Read Navajo DEUTERONOMY 22 Bible Online

DEUTERONOMY 22 - Navajo bible

DEUTERONOMY 22

¹Nikwá'ásiní bibéégashii, doodaii' bidibéda yóó'ííyáhígíí yiniłtsą́ągo doo t'óó dínííł'įįł da; t'áá ha'át'éegoda nikwá'ásiní bich'į' nát'ą́ą́' kónídíídlííł.

²Éí bilį́į́' ílíinii doo áhánígi kééhat'į́į́góó, doodaii' doo bééhonísingóó t'áá ni nighangi bá baa áhólyą́ą doo, áádóó bilį́į́' ílíinii bilį́į́' yíká nihidíníitą́ą'jį' bá baa áhólyą́ą doo, áko índa bich'į' kónídíídlííł.

³Áádóó bitélii ałdó' t'áá ákódíílííł áádóó bi'éé' índa nikwá'ásiní t'áadoo le'é yóó'ayiiníłígíí náhíláahgo ałdó' t'áá ákót'éego baa náhí'níił doo, doo éí t'óó dínííł'į́įł da.

⁴Nikwá'ásiní bibéégashii, doodaii' bitéliida atiin bąąhgóó diniite'go doo t'óó dínííł'į́įł da, nidi bíká adíílwołgo bił nídidíídzį́į́s.

⁵Asdzání éí diné bi'éé' doo bee hazhdít'ée da doo, doodaii' diné nidi asdzání bi'éé' doo bii' dziztį́į da doo, háálá ákódajit'ínígíí t'áá ádzíłtso éí Bóhólníihii nihiDiyin God bich'į' t'óó badají'ih.

⁶Tsin bąąhgi, doodaii' ni'góoda at'oh bii' tsídii biyázhí shijée'go, doodaii' biyęęzhii sinilgo, ákohgo amá biyázhí, doodaii' biyęęzhii yik'i sidáago bik'ííníyáago doo t'áá bił nídidíínił da,

⁷nidi amáhígíí ts'ídá béédidííchiłgo ayázhíígíí t'éí nídidíínił, ákónít'į́įgo yá'át'éehgo ná áhooníił doo áádóó as'ahgóó níyoołkáał doo.

⁸Kin ániidíii ádá áníléehgo bikáá'dę́ę́' bibąąhgóó tsé ahéédíítł' į́į́ł, áko áádę́ę́' t'áá háiida doo adah adootłish da, índa dił doo bee ádihodidíílt'ih da.

⁹Ch'il na'atł'o'ii k'idíléego bita'góó náánáła' álástsii' t'ááká bił k'idóólééł lágo, éí ákwíinilaago t'áá áłah bineest'ą' bąąh hazlį́'ígíí yidoołchxǫǫł.

¹⁰T'ááká béégashii áádóó télii yił ahąąh sizį́įgo bee nihoyółdlaad lágo.

¹¹Aghaa' áádóó na'at'ą́hí łigaii dits'idgo bee éé' ályaaígi át'éii doo biih díínáał da.

¹²Nibeeldléí ák'ínáníltihígíí t'áá dį́į́'góó bijánil hólǫ́ǫgo ánéinil'įįh doo.

¹³Diné t'áá háiida be'asdzą́ą́ hazlį́į'go yił biiską́ą́dóó bik'ijį' yijoosłxáa'go,

¹⁴nít'éé' t'áá ádzaagóó yaa halne'go díí asdzání doo ílíinii nahalingo áyiilaago ání, Díí asdzání bił ahaa nisht'áazhgo bił shiiską́ągo, nít'éé' diné bee haleeh nít'ée'go ásh'į́į́ lá.

¹⁵Áko asdzání bizhé'é índa bimá éí asdzání t'ah doo diné bee haleehgóó bee bééhózinii yoołtsosgo kin haal'áagi yah a'atiiníjį' hastóí aląąjį' naazíinii yich'į' doo'ash.

¹⁶Ákohgo asdzání bizhé'é éí hastóí aląąjį' naazíinii áyididooniił, Díí shitsi' éí diné ye'asdzą́ą́ dooleeł biniyé baa níłtį́į́ nít'éé', áko doo yiniizį́į' da.

