Read Navajo DEUTERONOMY 27 Bible Online

DEUTERONOMY 27 - Navajo bible

DEUTERONOMY 27

¹Mózes éí Ízrel dine'é hastóí aląąjį' naazíinii yił naazį́įgo diné yich'į' hadaasdzíi'go ádaaní, Díí jį́ bik'eh ó'oo'níiłii bee nihich'į' hadeiidziihígíí t'áá ałtso bik'eh dahonoł'į́į doo.

²Áko Bóhólníihii nihiDiyin God éí kéyah nihaidiní'ánígíí bich'į' Jórdan tooh ha'naa ninooná bijį́ ákwii tsé dantsaii adahidoohtsih áádóó dadoohdlish.

³Éí bikáa'gi saad t'áá ałtso díí bee haz'áanii át'éego bee ak'e'ashchį́įgo tsé'naa ninoonáago ádadoohłííł, áko Bóhólníihii nihiDiyin God éí kéyah nihaidiní'ánígíí bikáa'gi abe' áádóó tsés'ná bitł'izh bee áda'azįįd; éí danihizhé'é yę́ę biDiyin God Bóhólníihii éí kéyah yee nihá nihoní'áanii át'é.

⁴Éí bąą ákót'ée doo: Jórdan tooh ha'naa ninoonáago éí tsé adahidoohtsihígíí Dził Ííbalgi díí jį́ nihich'į' bee haasdziih, áádóó éí tsé dadoohdlish.

⁵Áadi Bóhólníihii nihiDiyin God bá bikáá' náá'iiniihí tsé bee ádadoohłííł; béésh bee na'anishí doo bee bindadoołnish da.

⁶Bóhólníihii nihiDiyin God bá bikáá' náá'iiniihí tsé doo hasht'e'nibí'ílne'ii bee ádadoohłííł, áádóó Bóhólníihii nihiDiyin God bich'į' didlidgo nááhániihii náádahidoołnih.

⁷Áádóó áadi hózhǫ́ǫ́jí nááhániihii náádahidoołnihgo da'doohsį́į́ł, índa Bóhólníihii nihiDiyin God binááł nihił nidahoozhǫǫh doo.

⁸Áko saad t'áá ałtso díí bee haz'áanii át'éego t'áá bééhózínígo éí tsé bikáa'gi bee ak'e'ashchį́įgo ádadoohłííł.

⁹Áádóó Mózes índa Líívai dine'é nááda'iiłniihii danilíinii éí Ízrel dine'é t'áá ałtso yich'į' hadaasdzíi'go ádaaní, Ízrel dine'é nohłíinii, ádahodoołzéehgo da'íísółts'ą́ą́'. Díí jį́ Bóhólníihii nihiDiyin God bidine'é dasoolį́į́'.

¹⁰Éí bąą Bóhólníihii nihiDiyin God áníinii bik'eh dahonoł'į́įgo bibik'eh ó'oo'níiłii índa yee nihwiiz'áanii bik'eh ádanoht'ée doo; éí díí jį́ nihich'į' bee haasdzíí'.

¹¹Áádóó t'áá éí bijį́ Mózes éí hazhó'ó diné áyidííniidgo ání,

¹²Díí dine'é éí Dził Gérazim bighą́ą́'dóó diné yik'ideizhdoodliił yiniyé deidoozįįł: Jórdan tooh ha'naa ninoonáago Símiyan áádóó Líívai áádóó Júdah áádóó Ísakar áádóó Jóseph índa Bénjamin áadi deidoozįįł.

¹³Áko díí dine'é éí Dził Ííbal bighą́ą́'dóó hóyée'go diné yá hadahadziih yiniyé deidoozįįł: Rúben áádóó Géed áádóó Ásher áádóó Zébyulan áádóó Dan índa Náftalai áadi deidoozįįł.

¹⁴Áádóó Líívai dine'é yádaałti'go Ízrel dine'é hastóí danilíinii t'áá ałtso ayóó íits'a'go yich'į' hadadoodzih:

¹⁵Díí diné hóyée'go bá ha'doodzih: éí t'áadoo le'é naask'ęę'go, doodaii' doolyį́į'go e'elyaii ájiilaii éí Bóhólníihii bił t'óó baa'ihii át'éego da'iichįįhii yinaashnishii béé'jiidlaii nahont'ingi niiníláii ákóbidi'doo'niił: áko diné t'áá ałtso ádadidooniił, T'áá ákót'ée doo.

¹⁶T'áá háiida hazhé'é, doodaii' hamá doo hoł nilíinii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

¹⁷T'áá háiida bił kééhojit'íinii bikéyah bináhásdzo bee bééhózinii nahjį' kójiilaii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

¹⁸T'áá háiida éí diné doo oo'íinii yóó'adzíílóozii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

¹⁹T'áá háiida éí dé'éyóní, doodaii' áłchíní bizhé'é ádaadinii, doodaii' sáanii bąąh ádahasdįįdii bá bee nihodiit'aahii bits'ą́ą́' dzidiiłgęęzii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

²⁰T'áá háiida hazhé'é be'asdzą́ą́ bił jineezhtéezhii hóyée'go há ha'doodzih, háálá hazhé'é baazhdíílá: áko diné t'áá ałtso ádadidooniił, T'áá ákót'ée doo.

²¹T'áá háiida éí naaldlooshii ał'ąą át'éii ła' dzizk'éedii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

²²T'áá háiida hazhé'é bitsi', doodaii' hamá bich'é'é bił jineezhtéezhii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

²³T'áá háiida hwe'asdzą́ą́ bimá bił jineezhtéezhii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

²⁴T'áá háiida bił kééhojit'íinii t'áá nahont'inee dziisxíinii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

²⁵T'áá háiida hach'į' ni'ílyáago diné t'áadoo bee bik'íhót'ahíii dziisxíinii hóyée'go há ha'doodzih: áko diné t'áá ałtso ádadidooniił, T'áá ákót'ée doo.

²⁶T'áá háiida díí bee haz'áanii t'áá aaníígóó áníinii doo bik'eh ájít'éégóó éí hóyée'go há ha'doodzih: áko diné t'áá ałtso ádadidooniił, T'áá ákót'ée doo.