Read Navajo DEUTERONOMY 14 Bible Online

DEUTERONOMY 14 - Navajo bible

DEUTERONOMY 14

¹Bóhólníihii nihiDiyin God ba'áłchíní danohłį́; daneeznánígíí bá t'ááká nida'ádiyołgéésh yíila', éí doodaii' nihítáa'gi t'ááká bá bídaahshééh yíila'.

²Háálá Bóhólníihii nihiDiyin God bich'į' diné dadiyinii danohłį́, áádóó Bóhólníihii t'áá bí ádá t'áá sahdii ánóht'ée doo biniyé nánihidiinilgo nihokáá' dine'é t'áá ałtso biláahgo ánóht'éego ánihósin.

³T'áá ha'át'íhída Bóhólníihii doo yíłdinii doo jiyą́ą da.

⁴Naaldlooshii kódaat'éhígíí daohsą́: éí béégashii lá, dibé lá índa tł'ízí lá.

⁵Bįįh, jádítsoh, bįįh łitsoii, tł'ízí ałchinii, tsétah tł'ízí, jádí índa tsétah dibé daahsą́.

⁶Áádóó naaldlooshii kódaat'éii bikéshgaan dahałgizhígíí índa nída'at'aałígíí éí t'éí daohsą́.

⁷Naaldlooshii bikéshgaan dahałgizhígíí, doodaii' nída'at'aałígíí ła' doo yidą́ą da: éí ghą́ą́'ask'idii áádóó gah índa dlǫ́'iigi át'éhígíí, háálá éí nída'at'aał nidi bikee' doo dahałgizh da. Éí doo nihá yá'ádaat'éeh da.

⁸Áádóó bisóodi éí bikee' hałgizh nidi doo ná'át'aałgóó bąą doo nihá yá'át'éeh da; bitsį'ígíí doo ła' dadoohsį́įł da áádóó daninéhígíí bits'íís doo bi'deelchíid da.

⁹Díí táyi' nidaaldeehii t'áá ałtso kódaat'éhígíí daohsą́: bit'a' dahólónígíí índa bikágí ałk'i dadook'įhígíí éí daahsą́.

¹⁰Nidi bit'a' ádaadinígíí índa bikágí doo ałk'i dadook'įhígíí doo yidą́ą da. Éí doo nihá yá'ádaat'éeh da.

¹¹Nidaat'a'ii yá'ádaat'éehii t'áá ałtso daohsą́.

¹²Nidi díí éí t'áadoo daohsání: éí atsá áádóó jeeshóó' áádóó jeeshóó' diłhiłii

¹³áádóó atseełtsoii áádóó giní índa atsá ał'ąą ádaat'éii

¹⁴áádóó gáagii ał'ąą ádaat'éii

¹⁵áádóó tsídiitsoh ástrich wolyéii áádóó ná'áshjaa' áádóó tábąąsdísí índa giní ał'ąą ádaat'éii

¹⁶áádóó dlǫ́'átah ná'áshjaa' áádóó ná'áshjaatsoh áádóó ná'áshjaałgaii

¹⁷áádóó naal'eełí bidaas'nézí áádóó ch'il haat'agii áádóó toohjį' noołnahii

¹⁸tábąąsdísí bijáás'nézí áádóó tábąąsdísí ał'ąą ádaat'éii áádóó tsé noolch'óshii áádóó jaa'abaní

¹⁹áádóó ch'osh nidaat'a'ii doo nihá yá'ádaat'éeh da, éí doo daadą́ą da.

²⁰Nidi nidaat'a'ii yá'ádaat'éehii t'áá ałtso daohsą́.

²¹T'áá ha'át'íhída t'áá bíni'ídi daaztsáanii t'áadoo daohsání; dé'éyóní bił kéédahoht'ínígíí baa dahidoh'aahgo éí deiyą́ą doo, doodaii' dé'éyóní danilíinii bich'į' nidahołniih doo, háálá Bóhólníihii nihiDiyin God bidine'é diyinii danohłį́. Tł'ízí yázhí bitsį' t'áadoo bimá bibe' bee daałbézhí.

²²T' áádóo nídí nínádanołt'į́hígíí t'áá át'é bits'ą́ą́dóó neeznáá daníjaa'ígíí éí t'ááłá'ígo shijaa' ninádahidoh'aah; éí t'áá nináhah bik'eh ákódaaht'į́į doo.

²³Bóhólníihii nihiDiyin God binááł díí nídaahdį́įh doo: éí náhodidoo' áłígi ákwii bízhi' dólzingo haz'ą́ągi tł'oh naadą́ą́' neeznáá daníjaa'ígíí éí t'ááłá'ígo shijaa' áádóó wáin ániidíii neeznáá daníką́ągo t'ááłá'í siką́ągo áádóó tsin áliv bineest'ą' bik'ah neeznáá daníką́ągo t'ááłá'í siką́ągo índa nihilį́į́' áádóó nihidibé alą́ąjį' nidahaazhchíinii náádahołniihii daahsą́ą doo. Ákódaaht'į́įgo díí bídahooł'aah doo: Bóhólníihii nihiDiyin God t'áá áłahjį' dadíínóhsin doo.

²⁴Nihighandóó diyingo haz'áníjį' atiinígíí nihá doo deighání dago áádóó baa nídahidoh'aahígíí nidahohjáahgo doo bídanoo ł'ą́ą́góó, doodaii' éí haz'ánígóó nihá aláahgo nízaadgo éí Bóhólníihii Diyin God náhodidoo'áłígi ákwii bízhi' dólzingo haz'áníjį' biyah hóyée'go Bóhólníihii nihiDiyin God nihik'ijisdli'go

²⁵baa nídahidoh'aahígíí éí béeso bił ałghááda'ayoh'níiłgo ałch'į' bida'astł'ǫ́ǫgo Bóhólníihii nihiDiyin God náhodidoo'áłígóó nídadohkah doo.

²⁶Áádóó béeso nihaa dahindéhígíí bee nihił bidáádahaníinii nishódahoołt'eeh; éí béégashii, doodaii' dibé, doodaii' wáin, doodaii' yidlą́ bitsxe'ii éí Bóhólníihii nihiDiyin God binááł niha'áłchíní bił nihił nidahoozhǫǫhgo nídaahdį́įh doo.

²⁷Líívai dine'é nihił kééhat'ínígíí t'ááká yóó'adadooh'ááł lágo, háálá éí nihíí' dooleełii doo bił ałts'ą́ą́' da'nołk'iiz da.

²⁸Táá' náhááh góne' nínádanołt'į́įhii t'áá át'é bits'ą́ą́dóó neeznáá daníjaa'ígíí éí t'ááłá'ígo shijaa' t'áá éí yihahígíí binih nihikin hadaas'áá góne' nooh ná'áchíihgi hasht'e'nidahohnííł.

²⁹Áko nihíí' dooleełii Líívai dine'é doo bił ałts'ą́ą́' da'nołk'iizii áádóó dé'éyóní áádóó áłchíní bizhé'é ádaadinii índa asdzání bąąh áhásdįįdii nihikintahgi nihił kéédahat'íinii nídaakahgo nihił nída'adį́įhgo hwiih nídaadleeh doo; ákódaoht'į́įgo Bóhólníihii nihiDiyin God éí naanish baa nidaahkaígíí t'áá ałtso yił nihik'ijidlíi doo.