Read Navajo DEUTERONOMY 15 Bible Online

DEUTERONOMY 15 - Navajo bible

DEUTERONOMY 15

¹Tsosts'id náhááh góne' ąąh hadasooł' áhígíí t'óó bik'indadi'yohzóoh dooleeł.

²Ąąh háá'á bik'ińda'deesdzooígíí kót'éego bee haz'ą́ą doo: t'áá háiida bił kééhojit'íinii bąąh hajííł'áhígíí t'óó bá bik'inízdoozoh. Bił kééhojit'íinii, doodaii' hak'is bąąh hajííł'áhígíí doo bee bizhdiilkaal da doo, háálá Bóhólníihii ąąh háá'á t'óó aa hidit'aahgo yee nihoní'ą́.

³Doo Ízrel dine'é nilíinii t'áá nich'į' niná'doodléełgo bee bidinilkaal doo, nidi Ízrel dine'é nilíinii bąąh háíníł'áhígíí t'óó bá bik'ińdíízoh.

⁴Áko nihitahgi doo ła'da bahojoobá'í da doo, háálá Bóhólníihii nihiDiyin God nilíinii kéyah nihíí' dadooleełgo nihaidiní'ánígíí biyi' Bóhólníihii t'áá íiyisí nihik'ijidlíi doo.

⁵Bóhólníihii nihiDiyin God hazhó'ó biinéé' deísółts'ą́ą'go díí bik'eh ó'oo'níiłii t'áá át'é bee nihich'į' haasdziihígíí ádaa dasoosįįdgo t'éiyá nihik'ijidlíi doo.

⁶Áko Bóhólníihii nihiDiyin God yee nihoní'áanii bik'ehgo nihik'ijidlíi doo, áádóó ał'ąą ana'í t'óó ahayóígíí bich'į' béeso a'iiníiłii danohłį́į doo, nidi bí éí doo nihada'iiníił da doo, índa ał'ąą ana'í t'óó ahayóígíí bindanoht'áa doo, nidi bí éí doo nihindant'áa da dooleeł.

⁷Nihitahgóó té'é'į́ yik'ee naagháii nihik'isóó danilíinii ła' nilį́įgo, éí nihikéyah Bóhólníihii nihiDiyin God nihaidiní'ánígi nihikin hadaas'áagi łahgo kééhat'į́įgo doo bich'į' nihijéí doołtł'is da, doodaii' doo t'óó bídadínóołyęsh da.

⁸Nidi bich'į' nihił dahadlee'go yídin nilínígíí bíighahgo béeso baa nída'ohniłgo bił yá'át'éeh doo.

⁹T'ááká yíila' nihijéí bee nichxǫ́'ígo tsídóhkeesgo kódóhniih lágo, Tsosts'id náhááh góne' ąąh háá'á bik'ińda'didzóóh baa nááhoolzhíísh. Áko nihik'is té'é'į́ nilį́įgo t'óó nabídanołyęęshgo áádóó doo t'áá k'ad bada'sooláágóó t'óó nihik'ijį' nilį́įgo Bóhólníihii yíká áníi doo, índa bí biniinaa ádił da'soołziih doo.

¹⁰T'áádóo nídí bich'į' nihił dahadlee' áádóó bich'į' danihíłtłeehígíí t'áadoo bik'édí danohłíní; ákódaoht'į́įgo Bóhólníihii nihiDiyin God nihinaanish nilíinii índa t'áá ádaohłíłígíí t'áá ałtso yił nihik'ijidlíi doo.

¹¹Háálá kéyahgi badahojoobá'íígíí áłahjį' nihił dahólǫ́ǫ doo; éí bąą díí nihich'į' bee haasdziihgo kódíshní, Nihik'isóó danilíinii badahojoobá'íii áádóó hojooba' nahas'áanii nihikéyahgi nidaakaígíí bich'į' nihił dahadlee' doo.

¹²Áádóó nihidine'é éí Hííbrew dine'é nilį́įgo hastiin, doodaii' asdzánída nihinaalte' danilį́į doo biniyé nihich'į' nidabi'diiniihgo hastą́ą́h nínáhahjį' nihá ninádaal'aah doo, nidi tsosts'id náhááh góne' béédahidohchíid doo.

¹³Áko t'áadoo át'éhígóó béédahidohchíidgo t'áá ákohígo t'áadoo bééda'ayołnéhí.

¹⁴Nihidibé danihíłtłeehgo ła' bá ats'ádadoohnił, áádóó tł'oh naadą́ą́' haaltséedii ła' baa dadoohjih, índa ch'il na'atł'o'ii yishjizhgo bąąh haa'nii'ii ła' baa dadoohsił. Bóhólníihii nihiDiyin God nihik'idajisdli'ígi át'éego baa dajiidoohbaał.

¹⁵Ííjip kéyahdi naalte' danohłį́į́ nít'éé' yę́ę nibéédahołníih dooleeł, áko Bóhólníihii nihiDiyin God náánihiisnii'go nihik'é niná'ídláago bąą díí jį́ díí kódaat'éhígíí nihich'į' bee haasdziih.

¹⁶Kóhodoonííł: bí ánihididooniiłgo, Doo nihits'ą́ą́' dah dideesháał da, háálá ayóó'ánihó'ní áádóó na'áłchíní ayóó'áyó'ní índa niha'ałk'ee bił yá'áhoot'ééh.

¹⁷Tsah nitsaazii bee dáádílkał bik'ijį' bijaa' bigháda'doohtsih, áádóó náásgóó nihá naal'a' doo, índa asdzání nihinaalte'ii ałdó' t'áá ákódadoohłííł.

¹⁸Nidi doo nihá nantł'agóó nihinaalte' nihits'ą́ą́' dah nídidoodááł, háálá ílį́įgo adeenáago naalnishii biláahgo ahą́ą́h nániiláago naalnishgo hastą́ą́h nááhai, áko Bóhólníihii nihiDiyin God éí nihindaanish t'áá át'é yik'ijidlíi doo.

¹⁹Nihilį́į́' biką'ii alą́ąjį' nidahachíhígíí éí Bóhólníihii nihiDiyin God bich'į' dílzingo ádadoohłííł; béégashii biką'ii alą́ąjį' nidahachíhígíí doo bee nihoyíłdlaad da doo, índa dibéką'ii alą́ąjį' nidahachíhígíí doo tánídadohgish da doo.

²⁰Bóhólníihii nihiDiyin God binááł t'áá nináhááh bik'eh nída'ohdį́įh doogo Bóhólníihii náhodidoo'áałgi nihí índa nihada'áłchíní bił ákódaaht'į́į doo.

²¹Áádóó ha'át'éegoda alį́į́' bąąh dahaz'ą́ągo na'niłhodgoda, doodaii' doo oo'į́įgoda, doodaii' yéego bąąh dahaz'ą́ągoda éí t'ááká Bóhólníihii nihiDiyin God bich'į' náádahołniih yíila'.

²²Nidi t'áá danihiníghanídi dadoohsį́į́ł, doo bi'didéehii áádóó bi'didéehii éí jádí bitsį' áádóó bįįh bitsį' yidánígi át'éego deiyą́ą doo.

²³T'áá hazhó'ó bidił t'éí t'áadoo daohsání; łeeshtahjį' tó yaadzídígi át'éego ni'jį' yadahoohsíid doo.