Read Navajo DEUTERONOMY 2 Bible Online

DEUTERONOMY 2 - Navajo bible

DEUTERONOMY 2

¹Naanísiikai áádóó Tónteel Łichíí' bich'į'go honoojíígóó dah dii'ná, Bóhólníihii áshidííniidígíí bik'ehgo, áko Dził Síyer hoolyéii binéi'néełgo lą'í yiską́.

²Nít'éé' Bóhólníihii shich'į' haadzíi'go ání,

³Díí dził binááhnéełgo nízaadgóó ahoolzhiizh; k'ad náhookǫsjigo dah doohnééh.

⁴Áádóó diné bich'į' handziihgo ábidiní, Nihik'isóó danilíinii Íísa dine'é éí Síyergi kéédahat'ínígíí bíighahgóó ch'ínóhnéehgo nihéédadooldzííł; éí bąą hazhó'ó ádaa dahonohsą́.

⁵T'áadoo bił na'ahíyádaałti'í; jó, bikéyah doo ła' nihaa dideesh'áał da; t'ááłá'í adées'eez bíighahgo nidi dooda, háálá Íísa dine'é éí Dził Síyer hoolyéhígi bíí' dadooleełgo baa hodiní'ą́.

⁶Béeso bee ch'iyáán baa nidahołniihgo dabinołkiin doo, áádóó ałdó' béeso bee éí tó doodlį́įłii baa nidahołniihgo daahdlą́ą doo.

⁷Háálá Bóhólníihii nihiDiyin God éí baa nidasoohkaígíí t'áá át'é yik'ijisdli', áádóó díí ayóó át'é honoojí biyi' wohnéełgo bił bééhózin; nihił hólǫ́ǫgo dízdiin nááhai; t'áadoo bídin danohłínígóó hoolzhiizh.

⁸Áádóó nihik'isóó danilíinii Íísa dine'é éí Dził Síyergi kéédahat'į́įgo bíighah ch'ínii'náago halgaigóó atiinígíí dah dii'ná áádóó Íílathgi kin haal'áhígíí índa Ííziyan-gííbergi kin haal'áhígíí bik'ee'ąą ahéénii'náago Mó'ab kéyah honoojíí góne' ii'ná.

⁹Áko Bóhólníihii áshidííniid, Mó'ab dine'é bich'į' dahodiyółnááł lágo, áádóó doo bik'iidoohjah da; éí bikédaayah doo nihaa dideesh'áał da, háálá Ar hoolyéegi Lat ba'áłchíní ahii' háá'ahiyoolchíiłii kéyah baa diní'ą́.

¹⁰Ákwii Íímim dine'é kéédahat'į́į́ nít'éé'; éí diné ayóó ádaat'éii áádóó t' óó adahayóí nít'éé' índa Ánakim dine'égi ádaníłnééz nít'éé'.

¹¹Éí Ánakim dine'égi át'éego ałdó' yé'iitsoh dabidi'níí nít'éé', nidi Mó'ab dine'é éí Íímim dine'é deiłníí nít'éé'.

¹²Hórim dine'é ałdó' bítséedi Dził Síyergi kéédahat'į́į́ nít'éé', nidi Íísa dine'é haghadahodeest'ą́ągo t'óó ádahasdįįd; ákwii kéédahojit'į́į́ nít'éé' yę́ęgi bighan ádahoolaa; Ízrel dine'é dajílíinii Bóhólníihii éí kéyah haidiní'ą́ągo hóó' daazlį́'ígi át'éego kéyah bíí' daazlį́į́'.

¹³K'ad tį', Zííred yíldzis góyaa tó nílínígíí ha'naa ninohnééh, dííniid, áko Zííred yíldzis góyaa tó nílínígi ha'naa ninii'ná.

¹⁴Kéídesh-barníya hoolyéédóó dah dii'náago Zííred yíldzis góyaa tó nílínígóó t'áá yii'néełgo tádiindóó ba'aan tseebíí nááhai. Oonéłígíí bitahgi diné nidaabaahii ałtso daneeznáajį' díigi át'éego naasdee'; Bóhólníihii ábidííniidígi ádahoodzaa.

¹⁵Háálá t'áá aaníí Bóhólníihii bik'ijį' nilį́įgo oonéłígíí bitahgi diné nidaabaahii ánábíłdįįhgo ałtso ábísdįįdjį' ákónábiil'įįh nít'éé'.

¹⁶Kódzaago Ízrel dine'é bitahgi diné nidaabaahii ádabi'disdįįdgo ałtso daneeznáago

¹⁷Bóhólníihii kóníigo shich'į' haadzíí',

¹⁸Díí jį́ Ar hoolyéhíjį' ha'naa ninohnééh; éí Mó'ab kéyah bibąąhgóó áhoolyé.

¹⁹Ámon dine'é bit'áahjį' oonáago bich'į' dahodiyółnááł lágo, áádóó t'áadoo bił na'ahíyádaałti'í; jó, Ámon dine'é bikéyah doo t'áá k'ad nihíí' íishłaa da, háálá éí Lat ba'áłchíní náás ahoolchíiłii bíí' dadooleełgo baa diní'ą́.