¹⁷Jó'akon, t'áá ádzaagóó yik'i hodii'ą́ągo kóní, Nitsi' doo bizháán naagháa da lá. Ákondi kǫ́ǫ́ díí shitsi' éí diné bee ádingo bee bééhózinii át'é. Áádóó kin haal'áádóó hastóí aląąjį' naazíinii bidáahjį' éé' bee ééhózinígíí niidoołkał.

¹⁸Áko kin haal'áádóó hastóí aląąjį' naazíinii éí diné nídeidínóołtsxis.

¹⁹Áádóó béésh łigaii shékel wolyéii neeznádiingo ninázhdoodléełgo éí asdzání bizhé'é baa doo'nił, háálá Ízrel dine'é ch'ikę́ę́h yízhí doo ílíinii bee wójíigo ájiilaa. Áádóó hwe'asdzą́ą́ nilį́įgo nizhníłdįįd bijį́įjį' doo yóó'azhdidoo'áał da.

²⁰Nidi díí ch'íhoot'ánígíí t'áá aaníígóó ch'ikę́ę́h t'ah doo diné bee haleehii bee bééhózinii t'áadoo bééhoozingóó

²¹ch'ikę́ę́h éí hazhé'é bighandóó ch'íhodi'doodlóosgo kintahdóó diné danilíinii tsé yee hoł nidazdoołniił, háálá Ízrel dine'é éí hazhé'é bik'éí danilíinii bitahgi baa yáhásinii baa nijiyá; ákót'éego nihitahdóó doo yá'áshóonii nahjį' kódaoł'į́į doo.

²²Diné ła' asdzání bahastiin hólóonii yił shitéezhgo habi'deel'į́į'go, asdzání bił jineezhtézhígíí t'áá bił nahodi'dootsił. Kót'éego Ízrel dine'é bitahdóó doo yá'áshóonii nahjį' kódaoł'į́į doo.

²³Ch'ikę́ę́h éí diné ła' bił ahaazhdoot'ash biniyé bił ahazhdeet'ą́ągo, nít'éé' diné ła' hak'íníyáago hoł neezhtéezhgo,

²⁴éí kin haal'áagi yah a'atiiníjį' nihodi'doot'ishgo tsé yee hoł nidazdoołniił; éí ch'ikę́ę́h kintahgi nijigháa nidi háká i'doolwołígíí t'áadoo bíká hazhdoolghaazhgóó biniinaa hodi'yoolyééł áádóó éí diné bił kééhojit'íinii be'asdzą́ą́ dooleełígíí baa yáhásinígi ájiilaago biniinaa ałdó' hodi'yoolyééł. Kót'éego nihitahdóó doo yá'áshóonii nahjį' kódaoł'į́į doo.

²⁵Nidi ch'ikę́ę́h éí diné ła' bił ahaazhdoot'ashgo bił ahazhdeet'ą́ągo halgaigóó ajííyáago, nít'éé' diné ła' hak'íníyáago hoł ninídéelgo, diné ił nizhnídélígíí t'éiyá hodi'yoolyééł.

²⁶Nidi ch'ikę́ę́h éí doo haada dadoohłíił da; hoł oodzí'ígíí biniinaa hodi'yoolyéełgi doo bą́ą́h ílį́į da; jó, díí áhóót'įįdígíí éí diné bikwá'ásiní yik'iilwodgo yiyiisxínígíí bił ałk'eh,

²⁷háálá halgaidi asdzání naagháago bik'ízhníyá áádóó azhą́ ch'ikę́ę́h bíká adoolwołii ch'ééh yíká dilwosh nít'éé' nidi t'áadoo bíká aalwodí da.

²⁸Diné ła' éí ch'ikę́ę́h t'ah doo diné bee haleehii, éí diné ła' yił ahaa doot'ashgo t'ah doo yił aha'deet'aahii bił nizhnídéelgo áádóó bił jizhtéezhgo ho'diiltsą́ągo

²⁹diné éí ch'ikę́ę́h bił jineezhtézhígíí bizhé'é béésh łigaii shékel wolyéii ashdladiingo baazhdoonił áádóó ch'ikę́ę́h hwe'asdzą́ą́ dooleeł, háálá baa yáhásinígi ájiilaa; nizhníłdįįd bijį́įjį' doo yóó'azhdidoo'áał da.

³⁰Diné ła'da hazhé'é be'asdzą́ą́ doo hwe'asdzą́ą́ ázhdoolíił da, doodaii' hazhé'é be'asdzą́ą́ doo t'áá tsé'édingo ázhdoolíił da.