Read Navajo DEUTERONOMY 13 Bible Online

DEUTERONOMY 13 - Navajo bible

DEUTERONOMY 13

¹Nihitahdóó ła' áhodooníiłii yaa halne'ii, doodaii' nayiiyeełgo yee bił ééhózinii nídiidzáago, éí bee ééhózinii, doodaii' t'óó bik'ee ił ahayóii áyoolíiłgo

²áádóó bee ééhózinii, doodaii' bik'ee t'óó ił ahayóii nihich'į' yee yáłti' yę́ę bik'eh áhoodzaago, jó, t'áá bítséedi kónihidííniid, Tį', diyin dabidi'níinii doo béédahonohsinii bikéé' dah dahididiikah áádóó bá nideil'a' doo.

³Áko áhodoonííł yaa halne'ii, doodaii' éí nayiiyeełgo yee bił ééhózinii bizaad doo dzółts'ą́ą' da; jó, Bóhólníihii nihiDiyin God hanihisííd, áko Bóhólníihii nihiDiyin God daats'í nihijéí t'áá át'é bee índa nihii' sizíinii t'áá át'é bee ayóó'ádeínóh'níigo bił bééhózin doo.

⁴Bóhólníihii nihiDiyin God bikéé' wohkah áádóó dadíínóhsin áádóó bibik'eh ó'oo'níiłii bik'eh dahonoł'į́įgo biinéé' deísółts'ą́ą́' índa bá nidaał'a'go bąąh dah shoojéé'.

⁵Éí áhodoonííł baa hojilne'ii, doodaii' nijiiyeełgo bee hoł ééhózinii hodi'yoolyééł, háálá éí Bóhólníihii nihiDiyin God yits'ánihidínóo'ah yiniyé nihich'į' yáłti'; éí Diyin God nilíinii Ííjip kéyahdóó háánihíí'eezh, áádóó naalte' danohłį́ yę́ędóó náánihiisnii'; Bóhólníihii nihiDiyin God nihich'į' yee haadzíi'ii bida'íínóhsingo deínóhkáah dooleełígíí yits'ánihidínóo'ah yiniyé nihich'į' yáłti'. Ákót'éego doo yá'át'éhígi ádaat'éhígíí nihitahdóó nahjį' kódaał'į́į doo.

⁶Bił háíní'áázh, éí nimá biyáázh, doodaii' niye' ła', doodaii' nitsi' ła', doodaii' ne'asdzą́ą́ ayóó'ííní'níinii, doodaii' áhą́dígo nik'is nilíinii t'áá nahont'inee nihíni' nihá áháléehgo kónihididooniiłgo, Tį', diyin dabidi'níinii bá nideiil'a' doo; éí nihí áádóó danihizhé'é yę́ę ałdó' bił doo béédahonohsin da

⁷éí diyin dabidi'níinii da'ana'í nihináágóó áhą́dígi, doodaii' nízaadi kéédahat'íinii t'áá éí nahasdzáán nidahonees'ą́ą́góó kéédahat'íinii dabidiyin ádaat'é.

⁸Ánihizhdííniidígíí t'ááká hach'į' lą́ da'oohłe' lágo, t'áadoo dahwíísółts'ą́'í, t'áadoo haa a'ááh nohsiní áádóó t'ááká yisdádahołtééł lágo índa t'ááká nídahodoł'įįh lágo.

⁹Nidi nihí hak'éí nohłíinii t'áádóo nídí dahodiyoołhééł; dahodiyoołhééł biniyé nihí alą́ąjį' dahodoohsił áádóó índa diné t'áá ałtso dahodoosił.

¹⁰Áádóó tsé bee hoł nidazdoołniiłgo dazdootsaał, háálá Bóhólníihii nihiDiyin God bits'ánihizhdínóo'ah biniyé nihíká ájíít'įįd; jó, Diyin God éí Ííjip kéyahdóó naalte' danohłį́ yę́ędę́ę́' háánihíí'eezh.

¹¹Áko Ízrel dine'é t'áá ałtso díí yaa dahodidoots'į́į́ł áádóó yik'ee bił daayée' doo, índa nihitahgóó doo yá'ádaashónígi áhát'íinii doo ła' ánáádoolníił da.

¹²Nihikin hadaas'áhígi łahgo ła' kójíníigo dahodidoohts'į́į́ł; éí Bóhólníihii nihiDiyin God nihaa hodiní'ánígi kéédahoht'į́įgo ákwii ła' ázhdidooniił,

¹³Diné doo yá'ádaashóonii léi' nihitahdóó hadahaaskaigo bikin haal'áhídóó kéédahat'íinii yóó'adeinee'aa'go kódeiłníigo, Tį', diyin dabidi'níinii bá nideiil'a' doo (éí doo béédahonohsin da).

¹⁴Áko bínda'ídółkidgo áádóó hadanohtáago haleebee bínda'ídídóołkił; jó, t'áá aaníí ákót'éego índa t'áá íídą́ą́' ts'ídá doo daaldinii nihitahjį' kólyaago baa ákodanoozį́į'go

¹⁵t'áá aaníí éí kin haal'áii ákwii kéédahat'ínígíí diltłish bee ts'ídá ałtso ádadoołdįįł, índa ákwii dahólónígíí t'áá át'é, alį́į'da diltłish bee ałtso nidadoołtsxił.

¹⁶Áko bindaalye'é bąąh dabi'doogą́'ígíí t'áá át'é kintaa aztiingi ałk'i yáádeidoohtsihgo t'áá át'é Bóhólníihii nihiDiyin God bich'į' dadohłidgo náádahidoołnih, índa éí kin haal'áhígíí ałk'i yanáa'áago ahool'áa doo; ákwe'é doo náánáła' kin haal'áago ánáádoolníił da.

¹⁷Áko ádadooldįįłgo nideet'áanii ts'ídá doo nijilée da, áko Bóhólníihii yee hashké nídzinii bik'e'íyée'ii doo nihik'i hwiidooleeł da, nidi nihaa a'ááh dínóozįįł áádóó nihaa a'áhí dínóozįįł índa k'ee'ąą nooht'į́įłgo ánihidoolííł, ákót'éego danihizhé'é yę́ę yich'į' yee ádee hadoodzíí'.

¹⁸Bóhólníihii nihiDiyin God bizaad hazhó'ó deísółts'ą́ą'go áádóó bibik'eh ó'oo'níiłii t'áá át'é díí jį́ nihich'į' bee haasdzí'ígíí bik'eh dahonoł'į́įgo índa Bóhólníihii nihiDiyin God binááł t'áá ákóne' át'éii baa nidaahkaigo éí yee nihik'iinít'į́į' doo.