Read Navajo DEUTERONOMY 25 Bible Online

DEUTERONOMY 25 - Navajo bible

DEUTERONOMY 25

¹Diné ałghazhdit'áahgo, aa dahwiinít'į́įjį' ándahwii'aahii há hasht'éédeidoodlííł biniyé baazhdoo'ashgo, ła' t'áá ákogi át'éego yá hadoodzih, índa ła'ígíí éí ba'át'e' biniinaa yá nihodoo'ááł.

²Áko kót'ée doo: diné doo yá'áshóonii náhodí'nóoltsxis bą́ą́h jílį́įgo, éí ánihwii'aahii hodínóołtéełgo ádąąh dahodzist'ánígíí bik'ehgo binááł díkwíidi shį́į́ náhodi'dooltxis.

³Dízdiindi nídidooltsxisgo t'áá ákódí doo, áádóó biláahgo éí dooda; nídi'dooltsxisgo bee haz'ánígíí biláahgo bił dziizdeestsxasgo éí hak'is t'áadoo nilínígóó ájiilaa doo.

⁴Béégashii éí tł'oh naadą́ą́' haił'éesgo t'áadoo bíchį́į́h bąąh nida'sooł'ání.

⁵Diné t'áá ła' háá'áazhgo t'ááłáhígóó kééhat'į́įgo, nít'éé' ła' daaztsą́ągo áádóó ba'áłchíní t'áadoo hazlį́į́'góó, hwe'asdzą́ą́ nít'é'ígíí doo hak'éí nilíinii doo yił ahaa doot'ash da, nidi bahastiin yę́ę bitsásk'ehgi bik'is be'asdzą́ą́ náájídlį́į doo biniyé baa nínááhodi'dooltééł índa ahastiin yę́ę bik'is hwee ádíhólníihgo ha'áłchíní hodooleeł.

⁶Áádóó kót'ée doo: alą́ąjį' há yizhchínígíí hak'is ádinígíí bízhi' bee yízhdóozhiił, áko éí Ízrel dine'é bitahdóó bízhi' doo nahjį' kódoolníił da.

⁷Áko éí diné doo t'áá k'ad bik'is yę́ę be'asdzą́ą́ yá'ázyehgóó éí asdzání kééhojit'ínígi yah a'atiinjį' hastóí aląąjį' naazíinii bich'į' nizhdoogáałgo ábizhdidooniił, Shahastiin yę́ę bik'is éí t'áá bí bik'is bízhi' Ízrel dine'é bitahgi náás yit'ih dooígíí doo yinízin da. Shahastiin yę́ę bik'is jílį́įgo shee ádíhojólníih dooígíí doo jinízin da.

⁸Áko hakin haal'áádóó hastóí aląąjį' naazíinii hágo dahodidooniiłgo hach'į' yádadoołtih, nidi, Doo she'asdzą́ą́ jidooleeł da, níigo yee yistee'go

⁹hak'is yę́ę be'asdzą́ą́ nít'é'ígíí hach'į' nidoogáałgo éí hastóí aląąjį' naazíinii binááł hakee' haididoo'áałgo hanii'jį' yik'ídidoozhahgo ádidooniił, Díí diné bik'is yę́ę bitsásk'ehgi doo t'áá k'ad áłchíní náás oochííł áyiilaaígíí kóhodi'doolnííł.

¹⁰Áko Ízrel dine' é bitahgi, Bikee' baa diilyáii ba'áłchíní, bee ho'dójíi doo.

¹¹Diné nidilt'éego ahigą́ągo, nít'éé' ła' be'asdzą́ą́ bíká adoolwoł biniyé áajį' adoolchidgo, bahastiin bits'ą́ą́' atííł'íinii yaa azhjihgo

¹²éí asdzání hála' k'ídoogish; t'áadoo haa a'ááh danohsingo dahonół'íní.

¹³Bee dah ní'diidlohí ał'ąą át'éii t'áadoo nihidah na'ayizii bii' nidasoołnilí; éí nitsaaígíí índa áłts'íísígíí t'áadoo chodaoł'íní.

¹⁴Nihighan góne' bee ída'neel'ąąhí ał'ąą át'éii t'áadoo nisoołnilí; éí nitsaaígíí índa áłts'íísígíí t'áadoo chodaoł'íní.

¹⁵Nidi bee dah ní'diidlohí t'áá ákogi át'éii áádóó bee ída'neel'ąąhí t'áá ákogi át'éii hazhó'ó nidasoołnil, áko Bóhólníihii nihiDiyin God kéyah nihaidiní'ánígíí bikáá' as'ahgóó anihídayiiłkaah doo.

¹⁶T'áá ałtso kódaat'éii yaa nidaakaii índa doo t'áá ákogi ádaat'íinii éí Bóhólníihii nihiDiyin God doo bíłdin da.

¹⁷Ííjip kéyahdóó ch'ínoonáago wohnéełgo Ámalek dine'é doo ákǫ́ǫ́ ádanihííł'įįdígíí béédaałniih.

¹⁸Shą́ą́', aadę́ę́' wohnéełgo nihaa hideeskaigo nihikéédę́ę́' íínáago éí doo dahadziilii nihikéédę́ę́' joonéłígíí nidahastseed; t'áá éí nídazdínéeskaii áádóó ch'ééh dazdeeskaii ákódahóół'įįd, áko Diyin God doo yik'ee bił daayée' da.

¹⁹Áko kót'ée doo: éí Bóhólníihii nihiDiyin God éí nihi'ana'í nihinás'áhígíí bits'ąą háá'áyį́į́h nihaidiní'ą́ągo kéyah Bóhólníihii nihiDiyin God nihaidiní'ánígíí ádíí' ádadoohłíiłgi kéédahoht'į́įgo, Ámalek dine'é danilíinii yádiłhił biyaagi doo béédahodoonih da biniyé ałtso nidadoołtsxił. Éí t'ááká baa dayoohnééh lágo.