t'áá bee ádee hadasoohdzíi'ii ts'ídá yá'át'éehii t'áá ałtso Bóhólníihii bich'į' ádee hadasoohdzíi'go náádahołniihii nidahohjáah doo.

¹²Áko Bóhólníihii nihiDiyin God binááł nihił nidahoozhǫǫh doo; nihí áádóó nihiye'ké áádóó nihitsi'ké áádóó diné nihá nidaal'a'í áádóó asdzání nihá nidaal'a'í índa Líívai dine'é nihitahgi kééhat'ínígíí éí nihíí' dadooleełii doo bił ałts'ą́ą́' da'nołk'iiz daígíí ałdó' bił nihił nidahoozhǫǫh doo.

¹³Ádaa ádahołyą́ągo t'ááká didlidgo nááhániihii t'áá áhoodzaagi náádahołniih lágo.

¹⁴Nidi nihitahgi t'ááłá'í dine'é dah yikahígíí biníi'gi Bóhólníihii náhodii'ánígi ákwii t'éiyá didlidgo náádahaniihii náádahołniih doo, índa nihich'į' bee haasdzí'ígíí áadi t'áá ałtso bida'íínóhsin doo.

¹⁵Ákondi t'áá danihiníghanígi aałk'ee áńdahooł'įįhgo da'ołghał, danohsinii éí Bóhólníihii nihiDiyin God nihik'ijidlíigo nihaidii'aahígíí bik'ehgo doo bi'didéehii, doodaii' bi'didéehii danohłíinii éí jádí bitsį', doodaii' bįįh bitsį' daohsą́ą doo.

¹⁶T'áá hazhó'ó bidił t'éí t'áadoo daohsání, łeeshtahjį' tó yaadzi'ígi át'éego łeeshtahjį' yadahoosíid doo.

¹⁷Danihiníghangóó díí t'áadoo daohsání: éí tł'oh naadą́ą́' neeznáá daníjoolgo t'ááłá'ígo shijoolii, éí Bóhólníihii baa nídahidoh'aahii, doodaii' wáin ániidíii, doodaii' áliv tsin naazkaadii bineest'ą' bik'ah neeznáá daníką́ągo t'ááłá'í sikánígíí, éí Bóhólníihii baa nídahidoh'aahii, doodaii' nihilį́į́' áádóó nihidibé alą́ąjį' nidahaazhchíinii náádahołniihii, doodaii' t'áá ha'át'íhída bee ádee hadasoohdzíi'ii bee náádaho łniihii, doodaii' t'áá nihí ádeinohsingo náádahołniihii, doodaii' bił dah ní'diilnihgo náádahołniihii,

¹⁸nidi Bóhólníihii nihiDiyin God hólǫ́ǫgi Bóhólníihii nihiDiyin God náhodidoo'áłígi ákwii daohsą́ą doo; ni áádóó niye' áádóó nitsi' áádóó diné ná naal'a'í áádóó asdzání ná naal'a'í índa Líívai dine'é nilíinii t'áá nighangi nił yah e'etiingóó nił kééhat'íinii Bóhólníihii nihiDiyin God hólǫ́ǫgi baa nidaahkaígíí t'áá ałtso baa nihił nidahoozhǫǫh doo.

¹⁹Ádaa ádahołyą́ągo t'ááká Líívai dine'é yóó'adadooh'ááł lágo, yidiiską́ą́góó nahasdzáán bikáa'gi ákót'éego dahinohnáa doo.

²⁰Áko Bóhólníihii nihiDiyin God éí kéyah hótsaago nihá yínéidoozohgo, jó, ákót'éego yee niha'di'ní'ą́, áádóó ádadidoohniił, Adeeshghał, háálá atsį' bídin danohłį́, áko t'áá deeshghał danohsinígíí daołghał doo.

