Read Navajo DEUTERONOMY 24 Bible Online

DEUTERONOMY 24 - Navajo bible

DEUTERONOMY 24

¹Diné ła'da hwe'asdzą́ą́ dooleełii nízhdiiłtį́ áádóó bá'dzízyehgo, nít'éé' doo yaa bił hózhǫ́ǫ́góó baa ákozniizį́į'go, háálá doo i'didéehii ła' bił hazhdeel'į́į́'; éí naaltsoos bik'ehgo ałts'á'iit'aashígíí bá hazhdidoolíiłgo áádóó bazhdoołtsosgo haghandóó béézh'doołnih.

²Áko haghandóó dah diiyáádóó bik'ijį' diné náánáła' ye'asdzą́ą́ náádoodleeł.

³Nít'éé' akée'di bahastiin silį́'ígíí náábijoosłxáa'go naaltsoos bik'ehgo ałts'á'iit'aashígíí há haididoolííł áádóó haidoołtsosgo bighandóó t'óó hwéé'doołnih, doodaii' akée'di hahastiin silį́'ígíí be'asdzą́ą́ jílį́į dooleełii daaztsą́ągo

⁴átséédą́ą́' hahastiin nít'é'ígíí bighandóó ch'íhoníł'a'ígíí doo bił ahaa nínáázhdoot'ash da, háálá ákóhát'į́įgo Bóhólníihii bił t'óó baa'ih; ázhdoolchxǫ'dóó bik'ijį'go ákót'é. Áko kéyah bikáá' doo ádił ni'iidzííh ádoohłíił da; jó, éí Bóhólníihii nihiDiyin God nihaidiní'ánígíí ádíí' ádadoohłíiłii át'é.

⁵Diné ła' ániid be'asdzą́ą́ hazlį́į'go doo anaa'góó doogáał da, áádóó doo ha'át'éegoda naanish bee bóhólníihgo óolzin da doo, nidi be'asdzą́ą́ silį́'ígíí yił hóshǫ́ǫ doo biniyé bighangi naagháago t'ááłá'í nídoohah.

⁶Diné ła'da tsédaashjéé', doodaii' tsédaashch'íní doo ąąh nizhdoo'áał da, háálá ákódziidzaii diné yee hináanii ąąh nizh'nílá.

⁷Diné ła' bikwá'ásiní éí Ízrel dine'é ła' hanaalte' biniyé jini'įįhgo, doodaii' naalte' biniyé naalyéhígi át'éego haa nahaniihgo éí azhni'įįhígíí hodi'yoolyééł. Kót'éego nihitahdóó doo yá'áshóonii nahjį' kódaoł'į́į doo.

⁸Naałniih łóód ats'íís yiyáanii naałdzidii bits'ąą ádaa ádahołyą́ągo haleebee baa ákodanoohsįįh, áko Líívai dine'é nááda'iiłniihii éí yee nidanihinitinígíí t'áá ałtso bich'į' bee haasdzíi'ii bik'ehgo ádaa daahsįįhgo bida'oł'į́.

⁹Shą́ą́', Bóhólníihii nihiDiyin God éí wohnéełgo Míriyam yaa honíłnii'ígíí béédaołniih; jó, éí Ííjip kéyahdę́ę́' ch'éénooh'náádóó bik'ijį' ákódzaa.

¹⁰T'áá ha'át'íhída nikwá'ásiní bąąh ninooláago bighan góne' náádidíídlééł biniyé doo yah adíínáał da.

¹¹Nidi t'áá tł'óó'dę́ę́' sínízį́įgo nikwá'ásiní bąąh ni'ííníláhígíí nich'į' ch'éidoodlééł.

¹²Éí diné bahojoobá'ígo ąąh niiníláhígíí doo t'áá niha'ałk'ee siłtsoozgo yidoołkáał da.

¹³Ąąh niiníláhígíí t'áá e'e'ááh bik'eh baa náhíłtsóos doo, áko yee nánítéehgo naahaniih doo; éí Bóhólníihii nihiDiyin God éí t'áá ákogi áhát'íinii át'éego nihaa nitsíkees doo.

¹⁴Adeenáago nihá naal'a'í bahojoobá'ígo índa hojooba' has'áanii nilį́įgo t'áadoo bide ádahwíínóhsiní; éí nihikwá'ásiní nilį́įgo, doodaii' dé'éyóní nilį́įgo nihikéyahgi kin naazhjaa'ígi hoł kééhat'į́įgo doo bide áhodzósin da.

¹⁵T'áadoo e'e'aahí yoosbánígíí bich'į' nidoohłééł, háálá bahojoobá'íii nilį́įgo éí t'áá íiyisí yídin nilį́; doo ákódaoł'į́į́góó Bóhólníihii yíká áníigo nihik'ijį' nilį́įgo sodilzin doo, áko éí bee t'óó ádił nida'ayołzííh.

¹⁶Azhé'é danilíinii bada'áłchíní bitsásk'ehgi doo nidabidi'tseed da doo, doodaii' áłchíní ałdó' bizhé'é bitsásk'ehgi doo nidabidi'tseed da doo. Diné t'áá łah dilt'éhígo t'áá hó bee ádił ni'dziilzíhígíí biniinaa hodi'yoolyééł.

¹⁷Dé'éyóní, doodaii' áłchíní bizhé'é ádaadinii nabik'íyáti'go doo t'áá ádzaagóó bits'ą́ą́' nidoohgis da, áádóó asdzání bąąh áhásdįįdii bi'éé' doo bits'ą́ą́' ąąh nidoołtsos da.

¹⁸Nidi díí béédaołniih: Ííjip kéyahdi naalte' danohłį́į́ nít'éé' áádóó Bóhólníihii nihiDiyin God t'ą́ą́' náánihiisnii'; éí bąą díí nihich'į' bee haasdzíi'ii bida'íínóhsin doo.

¹⁹Nihidáda'ak'ehgóó tł'oh naadą́ą́' dahohgéeshgo, ałch'į' bida'soohtł'ónígíí ła' beisoonahgo, doo ákǫ́ǫ́ bíká nídoohdáał da, nidi dé'éyóní áádóó áłchíní bizhé'é ádaadinii índa sáanii bąąh ádahasdįįdii bá át'ée doo, áko Bóhólníihii nihiDiyin God éí baa nidaahkaígíí t'áá ałtso nihá yik'ijidlíi doo.

²⁰Áádóó áliv tsin naazkaadii bineest'ą' bąąh nidahołhaałgo bikéédę́ę́' t'áadoo bąąh nináádahołhaałí; éí dé'éyóní áádóó áłchíní bizhé'é ádaadinii índa sáanii bąąh ádahasdįįdii bá át'ée doo.

²¹Ch'il na'atł'o'ii deínóhbéego bikéédę́ę́' t'áadoo náádayínóhbéhí; nidahaasdzí'ígíí éí dé'éyóní áádóó áłchíní bizhé'é ádaadinii índa sáanii bąąh ádahasdįįdii bá át'ée doo.

²²Díí béédaołniih: Ííjip kéyahdi naalte' danohłį́į́ nít'éé'; éí bąą díí nihich'į' bee haasdzíi'ii bida'íínóhsin doo.