Read Navajo DEUTERONOMY 19 Bible Online

DEUTERONOMY 19 - Navajo bible

DEUTERONOMY 19

¹Bóhólníihii nihiDiyin God éí ał'ąą ana'í ałtso íísdįįdgo, bikédaayah Bóhólníihii nihiDiyin God nihaidiní'ą́ągo, nihíí' ádadoohłííł áádóó bikin hadaas'áhígóó índa dabikin bii' kéédahoht'į́į doo.

²Kin hadaas'áhígíí nihikédaayahgi táa'go kin haal'áii t'áá nihí ádá nidadidooh'ááł; éí kédaayah Bóhólníihii nihiDiyin God nihaidiní'ánígíí ádíí' ádadoohłííł.

³Éí kin haal'áii bich'į' adahwiizt'i'go ádahodoohłííł áádóó nihikédaayah ahádahidoohsohgo, éí Bóhólníihii nihiDiyin God nihaidiní'ánígíí ádíí' ádadoohłíiłgo táá'góó ałts'ádadoohsoh, áko diné yiyiisxíinii áajį' yisdádahinichéeh doo.

⁴Kót'éego diné yiyiisxíinii yisdádínóochéełgo hináa doo: t'áá háiida yił kééhat'íinii doo t'áá ákwíílééhgóó yiyiisxį́įgo doo yik'ee diniihgóó bá át'é.

⁵Diné ła' tsin yidootsił biniyé yił kééhat'íinii tsintahgóó yił dah dii'áazhgo áádóó tsin k'íyiyiiłne'go tsénił yee atseełígíí baa diiltáalgo yił kééhat'íinii bístałgo daaztsą́ągo, hó éí ła' kin haal'áhíjį' azhdínóochéełgo jiináa doo.

⁶Doodaii' éí diné jiisxínígíí dił bąąh háálį́ ájiilaii biniinaa bik'éí k'ééhodidoodlíłígíí bił hodoochxih áádóó hódoolwoł; jó, yisdázhdínóochéłígóó há doo deeghání dago biniinaa hodiyoołhééł, azhą́ biniinaa hodi'yoolyéłígíí doo bą́ą́h ílį́į da nidi, áádóó doo bik'eezhdiniihgóó hoolzhiizh da nít'éé' nidi hodiyoołhééł.

⁷Éí bąą díí nihich'į' bee haasdzíi'go ánihidííniid, Táa'go kin haal'á nídahodidooh'ááł.

⁸Bóhólníihii nihiDiyin God éí kéyah hótsaago nihá yínéidoozohgo, jó, ákót'éego danihizhé'é yę́ę yich'į' yee ádee hadoodzíí' áádóó éí kéyah t'áá át'é nihaididoo'áałgo, danihizhé'é yę́ę yich'į' yee ádee hadoodzíí'

⁹áádóó díí bik'eh ó'oo'níiłii t'áá át'é díí jį́ nihich'į' bee haasdziihígíí bik'eh ádanoht'éego áádóó Bóhólníihii nihiDiyin God ayóó'ádeínóh'níigo índa t'áá áłahjį' bibik'eh honít'i'ii bik'ehgo deínóhkáahgo kódanoht'éego t'éiyá táa'go kin haal'áhígíí táa'go ádá ła' bínáádeidoohnił.

¹⁰Áko diné doo ádihodiilt'i'ii doo bidił bits'ánílį́įgo ádoohłíiłgo diyoołhéeł da; jó, nihikéyah bikáa'gi Bóhólníihii nihiDiyin God éí kéyah ádíí' ádadoohłíiłgo nihaidiní'ą́, áko bidił doo bee ádidahodidoołt'ih da.

¹¹Nidi diné ła'da yił kééhat'íinii yik'ee deeznihgo áádóó yaa niheedzáago áádóó yił adoodiłgo yił niizníłhaalgo índa bí t'éí díí ła' kin haal'áajį' adínóochéełgo,

¹²áko hakin haal'áhídóó hastóí aląąjį' naazíinii háká ida'dooł'aałgo nihodi'doodlóós áádóó dił biniinaa k'ééhodidléehii yaa dahodidoo'áałgo hodiyoołhééł.

¹³Dooyéí haa a'áhí dadínóohsįįł da nidi diné doo ádihodiilt'i'ii seesyį́įgo bidił bits'ánílį́įgo éí bee ádihodidoot'ihii Ízrel dine'é bitahdóó nahjį' kódaał'į́į doo, áko nihá yá'át'éehgo áhooníił doo.

¹⁴Bił kééhót'íinii bikéyah bikáa'gi tsé adeiztsih yę́ę doo łahgo anáádahidoohtsih da; éí náshiinídą́'ídi danihizhé'é yę́ę kéyah bee bééhózin doo biniyé tsé yee dahodeezo nít'éé'. Jó, Bóhólníihii nihiDiyin God nilíinii kéyah nihíí' dooleełgo nihaidiní'ánígíí ádíí' ádadoohłííł.

¹⁵Oo'íinii t'ááłá'ígo éí, Doo ákwii ájíít'įįd da, doodaii', Ádił adzisiihii bee ádił adzisiih, jiníigo éí doo bik'ehgo diné baa náhódóot'įįł da, nidi oo'íinii naaki, doodaii' táa'dago t'éiyá baa náhódóot'įįł.

¹⁶Ła'da t'áá ádzaagóó diné yide nídiidzáago yik'i hodii'aahgo, Doo yá'áshónígi ájíít'įįd, níigo

¹⁷éí diné t'áá ájíłah saad ahíjít'áhígíí éí Bóhólníihii áádóó nááda'iiłniihii áádóó ándahwii'aahii ákwii hólǫ́ǫgo yoołkáłígíí bidááhdóó nizhdoo'ash.

¹⁸Ándahwii'aahii ts'ídá haleebee nidahodoołkah; jó, hojilne'ígíí t'áá áhoodzaagóó hojilne'go hak'is t'áá ádzaagóó baa hojilne'go hwééhodoozįįł.

¹⁹Áko diné biyooch'íidii kódahodoohłííł: Shik'is ádeeshłííł, dzinízin yę́ęgi át'éego, jó, hóda ákódahodoohłííł; kót'éego nihitahdóó doo yá'áshóonii nahjį' kódaał'į́į doo.

²⁰Áádóó t'áá ákǫ́ǫ́ kéédahojit'ínígíí éí da'dzíists'ą́ą' doo índa hoł daayée' doo, áko kodóó nihitahgi doo yá'áshóonii doo ła' ánáádazhdoodlíił da.

²¹Dooyéí haa a'áhí dadínóohsįįł da; iiná hąąh yiz'įįdii iiná bąąh nídoot'įįł, bináá' atíjiilaago hanáá' atínídoolnííł, biwoo' atíjiilaago hawoo' atínídoolnííł, bíla' atíjiilaago hála' atínídoolnííł, bikee' atíjiilaago hakee' atínídoolnííł.