Read Navajo DEUTERONOMY 21 Bible Online

DEUTERONOMY 21 - Navajo bible

DEUTERONOMY 21

¹Ła' kéyahgi ho'diisyį́įgo éí Bóhólníihii nihiDiyin God éí kéyah nihaidiní'ánígíí ádíí' ádadoohłíiłii bikáa'gi dzígaidi dziztį́įgo ła'da hak'íníyáago, nidi diné hwiisxíinii doo bééhózingóó,

²áko nihadahastóí aląąjį' naazíinii áádóó ándahwii'aahii nidahidookahgo ho'diisyíinii dziztínídóó kin hadaas'áhíjį' yídadí'nóoł'ąął.

³Áádóó kót'ée doo: kin haal'áhídóó áhánígi ho'diisyį́įgo kin haal'áhídóó hastóí aląąjį' naazíinii éí béégashiitsa'ii ániid naagháhígíí t'ah doo bee adiníishii áádóó t'ah doo bizéédéetįįhgo bee adiníishii ła' nídeididoolóós.

⁴Áádóó kin haal'áádóó hastóí aląąjį' naazíinii éí ch'íldzis góyaa tó nílínígi doo nináhwiidla'ígi áádóó doo k'éédílyéhígi béégashiitsa'ii nideidoolóosgo bik'os k'ídeidootih.

⁵Áko Líívai dine'é biye'ké nááda'iiłniihii yich'į' nidookah, háálá Bóhólníihii nihiDiyin God nábidiinilgo nidaal'a' áádóó Bóhólníihii bízhi' bee ak'ihojidlí yee yádaałti'; yee hadahadziihígíí yee ałgha'dit'áhígíí áádóó atí'ahe'el'ínígíí t'áá át'é hasht' éédayoodlííł.

⁶Kin haal'áádóó hastóí aląąjį' naazíinii t'áá ałtso bił haz'ánídóó áhą́dígi diné bi'diisyį́įgo éí ch'íldzis góyaa béégashii bik'os k'ídeizti'ígíí bik'ijį' bíla' táádeidoogis.

⁷Áádóó ándadidoo'niiłgo ádadidooniił, Díí diné bidił doo bits'ánílį́įgo ádeiilyaa da, doo nidi nihinááł áhóót'įįd da.

⁸Bóhólníihii nílíinii, nidine'é Ízrel nilíinii t'ą́ą́' nááhíníłnii'ígíí baa a'áhí niizįįh áádóó t'áadoo biniinaanígóó diné bidił deezna'ígíí nidine'é Ízrel nilíinii t'áadoo bik'ijį' síníł'ání. Áko díí diné bidił bąąh háána'ígíí doo bee ła'da bik'íhát'áah da doo.

⁹Kót'éego t'áadoo baanígóó nihiníi'gi diné dił bits'ánílį́įgo ádaalne'ígíí nahjį' nidahidoh'aah; Bóhólníihii binááł ts'ídá t'áá ákóne' ádaaht'į́į dooleeł.

¹⁰Áko nihi'ana'í bik'iiojée'go áádóó Bóhólníihii nihiDiyin God nihílák'ee bidíí'ą́ągo índa yisnááh ádaahłaago

¹¹áádóó dasoołnánígíí bitahgi asdzání ła' ayóó ánóolninii hadííníl'į́į'go áádóó bidáahjį' sínílį́į'go, Éí she'asdzą́ą́ ádeeshłííł, nínízingo,

¹²áko nighangóó bił nídíít'ashgo áadi bitsii' yik'iidooshih áádóó bíláshgaan yidiyoogish.

¹³Áádóó bi'éé' yii' sitį́įgo bi'disnánígíí haididoo'niłgo nighangi sidáa doo, áádóó t'ááłá'í nídeezidjį' bimá áádóó bizhé'é yaa atínídindleeh doo, áádóó bik'ijį' bá'dííyehgo bahastiin dííleeł, índa bí éí ne'asdzą́ą dooleeł.

¹⁴Áko kót'ée doo: doo baa nił hózhǫ́ǫ́góó bíni'dii béé'dííłnihgo t'áá bí nízingóó adoogááł, nidi béeso doo bee nahidiyííłnih da, doo hwee adíít'įįł da, háálá bidáníínílnihgo ne'asdzą́ą́ íinilaa nít'éé'.

¹⁵Diné ła'da hwe'asdzą́ą́ naakigo ła' ayóó'ájó'níigo áádóó ła' jijoołáago, áko ayóó'ájó'nínígíí áádóó jijoołáhígíí t'áá áłah há ashchį́įgo áádóó haye' alą́ąjį' há yizhchíinii éí jijoołáhígíí biyáázh nilį́įgo,

¹⁶áko kót'ée doo: hwee hólóonii haye'ké baazhdee'aahgo ayóó'ájó'nínígíí biyáázh doo átsé baazhdidoo'áał da, háálá jijoołáhígíí biyáázh t'áá aaníí alą́ąjį' yizhchíinii nilį́.

¹⁷Nidi hwe'asdzą́ą́ jijoołáhígíí biyáázh alą́ąjį' há yizhchíinii baa ákoznízingo hwee hólóonii t'áá át'é naakidi ahą́ą́h nániiláago baazhdidoo'ááł, háálá bitsxe'ii bineest'ą' bee deezt'i'ii nilį́; alą́ąjį' bi'dizhchíinii nilį́įgo bíi'ii bíí' dooleełgo bee bá haz'ą́.

¹⁸Diné ła' haye' bízhą́'ílį́įgo áádóó naalteehgo índa bizhé'é, doodaii' bimá bizaad doo yik'eh hół'į́į́góó, áko nít'éé' bich'anáhojishkeeh, nidi doo hwíists'ą́ą́'góó

¹⁹bizhé'é áádóó bimá éí kin haal'áagi kééhat'į́įgi hastóí aląąjį' naazíinii yah a'atiiníjį' yich'į' niidoolóós.

²⁰Áko kin haal'áádóó hastóí aląąjį' naazíinii áyididooniił, Díí nihiyázhí bízhą́'ílį́ áádóó naalteehii nilį́ índa doo nihik'eh hół'į́į́góó dibidii áádóó adláanii nilį́.

²¹Áádóó kin haal'áagi kééhat'ínídóó diné danilíinii t'áá ałtso tsé yee hoł nidazdoołniiłgo dazdootsaał; ákót'éego nihitahdóó doo yá'áshóonii nahjį' kódaoł'į́į doo, áko Ízrel dine'é t'áá ałtso da'íists'ą́ą'go bił daayée' doo.

²²Áádóó diné ła'da ádił asiihgo aniné yą́ą́h nilį́ í'diilyaago, áádóó bidi'yoolyéełgo tsin bąąhjį' dabidi'doodlohgo

²³éí bits'íís doo tł'éé' bíighah dah hidíłtį́į da doo, nidi t'áá éí bijį́ yóó'ábidi'doolnííł, háálá dah bi'diidlo'ígíí éí Diyin God hóyée'jį' bá haadzí'ígíí át'é, áko Bóhólníihii nihiDiyin God éí kéyah nihaidiní'ánígíí ádíí' ádadoohłíiłii doo dadoołchxǫǫł da.