²¹Bóhólníihii nihiDiyin God náhodidoo'áłígi ákwii Bóhólníihii bízhi' dólzingo íidoolíłígóó nihá nízaad ládą́ą́', t'áá nihí nihibéégashii, doodaii' nihidibé hólǫ́ǫgo aałk'ee ádahwíínóhsin doo biniyé Bóhólníihii nihaidiní'ánígíí t'áá éí bee nihá hoséł'ą́, áko t'áá danihiníghanígi, T'áá deeshį́į́ł, danohsinígíí daołghał doo.

²²Jádí bitsį', doodaii' bįįh bitsį' daołghałígi át'éego béégashii, doodaii' dibé bitsį' daołghałgo yá'át'ééh; doo bi'didéehii, doodaii' bi'didéehii danohłíinii éí atsį'ígíí daoł ghałgo yá'át'ééh.

²³T'áá hazhó'ó diłígíí t'éí t'ááká daohsą́ą́' lágo, háálá dił éí iiná át'é, áko iiná éí atsį' t'áá bił doo daohsą́ą́' át'ée da.

²⁴Dił t'éí t'ááká daohsą́ą́' lágo, łeeshtahjį' tó yaadzídígi át'éego łeeshtahjį' yadahoosíid doo.

²⁵Ts'ídá t'ááká daohsą́ą́' lágo, áko niha'áłchíní náás da'ahílchíihii bił nihá yá'át'éehgo áhooníił doo, háálá Bóhólníihii binááł ts'ídá t'áá ákóne' ádanoht'ée doo.

²⁶T'áá hazhó'ó dadílyingo nidaahjaahii áádóó bee ádee hadadidoohdzihgo náádahołniihii t'éí Bóhólníihii náhodidoo'áłíjį' nidahohjááh.

²⁷Didlidgo náádahaniihii náádahołniihgo, ííshją́ą́ Bóhólníihii bibikáá' náá'iiniihí bikáa'jį' atsį'ígíí dił t'áá bił náádahołniih doo, áádóó náádahołniihígíí bidił éí Bóhólníihii bibikáá' náá'iiniihí bikáa'jį' yadahoosíid doo, índa atsį'ígíí t'éí nídaohdį́įh doo.

²⁸Díí saad nihich'į' bee haasdzí'ígíí t'áá ałtso hazhó'ó ádaa daohsįįhgo deísółts'ą́ą́', áko niha'áłchíní náás da'ahílchíihii bił yá'át'éehgo nihá áhooníiłgo ahool'áa doo, háálá Bóhólníihii nihiDiyin God binááł ts'ídá yá'át'éhígi índa t'áá ákóne' ádanoht'ée doo.

²⁹Bóhólníihii nihiDiyin God nihilą́ąjį' ana'í áyoołdįįłgo bikéyah bighadahididooht'áałgo nihíí' ádadoohłííł áádóó ákwii kéédahoht'į́į doo.

³⁰Ádaa ádahołyą́ągo nihilą́ąjį' ana'í ábi'disdįįdgo biloh doo biih doohkah da, índa bidiyin dabidi'níinii yich'į' nidahałáhígíí t'áadoo bínda'ídółkidgo kódadohníní, Haadashą' yit'éego díí ana'í danilíinii dabidiyin yá nidaal'a' nít'éé'? Shí ałdó' ákósht'į́įgo naash'a' doo.

³¹Bóhólníihii nihiDiyin God bich'į' t'áadoo ákódaaht'íní, háálá Bóhólníihii bich'į' ts'ídá doo haldinígi ádáát'įįdgo bąą bijoołxáhígíí bidiyin dabidi'níinii yá ádáát'įįd; jó, biye'ké índa bitsi'ké deidiłidgo bidiyin dabidi'níinii yich'į' náádayiiłniihgo yaa naaskai.

³²Nihich'į' bee haasdzí'ígíí ádaa daahsįįhgo bida'íínóhsin; doo ła' bíidooh'áał da, doodaii' doo ła' bididooh'áał da.