Read Navajo DEUTERONOMY 17 Bible Online

DEUTERONOMY 17 - Navajo bible

DEUTERONOMY 17

¹Áádóó dóola índa dibé tídadiilyaii, doodaii' doo hadaałt'éii Bóhólníihii nihiDiyin God bich'į' doo náádahidoołnih da, háálá Bóhólníihii nihiDiyin God éí doo yíłdinii át'é.

²Nihikin hadaas'áágóó nihitahgi Bóhólníihii nihiDiyin God nihaa hodiní'ánígi diné, doodaii' asdzánída Bóhólníihii nihiDiyin God binááł doo yá'áshónígi ádziidzaago bibee aha'deet'áanii k'ízhdootihgo

³éí diyin dabidi'níinii yá naal'a'go áádóó yich'į' nahałáago, azhą́ jį́honaa'éí, doodaii' tł'éhonaa'éí, doodaii' yá biyi' hiníláii éí doo bich'į' nahodoodlaałgóó bee haasdzíi'ii

⁴áádóó bee nihił hóóne'go baa dahosidoots'ą́ą'go haleebee bínda'ídóołkid; jó, t'áá aaníí át'é áádóó t'áádóo nídí Ízrel dine'é bitahgi ts' ídá doo haldinígi áhóót'įįdgo

⁵diné, doodaii' asdzánída éí doo yá'áshóonii yaa naayáhígíí kéédahoht'į́į́dóó dáń'dítį́hí góne' diné, doodaii' asdzánída ch'ídadoohłóosgo tsé bee bił nidazdoołniił.

⁶Oo'íinii nidilt'é, doodaii' tált'éego dahalne'go t'éiyá ajisiihii há nihoot'ánígíí hoł nizdoolniił; oo'íinii t'ááłá'í halne'go éí doo hoł nizdoolniił da.

⁷Oo'íinii dajílíinii alą́ąjį' áádóó índa diné náánáła'ígíí t'áá ałtso tsé yee hoł nidazdoołniił. Ákót'éego nihitahdóó doo yá'áshóonii nahjį' kódaał'į́į doo.

⁸Aa hwiinít'į́įgi baa saad hólóonii aláahgo nihá nantł'ago, éí t'áá ákójínéehgo, doodaii' doo t'áá ákójínééhgóó diné jiisxíinii, doodaii' ałgha'dit'áahgo bá baa náhát'íinii, doodaii' atí'ahil'íinii kééhoht'į́įgi baa ałgha'dit'ááh hólóonii nihá nantł'ago, Bóhólníihii nihiDiyin God náhodii'áníjį' doohkah,

⁹áádóó éí yoołkáałdi náá'iiłniihii Líívai dine'é nilíinii, doodaii' ánihwii'aahii nilíinii baa doohkahgo nideídídóołkił, haash yit'éego á nihodoot'áłígíí nihił ííshjání ádeidoolííł.

¹⁰Yee nidahodiiz'ánígíí bik'ehgo ádanoht'ée dooleeł; éí Bóhólníihii nihiDiyin God náhodidoo'áłídóó nihich'į' ííshją́ą́ ádeidoolíłígíí t'áá ałtso ádaa dadoohsįįł.

¹¹Bee haz'áanii bik'ehgo yee nihodii'aahígíí yíndanihiniłtingo áádóó bik'ehgo ándahwii'aahígíí yee nihił dahalne'go bik'eh ádanoht'é; yee nidahodiiz'áanii nihił ííshją́ą́ ádeidoolíłígíí t'ááká nish'náajigo, doodaii' nishtł'ajigo bits'ą́ąjį' ádanoht'é yíila'.

¹²Diné t'áá bí aghá'ádool'áii, éí Bóhólníihii nihiDiyin God binááł náá'iiłniihii naal'a'go ahidíízínígíí, doodaii' ánihwii'aahii doo jíists'ą́ą́'góó éí t'óó dazdootsaał. Ákót'éego Ízrel dine'é bitahdóó doo yá'áshóonii nahjį' kódaał'į́į doo.

¹³Áko diné t'áá ałtso dadi'doots'į́į́ł áádóó dahodísin doo índa diné doo ła' t'áá bí t'éí aghá'ínáá'dool'áa da doo.

¹⁴Áko Bóhólníihii nihiDiyin God nilíinii kéyah nihaidiní'ánígíí biih woonáago ádíí' ádaahłaa áádóó ákwii kééhoht'į́įgo ádadidoohniił, Shinaagóó ał'ąą ana'í ádaat'éhígi át'éego aláahgo naat'áanii ła' shinant'áago ádeeshłííł.

¹⁵T'áá aaníí aláahgo naat'áanii nihinant'áa doo biniyé Bóhólníihii nihiDiyin God néididoołtéełii nídadidoołtééł; nihik'isóó bitahdę́ę́' aláahgo naat'áanii nihinant'áa dooleełii nidadoołtééł; dé'éyóní doo nihinant'á biniyé nídadidoołtéeł da; jó, éí doo nihik'is nilį́į da.

¹⁶Nidi łį́į́' doo ádá néidínóołt'į́įł da, doo nidi bidine'é éí Ííjip kéyah góyaa doo yíká i'dooł'aał da, éí łį́į́' néidínóołt'į́į́ł biniyé, háálá Bóhólníihii nihich'į' yee haadzíi'go ádííniid, Doo ákǫ́ǫ́ nát'ą́ą́' nihééhidoohkah da.

¹⁷Doodaii' doo t'óó ahayóí be'asdzą́ą da doo, áko Bóhólníihii doo yits'ádoogáał da áádóó béésh łigaii índa óola doo t' óó ahayóí ádá íidoolíił da.

¹⁸Áko kót'ée doo: aláahgo bee bóhólníihgo bił haz'ą́ągi bibikáá'dóó nahat'áii yikáá' dah neezdáago Líívai dine'é nááda'iiłniihii bidáahgi naaltsoos si'ánígíí biyi'dóó bee haz'áanii náánáłahjį' naaltsoos ałch'į' yisdisii bikáá' yee ádá yik'i náá'doolchííł.

¹⁹Áádóó éí nei'áago ni'níłdįįd bijį́įjį' t'áá ákwíí jį́ yółta' doo, áko Bóhólníihii t'áá bí biDiyin God nilį́įgo yidósingo yíhooł'aah doo índa díí saad t'áá ałtso bik'ehgo bee haz'áanii áádóó yee nihwiiz'áanii yik'eh hół'į́įgo yé'éł'į́į doo.

²⁰Áádóó bik'isóó danilíinii doo yiláahgo í'dólzin da doo, índa bik'eh ó'oo'níiłii bits'ą́ąjį' nish'náajigo, doodaii' nishtł'ajigo doo dah didoogáał da, áko Ízrel dine'é bitahgi bí áádóó ba'áłchíní bił aláahgo bee bóhólníihgo bił haz'ą́ągi as'ahgóó abídeidiyoołkááł.