²⁰(Éí ałdó' yé'iitsoh bikéyahgo bá yáti' nít'éé'. Ałk'idą́ą́' ákwii yé'iitsoh kéédahat'į́į́ nít'éé'. Ámon dine'é bizaad k'ehgo yé'iitsoh Zamzámim deiłníí nít'éé';

²¹éí diné ayóoda ádaat'éii áádóó t'óó adahayóí nít'éé' índa Ánakim dine'égi ádaníłnééz nít'éé', nidi Ámon dine'é nilíinii dabinááł Bóhólníihii ábísdįįdgo yighadahodeest'ą́ągo kéédahat'į́į́ nít'éé' yę́ęgóó bighan ádahoolaa.

²²T'áá ákót'éego Bóhólníihii éí Íísa ba'áłchíní náás ahoolchíiłii Síyergi kéédahat'ínígíí dabinááł Hórai dine'é íísdįįd. Áko yighadahodeest'ą́ągo díí jį́į́góó ákwii dabighan.

²³Áádóó Éívim dine'é éí Hazíírim hoolyéegi kin dah naazhjaa'góó, t'áá Géíza kin haal'áajį' kéédahat'į́į́ nít'éé'. Éí Káftor hoolyéédę́ę́' Káftor dine'é danilíinii ádabisdįįdgo kéédahat'į́į́ nít'éé' yę́ęgóó dabighan ádahoolaa.)

²⁴Hasht'e'ádadołnéehgo Árnan tooh nílínígíí ha'naa ninohnééh; jó, Héshban kin haal'áádóó aláahgo naat'áanii Ámor dine'é nilíinii Sáíhan wolyéii bikéyah t'áá bił nihaa diní'ą́; k'ad nihíí' ádaohłééh, áádóó bich'į' anaa' danohdzin doo.

²⁵Díí jį́ nihits'á dahazyée'go áádóó yádiłhił biyaagi ał'ąą dine'é nihik'ee bił daayée'go ádeeshłííł, áádóó nihaa dahodiits'a'go nihik'ee bitah dahoditłid doo, índa nihiniinaa yínííł yik'ee ti'dahooníih doo.

²⁶Áko honoojí Kédiimath hoolyéhídóó dah adiił'a'go éí Héshban kin haal'áádóó aláahgo naat'áanii Sáíhan wolyéii bich'į' saad bee k'é wósh'níinii bił i'ííł'a'go ádíshní,

²⁷Nikéyah bikáá' atiingóó hadiishnéehgo nish'náajigo, doodaii' nishtł'ajigo t'áadoo haashnéhí nikéyahgóó hadideeshnéłígíí bee shadi'ní'aah.

²⁸Béeso bee ch'iyáán naa nahashniihgo éí yishą́ą doo. Béeso bee tó naa nahashniihgo éí yishdlą́ą doo. Áko t'áá ni' ákǫ́ǫ́ hadideeshnéłígíí bee shadi'ní'aah.

²⁹Íísa ba'áłchíní náás ahoolchíiłii Síyergi kéédahat'ínígíí índa Mó'ab dine' é danilíinii Ar hoolyéegi kéédahat'ínígíí ádashiilaaígi át'éego Jórdan tooh ha'naadi Bóhólníihii nihiDiyin God kéyah nihaidiní'ánígíí biih yii'náajį', ni ałdó' shadi'díí'ááł.

³⁰Nidi Héshban kin haal'áádóó aláahgo naat'áanii Sáíhan wolyéii bíighahgóó ch'ídii'néłígíí t'áadoo yee nihadi'ní'ą́ą da. Háálá Bóhólníihii nihiDiyin God éí háni' yiyííłtł'is áádóó hajéí doo biníhóó'áágóó áhoolaa. Nihílák'ee hodidoo'áłígíí biniyé doo ájóne' át'éégóó díísh jį́į́góó ákóhósin.

³¹Nít'éé' Bóhólníihii áshidííniid, Jó, Sáíhan wolyéii áádóó bikéyah nihaa hodinish'aah; ádíí' ádaohłééh áádóó bikéyah íí' dooleełii danihíí' dooleeł.

³²Áko Sáíhan wolyéii áádóó bidine'é yił nihik'ijį' nídadiibaa'go Jéíhazgi nihik'iijéé'.

³³Áádóó Bóhólníihii nihiDiyin God nihich'į' ho'níłnii'go hó áádóó haye'ké índa hodine'é ałtso bił ádahosiildįįd.

³⁴Áko íídą́ą́' hakin hadaas'áhígíí ałtso dasiilná, áádóó t'áá hakin hadaas'áhígi hastóí áádóó sáanii índa áłchíní ałtso ádahosiildįįd. T'ááłá'í nidi doo ła' jidziihgóó ádahwiilyaa.

³⁵T'áá hazhó'ó alį́į́' dooígíí t'éiyá ádá áádasiilzįįd, áádóó kin hadaas'áhígíí naalye'é bąąh da'oogą́ą'ii ádá nídahaadláá'.

³⁶Aró'er hoolyéego kin haal'áhídóó éí Árnan tooh bidáa'jį' áádóó tooh bibąąhgóó kin haal'áhídóó t'áá Gíliyadjį' łahgo nahontł'ago kin haal'áii nihá ádingo nii'ná, háálá Bóhólníihii nihiDiyin God éí t'áá ałtso yee nihadi'yii'aahgo ákódeiidzaa.

³⁷Áádóó Ámon dine'é dabikéyah t'éiyá t'áadoo baa nii'náa da, doodaii' Jábak tooh bibąąhgóó, doodaii' daadziłdi kin hadaas'áhígóó, doodaii' Bóhólníihii nihiDiyin God t' ááká ákǫ́ǫ́ dóoya' lágo, nihiłnínígóó t'áadoo tádadii'náa da.