Read Navajo DEUTERONOMY 23 Bible Online

DEUTERONOMY 23 - Navajo bible

DEUTERONOMY 23

¹Diné ła' bicho' ayęęzhii haa'nilígíí, doodaii' bicho' k'ígizhígíí éí Bóhólníihii baa áłah ná'oodleełgi doo yah adoogáał da.

²Wótashki' éí Bóhólníihii baa áłah ná'oodleełgi doo yah adoogáał da, índa hats'ą́ą́dóó neeznáadi ałk'i ná'ázhchį́įjį' nidi Bóhólníihii bich'į' nahadlá biniyé áłah ná'oodleełjį' doo yah anídaakah da doo.

³Áman dine'é, doodaii' Mó'ab dine'é ła' Bóhólníihii bich'į' nahadlá biniyé áłah ná'oodleełjį' doo yah anídaakah da doo; hats'ą́ą́dóó neeznáadi ałk'i ná'ázhchį́įjį' nidi Bóhólníihii bich'į' nahadlá biniyé áłah ná'oodleełjį' doo yah anídaakahgóó ahóyéel'áa doo.

⁴Háálá noonáádę́ę́' ch'iyáán áádóó tó ts'ídá t'áadoo bee nihíká ajííjée' da; jó, Ííjip kéyahdóó ch'éénohnáádóó wóshdę́ę́' nidi, áádóó Mesopotéímiyagi Pííthordę́ę́' Bíyor biye' Béílam hóyée'jį' nihá hadoodzih biniyé t'óó dadzooskan.

⁵Azhą́ ákódzaa nidi Bóhólníihii nihiDiyin God éí Béílam doo t'áá k'ad yidiizts'ą́ą' da, nidi Bóhólníihii nihiDiyin God éí hóyée'jį' ha'oodzí'ígíí nihá ak'ihojidlí áyiilaa, háálá Bóhólníihii nihiDiyin God ayóó'ánihó'ní.

⁶Bee bił hasht'edahodít'éii áádóó yá'át'éehgo bá áhooníił dooleełígíí t'áadoo bá hádaoht'ínígo nihí dayéełkaahgo ahool'áa doo.

⁷Íídam dine'é t'áadoo dajiinohłáhí, háálá éí nihik'is nilį́. Ííjip dine'é t'áadoo dajiinohłáhí, háálá bikéyah biyi' dé'éyóní danohłį́į́ nít'éé'.

⁸Bitsóóké, doodaii' binálíké danilínígíí táadi ałk'i ná'áshchį́įdi éí Bóhólníihii bich'į' nahadlá biniyé áłah ná'oodleełjį' yah anídaakah doo.

⁹Nihida'ana'í bik'ijį' nídahidoohbáahgo doo yá'ádaashóonii t'áá ałtso bits'ąą ádaa ádahołyą́.

¹⁰Nihitahdóó diné ła' ajiłhoshgo hwíígąsh haanahgo biniinaa doozh diyin da jileehgo, éí níbaal haal' áádóó ch'ízhdoogááł áádóó doo yah anízhdoodáał da,

¹¹nidi kót'ée doo: yaa adeez'ą́ągo tá'ádizdoogis áádóó i'íí'ą́ągo níbaal haal'áhí góne' yah anízhdoodááł.

¹²Nii'oh nídaahkah biniyé nihiníbaal haal'á bits'áhwiiní'ą́ądi bá haz'ą́ągo ádeínóhsin doo.

¹³Nihibee na'abaahii gish bił nidaahjaah doo; éí nii'oh nídaahkahgo bee háádahoyohdzi'go ákóyaa nida'ayohchįįh áádóó bik'éédahoohdzi' doo.

¹⁴Háálá Bóhólníihii nihiDiyin God éí nihiníbaal haal'áhígi nihitahgi hólǫ́, áko yisdánihiinííł áádóó nihi'ana'í nihílák'ee yidii'aah; éí bąą nihiníbaal haal'áagi hodiyin dooleeł, áko doo yá'áshóonii doo ła' nihitahgi yiidoołtséeł da, áádóó doo nihits'ą́ą́' dah hodidooleeł da.

¹⁵Áko naalte' éí yá naal'a'í yits'ą́ą́' yóó'eelwodii nihaa yílwodgo yá naal'a'í doo baa nídadoołtéeł da.

¹⁶Nihił kééhat'į́į doo; nihitahgi nihikin hadaas'áagi łahgo náhodii'aah, t'áá bił yá'áhoot'éhígi kééhat'į́įgo ádadoohłííł; t'áadoo bide ádahwíínóhsiní.

¹⁷Áko Ízrel dine'é bitsi'ké doo ła' ałjiłnii nilį́įgo nihitaagháa da doo índa biye'ké doo ła' diné t'áá bí ahaa nináldeehii danilį́į da doo.

¹⁸Áko ałjiłnii bich'į' nahalyéii, doodaii' diné t'áá bí ahaa nináldeehii bich'į' nahalyéii éí Bóhólníihii nihiDiyin God bihodiyin haz'ą́ąjį' doo bee ádee hadadidoohdzih da, háálá éí t'áá áłah ákó'él'íinii Bóhólníihii nihiDiyin God bił t'óó baa'ih.

¹⁹Ínáóltą'í binahjį' nikwá'ásiní doo béeso ba'díínił da: béeso, doodaii' ch'iyáán, doodaii' t'áá ha'át'íhída éí ínáóltą'í binahjį' doo a'dííléeł da.

²⁰Dé'éyóní éí ínáóltą'í biniyé béeso bada'ayohníiłgo t'áá áko, nidi nihikwá'ásiní éí ínáóltą'í t'áágééd béeso bada'ayohníił doo; ákót'éego Bóhólníihii nihiDiyin God éí baa nidaahkaii t'áá ałtso yik'ijidlíigo kéyah biih wohnéehgo ádíí' ádadoohłííł.

²¹Bóhólníihii nihiDiyin God bich'į' ádee hadadidoodzihgo t'áadoo baa nida'áhodołziidí, háálá Bóhólníihii nihiDiyin God éí ts'ídá t'áádóo nídí ákódaoht'į́į doo nihó'ní, doodago éí ádił nida'ayohsíih doo.

²²Nidi doo ádee hadasoohdzíí'góogo éí doo bee ádił nida'ayohsíih da doo.

²³Bee ádee hadadoohdzí'ígíí hazhó'ó baa ádahołyą́ągo bida'oohłííł; t'áá nihí ádeinohsingo náádahołniihii Bóhólníihii nihiDiyin God bich'į' ádee hadahidoohdzíi'go bee nidahosoo'ánígíí bida'oohłííł.

²⁴Bił kéédahoht'íinii bich'il na'atł'o'ii yíl'áhígi nidahisoohkaigo t'áá nihí danohsinígi ánéelt'e'go dadoohsį́įłgo t'áá áko, nidi nihe'ásaa' doo bii' hééł ádadoohłíił da.

²⁵Bił kéédahoht'íinii bitł'oh naadą́ą́' yíl'áhígi nidahisoohkaigo tł'oh naadą́ą́' bineest'ą' daohnizhgo nihílák'ee hadeezbingo daohnizh; éí daohsą́ągo t'áá áko, nidi bił kéédahoht'íinii bitł'oh naadą́ą́' yíl'áhígíí bee iigéshí bee t'áadoo dahogéshí.